മത നിഷേധിയാവാതിരിക്കാന്‍

മതത്തെ വ്യാജമാക്കുന്നവന്‍ ആരെന്ന് നീ കണ്ടുവോ? അനാഥക്കുട്ടിയെ തള്ളിക്കളയുന്നവനത്രെ അത്‌. പാവപ്പെട്ടവന്‍റെ ഭക്ഷണത്തിന്‍റെ കാര്യത്തില്‍ പ്രോത്സാഹനം നടത്താതിരിക്കുകയും ചെയ്യുന്നവന്‍.[അദ്ധ്യായം 107 മാഊന്‍ 1-3]

മതവിശ്വാസം മുറുകെപിടിക്കുന്നവരാണ് കൂടുതല്‍ പേരും. ചില ഭാവങ്ങളും ആചാരാനുഷ്ടാനങ്ങളും മതവിശ്വാസികളുടെ ലക്ഷണമായി കരുതപ്പെടുന്നു. പലരുടെയും സംസാരത്തിലും പെരുമാറ്റത്തിലും മതത്തിന്‍റെ മേല്‍വിലാസം പ്രകടമാകാറുണ്ട്. ബാഹ്യമായ ആരാധനാചടങ്ങുകള്‍ നിര്‍വഹിക്കാന്‍ വിശ്വാസികള്‍ ശ്രദ്ധിക്കുന്നുണ്ട്. നോമ്പ്, നമസ്കാരം, സകാത്ത്, ഹജ്ജ് തുടങ്ങിയ അടിസ്ഥാന ആരാധനാകര്‍മ്മങ്ങള്‍ നിര്‍വഹിക്കാന്‍ ജാഗ്രത കാണിക്കുന്ന വിശ്വാസികള്‍ ഏറെയാണ്‌. എന്നാല്‍ സാമൂഹ്യപ്രതിബദ്ധതയും പരക്ഷേമതല്പരയും പ്രകടിപ്പിക്കുന്നേടത്ത് അത്ര ജാഗ്രത കാണാറില്ല. ഒരാളുടെ മതവിശ്വാസം പൂര്‍ണമാകുന്നത് സമസ്രിഷ്ടികളോടുള്ള ബാധ്യതകള്‍ കൂടി നിര്‍വഹിക്കുമ്പോള്‍ മാത്രമാണ്.

സമൂഹത്തില്‍ ഒട്ടേറെ വൈജാത്യങ്ങളും വ്യത്യസ്തതകളും കാണാം. സമ്പന്നരും ദരിദ്രനും ശക്തനും ദുര്‍ബലനും ഈ ഭൂമിയിലെ ഒരു യാഥാര്‍ത്യമാണ്. അനാഥകള്‍, വൈകല്യം സംഭവിച്ചവര്‍, വൃദ്ധര്‍, കുഞ്ഞുങ്ങള്‍ തുടങ്ങി പ്രത്യേക പരിഗണനയര്‍ഹിക്കുന്ന ധാരാളംപേര്‍ അടങ്ങുന്നതാണ് സമൂഹം. ഇവരെ പരിഗണിക്കാതെയോ കൈപിടിച്ചുയര്‍ത്താതെയോ സാമൂഹ്യപുരോഗതി യാഥാര്‍ത്യമാവില്ല. ഇത്തരം ദുര്‍ബലവിഭാഗങ്ങളോട് ദയയും സഹാനുഭൂതിയും പ്രകടിപ്പിക്കുക എന്നത് വിശ്വാസത്തിലെ പ്രധാന ഭാഗമത്രേ.

മതത്തെ തള്ളിപ്പറയുക എന്നത് കേവലം ചില വിശ്വാസാചാരങ്ങളെ നിരാകരിക്കല്‍ മാത്രമല്ല. ദുരിതബാധിതരെ കണ്ടില്ലെന്നു നടിക്കുന്നതും അശരണരായവര്‍ക്ക് അത്താണിയാവാതിരിക്കുന്നതും നിഷേധത്തിന്റെ ഭാഗമാണ്. ദീന്‍ എന്നതിന് മതം, പരലോകം അഥവാ പ്രതിഫലദിനം എന്നീ അര്‍ഥങ്ങള്‍ നല്കപ്പെടാം. പ്രയാസപ്പെടുന്നവരെ കാണാതെ ജീവിക്കുന്നത് പരലോക നിഷേധത്തിന്റെ ഭാഗമായും കരുതാം. ആരാധനാകര്‍മ്മങ്ങള്‍ അര്‍ത്ഥവത്താവണമെങ്കില്‍ അവയുടെ ചൈതന്യം ജീവിതത്തില്‍ നിഴലിക്കണം. സാമ്പത്തികബാധ്യത ഒട്ടുമില്ലാത്ത ആരാധനകള്‍ക്ക് പലരും സന്നദ്ധരാണ്. എന്നാല്‍ സ്വന്തം ആവശ്യം മാറ്റിവച്ചും ചിലപ്പോള്‍ മറ്റുള്ളവരെ സഹായിക്കേണ്ട ഘട്ടങ്ങളില്‍ പലരും പിറകിലായിരിക്കും. സാധുക്കളുടെ അവകാശമായ സകാത്തും സദഖയും കൃത്യവും ക്രിയാത്മകവുമായി നല്‍കുന്നവര്‍ കുറവാണ്. സ്വയം ദാരിദ്ര്യത്തിന്റെ അവശതകള്‍ അനുഭവിച്ചപ്പോഴും തങ്ങളേക്കാള്‍ പ്രയാസപ്പെടുന്ന മറ്റുള്ളവരുടെ പ്രശ്നങ്ങള്‍ക്ക് പരിഹാരം കാണാന്‍ സ്വഹാബത്തിനു കഴിഞ്ഞു. അതുകൊണ്ടാണ് അല്ലാഹുവിന്‍റെ പ്രീതി അവര്‍ക്ക് നേടാന്‍ കഴിഞ്ഞത്. കാറ്റിനെക്കാള്‍ വേഗത്തില്‍ ദാനധര്‍മങ്ങള്‍ നല്‍കിയ പ്രവാചകനും മുഴുവന്‍ സ്വത്തും പ്രവാചകനെ ഏല്‍പ്പിക്കാന്‍ സന്നദ്ധരായ അനുചരന്മാരും വലിയ സമ്പന്നരായിരുന്നില്ല.

അനാഥകളെ അവഗണിക്കുന്നതും അവരോടു ക്രൂരമായി പെരുമാറുന്നതും അവരുടെ സ്വത്ത് അന്യായമായി പിടിച്ചുവെക്കുന്നതും പരലോക നിഷേധികളുടെയും മതനിഷേധികളുടെയും ലക്ഷണമാണ്. അനാഥകളെ സംരക്ഷിക്കുന്നു എന്ന് പറഞ്ഞു അവരെ ചൂഷണം ചെയ്യുന്നവരും ഈ ഗണത്തില്‍പെടും.

അനാഥകളെപ്പോലെത്തന്നെ സഹായത്തിനര്ഹരായവരാണ് അഗതികള്‍. ദാരിദ്രാവസ്ഥ പുറത്ത് കാണിക്കുന്നവരും ആത്മാഭിമാനം നിമിത്തം തങ്ങളുടെ ദുരവസ്ഥ പുറമേ പ്രകടിപ്പിക്കാത്തവരും അഗതികളിലുണ്ടാവും. ഇവരെ തിരിച്ചറിഞ്ഞവര്‍ അവരെ സഹായിച്ചാല്‍ മാത്രം പോര. സഹായിക്കാന്‍ കഴിയുന്നവരുടെ ശ്രദ്ധയിലേക്ക് ഇവരെ കൊണ്ട് വരാനും അവര്‍ ശ്രമിക്കേണ്ടതുണ്ട്. അവരെ സഹായിക്കുന്നതിനാവശ്യമായ എല്ലാ പ്രേരണകളും അവനില്‍ നിന്നുണ്ടാവണം. അതിനു വിരുദ്ധമായി അവരെ നിരുല്‍സാഹപ്പെടുത്തുന്ന സമീപനം സ്വീകരിക്കുന്നവന്‍ മതനിഷേധിയും പരലോകവിചാരണയെ നിരാകരിക്കുന്നവനുമായിത്തീരും.

by അബ്ദു സലഫി @ പുടവ കുടുംബ മാസിക

ആളെ അളക്കുന്നതിന് മുമ്പ്

വസ്തുക്കളെ താരതമ്യം ചെയ്തു മൂല്യനിര്‍ണ്ണയം നടത്താന്‍ മനുഷ്യന്‍ ശ്രമിക്കാറുണ്ട്. വ്യക്തികളെ പരസ്പരം താരതമ്യം ചെയ്യലും അതില്‍ അഭിപ്രായം പറയലും അവന്‍റെ സഹജവാസനകളില്‍ പെട്ടതാകുന്നു. എല്ലാം ബാഹ്യമായ കാഴ്ചപ്പാടിലൂടെ ആയിരിക്കും എന്നതാണ് വസ്തുത. ഇങ്ങനെ നടക്കുന്ന വിലയിരുത്തലുകള്‍ ചിലപ്പോഴൊക്കെ ശരിയാകുമെങ്കിലും മിക്കപ്പോഴും അങ്ങനെ ആയിരിക്കണമെന്നില്ല. മൂല്യനിര്‍ണയത്തിന്റെ മാനദണ്ഡം മാറുന്നതിനനുസരിച്ചു സ്വരൂപിക്കപ്പെടുന്ന അഭിപ്രായങ്ങള്‍ക്ക് മാറ്റം വരാം.

സഹലുബ്നു സഅ'ദിസ്സാഇ ദിയ്യ് (റ)ല്‍ നിന്നും ബുഖാരി ഉദ്ധരിക്കുന്ന ഒരു തിരുവചനം ഇപ്രകാരമാകുന്നു. അദ്ദേഹം പറഞ്ഞു : ഒരാള്‍ നബി (സ)യുടെ അടുത്തൂടെ നടന്നു പോയി. അപ്പോള്‍ തനിക്കരികിലിരിക്കുന്ന ഒരാളോട് നബി (സ) ചോദിച്ചു : "ഇയാളെക്കുറിച്ച് നിന്‍റെ അഭിപ്രായമെന്താണ്?" അദ്ദേഹം പറഞ്ഞു : "വളരെ ശ്രേഷ്ടനായ ഒരാളാകുന്നു ഇയാള്‍. അല്ലാഹുവാണ് സത്യം, വല്ല വിവാഹാലോചനയും വന്നാല്‍ എന്തുകൊണ്ടും അയാള്‍ അതിനര്ഹനാണ് . ഇദ്ദേഹം വല്ല ശുപാര്‍ശയും ചെയ്‌താല്‍ അത് സ്വീകരിക്കപ്പെടാതിരിക്കില്ല. അത്രയ്ക്ക് മാന്യനാണദ്ദേഹം". അപ്പോള്‍ റസൂല്‍ (സ) നിശബ്ദനായി. ഒന്നും പറഞ്ഞില്ല.

അല്പം കഴിഞ്ഞപ്പോള്‍ മറ്റൊരാള്‍ ആ വഴി വന്നു. പ്രവാചകന്‍ (സ) ചോദിച്ചു : "ഇയാളെക്കുറിച്ച് താങ്കളുടെ അഭിപ്രായമെന്താണ്?" അദ്ദേഹം പറഞ്ഞു : ഇയാളൊരു ദരിദ്രനായ മുസ്ലിമാണ്. വിവാഹന്വേഷണം നടത്തിയാല്‍ ആരും വിവാഹം കഴിച്ചുകൊടുക്കില്ല. വല്ലതും ശുപാര്‍ശ ചെയ്‌താല്‍ അതൊട്ടും സ്വീകരിക്കപ്പെടുകയില്ല. വല്ലതുമിദ്ദേഹം പറഞ്ഞാല്‍ ആരും കേള്‍ക്കുക പോലുമില്ല".

അപ്പോള്‍ റസൂല്‍ (സ) പറഞ്ഞു : "ഇദ്ദേഹം ഭൂമിയിലെ സകലതിനെക്കാളും ശ്രേഷ്ഠനായവനാകുന്നു".

സഹോദരങ്ങളെ, നാം സദാ ഓര്‍ക്കുകയും ചിന്തിക്കുകയും ചെയ്യേണ്ട ഒരു നബി വചനമാണിത്. എന്തെല്ലാം അഭിപ്രായങ്ങളാണ് നമുക്കുള്ളത്? ഒരാളെ പുകഴ്ത്താനും ഇകഴ്ത്താനുമൊക്കെ ക്ഷണനേരംകൊണ്ട് നമുക്ക് സാധിക്കും. സത്യത്തില്‍ ഒരാളെക്കുറിച്ച് നമുക്കെന്തറിയാം? ഒന്നുമറിയില്ല എന്നതല്ല വസ്തുതയെങ്കിലും എല്ലാം അറിയും എന്ന നിലപാടില്‍ അഭിപ്രായം പറയല്‍, അതില്‍ ഉറച്ചുനില്‍ക്കല്‍, അത് പ്രചരിപ്പിക്കല്‍ ഇതൊക്കെയും എത്ര അഭികാമ്യമല്ല.

വ്യക്തികള്‍ നമുക്ക് മുമ്പില്‍ വിലയിരുത്തപ്പെടുകയാണ്. അളവുകോല്‍ നഷ്ടപ്പെട്ട നമുക്ക് എങ്ങനെയാണ് ആളുകളെ വിലയിരുത്താനാവുക? സ്വയം വിലയിരുത്താന്‍ പോലും നാം അശക്തരായിരിക്കെ എന്തിനു നാം....

അല്ലാഹുവേ, നീ ഞങ്ങള്‍ക്ക് നന്മ നല്‍കേണമേ, ഞങ്ങളുടെ പാളിച്ചകളെ നീ പൊറുത്തു തരേണമേ. [ആമീന്‍]

by സഈദ് ഫാറൂഖി @ ഹദീസ് ചിന്തകള്‍ from യുവത ബുക്സ്

തസ്‌ബീഹ്‌ നമസ്‌കാരം

തസ്‌ബീഹ്‌ നമസ്‌കാരം ബിദ്‌അത്താണ്‌. അതിന്‌ പ്രവാചകചര്യയുടെ പിന്‍ബലമില്ല. തസ്‌ബീഹ്‌ നമസ്‌കാരത്തെക്കുറിച്ച ഹദീസുകള്‍ താഴെ ഉദ്ധരിക്കാം:

1). അബൂറാഫിഇ(റ) പറയുന്നു: ``റസൂല്‍(സ) അബ്ബാസി(റ)നോട്‌ പറഞ്ഞു: പിതൃവ്യാ, ഞാന്‍ അങ്ങേക്ക്‌ നല്‌കുന്നില്ലയോ, ഞാന്‍ ഉപകാരം ചെയ്യുന്നില്ലയോ, ഞാന്‍ ബന്ധം പുലര്‍ത്തുന്നില്ലയോ? അബ്ബാസ്‌(റ)പറഞ്ഞു: അതെ, അല്ലാഹുവിന്റെ ദൂതരേ. നബി(സ) പറഞ്ഞു: അതിനാല്‍ താങ്കള്‍ നാല്‌ റക്‌അത്ത്‌ നമസ്‌കരിക്കുക. ഓരോ റക്‌അത്തിലും ഫാതിഹയും ഒരു സൂറത്തും ഓതണം. ഓത്ത്‌ കഴിഞ്ഞാല്‍ താങ്കള്‍ സുബ്‌ഹാനല്ലാഹി വല്‍ഹംദുലില്ലാഹി വലാഇലാഹ ഇല്ലല്ലാഹു വല്ലാഹു അക്‌ബര്‍ എന്ന്‌ റുകൂഅ്‌ ചെയ്യുന്നതിന്‌ മുമ്പായി പതിനഞ്ചു പ്രാവശ്യം പറയുക. പിന്നെ റുകൂഅ്‌ ചെയ്യുകയും പത്ത്‌ പ്രാവശ്യം ഇതു ചൊല്ലുകയും ചെയ്യുക. പിന്നെ സുജൂദ്‌ ചെയ്‌തു പത്ത്‌ പ്രാവശ്യം ചൊല്ലുക. താങ്കള്‍ ഖിയാമിലേക്ക്‌ വരുന്നതിന്‌ മുമ്പായി. അങ്ങനെ ഓരോ റക്‌അത്തിലും എഴുപത്തിയഞ്ച്‌ എണ്ണം വീതം. അത്‌ നാല്‌ റക്‌അത്തില്‍ മുന്നൂറ്‌ എണ്ണമായിരിക്കും. അപ്പോള്‍ നിന്റെ പാപങ്ങള്‍ മണല്‍ പോലെയുണ്ടെങ്കിലും അല്ലാഹു നിനക്ക്‌ പൊറുത്തുതരും. അബ്ബാസ്‌(റ) ചോദിച്ചു: അല്ലാഹുവിന്റെ റസൂലേ, ഓരോ ദിവസവും ഇത്‌ ചെയ്യാന്‍ ഒരാള്‍ക്ക്‌ സാധിച്ചില്ലെങ്കില്‍ എന്ത്‌ ചെയ്യണം? നബി(സ) പറഞ്ഞു: താങ്കള്‍ വെള്ളിയാഴ്‌ച ദിവസം ചൊല്ലുക. അതിന്‌ താങ്കള്‍ക്ക്‌ സാധ്യമല്ലെങ്കില്‍ മാസത്തിലൊരിക്കല്‍. കൊല്ലത്തിലൊരിക്കലെങ്കിലും ചൊല്ലുക എന്ന്‌ വരെ നബി(സ) പറഞ്ഞു.'' (തിര്‍മിദി, ഇബ്‌നുമാജ)

2). അനസ്‌(റ) പറയുന്നു: ``ഉമ്മുസുലൈം(റ) നബി(സ)യെ സമീപിച്ചുകൊണ്ട്‌ പറഞ്ഞു: എനിക്ക്‌ നമസ്‌കാരത്തില്‍ പറയാന്‍ ചില കലിമതുകള്‍ പഠിപ്പിച്ചുതന്നാലും. നബി(സ) പറഞ്ഞു: പത്തു പ്രാവശ്യം അല്ലാഹു അക്‌ബര്‍ എന്ന്‌ പറയുക, പത്ത്‌ പ്രാവശ്യം സ്വുബ്‌ഹാനല്ലാഹ്‌ എന്നു പറയുക, പത്ത്‌ പ്രാവശ്യം അല്‍ഹംദുലില്ലാഹ്‌ എന്നു പറയുക. ശേഷം നീ ഉദ്ദേശിച്ചത്‌ ചോദിക്കുക. അവന്‍ നിനക്ക്‌ ഉത്തരം നല്‌കും.'' (തിര്‍മിദി)

3). ഇബ്‌നു അബ്ബാസ്‌(റ) പറയുന്നു: ``നബി(സ) അബ്ബാസിനോടു പറഞ്ഞു: അബ്ബാസ്‌! പിതൃവ്യാ! ഞാന്‍ താങ്കള്‍ക്ക്‌ നല്‌കുന്നില്ലയോ, ഞാന്‍ താങ്കള്‍ക്ക്‌ വേണ്ടത്‌ തരുന്നില്ലയോ? ഞാന്‍ താങ്കള്‍ക്ക്‌ ദാനം നല്‌കുന്നില്ലയോ? ഞാന്‍ താങ്കളോട്‌ കുടുംബബന്ധം ചേര്‍ക്കുന്നില്ലയോ? പത്ത്‌ കാര്യങ്ങള്‍ താങ്കള്‍ ചെയ്യുകയാണെങ്കില്‍ അല്ലാഹു താങ്കള്‍ക്ക്‌ താങ്കളുടെ ദോഷങ്ങള്‍, അതിന്റെ തുടക്കവും ഒടുക്കവും പുതുതായി മനപ്പൂര്‍വം ചെയ്‌തതും പിഴച്ചുപോയതും ചെറുതും വലുതും രഹസ്യമായതും പരസ്യമായതും എല്ലാം പൊറുത്തു തന്നിരിക്കുന്നു. പത്ത്‌ കാര്യങ്ങള്‍: താങ്കള്‍ നാല്‌ റക്‌അത്ത്‌ നമസ്‌കരിക്കുക. ഓരോ റക്‌അത്തിലും ഫാതിഹയും സൂറത്തും ഓതുക. ആദ്യ റക്‌അത്തില്‍ ഫാതിഹയില്‍ നിന്ന്‌ വിരമിച്ചാല്‍ ഖിയാമില്‍ തന്നെയിരിക്കെ സുബ്‌ഹാനല്ലാഹി വല്‍ഹംദുലില്ലാഹി വലാഇലാഹ ഇല്ലല്ലാഹു അല്ലാഹു അക്‌ബര്‍ എന്ന്‌ പതിനഞ്ച്‌ പ്രാവശ്യം ചൊല്ലുക. പിന്നെ റുകൂഅ്‌ ചെയ്യുകയും റുകൂഇല്‍ പത്ത്‌ പ്രാവശ്യം ഇത്‌ ചൊല്ലുകയും ചെയ്യുക. പിന്നെ റുകൂഇല്‍ നിന്ന്‌ തലയുയര്‍ത്തി പത്ത്‌ പ്രാവശ്യം ചൊല്ലുക. പിന്നെ സുജൂദില്‍ പ്രവേശിക്കുക. സുജൂദില്‍ പത്ത്‌ പ്രാവശ്യം ചൊല്ലുക. അപ്പോള്‍ ഓരോ റക്‌അത്തിലും എഴുപത്തിയഞ്ച്‌ വീതമായി. അങ്ങനെ താങ്കള്‍ നാല്‌ റക്‌അത്തിലും ചൊല്ലുക. എല്ലാ ദിവസവും ഒരു പ്രാവശ്യം താങ്കള്‍ അങ്ങനെ നമസ്‌കരിക്കാനാവുമെങ്കില്‍ ചെയ്‌തുകൊള്ളുക. അങ്ങനെ ചെയ്യുന്നില്ലെങ്കില്‍ ഓരോ വെള്ളിയാഴ്‌ചയും ചെയ്യുക. അതിനു സാധ്യമല്ലെങ്കില്‍ മാസത്തിലൊരിക്കല്‍. അതുമല്ലെങ്കില്‍ വര്‍ഷത്തിലൊരിക്കല്‍. അതുമല്ലെങ്കില്‍ നിന്റെ ആയുഷ്‌കാലത്ത്‌ ഒരിക്കലെങ്കിലും ചെയ്യുക.'' (അബൂദാവൂദ്‌, ഇബ്‌നുമാജ)

4). അബുല്‍ ജാസാഅ്‌(റ) പറയുന്നു: സ്വഹാബിയായ ഒരാള്‍ എന്നോട്‌ പറഞ്ഞു: ഒരു ദിവസം പ്രവാചകന്‍ എന്നോട്‌ പറഞ്ഞു: നാളെ നീ എന്റെയടുക്കല്‍ വരിക. നിനക്ക്‌ ഞാന്‍.... നല്‌കാം. പ്രവാചകന്‍ എനിക്ക്‌ വല്ല ദാനവും നല്‌കുമെന്ന്‌ ഞാന്‍ വിചാരിച്ചു. പിന്നീട്‌ പ്രവാചകന്‍ പറഞ്ഞു: രാത്രിയായാല്‍ നീ നാല്‌ റക്‌അത്ത്‌ നമസ്‌കരിക്കുക. പിന്നീട്‌ പ്രവാചകന്‍ പറഞ്ഞു: ശേഷം നീ രണ്ടാം സുജൂദില്‍ നിന്ന്‌ എഴുന്നേറ്റ്‌ ഇരിക്കുക (എഴുന്നേറ്റ്‌ നില്‌ക്കരുത്‌). അങ്ങനെ പത്ത്‌ തവണ വീതം തസ്‌ബീഹും തഹ്‌മീദും തക്‌ബീറും തഹ്‌ലീലും ചൊല്ലുക. അതുപോലെ നാല്‌ റക്‌അത്തിലും തുടരുക. പിന്നീട്‌ പ്രവാചകന്‍ പറഞ്ഞു: ഭൂമിയില്‍ ഏറ്റവും വലിയ ദോഷി നീയാണെങ്കിലും ഈ നമസ്‌കാരം കാരണം അതെല്ലാം നിനക്ക്‌ പൊറുക്കപ്പെട്ടു. ഞാന്‍ ചോദിച്ചു: ആ സമയം എനിക്കത്‌ നിര്‍വഹിക്കാന്‍ സാധിച്ചില്ലെങ്കിലോ? നബി(സ) പറഞ്ഞു: എങ്കില്‍ നീ രാത്രിയിലും പകലും അത്‌ നിര്‍വഹിക്കുക. മറ്റൊരു നിവേദനത്തില്‍ ഇപ്രകാരം നബി(സ) പറഞ്ഞതു ജഅ്‌ഫറി(റ)നോടാണ്‌.'' (അബൂദാവൂദ്‌)

5). അബ്‌ദുല്ലാഹിബ്‌നുല്‍ മുബാറക്‌ തസ്‌ബീഹ്‌ നമസ്‌കാരത്തെ സംബന്ധിച്ചു പറഞ്ഞു: ``നീ തക്‌ബീര്‍ ചൊല്ലുക. ശേഷം പറയുക: സുബ്‌ഹാനകല്ലാഹുമ്മ വബിഹംദിക തബറാകഇസ്‌മുക. വതആലാജദുക. വലാഇലാഹു ഗൈറുക. ശേഷം പതിനഞ്ച്‌ പ്രാവശ്യം സുബ്‌ഹാനല്ലാഹി വല്‍ഹംദുലില്ലാഹി വലാഇലാഹ ഇല്ലല്ലാഹു വല്ലാഹുഅക്‌ബര്‍. ശേഷം അഊദു ചൊല്ലി ബിസ്‌മി ഓതുക. ശേഷം ഫാതിഹയും ഒരു സൂറത്തും ഓതുക. ശേഷം പത്തു പ്രാവശ്യം ചൊല്ലുക. ശേഷം റുകൂഅ്‌ ചെയ്യുക.... അങ്ങനെ 75 പ്രാവശ്യം ഓരോ റക്‌ത്തിലും ചൊല്ലുക. ഓരോ റക്‌അത്തും പതിനഞ്ച്‌ പ്രാവശ്യം ചൊല്ലിക്കൊണ്ട്‌ ആരംഭിക്കുക. ശേഷം ഓതുക. ശേഷം പത്തു പ്രാവശ്യം ചൊല്ലുക. രാത്രിയാണ്‌ നമസ്‌കരിക്കുന്നതെങ്കില്‍ ഓരോ രണ്ട്‌ റക്‌അത്തിലും സലാം വീട്ടുന്നതാണ്‌ എനിക്ക്‌ ഏറ്റവും ഇഷ്‌ടപ്പെട്ടത്‌. പകലില്‍ നമസ്‌കരിക്കുകയാണെങ്കില്‍ ഓരോ രണ്ട്‌ റക്‌അത്തിലും നീ ഉദ്ദേശിക്കുന്നുവെങ്കില്‍ സലാം വീട്ടുക. ഉദ്ദേശിക്കുന്നുവെങ്കില്‍ സലാം വീട്ടാതിരിക്കുക.'' (തിര്‍മിദി)

ഈ ഹദീസുകളില്‍ തസ്‌ബീഹ്‌ നമസ്‌കാരത്തിന്റെ രൂപം വിവരിക്കുന്നതില്‍ ധാരാളം വൈരുധ്യങ്ങള്‍ കാണാം. ഹദീസുകള്‍ ശ്രദ്ധിച്ച്‌ വായിക്കുന്നവര്‍ക്ക്‌ വിശദീകരണത്തിന്റെ ആവശ്യമില്ലാതെ തന്നെ ഇതു വ്യക്തമാകും. രണ്ടാം ശാഫിഈ എന്നറിയപ്പെടുന്ന ഇമാം നവവി(റ) ശറഹുല്‍ മുഹദ്ദബില്‍ എഴുതുന്നു: ``തസ്‌ബീഹ്‌ നമസ്‌കാരം നല്ലതാണെന്ന വാദത്തില്‍ വിമര്‍ശനമുണ്ട്‌. തീര്‍ച്ചയായും അതിന്റെ ഹദീസുകള്‍ ദുര്‍ബലമാണ്‌. പുറമെ അറിയപ്പെടുന്ന നമസ്‌കാരത്തിന്റെ രൂപത്തെ മാറ്റി മറിക്കലുമുണ്ട്‌. അതിനാല്‍ സ്വഹീഹായ ഹദീസിന്റെ അടിസ്ഥാനത്തില്‍ അല്ലാതെ ഇതു നിര്‍വഹിക്കാതിരിക്കലാണ്‌ നല്ലത്‌. എന്നാല്‍ ഈ നമസ്‌കാരത്തിന്റെ ഹദീസുകള്‍ സ്ഥിരപ്പെട്ടതല്ല. ഉഖൈലി(റ) പറയുന്നു: തസ്‌ബീഹ്‌ നമസ്‌കാരത്തില്‍ സ്ഥിരപ്പെട്ട ഒരു ഹദീസും വന്നിട്ടില്ല. ഇപ്രകാരം ഇബ്‌നുഅറബിയും മറ്റുള്ളവരും തസ്‌ബീഹ്‌ നമസ്‌കാരത്തില്‍ സ്വഹീഹായ ഹദീസും ഹസനായ ഹദീസും വന്നിട്ടില്ലെന്ന്‌ പറയുന്നു.'' (4:54).

ഇമാം സുയൂഥി(റ) ഉദ്ധരിക്കുന്നു: ``ഉഖൈലി(റ)പറയുന്നു: തസ്‌ബീഹ്‌ നമസ്‌കാരത്തില്‍ ഒരൊറ്റ ഹദീസും സ്ഥിരപ്പെട്ടിട്ടില്ല. ഇബ്‌നുഅറബി(റ) പറയുന്നു: ഇതില്‍ സ്വഹീഹായ ഹദീസോ ഹസനായ ഹദീസോ ഇല്ല. ഇബ്‌നുജൗസി(റ) ഈ ഹദീസുകളെ മനുഷ്യനിര്‍മിതമായ ഹദീസിന്റെ ഗണത്തിലാണ്‌ പെടുത്തിയിരിക്കുന്നത്‌. (അല്ലആലി 2:44). ഈ ഹദീസിന്റെ പരമ്പരയെല്ലാം ദുര്‍ബലമാണെന്ന്‌ ഇമാം ശൗക്കാനി(റ)യും പറയുന്നു (അല്‍ഫവാഇദ്‌, പേജ്‌ 38)

ഇമാം നവവി(റ)യുടെ ഉസ്‌താദായ അബൂശാമ(റ) എഴുതുന്നു: ``തസ്‌ബീഹ്‌ നമസ്‌കാരത്തില്‍ കൂടുതല്‍ ഹദീസുകള്‍ വന്നിട്ടുണ്ടെങ്കിലും അവ സ്വഹീഹല്ല. അബൂദാവൂദ്‌ തന്റെ സുനനിലും തിര്‍മിദി തന്റെ ജാമിഇലും ഇബ്‌നുമാജ തന്റെ സുനനിലും ഹാകിം തന്റെ മുസ്‌തദ്‌റകിലും ബൈഹഖി തന്റെ സുനനിലും തസ്‌ബീഹ്‌ നമസ്‌കാരത്തിന്റെ ഹദീസുകള്‍ ഉദ്ധരിച്ചതു കൊണ്ട്‌ ആരും വഞ്ചിതരാകരുത്‌.'' (അല്‍ബാഇസ്‌, പേജ്‌ 47)

അദ്ദേഹം വീണ്ടും എഴുതുന്നു: ``ഹാഫിദ്‌ അബൂജഅ്‌ഫര്‍(റ) പറയുന്നു: തസ്‌ബീഹ്‌ നമസ്‌കാരത്തില്‍ സ്ഥിരപ്പെട്ട ഒരു ഹദീസുമില്ല. ശൈഖ്‌ അബുല്‍ഫര്‍ജ്‌ നിര്‍മിതമായ ഹദീസുകള്‍ വിവരിക്കുന്ന ഗ്രന്ഥത്തില്‍ തസ്‌ബീഹ്‌ നമസ്‌കാരത്തിന്റെ ഹദീസുകള്‍ ഉദ്ധരിക്കുന്നു. ഈ നമസ്‌കാരത്തിന്റെ ഹദീസുകളുടെ പരമ്പരകള്‍ ചിലതു നബിയിലേക്ക്‌ എത്തിയിട്ടില്ല. ചിലതു പരമ്പര മുറിഞ്ഞതാണ്‌. ചിലത്‌ നിവേദകര്‍ ദുര്‍ബലരായവരാണ്‌. ഇത്തരം ന്യൂനതകളില്‍ നിന്ന്‌ ഈ ഹദീസുകള്‍ ഒഴിവാകുന്നില്ല.'' (അല്‍ബാഇസ്‌, പേജ്‌ 47)

ഇമാം ശാഫിഈ(റ)യുടെ ശിഷ്യനായ ഇമാം ശീറാസി(റ) എഴുതുന്നു: ``തസ്‌ബീഹ്‌ നമസ്‌കാരത്തിന്റെ ഒരു ഹദീസ്‌ പോലും സ്വഹീഹായിട്ടില്ല.'' (സിഫ്‌ദസ്സആദ, പേജ്‌ 144). ഇബ്‌നുഹജറില്‍ അസ്‌ഖലാനി(റ) എഴുതുന്നു: ``തസ്‌ബീഹ്‌ നമസ്‌കാരത്തിന്റെ സര്‍വ പരമ്പരകളും ദുര്‍ബലമായതാണ്‌.'' ഇബ്‌നുതീമിയ്യാ, മുസ്‌നി മുതലായവരും ഇതിനെ ദുര്‍ബലമാക്കുന്നു.'' (തല്‍ഖീസ്‌ 4:185) ഹദീസ്‌ നിരൂപകന്മാരില്‍ പ്രഥമ സ്ഥാനത്ത്‌ നില്‌ക്കുന്ന ഇബ്‌നുജൗസി(റ) മനുഷ്യനിര്‍മിതമായ ഹദീസുകള്‍ വിവരിക്കുന്ന അല്‍മൗളൂആത്ത്‌ 2:465ല്‍ ഈ നമസ്‌കാരത്തിന്റെ പരമ്പരകള്‍ ദുര്‍ബലമായതാണെന്ന്‌ സ്ഥാപിക്കുന്നു. ഇബ്‌നുഖുസൈമ(റ) തന്റെ സ്വഹീഹില്‍ തസ്‌ബീഹ്‌ നമസ്‌കാരത്തിന്റെ ഹദീസുകള്‍ ദുര്‍ബലമാണെന്ന്‌ പറയുന്നു. (വാള്യം 1, പേജ്‌ 601, ഹദീസ്‌ നമ്പര്‍ 1216)

ഫര്‍ദ്‌ നമസ്‌കാരങ്ങള്‍ കൃത്യമായി അനുഷ്‌ഠിക്കുമെന്നും എന്നാല്‍ സുന്നത്ത്‌ നമസ്‌കാരങ്ങള്‍ യാതൊന്നും ഞാന്‍ നമസ്‌കരിക്കുകയില്ലെന്നും പറഞ്ഞ ഒരു വ്യക്തിയോട്‌ താങ്കള്‍ സ്വര്‍ഗത്തില്‍ പോകുമെന്ന്‌ നബി(സ) പറഞ്ഞതായി നിവേദനം ചെയ്യുന്ന ഹദീസ്‌ ഇമാം ബുഖാരി(റ) തന്റെ സ്വഹീഹില്‍ ധാരാളം സ്ഥലത്ത്‌ ഉദ്ധരിക്കുന്നതു കാണാം. എന്നാല്‍ നബി(സ) നമസ്‌കരിക്കാത്ത ഒരു നമസ്‌കാരം വല്ലവനും നമസ്‌കരിച്ചാല്‍ അവന്‍ നരകത്തിലാണെന്ന്‌ നബി(സ) പറഞ്ഞ ധാരാളം ഹദീസുകള്‍ സ്വഹീഹായി ഉദ്ധരിക്കപ്പെടുന്നു. വിശുദ്ധ ഖുര്‍ആനും ഈ യാഥാര്‍ഥ്യം നമ്മെ പഠിപ്പിക്കുന്നു. സംശയമുള്ളത്‌ ഉപേക്ഷിക്കാനും നബി(സ) നമ്മോട്‌ നിര്‍ദേശിക്കുന്നു.

By എ അബ്‌ദുസ്സലാം സുല്ലമി @ ശബാബ്

മുഹര്‍റം നോമ്പ്‌ ഹദീസുകളില്‍

മുഹര്‍റം പത്തിലെ വ്രതം ഹദീസ്‌ കൊണ്ട്‌ സ്ഥിരപ്പെട്ടതാണ്‌. ആദ്യകാലം മുതല്‍ക്കു തന്നെ നബി(സ) ഈ നോമ്പ്‌ നോറ്റിരുന്നു. മദീനയില്‍ വന്നപ്പോള്‍ നിര്‍ബന്ധ സ്വരത്തിലല്ലാതെ നബി(സ) ആ വ്രതം അനുഷ്‌ഠിക്കാന്‍ അനുചരരെ പ്രേരിപ്പിച്ചു. മുഹര്‍റം ഒമ്പതിലെ നോമ്പിനെ സംബന്ധിച്ചും നബി(സ)യുടെ നിര്‍ദേശം വന്നിട്ടുണ്ട്‌.

ആഇശ(റ) പറയുന്നു: ``ആശൂറാഅ്‌ നോമ്പ്‌ നോല്‍ക്കാന്‍ നബി കല്‌പിക്കാറുണ്ടായിരുന്നു. റമദാന്‍ നിര്‍ബന്ധമാക്കിയപ്പോള്‍ ഇഷ്‌ടമുള്ളവര്‍ വ്രതമെടുക്കുകയും ഇഷ്‌ടമുള്ളവര്‍ ഉപേക്ഷിക്കുകയും ചെയ്യുമായിരുന്നു.'' (ബുഖാരി)

ആഇശ(റ) പറയുന്നു: ``ആശൂറാഅ്‌ ദിവസം അജ്ഞാനകാലത്ത്‌ ഖുറൈശികള്‍ നോമ്പെടുക്കാറുണ്ടായിരുന്നു. റസൂലും(സ) അന്ന്‌ നോമ്പനുഷ്‌ഠിക്കാറുണ്ടായിരുന്നു. മദീനയില്‍ വന്നപ്പോള്‍ തിരുമേനി ആ ദിവസം നോമ്പെടുക്കുകയും ജനങ്ങളോട്‌ നോമ്പെടുക്കാന്‍ കല്‌പിക്കുകയും ചെയ്‌തു. പിന്നീട്‌ റമദാന്‍ വ്രതം നിര്‍ബന്ധമാക്കിയപ്പോള്‍ ആശൂറാഅ്‌ വ്രതം ഉപേക്ഷിച്ചു. ഇഷ്‌ടമുള്ളവര്‍ നോല്‍ക്കുകയും ഇഷ്‌ടമുള്ളവര്‍ ഉപേക്ഷിക്കുകയും ചെയ്‌തു.'' (ബുഖാരി)

ഇബ്‌നുഅബ്ബാസ്‌(റ) പറയുന്നു: ``നബി(സ) മദീനയില്‍ വന്നപ്പോള്‍ ജൂതന്മാര്‍ ആശൂറാഅ്‌ നോമ്പ്‌ നോല്‍ക്കുന്നതായി കണ്ടു. അവിടുന്ന്‌ ചോദിച്ചു:?ഇതെന്താണ്‌? അവര്‍ പറഞ്ഞു:?ഇത്‌ നല്ലൊരു ദിവസമാണ്‌. മൂസാനബിയെയും ഇസ്‌റാഈല്യരെയും അല്ലാഹു ശത്രുക്കളില്‍ നിന്ന്‌ രക്ഷിച്ച ദിനമാണിത്‌. അങ്ങനെ, മൂസാ നബി(അ) അന്ന്‌ നോമ്പെടുക്കുകയുണ്ടായി. അപ്പോള്‍ നബി(സ) പറഞ്ഞു:?മൂസായോട്‌ നിങ്ങളെക്കാള്‍ ബന്ധമുള്ളവന്‍ ഞാനാണ്‌.?തുടര്‍ന്ന്‌ തിരുമേനി ആ ദിവസത്തില്‍ നോമ്പെടുക്കുകയും നോമ്പെടുക്കാന്‍ കല്‌പിക്കുകയും ചെയ്‌തു.'' (ബുഖാരി)

അബൂഹുറയ്‌റ(റ) പറയുന്നു: ``നബി(സ)യോട്‌ ഒരാള്‍ ചോദിച്ചു: നിര്‍ബന്ധ നമസ്‌കാരം കഴിഞ്ഞാല്‍ ഏറ്റവും പുണ്യമുള്ള നമസ്‌കാരമേതാണ്‌? തിരുമേനി പറഞ്ഞു: രാത്രിയിലെ നമസ്‌കാരം. വീണ്ടും ചോദിച്ചു:?റമദാന്‍ കഴിഞ്ഞാല്‍ ഏറ്റവും പുണ്യമുള്ള വ്രതമേതാണ്‌??നിങ്ങള്‍ മുഹര്‍റം എന്ന്‌ വിളിക്കുന്ന അല്ലാഹുവിന്റെ മാസം.'' (അഹ്‌മദ്‌, മുസ്‌ലിം, അബൂദാവൂദ്‌)

ഇബ്‌നുഅബ്ബാസ്‌ പറയുന്നു: ``നബി(സ) ആശൂറാഅ്‌ ദിവസം നോമ്പനുഷ്‌ഠിക്കുകയും അന്ന്‌ നോമ്പെടുക്കാന്‍ കല്‌പിക്കുകയും ചെയ്‌തു. സ്വഹാബിമാര്‍ പറഞ്ഞു: അല്ലാഹുവിന്റെ പ്രവാചകരേ, ജൂതന്മാരും ക്രിസ്‌ത്യാനികളും ആദരിക്കുന്ന ദിവസമാണല്ലോ അത്‌. അവിടുന്ന്‌ പ്രതിവചിച്ചു: അടുത്ത വര്‍ഷമായാല്‍ ഇന്‍ശാഅല്ലാഹ്‌ നാം ഒമ്പതിന്‌ (താസൂആഅ്‌) നോമ്പനുഷ്‌ഠിക്കുന്നതാണ്‌. പക്ഷേ, അടുത്തവര്‍ഷം വരുന്നതിന്‌ മുമ്പായി തിരുമേനി(സ) അന്തരിച്ചു.'' (മുസ്‌ലിം)

നബി(സ) പറഞ്ഞു: ``അടുത്തവര്‍ഷം ഞാന്‍ ജീവിച്ചിരിക്കുകയാണെങ്കില്‍ തീര്‍ച്ചയായും ഞാന്‍ ഒമ്പതിന്‌ വ്രതമെടുക്കും.''?(മുസ്‌ലിം)

from ശബാബ്

ഒഴിക്കിനെതിരെ നീന്തുക

സമൂഹത്തില്‍ പരിഷ്കരണ പ്രവര്‍ത്തനങ്ങള്‍ നടത്താന്‍ സ്വയം സന്നദ്ധരായവരാണ് ഇസ്ലാഹി പ്രവര്‍ത്തകര്‍. പരിഷ്കരണം ഒരു പരിഷ്കാരമായി സ്വീകരിച്ചവരല്ല നാം. മറിച്ച്‌ സംസ്കരണം ലഭ്യമാകും വിധം അടിസ്ഥാനശിലകളില്‍ ഊന്നിനിന്നുള്ള പ്രവര്‍ത്തനമാണ് ഇസ്ലാഹ്.

ഇസ്ലാഹ് എളുപ്പമുള്ള പണിയല്ല. ഒഴുക്കിനെതിരില്‍ നീന്താന്‍ കെല്‍പ്പുള്ളവര്‍ക്കേ ഇസ്ലാഹി രംഗത്ത് ഉറച്ചുനില്‍ക്കാന്‍ സാധിക്കുകയുള്ളൂ. കാരണം ഒഴുക്കിനനുസരിച്ച് നീങ്ങാനാണ് സുഖം. ആ സുഖം സ്വീകരിക്കുന്നതില്‍ തൃപ്തരാണ് നാം. നമ്മുക്കെതിരിലാണ് ലോകം. ഭൌതികതയുടെ അതിപ്രസരത്തില്‍ മതനിയമങ്ങളെ പരിഹസിക്കാന്‍ ഭൌതികന്മാര്‍ തയ്യാറാവുന്നു. അന്ധവിശ്വാസങ്ങളിലൂടെ മുസ്ലിം സമൂഹത്തിന്‍റെ ചിത്രം വൃത്തികേടാക്കാന്‍ മുസ്ലിംകളിലെ വലിയൊരു വിഭാഗം ശക്തിയായി പ്രവര്‍ത്തിക്കുന്നു. ഇസ്ലാമിനെ ഭൌതിക പ്രസ്ഥാനങ്ങളെപ്പോലെ തരംതാഴ്ത്തി വെറുമൊരു ബദല്‍ വ്യവസ്ഥയാക്കാന്‍ ചിലര്‍ വെമ്പല്‍ കൊള്ളുന്നു. തീവ്രവാദികളും ഭീകരവാദികളും ഇസ്ലാമിന്‍റെ മറവില്‍ ഒളിക്കാന്‍ ശ്രമിക്കുന്നു. ഇതിനെല്ലാം പുറമേ ഖുര്‍ആനും സുന്നത്തുമെന്ന വിശുദ്ധ ആശയത്തില്‍നിന്നും ആളുകളെ അകറ്റാന്‍ എല്ലാവരും ഒന്നിക്കുന്നു. ദൈവനിഷേധികളും അന്ധവിശ്വാസികളും തൌഹീദിനെതിരെ ഒരുമയോടെയാണ് നീങ്ങുന്നത്‌.

ആശയരംഗത്ത് നമ്മെ നേരിടാന്‍ ഇന്നാര്‍ക്കും സാധ്യമല്ല. അത്ര ശക്തമാണ് നമ്മുടെ ആദര്‍ശം. കാരണം, അത് അല്ലാഹുവിന്‍റെ ദീനാണ്. അത് മറ്റെല്ലാറ്റിനെക്കാളും ഉയന്നുനില്‍ക്കും. അതിന്‍റെ പ്രകാശം ഊതിക്കെടുത്താനുള്ള ശ്രമം നടക്കും. എന്നാല്‍ ആ ശ്രമം പരാജയപ്പെടുക തന്നെചെയ്യും. ഇവിടെ തല്പരകക്ഷികള്‍ക്ക് ഗത്യന്തരമില്ലാതെയായിരിക്കുന്നതിന്റെ തെളിവാണ് സംഘടനക്കു നേരെ വരുന്ന കയ്യേറ്റങ്ങള്‍. നാം പ്രവര്‍ത്തിക്കുന്നത് പരലോകഗുണത്തിന് വേണ്ടിയാണ്. അതിനാല്‍ ഇത്രകാലം ജീവിക്കണമെന്ന വ്യാമോഹം നമുക്കില്ല. ജീവിക്കുന്ന കാലമത്രയും ദീനിന്‍റെ മാര്‍ഗത്തിലായിരിക്കണം. മരിക്കുന്നതും അങ്ങനെത്തന്നെ. അതിനാല്‍ ധീരമായി, തഖ്'വയോടെ, അര്‍പ്പണ ബോധത്തോടെ മുന്നോട്ടു ഗമിക്കുക.

by ഹുസൈന്‍ മടവൂര്‍ @ പ്രാസ്ഥാനിക ചിന്തകള്‍ from യുവത ബുക്സ്

മനസ്സുഖം വന്‍ധനം

ജീവിതത്തില്‍ സുഖം തേടിയുള്ള അലച്ചിലിലാണ് മനുഷ്യരെല്ലാം. വീട്, ധാരാളം സ്വത്ത്, മുന്തിയ വാഹനം, സമൂഹത്തില്‍ ഉയര്‍ന്ന സ്ഥാനം എന്നിവയെല്ലാം ഒരു സാധാരണ മനുഷ്യന്‍റെ സ്വപ്നങ്ങളാണ്. എത്ര കിട്ടിയാലും പോരാ എന്ന ചിന്തയില്‍ ന്യായാന്യായം നോക്കാതെ ഭൌതിക വിഭവങ്ങള്‍ സംഭരിക്കുന്നതില്‍ വ്യാപൃതരാവുകയാണ് മനുഷ്യര്‍. ധനക്കൊതി എന്തെല്ലാം ദുരന്തങ്ങളാണ് വരുത്തിവെക്കുന്നത്. ജീവിതം കൂടുതല്‍ സുഖപ്രദമാക്കാന്‍ വേണ്ടി ശ്രമിക്കുന്തോറും മനസ്സിന്‍റെ സുഖവും ശാന്തതയും നഷ്ടപ്പെടുന്നു. പ്രശ്നങ്ങളുടെ കുരുക്കുകള്‍ കൂടുന്നു. ധനം എത്ര വേണമെങ്കിലും മനുഷ്യന് വാരിക്കൂട്ടാം. ഭൂമി നിറയെ ദൈവത്തിന്‍റെ അനുഗ്രഹങ്ങളാണ്. അവ നേടിയെടുക്കാനുള്ള കഴിവും സ്വാതന്ത്ര്യവും അവനു നല്കിയിട്ടുമുണ്ട്. പക്ഷെ, ഇവയൊന്നും മനസ്സിന്‍റെ സുഖം പൂര്‍ത്തീകരിക്കാന്‍ പര്യാപ്തമല്ല. പരമദരിദ്രനാകം ചിലപ്പോള്‍ കോടീശ്വരനേക്കാള്‍ കൂടുതല്‍ സന്തോഷവും സമാധാനവും അനുഭവിക്കുന്നവന്‍.

ചിന്തകനും ഫിലോസഫറും നിരവധി ഗ്രന്ഥങ്ങളുടെ കര്‍ത്താവുമായ ഇബ്നു തൈമിയ പറയുന്നു : "എന്‍റെ സ്വര്‍ഗം എന്‍റെ നെഞ്ചിലാണ്". അദ്ദേഹത്തിന് വീടും സ്വത്തും ഉദ്യോഗവും ഒന്നുമുണ്ടായിരുന്നില്ല. പള്ളിയുടെ പരിസരത്ത് ഒരു മുറിയിലായിരുന്നു താമസം. ദിവസവും ഒരു റൊട്ടിയാണ് ഭക്ഷണം. ധരിക്കാന്‍ രണ്ടു വസ്ത്രങ്ങള്‍ മാത്രം. ഉറക്കം അധികവും പള്ളിയില്‍. ജീവിതം ഇത്ര ദുരിതം നിറഞ്ഞതായിട്ടും അദ്ദേഹം നെഞ്ചില്‍ സ്വര്‍ഗവുമേറ്റി നടക്കുകയായിരുന്നു. മറ്റൊരു മഹാപണ്ഡിതനാണ് അഹമദുബ്നു ഹമ്പല്‍. ഇതേ പോലെയുള്ള ജീവിതമാണ് അദ്ദേഹവും നയിച്ചിരുന്നത്. ധരിച്ചിരുന്നത് കണ്ടംവെച്ച ഒരു വെള്ള വസ്ത്രം. സ്വന്തം കൈകൊണ്ടത്‌ തുന്നും. മൂന്ന് കൊച്ചു മുറികള്‍ മാത്രമുള്ള ഒരു മണ്കൂരയിലാണ് താമസം. പതിനേഴുവര്ഷം പഴക്കമുള്ള പലവട്ടം കണ്ടംവെച്ച ഒരു ചെരിപ്പാണ് അദ്ദേഹം ധരിച്ചിരുന്നതെന്നു ചരിത്രകാരന്മാര്‍ പറയുന്നു. നാട്നീളെ വിജ്ഞാനം തേടിയുള്ള യാത്രയും. ഇങ്ങനെയൊക്കെയായിട്ടും അദ്ദേഹത്തിന് മനസ്സ് നിറയെ സന്തോഷമായിരുന്നു.

ഈ മഹാന്മാരെല്ലാം പ്രവാചകന്‍ (സ)യുടെ ജീവിതത്തില്‍നിന്ന് ആവേശം കൊണ്ടവരായിരുന്നു. അത്ര ക്ലേശം നിറഞ്ഞതായിരുന്നുവല്ലോ അദ്ദേഹത്തിന്റെ ജീവിതവും. ഈന്തപ്പനമ്പ് കൊണ്ടുള്ള മേല്‍ക്കൂരയും വിരിപ്പും. ഓലയുടെ പാടുകള്‍ അദ്ദേഹത്തിന്റെ ശരീരത്തില്‍ തെളിഞ്ഞു കാണാമായിരുന്നു. വിശന്നപ്പോള്‍ വയറ്റില്‍ കല്ല്‌ വെച്ച് കെട്ടിയിരുന്നു. മൂന്നു ദിവസം ഒന്നും ഭക്ഷിക്കാന്‍ കിട്ടാതെ പട്ടിണി കിടക്കേണ്ടി വന്നു. ഈ പ്രയാസങ്ങളൊന്നും തിരുമനസ്സിനെ ബാധിച്ചതേയില്ല. പ്രവാചകന്‍റെ പ്രസിദ്ധമായ ഒരു വചനമുണ്ട് : "രാത്രി നിര്‍ഭയമായി കഴിയാന്‍ ഒരു മാളം, ശരീരത്തിന് അസുഖമൊന്നുമില്ല, ഇന്നത്തേക്ക് വേണ്ട ആഹാരം കൈവശമുണ്ട്, എങ്കില്‍ ഭൌതിക സുഖങ്ങള്‍ മുഴുവനും ലഭിച്ചത് പോലെയാണ്". ഇതേ തത്വം പ്രവാചകന്‍ (സ) മറ്റൊരു വചനത്തില്‍ ഇങ്ങനെ വ്യക്തമാക്കി : "നിനക്ക് ദൈവം എന്താണോ വിധിച്ചത് അതില്‍ തൃപ്തിയടയുക. എങ്കില്‍ നീ ആയിരിക്കും ഏറ്റവും സമ്പന്നനായ വ്യക്തി". ഒരാള്‍ക്ക്‌ എല്ലാ അനുഗ്രഹങ്ങളും ലഭിച്ചെന്നുവരില്ല. തന്‍റെ സുഖത്തിന്റെ വലുപ്പം മനസ്സിലാക്കണമെങ്കില്‍ അത്രയും ലഭിച്ചിട്ടില്ലാത്തവരെ കാണണം.

ഉറങ്ങുന്നത് പട്ടുമെത്തയിലായത് കൊണ്ട് പൂര്‍ണസുഖമാണെന്ന് ഒരിക്കലും ധരിക്കരുത്. മില്‍ട്ടന്‍ പറഞ്ഞത്പോലെ മനസ്സാണ് സ്വര്‍ഗത്തെ നരകവും നരകത്തെ സ്വര്‍ഗവുമാക്കുന്നത്. നെപ്പോളിയന്‍ ഏറെ പ്രശസ്തി നേടിയെങ്കിലും അദ്ദേഹം പറയുന്നു : "ജീവിതത്തില്‍ സുഖമുള്ള ഒരു ദിവസം പോലും എനിക്കുണ്ടായിട്ടില്ല". ഖലീഫ ഹിഷാം പറഞ്ഞതും ഇത് തന്നെ : "എന്‍റെ സുഖ ദിവസങ്ങള്‍ എണ്ണിനോക്കുമ്പോള്‍ 13 ദിവസം മാത്രം!". ധനക്കൊതി, ആഡംബരഭ്രമം, സ്ഥാനമോഹം, പ്രയാസങ്ങളേയും പ്രശ്നങ്ങളേയും തരണംചെയ്യാനുള്ള കെല്പ്പില്ലായ്മ എന്നീ ദൌര്‍ബല്യങ്ങളില്‍ നിന്ന് മോചിതനായവര്‍ക്ക് മാത്രമേ മനസ്സുഖം അനുഭവിക്കാന്‍ കഴിയുകയുള്ളൂ.

by പ്രൊഫ: പി മുഹമ്മദ്‌ കുട്ടശ്ശേരി @ ജീവിതം സന്തോഷപ്രദമാകാന്‍ from യുവത ബുക്സ്

സ്ത്രീ ഇസ്‌ലാമില്‍

ലോകത്തെ പ്രഥമ നിയമവ്യവസ്ഥ യുണ്ടാക്കിയത് ബാബിലോണിയയിലെ ആദ്യകാല രാജാക്കന്മാരില്‍ ഒരാളായ ഹമൂറാബിയാണെന്ന് പറയപ്പെടുന്നു. ആ പ്രഥമ നിയമവ്യവസ്ഥയില്‍പോലും സ്ത്രീ ജന്മം മ്ലേച്ചമായി ദര്‍ശിച്ചിരുന്നു. പരിശുദ്ധ ഖുര്‍ആന്‍ അവതരിക്കപ്പെടുന്നതിന്റെ മുമ്പ് ചില ഗോത്രങ്ങള്‍ പെണ്‍കുട്ടികളുടെ ജനനത്തെ നിഷേധിച്ചിരുന്നു. ഗര്‍ഭ പാത്രത്തില്‍ വെച്ച് ശിശു ആണോ പെണ്ണോ എന്ന് മനസ്സിലാക്കുവാന്‍ അവര്‍ക്ക് സാധിച്ചിരുന്നില്ല. അതിനാല്‍ പെണ്‍കുഞ്ഞു ജനിക്കുമ്പോള്‍ തന്നെ കൊന്നൊടുക്കി അവളുടെ ജന്മാവകാശത്തെ പോലും അവര്‍ ഹനിച്ചു. പരിശുദ്ധ ഖുര്‍ആന്‍ ആ സംഭവത്തെ വിവരിക്കുന്നത് കാണുക : "അവരില്‍ ഒരാളോട് പെണ്‍കുട്ടി ജനിച്ചതായി സന്തോഷവാര്‍ത്ത അറിയിക്കപ്പെട്ടാല്‍ അവന്റെ മുഖം കറുത്തിരുണ്ടതാകുന്നു. അവന്‍ കോപം നിറഞ്ഞവനുമാണ്. അവനോടു സന്തോഷവാര്‍ത്ത അറിയിക്കപ്പെട്ടതിന്റെ മ്ലേച്ചതയാല്‍ (അപമാനം ഭയന്ന്) ജനങ്ങളില്‍ നിന്നവന്‍ മറയുന്നു. അപമാനം സഹിച്ചു (കൊല്ലാതെ) അതിനെ ജീവിക്കുവാന്‍ അനുവദിക്കണോ അതല്ല അതിനെ മണ്ണില്‍ കുഴിച്ചുമൂടണോ (എന്നവന്‍ ശങ്കിച്ച് നില്‍ക്കുന്നു). അറിയുവിന്‍, അവരുടെ വിധി എത്ര ചീത്ത!" [നഹ്ല്‍ 58 ,59]

പെണ്‍ജന്മം സന്തോഷവാര്‍ത്തയാണെന്ന് പരിശുദ്ധ ഖുര്‍ആന്‍ പ്രഖ്യാപിക്കുന്നു. മറ്റൊരു സംഭവം ഖുര്‍ആനില്‍ വിവരിക്കുന്നത് കാണുക: "ഇമ്രാന്റെ ഭാര്യ പറഞ്ഞ സന്ദര്‍ഭം (ഓര്‍മ്മിക്കുവിന്‍). എന്റെ നാഥാ, എന്റെ ഉദരത്തിലുള്ളതിനെ സ്വതന്ത്രമാക്കപ്പെട്ടനിലയില്‍ നിനക്കുവേണ്ടി ഞാന്‍ നേര്‍ച്ച നേരുന്നു. അതിനാല്‍ എന്റെ പക്കല്‍നിന്നും സ്വീകരിച്ചാലും. നിശ്ചയം നീ കേള്‍ക്കുന്നവനും അറിയുന്നവനുമാണ്‌. അങ്ങനെ അവള്‍ പ്രസവിച്ചപ്പോള്‍ അവള്‍ പറഞ്ഞു : എന്റെ രക്ഷിതാവേ, ഞാന്‍ ഇതിനെ പെണ്ണായി പ്രസവിച്ചിരിക്കുന്നു. -അല്ലാഹുവാകട്ടെ അവള്‍ പ്രസവിച്ചതിനെ സംബന്ധിച്ചു അറിയുന്നവനാണ്-. ആണ് പെണ്ണിനെപ്പോലെയല്ല. ഞാന്‍ അതിനു മര്‍യം എന്ന് പേരിട്ടിരിക്കുന്നു. അതിന്റെയും അതിന്റെ സന്താനങ്ങളുടെയും കാര്യത്തില്‍ ശപിക്കപ്പെട്ട പിശാചില്‍ നിന്നും ന്നിന്നോട് ഞാന്‍ അഭയം തേടുന്നു. അപ്പോള്‍ അവളെ (കുഞ്ഞിനെ) അവളുടെ നാഥന്‍ നല്ലനിലയില്‍ സ്വീകരിച്ചു. അവളെ ഉത്തമമായി വളര്‍ത്തുകയും ചെയ്തു" [ആലു ഇമ്രാന്‍ 36 ,37].

പെണ്‍കുട്ടിയായതിനാല്‍ മോശമായിപ്പോയി എന്ന ഇമ്രാന്റെ ഭാര്യയുടെ ചിന്താഗതിയെ അല്ലാഹു തിരുത്തുകയാണ്. ആണിനെക്കാള്‍ നല്ല രീതിയില്‍ അല്ലാഹു ആ പെണ്‍കുഞ്ഞിനെ സ്വീകരിച്ചു. അവന്റെ പ്രത്യേക പരിഗണനയും ആദരവും നല്‍കി അവളെ വളര്‍ത്തി. അന്ത്യ പ്രവാചകനായ മുഹമ്മദ്‌ നബി (സ)ക്ക് പെണ്മക്കള്‍ മാത്രമാണ് ജീവിച്ചിരുന്നത്. അവര്‍ മുഖേന അല്ലാഹു അദ്ധേഹത്തെ അനുഗ്രഹിച്ചു. ഒരു പുരുഷപിതാവാകാനുള്ള ഭാഗ്യം അല്ലാഹു അദ്ദേഹത്തിന് നല്‍കിയില്ല. "മുഹമ്മദ്‌ നിങ്ങളില്‍ ഒരു പുരുഷന്റെയും പിതാവല്ല" [അഹ്സാബ് 41].

പെണ്‍കുട്ടികളെ മോശമായി ദര്‍ശിക്കുന്ന സമൂഹം നശിച്ചുവെന്ന് ഖുര്‍ആന്‍ പ്രഖ്യാപിക്കുന്നു. "തങ്ങളുടെ (പെണ്‍ )സന്തതികളെ യാതോരരിവുമില്ലാതെ മൂഡമായി വധിച്ചവര്‍ നഷ്ട്ടത്തില്‍ പതിച്ചു." [ആന്‍ആം]. "കുഴിച്ചുമൂടപ്പെട്ട പെണ്‍കുഞ്ഞ് അവള്‍ എന്ത് കുറ്റം നിമിത്തമാണ് വധിക്കപ്പെട്ടതെന്നു ചോദിക്കപ്പെടുമ്പോള്‍ " [തക്-വീര്‍ 8 ,9 ]. ഭ്രൂണം പെണ്‍കുഞ്ഞിന്റെതായതിനാല്‍ അതിനെ നശിപ്പിച്ചുകളഞ്ഞവരും ഈ വിചാരണയെ നേരിടേണ്ടിവരും. മനുഷ്യമനസ്സിന്റെ വികലമായ ചിന്താഗതിയെയാണ് ഖുര്‍ആന്‍ ഇവിടെ ചോദ്യം ചെയ്യുന്നത്. അതായത്, ആണ്‍ ജന്മത്തെക്കാള്‍ നിലവാരം കുറഞ്ഞതാണ് പെണ്‍ജന്മം എന്ന ചിന്താഗതിയെ. ജനിച്ച പെണ്‍ കുഞ്ഞിനെ വധിക്കുന്നവന്റെയും ഭ്രൂണത്തെ നശിപ്പിക്കുന്നവന്റെയും ചിന്താഗതി ഒന്ന് തന്നെയാണ്.

മുഹമ്മദ്‌ നബി (സ) ആണിന്റെ ജനനത്തെക്കാള്‍ പ്രാധാന്യം കല്പ്പിച്ചിരുന്നത്‌ പെണ്‍കുട്ടികളുടെ ജന്മത്തിനാണ്. അദ്ദേഹത്തിന്റെ ചില വചനങ്ങള്‍ ശ്രദ്ധിക്കുക : "ആഇശ (റ) നിവേദനം, ഒരിക്കല്‍ ഒരു സ്ത്രീ ഭിക്ഷയാചിച്ചുകൊണ്ട് എന്റെ അരികില്‍വന്നു. അവളുടെ രണ്ടു പെണ്‍കുട്ടികളും കൂടെയുണ്ടായിരുന്നു. ഒരു കാരക്കയല്ലാതെ മറ്റൊന്നും എന്റെയടുത്തു ഉണ്ടായിരുന്നില്ല. അത് ഞാന്‍ അവര്‍ക്ക് കൊടുത്തു. അവളതു കുട്ടികള്‍ക്ക് ഭാഗിച്ചു കൊടുത്തു. അവളൊന്നും കഴിച്ചില്ല. പിന്നീട് ഈ സംഭവം ഞാന്‍ നബി (സ)യോട് പറഞ്ഞു. അപ്പോള്‍ അവിടുന്ന് പറഞ്ഞു : ഈ പെണ്‍കുട്ടികള്‍ നിമിത്തം വല്ലവരും പരീക്ഷിക്കപ്പെടുകയും എന്നിട്ട് അവന്‍ അവര്‍ക്ക് നന്മ ചെയ്യുകയും ചെയ്‌താല്‍ നരകത്തില്‍ നിന്ന് അവര്‍ അവനു ഒരു മറയാകിത്തീരുന്നതാണ്." [ബുഖാരി,മുസ്ലിം]. ആണ്‍ കുട്ടികള്‍ നരകത്തില്‍ നിന്നും മറയായിത്തീരുമെന്നു നബി (സ) ഇത്ര വ്യക്തമായി പ്രസ്താവിക്കുന്നില്ല.

നബി (സ) പറഞ്ഞു : "പെണ്‍കുട്ടികളുടെ ജനനം ഒരാള്‍ക്ക്‌ സ്വര്‍ഗ്ഗം അനിവാര്യമാക്കുകയോ അല്ലെങ്കില്‍ നരകത്തില്‍ നിന്നും അയാളെ മോചിപ്പിക്കുകയോ ചെയ്യും." [മുസ്‌ലിം]

നബി (സ) പറഞ്ഞു : "ഇഹലോകം വിഭവങ്ങളാണ്. ഇഹലോകത്തെ വിഭവങ്ങളില്‍ ഉത്തമമായത് നല്ല സ്ത്രീകളാണ്," [മുസ്‌ലിം]

നബി (സ) പറഞ്ഞു : "സ്ത്രീകളുടെ അവകാശത്തെ ഹനിക്കുന്നവര്‍ പാപികളാണ്." [നാസാഈ]

നബി (സ) പറഞ്ഞു : "വല്ലവനും രണ്ടു പെണ്‍കുട്ടികള്‍ ജനിച്ചു. അവന്‍ അവരെ വളര്‍ത്തി. എങ്കില്‍ പരലോകത്ത് ഞാനും അവനും ഇപ്രകാരം വരുന്നതാണ്. ശേഷം നബി (സ) തന്റെ വിരലുകള്‍തമ്മില്‍ യാതൊരു വിടവുമില്ലാതെ ചേര്‍ത്ത്പിടിച്ചു." [മുസ്‌ലിം]

by എ അബ്ദുസ്സലാം സുല്ലമി @ സ്തീകളുടെ അവകാശങ്ങള്‍ from യുവത ബുക്ക്‌ ഹൌസ്

103 സൂറത്തുല്‍ അസ്വര്‍ (കാലം)

بِسْمِ اللَّـهِ الرَّحْمَـٰنِ الرَّحِيمِ

1. وَالْعَصْرِ : കാലത്തെ കൊണ്ട് സത്യം.

2. إِنَّ الْإِنسَانَ لَفِي خُسْرٍ : തീര്‍ച്ചയായും മനുഷ്യര്‍ നഷ്ടത്തില്‍ തന്നെയാണ്.

വ്യാഖ്യാനം : കാലം എന്നതുകൊണ്ട് ഉദേശിക്കുന്നത് താഴെ വിവരിക്കുന്നവയാണ്.

1. മനുഷ്യജീവിതത്തില്‍ കഴിഞ്ഞുപോയ വയസ്സുകള്‍ : ഈ വയസ്സുകള്‍ മനുഷ്യര്‍ക്ക്‌ നഷ്ടമാണ്. ഓരോ ദിവസവും മുന്നോട്ടു പോകുമ്പോള്‍ മനുഷ്യര്‍ അവന്റെ വാര്ധക്യത്തെയും മരണത്തെയും സമീപിക്കുകയാണ്. ആര്‍ക്കും ഭൂമിയുടെ കറക്കത്തെ പിന്നോട്ട് ചലിപ്പിച്ചു അവ തിരിച്ചുകൊണ്ട് വരാന്‍ സാധ്യമല്ല. ഇതില്‍ ചന്ദ്രനിലും ചൊവ്വയിലും ഇറങ്ങിയവരും വയലില്‍ ഇറങ്ങി പണിയെടുക്കുന്നവനും തുല്യമാണ്.

2. ഭൌതികലോകം : ഭൌതിക ലോകത്ത് ധാരാളം അത്ഭുത പ്രതിഭാസങ്ങള്‍ അല്ലാഹു സൃഷ്ടിച്ചിട്ടുണ്ട്. ഇവയെല്ലാം തന്നെ അധര്‍മ്മകാരികള്‍ നഷ്ടത്തിലാണെന്നതിനു വ്യക്തമായ രേഖയാണ്.

3. ലോകചരിത്രം : അധര്‍മകാരികള്‍ നഷ്ടത്തിലാണെന്നതിനു ലോക ചരിത്രവും സാക്ഷിയാണ്.

4. പകലിന്റെ അന്ത്യം : പകല്‍ അസ്തമിക്കുന്നത് പോലെ എല്ലാ വ്യക്തികളും മരണപ്പെടും. അവന്‍ സമ്പാദിച്ചതെല്ലാം നഷ്ടപ്പെടും.

5. പരലോകത്തില്‍ എല്ലാവരും നഷ്ടത്തിലാണ്.

**********************************************

3. إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ : വിശ്വസിക്കുകയും സല്‍ക്കര്‍മ്മങ്ങള്‍ അനുഷ്ടിക്കുകയും പരസ്പരം സത്യം കൊണ്ട് അനുശാസിക്കുകയും പരസ്പരം ക്ഷമകൊണ്ട് അനുശാസിക്കുകയും ചെയ്യുന്നവരൊഴികെ.

വ്യാഖ്യാനം :

1. ഈ നാല് സ്വഭാവമുള്ള സ്ത്രീപുരുഷന്മാര്‍ക്ക് അവരുടെ ജീവിതത്തില്‍ മുന്നോട്ടു പോയിക്കൊണ്ടിരിക്കുന്ന വയസ്സുകള്‍ ഒരിക്കലും നഷ്ടത്തിലാകുന്നില്ല.'എന്റെ നല്ലകാലം കഴിഞ്ഞു പോയല്ലോ എന്ന് വിചാരിച്ചു ദുഖിക്കേണ്ടതില്ല. മരണത്തിനും വാര്‍ധക്യത്തിനും അവരുടെ പുരോഗതിയെ തടയുവാന്‍ സാധ്യമല്ല. ഒരു വിത്ത് നശിക്കുമ്പോള്‍ ചെടിയാകുന്നത് പോലെ പുരോഗതി പ്രാപിച്ച മറ്റൊരു ജീവിതത്തിലേക്കുള്ള താല്‍കാലിക നാശം മാത്രമാണ് അവര്‍ക്കുള്ളത്. ഒരു പുഴു ചിത്രശലഭമാകുന്നതുപോലെ.

2. ഈ നാല് സ്വഭാവങ്ങള്‍ മാത്രമാണ് പരലോകത്തെ നഷ്ടത്തില്‍ നിന്നും മനുഷ്യനെ രക്ഷപ്പെടുത്തുക.

3. വിശ്വാസത്തോടൊപ്പം പുണ്യകര്‍മ്മം അനുഷ്ടിക്കണം. ഇത് സ്വന്തം പ്രശ്നമാണ്. ഇത്രമാത്രം മതിയാവുകയില്ല. നാം മനസ്സിലാക്കിയ സത്യം (ആണും പെണ്ണും) മറ്റുള്ളവരോട് പറയണം. അതുമൂലം ഉണ്ടാകുന്ന വിമര്‍ശനം നാം സഹിക്കണം.

4. മനുഷ്യരെ അല്ലാഹു നരകത്തിനു വേണ്ടി നിര്‍ബന്ധിതരായി സൃഷ്ടിക്കുന്നില്ല. നരകത്തില്‍ നിന്നും മോചിതരാകുന്നതിനു അല്ലാഹുവിന്റെ വിധി മനുഷ്യര്‍ക്ക്‌ പ്രതിബന്ധവാകുന്നുമില്ല.

5. വിശ്വാസം മനുഷ്യര്‍ക്ക്‌ ഉണ്ടായാല്‍ ഈലോകത്തെ പ്രതിസന്ധികള്‍ വരെ തട്ടിമാറ്റുവാന്‍ സാധിക്കും. മാനസികമായി അവനെ നശിപ്പിക്കുവാന്‍ യാതൊരു ഭൌതിക പ്രശ്നത്തിനും സാധ്യമല്ല. ദൈവവിശ്വാസം ഇല്ലാത്തപക്ഷം ശാസ്ത്രം പഠിച്ചവനും ആത്മഹത്യ ചെയ്യും. ഭൌതിക പ്രശ്നങ്ങള്‍ അവനെ മാനസികരോഗിയാക്കും.

by അബ്ദുസ്സലാം സുല്ലമി @ ഖുര്‍ആനിന്റെ വെളിച്ചം

ബലിപെരുന്നാള്‍ : സമര്‍പ്പണത്തിന്റെ സ്മൃതികള്‍

ബലിപെരുന്നാള്‍ ആത്മാവിന്‍റെ ആഘോഷമാണ്. ആത്മീയതയാണതിന്റെ അടിയാധാരം. ആത്മീയതയില്ലാത്ത ആഘോഷങ്ങളെല്ലാം ഭൌതിക പരിസരങ്ങളില്‍ തിളങ്ങിയണയും. എന്നാല്‍ ആത്മാവിലലിയുന്ന ആഘോഷങ്ങള്‍ ആത്മീയതയാല്‍ സമ്പന്നമാണ്. അത് അമരമായ ആദര്‍ശത്തെയും അതുല്യമായ സന്ദേശത്തേയുമാണ് വെളിപ്പെടുത്തുന്നത്. ബലിപെരുന്നാളും മറിച്ചല്ല.

ഇസ്ലാമിലെ ആരാധനകളിലൊന്നിലും ആഘോഷത്തിന്‍റെ തിമിര്‍പ്പോ പുളകങ്ങളോ കാണാനാവില്ല. എന്നാല്‍ പെരുന്നാളാഘോഷം ആരാധനയാണെന്ന് മതം പഠിപ്പിക്കുന്നു. ആഘോഷിക്കുമ്പോള്‍പോലും ആരാധനയുടെ മണവും നനവും അനുഭവപ്പെടുന്നു. ശബ്ദഘോഷങ്ങളോ വര്‍ണപ്പൊലിമകളോ ഇല്ലാതെപോലും മനസ്സുകളില്‍ ആനന്ദം വിരിയിക്കാന്‍ പെരുന്നാളുകള്‍ക്ക് കഴിയുന്നത്‌ ആത്മീയതയുടെ സാന്നിധ്യം കൊണ്ടാണ്.

ബലിപെരുന്നാളിന്‍റെ ഓളങ്ങള്‍ ഒഴുകിനീങ്ങുന്നത്‌ ചരിത്രത്തിന്‍റെ വിപ്ലവവീഥിയിലേക്കാണ്. ഇബ്രാഹിം നബി (അ)യുടെയും പത്നി ഹാജറയുടെയും മകന്‍ ഇസ്മായീല്‍ (അ)ന്റേയും ജീവിതത്തിന്‍റെ അടരുകളാണ് ബലിപെരുന്നാളിനെ ഹൃദയഹാരിയാക്കിത്തീര്‍ക്കുന്നത്.

ആദര്‍ശഗരിമകൊണ്ടും വിശ്വാസദൃടത കൊണ്ടും ചരിത്രത്തിലേക്ക് ഇരച്ചുകയറുന്ന മുന്നേറ്റമായിരുന്നു അവരുടേത്. ഉന്നതമായ ഒരാദര്‍ശത്തെ ഹൃദയത്തിലേറ്റിയ ഇബ്രാഹിംനബിയും സ്വയം സന്നദ്ധതയുടെ മാതൃകാപുത്രനായി മാറിയ ഇസ്മായീല്‍നബിയും ത്യാഗമനസ്ഥിതിയുടെ സ്ത്രീരൂപമായി തിളങ്ങിയ ഹാജറയും നടന്നുനീങ്ങിയത് ഒരേ ലക്ഷ്യത്തിലേക്കായിരുന്നു.

അല്ലാഹുവല്ലാതെ ആരാധ്യനില്ലെന്ന മഹദ്'വചനത്തെ മുന്‍നിര്‍ത്തിയായിരുന്നു ഇബ്രാഹിമിന്‍റെ ഓരോ നീക്കങ്ങളും. ഏകദൈവവിശ്വാസത്തെ ഹൃദയത്തിലേറ്റി പ്രവര്‍ത്തനപഥത്തിലേക്ക് ഇറങ്ങിച്ചെന്ന ആ മഹാന്‍ പ്രബോധനവഴികളിലെ ദുര്‍ഘടാവസ്ഥകളെ മറികടന്നു. നാട്ടുരാജാക്കന്മാരും നാട്ടുപ്രമാണിമാരും പൌരപ്രമുഖരുമെല്ലാം സത്യപ്രബോധനത്തിനു തടസ്സം നിന്നിട്ടും കൂസലില്ലാതെ മുന്നേറിയ അദ്ദേഹം മഹത്തായ ആദര്‍ശത്തിന് വേണ്ടി കാവലിരുന്നു. കേവലം മുന്നേറ്റമായി മാത്രം അത് ഒതുങ്ങിയില്ല. ഒരു സന്ദേശമായി ലോകം ഏറ്റുപിടിക്കുന്നതിലേക്ക് വികാസം പ്രാപിച്ചു. ചരിത്രം അത് ഉറക്കെ ഏറ്റു ചൊല്ലി.

ഒരു വലിയ പ്രബോധനദൌത്യമായിരുന്നു ഇബ്രാഹിം നബി ഏറ്റെടുത്തിരുന്നത്. അതിന്‍റെ വിജയത്തിനുവേണ്ടി ആവുന്നാതൊക്കെ ചെയ്യാന്‍ അദ്ദേഹത്തിനു സാധിച്ചു. അല്ലാഹു അക്കാര്യം എടുത്തു പറയുന്നു: "ഇബ്രാഹീമിനെ അദ്ദേഹത്തിന്റെ രക്ഷിതാവ് ചില കല്‍പനകള്‍കൊണ്ട് പരീക്ഷിക്കുകയും, അദ്ദേഹമത് നിറവേറ്റുകയും ചെയ്ത കാര്യവും (നിങ്ങള്‍ അനുസ്മരിക്കുക.) അല്ലാഹു (അപ്പോള്‍) അദ്ദേഹത്തോട് പറഞ്ഞു: ഞാന്‍ നിന്നെ മനുഷ്യര്‍ക്ക് നേതാവാക്കുകയാണ്‌. ഇബ്രാഹീം പറഞ്ഞു: എന്റെ സന്തതികളില്‍പ്പെട്ടവരെയും (നേതാക്കളാക്കണമേ.) അല്ലാഹു പറഞ്ഞു: (ശരി; പക്ഷെ) എന്റെ ഈ നിശ്ചയം അതിക്രമകാരികള്‍ക്ക് ബാധകമായിരിക്കുകയില്ല." [സൂറ 2:124]

ഇബ്രാഹിം നബിയുടെ ജീവിതപാതയാണ് ഏറ്റവും നേരായതെന്നും അതിലൂടെ സഞ്ചരിക്കാന്‍ കഴിയുകയെന്നത് വലിയ കാര്യമാണെന്നുമാണ് ഈ വചനം നമ്മെ പഠിപ്പിക്കുന്നത്‌. എന്നാല്‍ ഈ മാര്‍ഗത്തെ കണ്ടില്ലെന്നു നടിക്കുകയും ഭൌതിക ജീവിതത്തിന്‍റെ സുഖങ്ങളില്‍മാത്രം വ്യാപരിക്കുകയും ചെയ്യുന്നവര്‍ക്ക് അല്ലാഹു താക്കീത് നല്‍കുന്നുണ്ട്. ഇബ്രാഹിം (അ) തെരഞ്ഞെടുത്തവഴി അത്യന്തം അപകടമുള്ളതായിരുന്നു. നിഷ്പ്രയാസം ചെയ്തുതീര്‍ക്കാവുന്നത്ര നിസ്സാരമായിരുന്നില്ല അത്. മറിച്ച് കൂരിരുട്ടുകളോടും ദുര്മൂര്ത്തികളോടുമെല്ലാം പടവെട്ടിയ ചരിത്രത്തെ പേറുന്നതാണ് അത്. വെളിച്ചത്തിന്റെ നേരായ പാതയാണത്. അതിനോട് വിമുഖതകാട്ടി പിന്തിരിയുന്നത് ഏറ്റവും വലിയ ഭോഷത്വമാണെന്നും ഖുര്‍ആന്‍ ഉണര്ത്തിയിട്ടുണ്ട്. "സ്വന്തം ആത്മാവിനെ മൂഢമാക്കിയവനല്ലാതെ മറ്റാരാണ് ഇബ്രാഹീമിന്റെ മാര്‍ഗത്തോട് വിമുഖത കാണിക്കുക? ഇഹലോകത്തില്‍ അദ്ദേഹത്തെ നാം വിശിഷ്ടനായി തെരഞ്ഞെടുത്തിരിക്കുന്നു. പരലോകത്ത് അദ്ദേഹം സജ്ജനങ്ങളുടെ കൂട്ടത്തില്‍ തന്നെയായിരിക്കും". [സൂറ 2:130]

എന്നാല്‍ ഇബ്രാഹിം നബിയുടെ കാലത്തെ നമ്രൂദ് എന്ന സ്വേചാതിപതിയായ രാജാവ് ദൈവത്തെ നിഷേധിക്കുകയും ഇബ്രാഹിമിന്‍റെ മാര്‍ഗത്തെ നിരസിക്കുകയും ചെയ്തവനായിരുന്നു. വലിയ സമ്പത്ത്കൊണ്ട് അനുഗ്രഹിക്കപ്പെട്ട നമ്രൂദ് അനുഗ്രഹദാതാവിനെ മറന്നു അന്ധമായ വഴി തെരഞ്ഞെടുത്തു. ഇബ്രാഹിം (അ) അത് ഓര്‍മ്മപ്പെടുത്തി. ഫലമുണ്ടായില്ല. ഖുര്‍ആന്‍ പറയുന്നത് കാണുക : "ഇബ്രാഹീമിനോട് അദ്ദേഹത്തിന്റെ നാഥന്റെ കാര്യത്തില്‍ തര്‍ക്കിച്ചവനെപ്പറ്റി നീയറിഞ്ഞില്ലേ? അല്ലാഹു അവന്ന് ആധിപത്യം നല്‍കിയതിനാലാണ് (അവനതിന് മുതിര്‍ന്നത്‌.) എന്റെ നാഥന്‍ ജീവിപ്പിക്കുകയും മരിപ്പിക്കുകയും ചെയ്യുന്നവനാകുന്നു എന്ന് ഇബ്രാഹീം പറഞ്ഞപ്പോള്‍ ഞാനും ജീവിപ്പിക്കുകയും മരിപ്പിക്കുകയും ചെയ്യുന്നുവല്ലോ എന്നാണവന്‍ പറഞ്ഞത്‌". [സൂറ 2:258]. ഇങ്ങനെ ധിക്കാരത്തിന്റെ സ്വരമുയര്‍ത്തിയ നമ്രൂദ് ഒടുവില്‍ പരാജയത്തിന്‍റെ പടുകുഴിയിലാപതിച്ചു.

ഇബ്രാഹിമിന്റെ മാര്‍ഗം വിജയത്തിന്‍റെ പാതയാണ്. അത് തെരെഞ്ഞെടുക്കുന്നതോട്കൂടി ഒരാള്‍ വിശ്വാസത്തിന്‍റെ മഹത്വം തിരിച്ചറിയുന്നു. ആദര്‍ശത്തിന്റെ ശക്തി ഹൃദയത്തിലേറ്റുന്നു. പ്രവര്‍ത്തനഗോദയിലവന്‍ ഓടിയിറങ്ങുന്നു. നന്മകളുടെ സന്ദേശവാഹകനും തിന്മകളുടെ നൃശംസകനുമായിത്തീരുന്നു. ഖുര്‍ആന്‍ എടുത്തുപറയുന്നതും അത് തന്നെയാണ്. "സദ്‌വൃത്തനായിക്കൊണ്ട് തന്‍റെ മുഖത്തെ അല്ലാഹുവിന് കീഴ്പെടുത്തുകയും, നേര്‍മാര്‍ഗത്തിലുറച്ച് നിന്ന് കൊണ്ട് ഇബ്രാഹീമിന്‍റെ മാര്‍ഗത്തെ പിന്തുടരുകയും ചെയ്തവനേക്കാള്‍ ഉത്തമ മതക്കാരന്‍ ആരുണ്ട്‌? അല്ലാഹു ഇബ്രാഹീമിനെ സുഹൃത്തായി സ്വീകരിച്ചിരിക്കുന്നു"[സൂറ 4:125]. അല്ലാഹുവിന്റെ കൂട്ടുകാരനായി വിശേഷിപ്പിക്കപ്പെടാന്‍മാത്രം മഹത്വം അദേഹത്തിനു നേടിക്കൊടുത്തത് സത്യമാര്‍ഗത്തിന്റെ വിശുദ്ധിയും ആദര്‍ശത്തിന്റെ തെളിച്ചവുമായിരുന്നു.

താനറിഞ്ഞ സത്യം തന്‍റെ ചുറ്റിലുമുള്ളവരുമായി പങ്കുവെച്ച ഇബ്രാഹിം നബി (അ) തന്‍റെ പ്രബോധനത്തിനു തുടക്കംകുറിക്കുന്നത് തന്‍റെ കുടുംബത്തില്‍നിന്നാണ്. പിതാവിനോടും കുടുംബത്തോടും അറിഞ്ഞനുഭവിച്ച സത്യം തുറന്നു പറഞ്ഞതിനാല്‍ ജീവിതസുരക്ഷപോലും അദ്ദേഹത്തിന് മുന്നില്‍ ചോദ്യചിഹ്നമായി അവശേഷിച്ചു. എന്നിട്ടും കൂരിരുട്ടിന്‍റെ കാടുപാതകളെ വകഞ്ഞുമാറ്റി വെളിച്ചത്തിന്റെ മെഴുകുതിരിയുമായി അദ്ദേഹം സ്വന്തം സമൂഹത്തിനു വെട്ടമേകിയത് ചരിത്രത്തെ ചേതോഹരമാക്കിത്തീര്‍ക്കുന്നു.

കാലങ്ങള്‍ക്ക് ശേഷവും ഇബ്രാഹിമിന്‍റെ ജീവിതം നമുക്ക്മുന്നില്‍ തിളങ്ങിനില്‍ക്കുന്നു. ചരിത്രം വിസ്മയിച്ചു നിന്ന്പോയ ജീവിതമായിരുന്നു അദ്ദേഹത്തിന്‍റെത്. വിശുദ്ധ ഖുര്‍ആനില്‍ 25 സൂറത്തുകളിലായി 69 തവണ ആവര്‍ത്തിച്ച നാമമാണ് അദ്ദേഹത്തിന്‍റെത്. ബഹുദൈവവാദികളെ ആദര്‍ശത്തിന്റെ മഹത്വംകൊണ്ട് നേരിട്ട അദ്ദേഹം സത്യത്തിന്‍റെ ഉദയസൂര്യനായി അവര്‍ക്ക്ചുറ്റിലും പ്രഭപരത്തിയതിനാണ് കാലം പിന്നീട് സാക്ഷിയായത്. ഐതിഹ്യപുരുഷനായിരുന്നില്ല അദ്ദേഹം. ആദര്‍ശപിതാവായിരുന്നു. സ്വന്തം പിതാവിനാല്‍ വീട്ടില്‍നിന്നും ആട്ടിയിറക്കപ്പെട്ടപ്പോഴും സ്വപത്നിയെ വിട്ടു ദൂരദിക്കിലേക്ക് മാറിനില്‍ക്കേണ്ടി വന്നപ്പോഴും സ്വന്തം മകനെ ബലികഴിക്കാന്‍ ആജ്ഞവന്നപ്പോള്‍ അതിനു സന്ദേഹംകൂടാതെ സന്നദ്ധനായതും ചരിത്രം തുളുമ്പുന്ന അക്ഷരങ്ങളാല്‍ എഴുതിവച്ചിട്ടുണ്ട്.

വിശ്വാസത്തെ അറിഞ്ഞനുഭവിക്കാന്‍ കഴിഞ്ഞത്കൊണ്ടാണ് ഇബ്രാഹിംനബിക്ക് തന്‍റെ പ്രബോധനം തുടരാനായത്. ഈരംഗത്ത് ഒട്ടനവധി ത്യാഗം വരിക്കാനും അദേഹത്തിനു മനസ്സുണ്ടായത് അത്കൊണ്ടാണ്. വലിയമനസുള്ളവര്‍ക്കെ ത്യാഗംവരിക്കാന്‍ കഴിയുകയുള്ളൂ. സ്വന്തത്തിന്‍റെ നേട്ടങ്ങള്‍ക്കായി ത്യാഗംചെയ്യാന്‍ അധികംപേരും തയാറാവുമെങ്കിലും സമൂഹത്തിനു സേവനംചെയ്യുന്നതിലോ ദീന്‍ പ്രബോധനംചെയ്യുന്നിടത്തോ ത്യാഗമനുഷ്ടിക്കാന്‍ അധികമാളുകളെ കാണാനാവില്ല. ഉന്നതമായ ഒരാദര്‍ശത്തിലൂടെ ഒരു സമൂഹത്തെ രക്ഷപ്പെടുത്താന്‍വേണ്ടി ഇറങ്ങിത്തിരിച്ച ഇബ്രാഹിംനബിക്ക് കുറെയേറെ ത്യാഗം അനുഷ്ടിക്കേണ്ടതായി വന്നു. അതിനുമാത്രം വിശാലമായ മനസ്സ് അദേഹത്തിനുണ്ടായിരുന്നു എന്നതാണ് അദ്ദേഹത്തിന്‍റെ വിജയം. വീട്ടില്‍നിന്നും ആട്ടിപ്പായിച്ച സ്വന്തം പിതാവിന്വേണ്ടി പ്രാര്‍ഥിക്കാന്‍ കഴിഞ്ഞത് ഇത്തരമൊരു മനസ്സ് അദ്ദേഹത്തിന്‍റെകൂടെ എപ്പോഴും ഉണ്ടായത്കൊണ്ടായിരുന്നു. ഗുണകാംഷാമനസ്ഥിതിയോടെ പ്രബോധിതസമൂഹത്തെ ഉള്‍ക്കൊണ്ടു എന്നത് അദ്ദേഹത്തില്‍നിന്നുള്ള ഒരു വലിയ ജീവിതപാഠമാണ്.

ഏകദൈവ വിശ്വാസത്തിനു വേണ്ടി ആത്മാവ് സമര്‍പ്പിച്ചവനായിരുന്നു അദ്ദേഹം. വിശ്വാസമെന്നത് ഒരു മൂലയില്‍ ചടഞ്ഞുകൂടി ജപിക്കാനുള്ളതല്ലെന്നും മറിച്ചത് ജീവിതത്തില്‍ വഴിവിളക്കായും വീഴ്ച്ചകളിലെ തിരുത്തായും ഉപയോഗപ്പെടുത്തേണ്ടതാണെന്നുമാണ് ആ മഹത്തായ ജീവിതം പഠിപ്പിക്കുന്നത്‌. തന്‍റെ പ്രബോധനത്തിനു നേരെ പ്രതിഷേധത്തിന്‍റെ കൂരമ്പുകള്‍ ഏറ്റപ്പോഴും ജാലകങ്ങള്‍ തുറന്നിട്ട സ്വച്ഛമായ വായുസഞ്ചാരമുള്ള വീടുപോലെ എല്ലാറ്റിനെയും ഉള്‍ക്കൊള്ളാവുന്ന തലത്തിലേക്ക് വളര്‍ന്നു പന്തലിച്ച ആ ജീവിതം സമൂഹത്തിനുമീതെ തണല്‍ വിരിച്ചു. ഈ തണലില്‍ വന്നുചേരാനാണ് മതം നമ്മോടു ആവശ്യപ്പെടുന്നത്.

ജനക്കൂട്ടത്തെ ആവേശം കൊള്ളിക്കാനുള്ള ചെപ്പടിവിദ്യകളായിരുന്നില്ല അദ്ദേഹം നടത്തിയിരുന്നത്. മറിച്ചു, ഉന്നതമായ വിശ്വാസത്തിന്‍റെ തണലില്‍ നിര്‍ഭയരായി ജീവിക്കാനുള്ള സാധ്യതയിലേക്ക് ഒരു സമൂഹത്തെ വഴിനടത്തുകയായിരുന്നു അദ്ദേഹം. ഏകദൈവവിശ്വാസത്തില്‍ മാത്രമാണ് തീരാത്ത സമാധാനമുള്ളതെന്നുമായിരുന്നു അദ്ദേഹം ഓര്‍മ്മപ്പെടുത്തിയിരുന്നത്. കരുതിവെപ്പുകളെ ബലികൊടുക്കാനുള്ള അദ്ദേഹത്തിന്‍റെ സന്നദ്ധതയാണ് ഓരോ ബലിപെരുന്നാളിലും തെളിഞ്ഞുകത്തുന്നത്.

ഇബ്രാഹിമി സ്മരണകള്‍ ജീവിതത്തിനു ആവേശം നല്‍കണം. സമരോല്‍സുകമായ ജീവിതം; ആദര്‍ശജീവിതത്തെ സന്ദേശമായും ഏകദൈവത്തെ ഉന്നതനായും വിഗ്രഹങ്ങളെ ഒന്നിനും കൊള്ളാതവയായും ചിത്രീകരിച്ച ജീവിതം; സമാധാനത്തിനര്‍ഹര്‍ ആരാണെന്നും സൃഷ്ടികളില്‍ ഉത്തമര്‍ ആരാണെന്നും കാണിച്ചുതന്ന ജീവിതം; അടുപ്പത്തിന്റെ അളവ്കോലുകള്‍ക്കപ്പുറത്ത് അല്ലാഹുവിന്‍റെ കൂട്ടുകാരനെന്ന അപൂര്‍വ ബഹുമതിക്ക് അര്‍ഹതകിട്ടിയ ജീവിതം; ചരിത്രം കൈകൂപ്പി നില്‍ക്കുന്ന വിസ്മയ ജീവിതം. ഇബ്രാഹിമിന്‍റെ ജീവിതം ഒരു സമൂഹത്തിന്‍റെ ചരിത്രമായി മാറിയതും ഒരു സന്ദേശമായി വികാസംകൊണ്ടതും അദ്ദേഹം കൂടെ കരുതിയ വിശ്വാസത്തിന്‍റെ കരുത്തിലായിരുന്നു.

ഇബ്രാഹിം നബിയുടെ ജീവിത സന്ദേശമാണ് ഈദ് സുദിനത്തിലും നാം അനുസ്മരിക്കുന്നത്‌. ഈദ് വിപ്ലവത്തിന്റെ വിളംബര ശബ്ദമാണ്. ജീവിതത്തിന്‍റെ ആദര്‍ശം സ്നേഹനിധിയായ അല്ലാഹുവാണെന്ന നിര്‍ണയത്തെ സാക്ഷ്യപ്പെടുത്തുകയാണ് ഓരോ തക്ബീര്‍ മന്ത്രധ്വനികളും. ആക്രമണങ്ങളെയും അധിനിവേശങ്ങളെയും പ്രകോപനങ്ങളേയും പ്രീണനങ്ങളേയും ദൌര്‍ബല്യങ്ങളെയും പ്രതിരോധിക്കാനാണവ ഊര്‍ജംനല്‍കുന്നത്.

പുതിയ പ്രതീക്ഷകളെയും പുതിയ പുലരികളെയുമാണ് ഈദ് നമ്മുടെമുന്നില്‍ വരച്ചുകാട്ടുന്നത്. ആണും പെണ്ണും വൃദ്ധരും കുട്ടികളും ഒരു സാഗരംപോലെ ഒത്തുചേര്‍ന്ന് തോളോട്തോളുരുമ്മിനിന്ന് പോര്‍ക്കളത്തിലെന്നപോലെ അണിചേരുമ്പോള്‍ ഈദ് ഐക്യത്തിന്‍റെതു കൂടിയാവുന്നു. പരസ്പരസ്നേഹവും സൌഹാര്‍ദ്ധവുമാണ് അത് വിളംബരം ചെയ്യുന്നത്.

നോവുന്ന ഹൃദയത്തെ സമാശ്വസിപ്പിക്കുവാനും കരയുന്നവന്റെ കണ്ണീരൊപ്പാനും സാധിക്കാത്തവന് വിശ്വാസിയാവാന്‍ കഴിയില്ല. കരഞ്ഞുകലങ്ങിയ കണ്ണുമായി ഈദ് ദിനം കൊണ്ടാടുന്ന ചിലരെങ്കിലും നമ്മോടൊപ്പം ഇന്നുമുണ്ട്. ഓര്‍ക്കുക നാം. ഈ ബലിപെരുന്നാള്‍ സുദിനത്തില്‍ ഇബ്രാഹീമുമാരായിത്തീരാനുള്ള ഇച്ചാശക്തിയാണ് നാം കാണിക്കേണ്ടത്. ദുരാചാരങ്ങള്‍ക്കും പൈശാചികഇറക്കുമതികള്‍ക്കും അനാചാരങ്ങള്‍ക്കുമെതിരെ പടയണിചേരുക നാം. സകലമാന അടിമപ്പെടുത്തലുകള്‍ക്കുമെതിരെ ഇതാ ജിഹാദ് പ്രഖ്യാപിക്കപ്പെട്ടിരിക്കുന്നു. അല്ലാഹു അക്ബര്‍, വലില്ലാഹില്‍ഹംദ്.

by ജംഷിദ് നരിക്കുനി @ പുടവ മാസിക

ഹജ്ജ് : ചിന്താബന്ധുരമായ തീര്‍ഥാടനം

തീര്‍ഥാടനം പുണ്യകര്‍മ്മമായി കാണാത്ത മതങ്ങള്‍ വിരളമാണ്. ജീവിതത്തിന്റെ സായന്തനത്തില്‍ തീര്‍ഥാടനം നടത്തി നിര്‍വാണം കാത്തിരിക്കുന്ന മതവിശ്വാസവും മനുഷ്യര്‍ക്കിടയിലുണ്ട്. ഇസ്ലാം തീര്‍ഥാടനത്തിന്റെ കാര്യത്തിലും മാതൃകയായി നിലകൊള്ളുന്നു. ഹജ്ജ് കര്‍മ്മമാണ് ഇസ്ലാം നിശ്ചയിച്ച തീര്‍ഥാടനം. ഇത് ജീവിതത്തില്‍ ഒരിക്കല്‍ മാത്രമേ നിര്‍ബന്ധമുള്ളു.

നിര്‍ണിതമായ ദിവസങ്ങളില്‍ നിശ്ചിത സ്ഥലത്ത്വച്ച് - അഥവാ പരിശുദ്ധ ഹറമിലും പരിസരത്തും ദുല്‍ഹിജ്ജ 8 മുതല്‍ 13 വരെ - മാത്രമേ അത് നിര്‍വഹിക്കുവാന്‍ കഴിയൂ. ആയതിനാല്‍ ഹജ്ജ് നിര്‍ബന്ധമാക്കി നിശ്ചയിച്ച അറിയിപ്പിന്റെ കൂടെ അല്ലാഹു ഉണര്‍ത്തുന്നു : 'മാര്‍ഗം സൌകര്യപ്പെട്ടു കിട്ടിയവര്‍ക്ക്' മാത്രമേ ഹജ്ജ് നിര്‍ബന്ധമുള്ളൂ. ശാരീരികവും മാനസികവും സാമ്പത്തികവും സാങ്കേതികവുമായ സൌകര്യങ്ങള്‍ ഒത്തിണങ്ങാതെ ഹജ്ജ് നിര്‍വഹിക്കാന്‍ കഴിയില്ലല്ലോ.

ലോകത്തിലെ ഏറ്റവും വലിയ മനുഷ്യസംഗമം ഹജ്ജ് ആണ്. പ്രപഞ്ചസൃഷ്ടാവായ ദൈവത്തിന്റെ ഏകത്വം അംഗീകരിക്കുകയും അത് പ്രഖ്യാപിക്കുകയും ചെയ്യുന്ന ഒരു കര്‍മ്മമാണ് ഹജ്ജ്. ശരീരവും മനസ്സും ഒരു പോലെ പാകപ്പെടുത്തി എടുത്ത് ആഴ്ചകളോളം ഹജ്ജിനു വേണ്ടി മാത്രമായി മാറി നില്‍ക്കുന്ന ഹജ്ജിനു മഹത്തായ പ്രതിഫലമാണ് അല്ലാഹു വാഗ്ദാനം ചെയ്തിരിക്കുന്നത്. നവജാത ശിശുവിന്റെ നൈര്‍മല്ല്യം! അതോടൊപ്പംതന്നെ ഹജ്ജ് നിര്‍വഹണത്തിലൂടെ കരഗതമാകുന്ന നിരവധി വ്യക്തിത്വഗുണങ്ങളുമുണ്ട്. വൈവിധ്യം നിറഞ്ഞ ലോകത്ത് നിന്ന് ഒരേ വേഷവും ഒരേ ചിന്തയും ഒരേ മന്ത്രവുമായെത്തുന്ന ലക്ഷക്കണക്കിന് ഹാജിമാര്‍ പ്രകടിപ്പിക്കുന്നത് വിശ്വാസസാഹോദര്യമാണ്. വി ഐ പി ലോഞ്ചുകളോ മെറ്റല്‍ ടിറ്റക്റ്റരു കളോ ഇല്ലാത്ത പ്രവിശാലമായ മനുഷ്യസാഗരത്തില്‍ - ഹജ്ജിന്റെ കര്‍മ്മ വീഥിയില്‍ - സമത്വത്തിന്റെ സദ്ഭാവന കര്‍മ്മപദത്തില്‍ വരികയാണ്.

ഹജ്ജ് സംഗമത്തിനായി അല്ലാഹു നിശ്ചയിച്ച സ്ഥലം ഭൂമി ശാസ്ത്രപരമായും ചരിത്രപരമായും പ്രാധാന്യമേറിയ ഒരു പ്രദേശമാണ്. 4000 വര്‍ഷം മുമ്പ് ഇറാഖില്‍ നിന്നെത്തിയ ഇബ്രാഹിം (അ) എന്ന പ്രവാചകന്‍റെ ഭാര്യയും പിഞ്ചുകുഞ്ഞുമാണ് മക്കയിലെ ആദ്യ നിവാസികള്‍. സംസം നീരുറവയും ഖഅ'ബ എന്ന ആരാധനാലയവും ആ നാടിനെ വിശുദ്ധവും പ്രസിദ്ധവുമാക്കി. അറേബ്യന്‍ ചരിത്രത്തിലെ അവിസ്മരണീയ സംഭവമായ ഗജവര്‍ഷ ഗണനയ്ക്കാധാരമായ ആനപ്പടയുടെ തകര്‍ച്ചയും യമന്‍-സിറിയ വ്യാപാരപാതയിലെ നിര്‍ഭയമായ ഇടത്താവളമെന്ന സ്ഥാനവും മക്കാനിവാസികളായ ഖുറൈഷികളുടെ സാമൂഹികജീവിതത്തെ ആഴത്തില്‍ സ്പര്‍ശിച്ച കാര്യങ്ങളായിരുന്നു. ഒന്നര സഹസ്രാബ്ദം മുന്‍പ് അന്തിമ പ്രവാചകന്‍ മുഹമ്മദ്‌ നബി (സ) നിയുക്തനാവുന്നതും ഇവിടെത്തന്നെ. നമസ്കാരത്തിലെ ഖിബ്'ലയും ഹജ്ജിന്‍റെ കേന്ദ്രവും ആ മന്ദിരം ആയിത്തീര്‍ന്നതും യാദ്രിശ്ചികമല്ല.

by സി പി ഉമര്‍ സുല്ലമി @ അത്തൌഹീദ് മാസിക

ഖബര്‍ സിയാറത്തും ഖബര്‍ പൂജയും

പകലന്തിയോളം ജനനിബിഡമായിരുന്നു ആ മഖ്‌ബറ. ആണും പെണ്ണും അത്യധികമായ ഭയക്തി ബഹുമാനത്തോടെ മഖാമിന്റെ പരിസരത്ത്‌ പ്രാര്‍ഥനയിലും ഖുര്‍ആന്‍ പാരായണത്തിലും നിരതരായിരുന്നു. മഖാമിനകത്തെ ഇടുങ്ങിയ മുറിയില്‍ ഖബറിനെ വലംവെക്കാനും ഖബറിന്‌ മുന്നില്‍ സുജൂദില്‍ വീഴാനും ഖബറിന്‌ മേല്‍ പച്ചപ്പട്ട്‌ വിരിക്കാനും നേര്‍ച്ചപ്പൂവ്‌ വിതറാനും ആളുകള്‍ തിക്കും തിരക്കും കൂട്ടുന്നു. സ്‌ത്രീകള്‍ ഹിജാബിന്റെ നിയമങ്ങളെല്ലാം ലംഘിച്ച്‌ മഖാമിന്റെ മതിലിനോട്‌ ചേര്‍ന്നിരുന്ന്‌ നിലവിളിക്കുന്നു, പ്രാര്‍ഥിക്കുന്നു, ഖുര്‍ആന്‍ ഓതുന്നു, നെഞ്ചത്തടിക്കുന്നു, മതിലില്‍ മുഖമമര്‍ത്തിക്കരയുന്നു, മതിലിനെ പൊത്തിപ്പിടിച്ച്‌ പ്രാര്‍ഥിക്കുന്നു, സുജൂദ്‌ ചെയ്യുന്നു, മഖാമിന്‌ നേരെ തിരിഞ്ഞ്‌ നമസ്‌കരിക്കുന്നു. അവരിലധികവും യുവതികള്‍! ആരും അവരെ വിലക്കുകയോ തടയുകയോ ചെയ്യുന്നില്ല. ആണും പെണ്ണുമായി, പണ്ഡിതരും പാമരരുമായി, പുരോഹിതരും പൂജാരികളുമായി നൂറുകണക്കിനാളുകള്‍ അവിടെയുള്ള രണ്ട്‌ മഖ്‌ബറകളെ ചുറ്റിപ്പറ്റി അപ്പോഴവിടെയുണ്ടായിരുന്നു.

അല്ലാഹുവിന്‌ ഏറ്റവും വെറുപ്പുള്ള ശിര്‍ക്ക്‌ നഗ്നതാണ്ഡവം നടത്തുന്ന ഈ മഖാം പരിസരത്ത്‌ അധികസമയം നില്‍ക്കാന്‍ തോന്നിയില്ല. അല്ലാഹുവിന്റെ ശിക്ഷയിറങ്ങുമോ എന്ന ഭയം നിമിത്തം വേഗം പുറത്തുകടന്നു. ഇസ്‌ലാമിന്റെയും മുസ്‌ലിംകളുടെയും പേരില്‍ നടക്കുന്ന ബഹുദൈവത്വ ജീര്‍ണത നേരില്‍ കാണാനുള്ള ഭാഗ്യമോ നിര്‍ഭാഗ്യമോ ഓര്‍ത്ത്‌, സമുദായത്തിന്റെ ഗതിയോര്‍ത്ത്‌ ലജ്ജിച്ച്‌ അവിടെ നിന്നും പുറത്തുകടന്നു.

ഡല്‍ഹിയിലെ നിസാമുദ്ദീന്‍ ഔലിയയുടെ മഖ്‌ബറയില്‍ നിന്നുള്ള അനുഭവമാണിത്‌. ഉത്സവങ്ങളും ഉറൂസുകളും നടത്തി പരിപാലിക്കപ്പെടുകയും പരിപോഷിപ്പിക്കപ്പെടുകയും ഖബര്‍ സിയാറത്താണെന്നും മഖ്‌ബറകളില്‍ മറമാടപ്പെട്ട മഹാന്മാരെ മുന്‍ നിര്‍ത്തി അല്ലാഹുവിനോട്‌ `തവസ്സുല്‍' ചെയ്‌തു പ്രാര്‍ഥിക്കുകയാണെന്നും അതില്‍ തെറ്റൊന്നുമില്ലെന്നുമാണ്‌ യാഥാസ്ഥിതിക പണ്ഡിതന്മാരുടെ പക്ഷം.

എന്നാല്‍ പ്രവാചകന്റെ(സ) കാലത്ത്‌ മക്കയിലെ ബഹുദൈവാരാധകര്‍ ഇബ്‌റാഹീം, ഇസ്‌മാഈല്‍(അ) തുടങ്ങിയ നബിമാരുടെയും ലാത്ത, ഉസ്സ തുടങ്ങിയ മഹാന്മാരുടെയും പ്രതിമകളുണ്ടാക്കി അവരോട്‌ പ്രാര്‍ഥിക്കുകയും അവരിലേക്ക്‌ നേര്‍ച്ച നേരുകയും ചെയ്‌തതിനെപ്പറ്റി അവരുടെ വാദഗതികള്‍ എന്തായിരുന്നുവെന്ന്‌ വിശുദ്ധ ഖുര്‍ആന്‍ പറയുന്നത്‌ നോക്കുക: ``അല്ലാഹുവിന്‌ പുറമെ അവര്‍ക്ക്‌ ഉപകാരമോ ഉപദ്രവമോ ചെയ്യാത്തവയെയാണ്‌ അവര്‍ ആരാധിക്കുന്നത്‌. ഇവര്‍ അല്ലാഹുവിങ്കല്‍ ഞങ്ങളുടെ ശുപാര്‍ശകരാണ്‌ എന്നവര്‍ പറയുകയും ചെയ്യുന്നു. (നബിയേ) പറയുക: ആകാശങ്ങളിലും ഭൂമിയിലും അല്ലാഹുവിനറിയാത്തത്‌ നിങ്ങളവനെ അറിയിക്കുകയാണോ? അവനത്രെ പരിശുദ്ധന്‍. അവര്‍ പങ്കുചേര്‍ക്കുന്നതില്‍ നിന്നെല്ലാം അല്ലാഹു ഉന്നതനായിരിക്കുന്നു.'' (യൂനുസ്‌ 18)

``അല്ലാഹുവിന്‌ പുറമെ രക്ഷാധികാരികളെ സ്വീകരിച്ചവര്‍ (പറഞ്ഞിരുന്നത്‌) ഇവര്‍ അല്ലാഹുവിലേക്ക്‌ ഞങ്ങളെ അടുപ്പിക്കുവാന്‍ വേണ്ടി മാത്രമാണ്‌ ഇവരെ ഞങ്ങള്‍ ആരാധിച്ചിരുന്നത്‌ എന്നാണ്‌.'' (സുമര്‍ 3)

മഹാന്മാരായ അമ്പിയാക്കളുടെയും ഔലിയാക്കളുടെയും ബിംബങ്ങളുണ്ടാക്കി പൂജിച്ചപ്പോള്‍ മക്കയിലെ ബഹുദൈവ വിശ്വാസികള്‍ പറഞ്ഞ ഇതേ മറുപടി തന്നെയാണ്‌ ജാറങ്ങളില്‍ ആഗ്രഹസഫലീകരണത്തിന്‌ പോകുന്നവര്‍ക്കും പറയാനുള്ളത്‌. മരണ സ്‌മരണയുണര്‍ത്താനും പരലോക ചിന്തയുണ്ടാക്കാനുമാണ്‌ ഖബര്‍ സിയാറത്ത്‌ നബി(സ) സുന്നത്താക്കിയത്‌. ഇക്കാര്യം സ്വഹീഹായ ഹദീസുകളില്‍ സ്ഥിരപ്പെട്ടതാണ്‌. ഖബര്‍ സിയാറത്തിനെ ആരും എതിര്‍ത്തിട്ടില്ല, എതിര്‍ക്കുന്നുമില്ല. എന്നാല്‍ നിസാമുദ്ദീന്‍ ഔലിയയുടെ ദര്‍ഗയിലും മറ്റും നടക്കുന്നത്‌ ഖബര്‍ സിയാറത്തല്ല, ഖബര്‍പൂജയാണ്‌. ഓരോ ദിവസവും ആയിരക്കണക്കിന്‌ പച്ചത്തുണികളാണ്‌ നേര്‍ച്ചയായി ആ മഖ്‌ബറയില്‍ സമര്‍പ്പിക്കപ്പെടുന്നത്‌. കഅ്‌ബയുടെ പരിസരത്ത്‌ പോലും കാണാത്ത അതിരുവിട്ട ഭക്തി പാരവശ്യമാണ്‌ ദര്‍ഗകളില്‍ കാണുന്നത്‌. ഇവരെ സേവിക്കാന്‍ കുറെ മുസ്‌ലിം `പൂജാരി'മാരുമുണ്ട്‌.

പ്രവാചകന്റെ(സ) അന്തിമ വസിയ്യത്തിനെ കാറ്റില്‍ പറത്തി ഇത്തരം മഖ്‌ബറകള്‍ പൂജാകേന്ദ്രങ്ങളാകുകയാണ്‌! ഇതിനെ ന്യായീകരിക്കാന്‍ കുറെ പുരോഹിതന്മാരും. മുസ്‌ലിംകള്‍ അധസ്ഥിതരും നിന്ദിതരുമാകാന്‍ വേറെ കാരണം തെരയുന്നതെന്തിന്‌? ദൈവിക കാരുണ്യത്തില്‍ നിന്ന്‌ മുസ്‌ലിംകള്‍ അകറ്റപ്പെടാനും ദൈവകോപത്തിന്റെ കാഹളം മുഴങ്ങാനും ഇതില്‍പരം കാരണം വേറെയന്തിന്‌? സമുദായത്തിന്റെ അസ്‌തിത്വം നിലനിര്‍ത്താന്‍ ഇസ്‌ലാമിനോട്‌ സ്‌നേഹമുള്ള, പരലോകബോധമുള്ള മുസ്‌ലിംകളെല്ലാം ഈ കടുത്ത തിന്മക്കെതിരെ ഒറ്റക്കെട്ടായി പ്രതികരിക്കേണ്ടിവരും. ഇതിനോട്‌ മൗനം പാലിക്കുകയോ ഇതിനെ ന്യായീകരിക്കുകയോ ചെയ്യുന്ന പുരോഹിതന്മാരുടെ താല്‌പര്യം ഇസ്‌ലാമിനു പുറത്താണ്‌. ഇത്തരം ദുരാചാരകേന്ദ്രങ്ങളുടെ പാര്‍ശ്വവര്‍ത്തികളായി ജീവിക്കുകയും ഇതിലൂടെ വരുന്ന അവിഹിത വരുമാനത്തിന്റെ വിഹിതം പങ്കിട്ടെടുത്ത്‌ ജീവിതം തള്ളിനീക്കുകയും ചെയ്യുന്നവരാണിവരിലധിക പേരും. പരലോകത്തെക്കാള്‍ ഇഹലോകത്തിന്‌ മുന്‍ഗണന കൊടുക്കുന്ന ഇത്തരം പണ്ഡിത പുരോഹിതന്മാരില്‍ നിന്ന്‌ ഒരു ഗുണവും ഇസ്‌ലാമിക സമൂഹത്തിനുണ്ടാകില്ലെന്നുറപ്പാണ്‌.

സുന്നത്തായ ഖബര്‍ സിയാറത്തും ശിര്‍ക്കിലേക്ക്‌ നയിക്കുന്ന ഖബര്‍ പൂജയും തമ്മിലുള്ള വ്യത്യാസം വ്യക്തമാക്കിത്തരുന്ന ഏതാനും പ്രമാണ വാക്യങ്ങള്‍ താഴെ:

``നബി(സ) പറഞ്ഞു: ഞാന്‍ നിങ്ങളോട്‌ ഖബര്‍ സിയാറത്ത്‌ നിരോധിച്ചിരിക്കുന്നു. ഇനി നിങ്ങള്‍ ഖബ്‌റുകള്‍ സന്ദര്‍ശിച്ചുകൊള്ളുവിന്‍. അത്‌ നിങ്ങളെ മരണത്തെ ഓര്‍മിപ്പിക്കുന്നതാണ്‌.'' (തിര്‍മുദി, മുസ്‌ലിം)

``ജാബിര്‍(റ) പറയുന്നു: ഖബ്‌റുകള്‍ കുമ്മായമിടുക, അതിന്മേല്‍ വല്ലതും നിര്‍മിക്കുക എന്നിവ നബി(സ) നിരോധിച്ചിരിക്കുന്നു.'' (മുസ്‌ലിം)

``നബി(സ) പറഞ്ഞു: അവര്‍ (ജൂത, ക്രിസ്‌ത്യാനികള്‍) അവരുടെ പ്രവാചകന്മാരുടെയും സജ്ജനങ്ങളുടെയും ഖബ്‌റുകള്‍ പ്രാര്‍ഥനാ മന്ദിരങ്ങളാക്കി. എന്നാല്‍ നിങ്ങള്‍ ഖബ്‌റുകളെ പ്രാര്‍ഥനാ മന്ദിരങ്ങളാക്കരുത്‌. ഞാന്‍ അതിനെ നിങ്ങളോട്‌ നിരോധിക്കുന്നു.'' (മുസ്‌ലിം)

``നബി(സ) പ്രഖ്യാപിച്ചു: മൂന്ന്‌ പള്ളികളിലേക്കല്ലാതെ പുണ്യ തീര്‍ഥാടനം പാടില്ല. മസ്‌ജിദുല്‍ ഹറാം, എന്റെ ഈ പള്ളി (മസ്‌ജിദുന്നബവി), മസ്‌ജിദുല്‍ അഖ്‌സ എന്നിവയാണത്‌.'' (ബുഖാരി, മുസ്‌ലിം)

മക്കയിലെ ബഹുദൈവാരാധകര്‍ മഹാന്മാരുടെ ബിംബങ്ങളുണ്ടാക്കി അവയെ വന്ദിക്കുകയും ആരാധിക്കുകയും ചെയ്‌ത സംഭവം വിവരിച്ച ശേഷം ഇമാം റാസി(റ) പറയുന്നു: മഹാത്മാക്കളുടെ ഖബ്‌റുകളെ വന്ദിച്ചാല്‍ അവര്‍ തങ്ങള്‍ക്ക്‌ അല്ലാഹുവിന്റെ അടുക്കല്‍ ശുപാര്‍ശക്കാരാകുമെന്ന വിശ്വാസത്തില്‍ അവരുടെ ഖബ്‌റുകളെ വന്ദിക്കുന്നതില്‍ അനേകമാളുകള്‍ ഇക്കാലത്ത്‌ വ്യാപൃതമായിരിക്കുന്നത്‌ ഇതിന്‌ തുല്യമായത്‌ തന്നെയാണ്‌'' (തഫ്‌സീറുല്‍ കബീര്‍)

ഇതുപോലുള്ള നിരവധി വാക്യങ്ങളില്‍ നിന്ന്‌ വ്യക്തമാകുന്നത്‌ മരണസ്‌മരണയും പരലോക ബോധവുമുണ്ടാക്കാന്‍ വേണ്ടി മുസ്‌ലിംകള്‍ മഖ്‌ബറകള്‍ സന്ദര്‍ശിക്കല്‍ സുന്നത്താണെന്നും ഖബ്‌റാളികള്‍ക്ക്‌ വേണ്ടി പ്രാര്‍ഥിക്കണമെന്നും മഹാന്മാരുടെ ഖബ്‌റുകള്‍ പ്രത്യേകം അടയാളപ്പെടുത്തി കെട്ടിപ്പൊക്കി അവരോട്‌ പ്രാര്‍ഥിക്കാന്‍ അവിടേക്ക്‌ പോകുന്നത്‌ കുറ്റമാണെന്നും ദൈവിക കോപത്തിന്‌ ഇടയാക്കുന്ന സംഗതിയാണതെന്നുമാണ്‌. പക്ഷെ, ഇക്കാര്യം സമൂഹത്തെ ബോധ്യപ്പെടുത്തിക്കൊടുക്കേണ്ട പണ്ഡിതന്മാരില്‍ വലിയൊരു വിഭാഗം ഈ കടുത്ത തിന്മയെ ന്യായീകരിക്കുന്നതാണ്‌ നാം കാണുന്നത്‌.

by കെ പി എസ്‌ ഫാറൂഖി @ ശബാബ്

ദൈവത്തോടുള്ള കടമ പാലിക്കുക

"ഇസ്രായീല്‍ സന്തതികളേ, ഞാന്‍ നിങ്ങള്‍ക്ക് ചെയ്തു തന്നിട്ടുള്ള അനുഗ്രഹം നിങ്ങള്‍ ഓര്‍മിക്കുകയും, എന്നോടുള്ള കരാര്‍ നിങ്ങള്‍ നിറവേറ്റുകയും ചെയ്യുവിന്‍. എങ്കില്‍ നിങ്ങളോടുള്ള കരാര്‍ ഞാനും നിറവേറ്റാം. എന്നെ മാത്രമേ നിങ്ങള്‍ ഭയപ്പെടാവൂ". [അദ്ധ്യായം 2 ബഖറ 40]

യഅ'ഖൂബ് നബി (അ)യുടെ മറ്റൊരു പേരായിരുന്നു ഇസ്റാഈല്‍ എന്നത്. ഇസ്റാഈല്‍ സന്തതികള്‍ എന്നാണു ബനൂഇസ്രാഈല്‍ എന്ന വാക്കിനര്‍ത്ഥം. അല്ലാഹുവിന്‍റെ മിത്രം എന്ന് വിശേഷിക്കപ്പെട്ട ഇബ്രാഹിം നബി (അ)യുടെ പുത്രന്‍ ഈസ്‌ഹാഖ് (അ)യുടെ മകനാണ് യഅ'ഖൂബ് (അ). യൂസുഫ് നബി (അ) അടക്കമുള്ള യഅ'ഖൂബ് നബിയുടെ മക്കളെയും സന്താനപരമ്പരയെയും പില്‍ക്കാലത്ത്‌ ബനൂഇസ്രാഈല്‍ എന്ന് വിളിക്കപ്പെട്ടുവന്നു.

ഏറ്റവും അധികം പ്രവാചകന്മാര്‍ നിയോഗിക്കപ്പെട്ടത് ഇസ്റാഈല്‍ വംശത്തില്‍ നിന്നായിരുന്നു. അല്ലാഹുവിന്‍റെ അളവറ്റ അനുഗ്രഹങ്ങള്‍ അനുഭവിക്കാന്‍ ഭാഗ്യം ലഭിച്ചവരായിരുന്നു അവര്‍. ഈ അനുഗ്രഹങ്ങള്‍ക്ക് അര്‍ഹമായ നിലയില്‍ നന്ദി കാണിക്കാന്‍ അവര്‍ സന്നദ്ധരായില്ല. അതിനാല്‍ ലഭിച്ച അനുഗ്രഹങ്ങളെ ഓര്‍ത്തുനോക്കാനും അവയ്ക്ക് നന്ദി കാണിക്കാനുമുള്ള ആഹ്വാനമാണ് അല്ലാഹു ഇവിടെ നല്‍കുന്നത്. വചനത്തിലെ അഭിസംബോധന ബനൂഇസ്രാഈല്യരാണെങ്കിലും ഇക്കാലത്തെ മുഴുവന്‍ മനുഷ്യര്‍ക്കും ബാധകമാണിത് എന്നതില്‍ തര്‍ക്കമില്ല.

അല്ലാഹുവിന്‍റെ അളവറ്റ അനുഗ്രഹങ്ങള്‍ അനുഭവിച്ചു കൊണ്ടിരിക്കുന്നവരാണ് നാം. എണ്ണിയാലൊതുങ്ങാത്ത ഇവ നമുക്ക് തന്നത് അല്ലാഹു മാത്രം. അത് ഓര്‍ക്കാനും അവന്‍റെ കല്‍പ്പനകള്‍ അനുസരിച്ചു അവനു നന്ദി കാണിക്കാനും നമുക്ക് ബാധ്യതയുണ്ട്. അല്ലാഹുവിനോട് നാം ചെയ്ത പ്രതിജ്ഞകളും കരാറുകളും പാലിക്കാനും നാം ബാധ്യസ്ഥരാണ്. അല്ലാഹുവാണ് സൃഷ്ടാവ് എന്നത് മനുഷ്യര്‍ അംഗീകരിച്ച ഒരു തത്ത്വമാണെന്ന് ഖുര്‍ആന്‍ സൂചിപ്പിക്കുന്നുണ്ട്. "അല്ലാഹുവേ, നിന്‍റെ പ്രീതി ആഗ്രഹിച്ചു കൊണ്ടാണ് ഞാന്‍ ജീവിക്കുന്നതും മരിക്കുന്നതും ആരാധനകളില്‍ മുഴുകുന്നതും' എന്ന് പ്രതിജ്ഞ ചെയ്യാറുള്ളവനാണ് വിശ്വാസി. ഇത് പാലിക്കേണ്ടത് അവന്‍റെ ചുമതല തന്നെ.

എന്നാല്‍ അല്ലാഹു നമുക്ക് വാഗ്ദാനം ചെയ്യുന്ന മഹത്തായ പ്രതിഫലം അവന്‍ തരുമെന്ന കാര്യത്തില്‍ സംശയം വേണ്ട. "നിങ്ങള്‍ നന്ദി കാണിക്കുന്നവരായാല്‍ ഞാന്‍ കൂടുതല്‍ തന്നു കൊണ്ടിരിക്കും" എന്ന് ഖുര്‍ആന്‍ പറയുന്നു. "എന്‍റെ അടിമ എന്നെ ഏതു രീതിയില്‍ സമീപിക്കുന്നുവോ അതിനനുസരിച്ച സമീപനം എന്‍റെ ഭാഗത്തുമുണ്ടാകും" എന്ന് അല്ലാഹു പറഞ്ഞതായി നബി (സ) പഠിപ്പിക്കുന്നു. ഏതു കാലാവസ്ഥയിലും സാഹചര്യങ്ങളിലും അഭൌതികമായി ഭയപെടെണ്ടവന്‍ അല്ലാഹു മാത്രമാണ്. മനുഷ്യന്‍റെ പ്രയാസങ്ങളും ബുദ്ധിമുട്ടുകളും അല്ലാഹുവിന്‍റെ പരീക്ഷണമായിരിക്കാം. എല്ലാ ചുറ്റുപാടുകളിലും മനുഷ്യന്‍ ഭയപ്പെടേണ്ടത് അല്ലാഹുവിനെ മാത്രമാണ്. അവന്‍റെ അറിവില്‍ പെടാതെ ഒന്നും ചെയ്യാനോ പറയാനോ മനുഷ്യന് കഴിയില്ല. അതിനാല്‍ അവനെ സൂക്ഷിക്കുക. അതാണ്‌ വിജയ മാര്‍ഗം.

by അബ്ദു സലഫി @ പുടവ

മന്ത്രവും ഉറുക്കും

പരിശുദ്ധ ഖുര്‍ആനിലും തിരുസുന്നത്തിലും വന്ന പ്രാര്‍ഥനകള്‍ ചൊല്ലി രോഗശമനത്തിനു വേണ്ടി പ്രാര്‍ഥിക്കുന്നതിനാണ് ഇസ്‌ലാമില്‍ മന്ത്രം എന്ന് പറയുന്നത്. ഇസ്ലാം ഇത് അനുവദിച്ചിട്ടുണ്ട്. ചികിത്സ ചെയ്യുന്നതോടൊപ്പമായിരിക്കണം മന്ത്രമെന്നും പ്രവാചകന്‍ (സ) പഠിപ്പിക്കുന്നു (ബുഖാരി). എന്നാല്‍ മന്ത്രിച്ചശേഷം ശരീരത്തില്‍ എന്തെങ്കിലും കെട്ടുകയോ വെള്ളത്തില്‍ മന്ത്രിച്ചു ഊതിയ ശേഷം വെള്ളം കുടിക്കുകയോ മറ്റോ ചെയ്യുന്നത് ഇസ്ലാം അംഗീകരിക്കുന്നില്ല. വെള്ളം, നൂല്, ഉറുക്കു, ഏലസ്സ്, പിഞ്ഞാണമെഴുത്ത് എന്നിവക്കൊന്നുംതന്നെ ഹദീസിന്റെ യാതൊരു പിന്‍ബലവും കാണാന്‍ സാധിക്കുകയില്ല. പ്രത്യുത ഇവയെല്ലാം ഇസ്ലാം വിരോധിക്കുകയാണ് ചെയ്യുന്നത്.

ഇമ്രാന്‍ (റ) നിവേദനം ചെയ്യുന്നു : ഒരിക്കല്‍ നബി (സ) ഒരു മനുഷ്യന്റെ തോള്‍ കയ്യില്‍ ഒരു വട്ടക്കണ്ണി കാണുകയുണ്ടായി. അപ്പോള്‍ നബി (സ) പറഞ്ഞു : നിനക്ക് നാശം! നിനക്ക് നാശം! എന്താണിത്? അയാള്‍ പറഞ്ഞു : വാതരോഗശമാനത്തിനാണ്. അപ്പോള്‍ റസൂലുല്ലാഹ് (സ) പറഞ്ഞു : ഇത് വാതരോഗത്തെ നിനക്ക് വര്‍ധിപ്പിക്കുക മാത്രമാണ് ചെയ്യുന്നത്. നീ അത് ഊരിയെരിയുക. അതുമായി നീ മരണപ്പെട്ടാല്‍ നീ ഒരിക്കലും വിജയിക്കുകയില്ല.(അഹമദ്, ഇബ്നു ഹിബ്ബാന്‍, ഹാക്കിം)

ഖുര്‍ആന്‍ ഓതി ശരീരത്തില്‍ മന്ത്രിച്ച വട്ടക്കണ്ണിയോ മറ്റോ ബന്ധിപ്പിക്കുന്നത് ഇസ്ലാം അനുവദിച്ചിരുന്നുവെങ്കില്‍ അത് കണ്ട ഉടനെത്തന്നെ നിനക്ക് നാശം എന്ന് നബി (സ) പറയുമായിരുന്നില്ല. ഖുര്‍ആന്‍ കൊണ്ടാണോ നീ ഇത് മന്ത്രിച്ചതെന്നു നബി (സ) ചോദിക്കുന്നുമില്ല. നിരുപാധികം വിരോധിക്കുകയാണ് ചെയ്തത്. പുറമേ ഇദ്ദേഹം ഒരു സഹാബിയാണ്. ശിര്‍ക്കിന്റെ പദം വെച്ചു അദ്ദേഹം ഇപ്രകാരം ശരീരത്തില്‍ ബന്ധിപ്പിക്കുകയില്ല.

ഉഖ്ബത് (റ) നിവേദനം : നബി (സ) അരുളി : ആരെങ്കിലും ശരീരത്തില്‍ ഏലസ്സ് കെട്ടിയാല്‍ അല്ലാഹു അവന്റെ രോഗശമനം പൂര്‍ത്തിയാക്കിക്കൊടുക്കാതിരിക്കട്ടെ. ആരെങ്കിലും രക്ഷാകവടി കെട്ടിയാല്‍ അവന്റെ രോഗത്തെ അല്ലാഹു സുഖപ്പെടുത്താതിരിക്കട്ടെ. (അഹമദ്, ഹാക്കിം). ഈ രണ്ടു ഹദീസുകളും ഇമാം ദഹബി സഹീഹാക്കിയിട്ടുണ്ട്. ഇവിടെയും നബി (സ) ഖുര്‍ആന്‍ കൊണ്ട് മന്ത്രിച്ച ഏലസ്സും രക്ഷാകവടിയും ഒഴിവാക്കുന്നില്ല.

ഹുദൈഫത് (റ) ഒരിക്കല്‍ ഒരു രോഗിയെ സന്ദര്‍ശിച്ചു. അപ്പോള്‍ അദ്ദേഹം രോഗിയുടെ കയ്യിന്മേല്‍ ഒരു നൂല്‍ കണ്ടു. അദ്ദേഹം അത് മുറിച്ചു കളഞ്ഞ ശേഷം ഇപ്രകാരം ഓതി : 'അവരില്‍ അധികമാളുകളും അല്ലാഹുവില്‍ ശിര്‍ക്ക് വെച്ച് കൊണ്ടല്ലാതെ വിശ്വസിക്കുന്നില്ല' [അബൂഹാതിം]

ഒരിക്കല്‍ ഹുദൈഫത് (റ) ഒരു രോഗിയെ സന്ദര്‍ശിച്ചു. അദ്ദേഹം രോഗിയുടെ കയ്യില്‍ തടവിക്കൊണ്ടിരുന്നപ്പോള്‍ കയ്യിന്മേല്‍ ഒരു നൂലുള്ളതായി അദ്ദേഹം കണ്ടു. അദ്ദേഹം ചോദിച്ചു : എന്താണിത്? രോഗി പറഞ്ഞു : മന്ത്രിച്ചു കെട്ടിയതാണ്‌. അപ്പോള്‍ നബി (സ) യുടെ അനുചരനായ അദ്ദേഹം അത് മുറിച്ചു മാറ്റിയശേഷം പറഞ്ഞു : ഈ നൂലുമായി നീ മരിച്ചാല്‍ ഞാന്‍ നിനക്ക് മയ്യിത്ത് നമസ്ക്കരിക്കുകയില്ല. [അബൂഹാതിം]. ഖുര്‍ആന്‍ കൊണ്ട് മന്ത്രിച്ചതാണോ എന്ന് ഈ സഹാബി ചോദിക്കുന്നില്ല. ഇക്കാലത്തെ മുസ്ലിങ്ങള്‍ പോലും ശിര്‍ക്കിന്റെ പദം ഉപയോഗിച്ച് മന്ത്രിച്ച നൂല്‍ ബന്ധിപ്പിക്കാറില്ലെങ്കില്‍ ആ കാലത്തെ മുസ്ലിങ്ങള്‍ ചെയ്തിരുന്നെന്ന് എങ്ങനെ വാദിക്കും?

അബൂബഷീര്‍ (റ) നിവേദനം : അദ്ദേഹം ഒരിക്കല്‍ നബി (സ)യുടെ കൂടെ ഒരു യാത്രയിലായിരുന്നു. തത്സമയം നബി (സ) ഒരു ദൂതനെ അയച്ചു. അയാളോടി ഇപ്രകാരം പറഞ്ഞു : ഒട്ടകത്തിന്റെ ശരീരത്തില്‍ (കണ്‍ണേര്‍) ബാധിക്കാതിരിക്കുവാന്‍ കെട്ടിയിട്ടുള്ള മാലകളും ഞാണും മുറിച്ചു കളയണം. [ബുഖാരി, മുസ്ലിം]. ഖുര്‍ആന്‍ കൊണ്ട് കെട്ടിയതാണെങ്കില്‍ ഒഴിവാക്കാന്‍ നബി (സ) ഇവിടെ നിര്‍ദേശിക്കുന്നില്ല. പുറമേ സഹാബികള്‍ ശിര്‍ക്കിന്റെ പദംകൊണ്ട് മന്ത്രിച്ചു ഇപ്രകാരം ചെയ്യുമെന്ന് വിശ്വസിക്കാന്‍ നമുക്ക് സാധ്യമല്ല.

അബ്ദുള്ള (റ) നിവേദനം : ആരെങ്കിലും ശരീരത്തില്‍ എന്തെങ്കിലും കെട്ടിയാല്‍ (അള്ളാഹു രോഗശമനത്തില്‍ നിന്നൊഴിവായി) ആ വസ്തുവില്‍ ഭരമേല്‍പ്പിക്കപ്പെടും. [അഹമദ്, തുര്‍മുദി]

മുകളില്‍ ഉദ്ധരിച്ച ഹദീസുകളില്‍ നിന്നും നബി (സ)യോ സഹാബികളോ ഒരാളുടെയോ ഒരു മൃഗത്തിന്റെയോ ശരീരത്തില്‍ മന്ത്രിച്ചു കെട്ടിയ നൂലോ ഏലെസ്സോ ഉറുക്കോ വട്ടക്കണ്ണിയോ ഞാണോ കണ്ടാല്‍ അത് ഖുര്‍ആന്‍ കൊണ്ടാണോ അല്ലയോ എന്ന് അന്വേഷിക്കാറില്ലെന്നും നിരുപാധികം അവയെ വിരോധിക്കുകയാണ് പതിവെന്നും വ്യക്തമായി. ഒറ്റ ഹദീസുപോലും ഇപ്രകാരം അന്വേഷിച്ചത് കാണാന്‍ സാധിക്കുകയില്ല. രോഗശമനത്തിനാണോ അല്ലയോ എന്നാണു അന്വേഷിക്കാരുള്ളത്.

ഇമാം ശാഫി (റ) അടക്കം നാല് മദ്ഹബുകളുടെയും ഒരു ഇമാമും ഒരു സഹാബിയെയും കണ്ടുമുട്ടിയിട്ടില്ല. എന്നാല്‍ സഹാബികളെ കണ്ടുമുട്ടിയ ഇബ്രാഹീമുന്നഖ്ഈ (റ) പറയുന്നു : അവര്‍ എല്ലാത്തരം എലെസ്സുകളെയും വെറുത്തിരുന്നു. ഖുര്‍ആന്‍ കൊണ്ടായിരുന്നാലും അല്ലെങ്കിലും. [വകീഅ] അവര്‍ എന്നതുകൊണ്ട് ഉദേശിക്കുന്നത് പ്രഗല്‍ഭ സഹാബികലായ അബ്ദുല്ലഹിബ്നു മസ്ഊദും (റ) അദ്ധേഹത്തിന്റെ പ്രഗല്‍ഭ ശിഷ്യന്മാരായ അല്‍ഖമ, അസ്വദ്, അബൂവാഈല്‍, ഹാരിസ്, ഉബൈദത്, മസ്രൂഖ്, റബീഅ, സുബൈദ് മുതലായവരുമാണ്‌. താബിഈകളുടെ നേതാക്കന്മാര്‍ എന്ന പേരില്‍ ഇവര്‍ അറിയപ്പെടുന്നു. ഖുര്‍ആന്‍ കൊണ്ടായിരുന്നാലും ശരീരത്തില്‍ ഒന്നും മന്ത്രിച്ചു കൊണ്ട് ബന്ധിപ്പിക്കാന്‍ പാടില്ലെന്ന് ഇവര്‍ പറയുന്നു. ഉറുക്കും ഏലസ്സും നൂലും എല്ലാം തന്നെ ഇവിടെ സമമാണ്. ഈ അഭിപ്രായം തന്നെയാണ് ഇബ്നു അബ്ബാസ് (റ, ഹുദൈഫത് (റ), ഉഖ്ബത്ബ്നു ആമിര്‍ (റ), ഇബ്നു ഉകൈം (റ) മുതലായ സഹാബികള്‍ക്കും ഉള്ളത്. ഇമാം അഹമ്ദില്‍ നിന്നും ഈ അഭിപ്രായം ഉദ്ധരിക്കുന്നു. അദ്ധേഹത്തിന്റെ ധാരാളം ശിഷ്യന്മാര്‍ ഈ അഭിപ്രായത്തെ ഖണ്ഡിതമായി തന്നെ പ്രഖ്യാപിക്കുന്നു.

ഈസാ നിവേദനം : ഞാന്‍ അബ്ദുല്ലാഹിബ്നു ഉകൈമിന്റെ (റ) അടുത്ത് പ്രവേശിച്ചു. അദ്ധേഹത്തില്‍ ഉമ്രത് ഉണ്ട്. ഞാന്‍ പറഞ്ഞു : താങ്കള്‍ക്കു ഉറുക്കു ബന്ധിപ്പിച്ചു കൂടെ? അപ്പോള്‍ സഹാബിയായ അദ്ദേഹം പറഞ്ഞു : "അതില്‍ നിന്നും ഞാന്‍ അല്ലാഹുവിനോട് രക്ഷ തേടുന്നു. നബി (സ) പറഞ്ഞു : ആരെങ്കിലും ശരീരത്തില്‍ എന്തെങ്കിലും ബന്ധിപ്പിച്ചാല്‍ അതിന്മേല്‍ ഭരമേല്‍പ്പിക്കപ്പെട്ടു." [അബൂദാവൂദ്]

ഇബ്നു അബ്ബാസ് (റ) പറയുന്നു : ഞാന്‍ മുഅവ്വദതൈനി ഓതി മന്ത്രിക്കും. എന്നാല്‍ ബന്ധിപ്പിക്കുകയില്ല. [വകീഅ]

റുവൈഫിഅ (റ) നിവേദനം : നബി (സ) എന്നോട് പറഞ്ഞു : ആരെങ്കിലും കഴുത്തില്‍ ഞാണ്‍ ബന്ധിപ്പിച്ചാല്‍ മുഹമ്മദിന് അവനുമായി ബന്ധമില്ല. [അഹമദ്, നസാഈ]. ഇവിടെ ഞാണ്‍ എന്നതിന്റെ വിവക്ഷ എലസ്സാണെന്ന് മറ്റൊരു നിവേദനത്തില്‍ പറയുന്നു.

ഇബ്നു മസ്ഊദ്‌ (റ) നിവേദനം : നബി (സ) പറയുന്നതായി ഞാന്‍ കേട്ടു : 'നിശ്ചയം മന്ത്രവും ഏലസ്സും ദമ്പതിമാര്‍ പിണങ്ങിയാല്‍ അവരെ യോജിപ്പിക്കുന്ന മന്ത്രവും ശിര്‍ക്കാണ്‌' [അഹമദ്, അബൂദാവൂദ്]

ഇബ്നു ആമിര്‍ (റ) നിവേദനം : നബി (സ) അരുളി : ...വല്ലവനും ഏലസ്സ് ബന്ധിപ്പിച്ചാല്‍ നിശ്ചയം അവന്‍ ശിര്‍ക്ക് ചെയ്തു. [ഹാകിം]

ഇബ്നു മസ്ഊദ്‌ (റ)വിന്റെ ഭാര്യ സൈനബ (റ) നിവേദനം : ഒരിക്കല്‍ എന്റെ ഭര്‍ത്താവ് ഇബ്നു മസ്ഊദ്‌ (റ) എന്റെ കഴുത്തില്‍ ഒരു നൂല് കണ്ടു. അതെന്താണെന്ന് അദ്ദേഹം ചോദിച്ചപ്പോള്‍ മന്ത്രിചൂദിയതാണെന്ന് ഞാന്‍ പറഞ്ഞു. അപ്പോള്‍ അദ്ദേഹം അത് മുറിച്ചു കളഞ്ഞ ശേഷം ഇപ്രകാരം പറഞ്ഞു : 'നിങ്ങള്‍ അബ്ദുള്ളയുടെ കുടുംബമാണ്. ശിര്‍ക്കിന്റെ ആവശ്യം നിങ്ങള്ക്കില്ല. നബി (സ) പ്രാര്‍ഥിച്ച പോലെ ഇപ്രകാരം പ്രാര്‍ഥിച്ചാല്‍ മതി: ജനങ്ങളുടെ നാഥാ! എന്റെ രോഗം നീ ദുരീകരിക്കണേ, ഒരു രോഗത്തെയും അവശേഷിപ്പിക്കാത്തവിധം നീ എനിക്ക് ശമനം നല്‍കേണമേ, നിന്റെ ശമനമല്ലാതെ യഥാര്‍ത്ഥ ശമനമില്ല. [ഇബ്നു ഹിബ്ബാന്‍, ഹാകിം]. ഇലാഹാക്കിയാല്‍ മാത്രമേ ശിര്‍ക്ക് വരുള്ളൂ എന്ന പുരോഹിദ ജല്പനം ഇവിടെ തകരുന്നു. ഇബ്നു മസ്ഊദിന്‍റെ ഭാര്യ നൂലിനെ ഇലാഹാക്കിയിരുന്നുവെന്നു ഈ പുരോഹിദര്‍ വാദിക്കുമോ? നിനക്ക് ഖുര്‍ആന്‍ കൊണ്ട് നൂല്‍ മന്ത്രിച്ചാല്‍ മതിയായിരുന്നില്ലേ എന്ന് ഈ സഹാബിവര്യന്‍ ഇവിടെ പറയുന്നില്ല.

അബൂ ഹുറൈറ (റ) നിവേദനം : ആരെങ്കിലും എന്തെങ്കിലും ബന്ധിച്ചാല്‍ അതിന്മേല്‍ ഭരമെല്‍പ്പിക്കപ്പെട്ടു. [നസാഈ]. ഈ ഹദീസിനെ വ്യാഖ്യാനിച്ചു നസാഈയുടെ ശര്‍ഹില്‍ എഴുതുന്നു : അബൂബക്കര്‍ (റ) തുര്‍മുദിയുടെ ശര്‍ഹില്‍ പറയുന്നു : ഖുര്‍ആന്‍ ഓതിക്കൊണ്ട് മന്ത്രിച്ചു ശരീരത്തില്‍ ബന്ധിപ്പിക്കല്‍ സുന്നത്തിന്റെ മാര്‍ഗ്ഗമല്ല. [നസാഈ].

by അബ്ദുസ്സലാം സുല്ലമി @ തൌഹീദ്, ഒരു സമഗ്ര വിശകലനം

ആയത്തുല്‍ കുര്‍സിയ്യ്

അല്ലാഹു, അവനല്ലാതെ ഒരു ആരാധ്യനുമില്ല. എന്നെന്നും ജീവിച്ചിരിക്കുന്നവനും സ്വയം ഭൂവുമാകുന്നു. അവനെ മയക്കവും നിദ്രയും പിടികൂടുകയില്ല. അവനുള്ളതാണ് ആകാശത്തിലുള്ളതും ഭൂമിയിലുള്ളതും. ആരുണ്ട് അവന്റെ അനുവാദപ്രകാരമല്ലാതെ അവനോടു ശുപാര്‍ശ ചെയ്യുന്നവന്‍. അവന്‍ അറിയുന്നു; അവരുടെ മുമ്പിലുള്ളതും അവരുടെ പിന്നിലുള്ളതും. അവന്റെ അറിവില്‍ നിന്നും അവന്‍ ഉദ്ദേശിച്ചതല്ലാതെ യാതൊന്നും അവര്‍ പ്രാപിക്കുന്നില്ല. അവന്റെ കുര്‍സിയ്യ് (രാജപീഠം) ആകാശങ്ങള്‍ക്കും ഭൂമിക്കും വിശാലമായിരിക്കുന്നു. അവ രണ്ടിന്റെയും സംരക്ഷണം അവനൊരു ഭാരമാവുകയില്ല. അവന്‍ അത്യുന്നതനും മഹാനുമാകുന്നു. [വിശുദ്ധ ഖുര്‍ആന്‍ അദ്ധ്യായം 2 ബഖറ 255]

മഹത്തായ തത്വതിലേക്ക് ഈ സൂക്തം അറിവ് നല്‍കുന്നു.

1. ദൈവം സ്വയം ഭൂവാന്. അതിനാല്‍ അവനെ ആര് സൃഷ്ടിച്ചു എന്ന ചോദ്യത്തിനു പ്രസക്തിയില്ല.

2. സ്വയം ഭൂവിന്റെ സവിശേഷതകള്‍ അവനില്‍ മാത്രമാണുള്ളത്. പ്രപഞ്ചത്തിനു അതില്ല.

3. മരണം സംഭവിക്കുന്നവന്‍ ദൈവമല്ല. ദൈവത്തെ നിദ്രപോലും പിടികൂടാന്‍ പാടില്ല. യേശുക്രിസ്തു ദൈവമല്ല. ബൈബിളില്‍ തന്നെ പറയുന്നു : "കര്‍ത്താവാണ് നിത്യദൈവം. ഭൂമിയുടെ അറുതികളെ സൃഷ്ടിച്ചവന്‍. അവന്‍ തളരുകയോ ക്ഷീണിക്കുകയോ ചെയ്യുന്നില്ല. അവന്റെ ബുദ്ധി അപ്രമേയമാണ്‌" [യെശയ്യാ 40:28]. "ഞാനാണ് ആദിമനും അന്തിമനും. ഞാനല്ലാതെ ദൈവം ഇല്ല. എന്നെപ്പോലെ ആരുണ്ട്?" [44:6]. "കര്‍ത്താവാണ് സത്യദൈവം. അവനാണ് ജീവനുള്ള ദൈവം; നിത്യരാജാവ്" [യിരെമ്യാ 10 :10]. "കര്‍ത്താവേ, എന്റെ ദൈവമേ, എന്റെ പരിശുദ്ധനായവനെ, നീ അനാദി മുതല്‍ ഉള്ളവന്‍ അല്ലെ. നീ അമര്‍ത്യന്‍" [ഹബക്കൂക്ക് 1:12]. യേശു ക്രിസ്തുവിനു മരണം സംഭവിച്ചിട്ടുണ്ടെന്ന് ബൈബിള്‍ തന്നെ പറയുന്നു. ഓശാന പ്രസിദ്ധീകരിച്ച ബൈബിളില്‍ "യേശിവിന്റെ മരണം' എന്നൊരു അദ്ധ്യായം തന്നെ കാണാം. ശേഷം എഴുതുന്നു : "അവന്‍ തലകുനിച്ചു പ്രാണന്‍ വെടിഞ്ഞു" [യോഹന്നാന്‍ 19 :30].

4. ഉറക്കം ബാധിച്ചവനെ വരെ വിളിച്ചാല്‍ കേള്‍ക്കുകയില്ല. അതിനാല്‍ ദൈവം മാത്രമാണ് വിളിച്ചുതേടല്‍ കേള്‍ക്കുന്നവന്‍.

5. പരലോകത്തെ ശുപാര്‍ശയും ഭൌതിക ലോകത്തെ ശുപാര്‍ശയും തമ്മില്‍ ധ്രുവങ്ങള്‍ തമ്മിലുള്ള വ്യത്യാസമുണ്ട്. അല്ലാഹുവിന്റെ അനുവാദത്തിനു ശേഷം അവന്‍ തൃപ്തിപ്പെട്ടു നിര്‍ദ്ദേശിക്കുന്നവര്‍ക്കു മാത്രമാണ് മുഹമ്മദ്‌ നബി (സ) വരെ ശുപാര്‍ശ ചെയ്യുക.

6. പ്രപഞ്ചത്തിന്റെ മുഴുവന്‍ അധികാരമുള്ളവന്‍ മാത്രമേ ദൈവമാവുകയുള്ളൂ.

by അബ്ദുസ്സലാം സുല്ലമി @ ഖുര്‍ആനിന്റെ വെളിച്ചം

പ്രാര്‍ത്ഥന : അര്‍ത്ഥവും ഉദ്ദേശവും

പ്രാര്‍ത്ഥന എന്ന പദത്തിനു അപേക്ഷ, യാചന എന്നെല്ലാം അര്‍ത്ഥങ്ങളുണ്ട്. ഭാഷാപരമായി പ്രാര്‍ത്ഥനക്ക് ഇവ്വിദമുള്ള അര്‍ത്ഥസങ്കല്‍പ്പങ്ങളുണ്ടെങ്കിലും സാധാരണ കേവല അപേക്ഷക്ക് പ്രാര്‍ത്ഥന എന്ന് സാങ്കേതികമായി പറയാറില്ലല്ലോ. ഒരു സ്ഥാപനത്തില്‍ ജോലി ലഭിക്കാന്‍ മാനേജര്‍ക്ക് അപേക്ഷ നല്‍കിയാല്‍ 'ഞാനൊരു ജോലിക്ക് വേണ്ടി മാനേജരോട് പ്രാര്‍ഥിച്ചു' എന്നാരും പറയാറില്ല. എന്നാല്‍ ഒരു ജോലി ലഭിക്കുവാന്‍ സര്‍വ ശക്തനായ സൃഷ്ടാവിനോടോ അല്ലെങ്കില്‍ അഭൌതിക ശക്തിയുണ്ടെന്നു വിശ്വസിക്കപ്പെടുന്ന വ്യക്തിയോടോ വസ്തുവോടോ ശക്തിയോടോ തേടിയാല്‍ ഒരു ജോലി ലഭിക്കാന്‍ വേണ്ടി പ്രാര്‍ഥിച്ചു എന്ന് തന്നെയാണ് പറയുക. അപ്പോള്‍ അഭൌതിക മാര്‍ഗത്തിലൂടെ സഹായവും രക്ഷയും ലഭിക്കുവാനുള്ള തേട്ടമാണ്‌ പ്രാര്‍ത്ഥന.

ഇതിനു തന്നെയാണ് അറബിയില്‍ ദഅ'വത്ത്, ദുആഅ' എന്നൊക്കെ പറയുന്നത്. ക്ഷണിക്കുക, വിളിക്കുക എന്നൊക്കെ ഭാഷയില്‍ അര്‍ത്ഥമുണ്ട്. എന്നാല്‍ "തീര്‍ച്ചയായും ഞാന്‍ എന്റെ രക്ഷിതാവിനോട്‌ മാത്രമാണ് ദുആ ചെയ്യുന്നത്" [72:20 ], "അതിനാല്‍ അല്ലാഹുവോട് കൂടെ മറ്റാരോടും നിങ്ങള്‍ ദുആ ചെയ്യരുത്" [72:18] എന്നിങ്ങനെ ദുആ അല്ലാഹുവിനോട് മാത്രമായി പറയുമ്പോള്‍ മേല്‍ പറഞ്ഞത്പോലെ അഭൌതിക മാര്‍ഗത്തിലൂടെ സഹായവും രക്ഷയും ലഭിക്കുവാനുള്ള തേട്ടമാണ്‌ ഉദ്ദേശ്യം.

ജീവിതത്തിലെ പ്രതിസന്ധിഘട്ടങ്ങളില്‍ നിന്നും രക്ഷനേടാന്‍ മനുഷ്യന്‍ സകലവഴികളും അവലംബിച്ചേക്കും. ഭൌതികവും ദ്രിശ്യവുമായ എല്ലാ വഴികളും അടഞ്ഞതായി കണ്ടാല്‍ ചില അവിവേകികള്‍ ജീവനോടുക്കിയേക്കും. എന്നാല്‍ ഒരു ദൈവവിശ്വാസി പ്രയാസങ്ങളില്‍ നിന്നും രക്ഷനേടാന്‍ എന്ത്ചെയ്യും? താന്‍ വിശ്വസിക്കുന്ന ദൈവത്തോട് പ്രാര്‍ഥിക്കുന്നു. ഈ സമര്‍പ്പണം വിശ്വാസിക്ക് പ്രതീക്ഷയും പ്രത്യാശയും പ്രദാനം ചെയ്യുന്നു. അപ്പോള്‍ ഒരു വിശ്വാസിയില്‍ ആദ്യാന്ത്യമുണ്ടാകുന്ന വിനയത്തിന്റെയും ആരാധനയുടെയും ഭാവമാകുന്നു ദുആ അഥവാ പ്രാര്‍ത്ഥന. അത് കൊണ്ട് തന്നെ പ്രാര്‍ത്ഥന ഇല്ലാത്ത ആരാധനയില്ല. പ്രവര്‍ത്തനമില്ലാതെ പ്രാര്‍ത്ഥന കൊണ്ട് മാത്രം പ്രയോജനവുമില്ല. പ്രവര്‍ത്തനവും പ്രാര്‍ഥനയും പരസ്പര പൂരകങ്ങളാണ്. അഹങ്കാരികള്‍ യാതൊരു ആരാധനയും ചെയ്യുന്നവരല്ല. പ്രാര്‍ഥിക്കാതിരിക്കുന്നത് അഹങ്കാരമാണ്. പ്രാര്‍ത്ഥനക്കര്ഹനായ നാഥനോട് പ്രാര്‍ഥിക്കാത്തവര്‍ നരകത്തില്‍ നിന്ദ്യരായി പ്രവേശിക്കുക തന്നെ ചെയ്യുന്നതാണ്.

"നിങ്ങളുടെ നാഥന്‍ പറഞ്ഞിരിക്കുന്നു, നിങ്ങള്‍ എന്നോട് പ്രാര്‍ഥിക്കുവിന്‍. നിങ്ങള്‍ക്ക് ഞാന്‍ ഉത്തരം ചെയ്യാം. എന്നെ ആരാധിക്കാതെ അഹങ്കരിക്കുന്നവരാരോ അവര്‍ നിന്ദ്യരായി ആളിക്കത്തുന്ന നരകത്തില്‍ പ്രവേശിക്കുന്നതാണ്." [40:60]

പ്രസ്തുത ആയത്തില്‍ 'ദുആഈ' എന്നല്ല 'ഇബാദത്തീ' എന്നാണു പ്രയോഗിച്ചിട്ടുള്ളത്. ആരാധന വിനയത്തിന്റെയും വണക്കത്തിന്റെയും പാരമ്യമാണ്. പ്രാര്‍ത്ഥനയാണെങ്കില്‍ അങ്ങേയറ്റത്തെ വിനയവും വിധേയത്തവും പ്രകടിപ്പിക്കലുമാണ്. അതുകൊണ്ടാണ് 'പ്രാര്‍ത്ഥന, അത് തന്നെയാണ് ആരാധന' 'പ്രാര്‍ത്ഥനയാണ് ആരാധനയുടെ മജ്ജ' എന്നെല്ലാം നബി (സ) വിശേഷിപ്പിച്ചത്‌.

പ്രാര്‍ഥിച്ചാലും ഇല്ലെങ്കിലും വിധി എന്താണോ അതുപോലെ സംഭവിക്കുമെന്ന് സമാശ്വസിച്ചു പ്രാര്‍ഥിക്കാതിരിക്കല്‍ ശരിയാണോ? അതല്ല, വിധിയില്‍ വിശ്വസിക്കുകയും ആശ്വസിക്കുകയും ചെയ്യുന്നതോടൊപ്പം പ്രാര്‍ഥിക്കുകകൂടി ചെയ്യേണ്ടതുണ്ടോ? ഇതില്‍ ഏതാണ് ഉത്തമം എന്ന വിഷയം പൂര്‍വികന്മാര്‍ ചര്‍ച്ച ചെയ്യുകയും 'പ്രാര്‍ഥിക്കണം' എന്നതിനാണ് തെളിവുകളുടെ പിന്‍ബലവും പ്രാധാന്യവും എന്ന് അവര്‍ കണ്ടെത്തുകയും ചെയ്തു. ഉത്തരം കിട്ടിയാലും ഇല്ലെങ്കിലും അല്ലാഹുവിന്റെ കല്പന അനുസരിക്കലായതിനാല്‍ പ്രാര്‍ത്ഥനക്ക് പ്രതിഫലവും ലഭിക്കുന്നതാണ്. എത്ര യോഗ്യനായിരുന്നാലും പ്രാര്‍ത്ഥനയില്ലെങ്കില്‍ അല്ലാഹു പരിഗണിച്ചു കൊള്ളണമെന്നില്ല. ആത്മാര്‍ത്ഥമായി പ്രാര്‍ഥിക്കുന്നവരെയാണ് അല്ലാഹു പരിഗണിക്കുക.

"നബിയെ, പറയുക : നിങ്ങളുടെ പ്രാര്‍ത്ഥനയില്ലെങ്കില്‍ എന്റെ രക്ഷിതാവ് നിങ്ങള്‍ക്ക് എന്ത് പരിഗണന നല്‍കാനാണ്? എന്നാല്‍ നിങ്ങള്‍ നിഷേധിച്ചുതള്ളിയിരിക്കുകയാണ്. അതിനാല്‍ ശിക്ഷ അനിവാര്യമായിരിക്കും." [25 :77]

അല്ലാഹുവോട് മാത്രം

കഷ്ടപ്പെടുന്ന സൃഷ്ടി വിളിച്ചു പ്രാര്‍ഥിച്ചാല്‍ സ്ഥലകാല വ്യത്യാസങ്ങളില്ലാതെ പ്രാര്‍ത്ഥന കേള്‍ക്കുവാനും ഉത്തരം ചെയ്യുവാനും കഷ്ടപ്പാടുകള്‍ തീര്‍ക്കുവാനും സര്‍വശക്തനായ സൃഷ്ടാവിന് അഥവാ അല്ലാഹുവിനു മാത്രമേ സാധിക്കുകയുള്ളൂ. ഏതെങ്കിലും വ്യക്തിക്കോ ശക്തിക്കോ ഈ കഴിവുണ്ടെങ്കില്‍ അതാണ്‌ പ്രാര്‍ഥിക്കാനുള്ള അര്‍ഹത. ആ ശക്തിയായിരിക്കണം ദൈവം. അല്ലാഹുവെ കൂടാതെ മറ്റൊരു ദൈവം ഉണ്ടാവുകയാണെങ്കില്‍ പ്രപഞ്ചവ്യവസ്ഥ തന്നെ തകരാറിലായിപ്പോകുമെന്നു ചിന്തിക്കുന്ന ആര്‍ക്കും മനസ്സിലാക്കാവുന്നതാണ്.

"കഷ്ടപ്പെടുന്നവര്‍ വിളിച്ചു പ്രാര്‍ഥിച്ചാല്‍ അവനു ഉത്തരം നല്‍കുകയും വിഷമം നീക്കി കൊടുക്കുകയും നിങ്ങളെ ഭൂമിയിലെ പ്രതിപുരുഷന്മാരാക്കി വെക്കുകയും ചെയ്യുന്നവനോ (അതോ അവരുടെ ദൈവങ്ങളോ ഉത്തമം?). അല്ലാഹുവോടൊപ്പം വേറെ വല്ല ദൈവവുമുണ്ടോ? വളരെ കുറച്ചേ നിങ്ങള്‍ ചിന്തിക്കുന്നുള്ളൂ" [27:62].

ലൌകിക ജീവിതത്തില്‍ ഉത്തരം ലഭിക്കുവാനും നേട്ടം ഉണ്ടാക്കുവാനും വേണ്ടി മാത്രമുള്ളതല്ല പ്രാര്‍ത്ഥന; മറിച്ചു നരകത്തില്‍ നിന്നും മോക്ഷം ലഭിക്കുവാനും കൂടിയുള്ളതാണ്. ഇത് പറഞ്ഞു കൊടുത്താല്‍ നരകത്തില്‍ നിന്നും കത്തിയെരിയുമ്പോള്‍ തെറ്റുകള്‍ സമ്മദിച്ചുകൊണ്ട് നരക വിമുക്തിക്ക് വല്ല മാര്‍ഗവുമുണ്ടോ എന്ന് അല്ലാഹുവോട് അവിശ്വാസികള്‍ ചോദിക്കും. അപ്പോള്‍ അവര്‍ക്ക് ലഭിക്കുന്ന ഉത്തരം ഇതായിരിക്കും, "അല്ലാഹുവോട് മാത്രം പ്രാര്‍ഥിക്കപ്പെട്ടാല്‍ നിങ്ങള്‍ അവിശ്വസിക്കുകയും അവനോടു പങ്ക് ചേര്‍ക്കപ്പെടുകയാണെങ്കില്‍ നിങ്ങള്‍ വിശ്വസിക്കുകയും ചെയ്തിരുന്നത് നിമിത്തമത്രെ അത്. എന്നാല്‍ (ഇന്ന്) വിധി കല്പിക്കാനുള്ള അധികാരം ഉന്നതനും മഹാനുമായ അല്ലാഹുവിനാകുന്നു" [40 :12].

ഈ ദുരവസ്ഥ വരാതിരിക്കാന്‍ വേണ്ടി അല്ലാഹു വിശ്വാസികള്‍ക്ക് മുന്നറിയിപ്പ് നല്‍കുന്നു. "ആകയാല്‍ മതം അല്ലാഹുവിനു (മാത്രം) നിഷ്കളങ്കമാക്കിക്കൊണ്ട് നിങ്ങള്‍ അവനോടു പ്രാര്‍ഥിക്കുവിന്‍. അവിശ്വാസികള്‍ക്ക്‌ അനിഷ്ടകരമായിരുന്നാലും ശരി" [40 :14 ].

by സി പി ഉമര്‍ സുല്ലമി @ പ്രാര്‍ത്ഥനകള്‍ നിത്യജീവിതത്തില്‍ from യുവത ബുക്സ്

Popular ISLAHI Topics

ISLAHI visitors