ഖബര്‍ സിയാറത്തും ഖബര്‍ പൂജയും

പകലന്തിയോളം ജനനിബിഡമായിരുന്നു ആ മഖ്‌ബറ. ആണും പെണ്ണും അത്യധികമായ ഭയക്തി ബഹുമാനത്തോടെ മഖാമിന്റെ പരിസരത്ത്‌ പ്രാര്‍ഥനയിലും ഖുര്‍ആന്‍ പാരായണത്തിലും നിരതരായിരുന്നു. മഖാമിനകത്തെ ഇടുങ്ങിയ മുറിയില്‍ ഖബറിനെ വലംവെക്കാനും ഖബറിന്‌ മുന്നില്‍ സുജൂദില്‍ വീഴാനും ഖബറിന്‌ മേല്‍ പച്ചപ്പട്ട്‌ വിരിക്കാനും നേര്‍ച്ചപ്പൂവ്‌ വിതറാനും ആളുകള്‍ തിക്കും തിരക്കും കൂട്ടുന്നു. സ്‌ത്രീകള്‍ ഹിജാബിന്റെ നിയമങ്ങളെല്ലാം ലംഘിച്ച്‌ മഖാമിന്റെ മതിലിനോട്‌ ചേര്‍ന്നിരുന്ന്‌ നിലവിളിക്കുന്നു, പ്രാര്‍ഥിക്കുന്നു, ഖുര്‍ആന്‍ ഓതുന്നു, നെഞ്ചത്തടിക്കുന്നു, മതിലില്‍ മുഖമമര്‍ത്തിക്കരയുന്നു, മതിലിനെ പൊത്തിപ്പിടിച്ച്‌ പ്രാര്‍ഥിക്കുന്നു, സുജൂദ്‌ ചെയ്യുന്നു, മഖാമിന്‌ നേരെ തിരിഞ്ഞ്‌ നമസ്‌കരിക്കുന്നു. അവരിലധികവും യുവതികള്‍! ആരും അവരെ വിലക്കുകയോ തടയുകയോ ചെയ്യുന്നില്ല. ആണും പെണ്ണുമായി, പണ്ഡിതരും പാമരരുമായി, പുരോഹിതരും പൂജാരികളുമായി നൂറുകണക്കിനാളുകള്‍ അവിടെയുള്ള രണ്ട്‌ മഖ്‌ബറകളെ ചുറ്റിപ്പറ്റി അപ്പോഴവിടെയുണ്ടായിരുന്നു.

അല്ലാഹുവിന്‌ ഏറ്റവും വെറുപ്പുള്ള ശിര്‍ക്ക്‌ നഗ്നതാണ്ഡവം നടത്തുന്ന ഈ മഖാം പരിസരത്ത്‌ അധികസമയം നില്‍ക്കാന്‍ തോന്നിയില്ല. അല്ലാഹുവിന്റെ ശിക്ഷയിറങ്ങുമോ എന്ന ഭയം നിമിത്തം വേഗം പുറത്തുകടന്നു. ഇസ്‌ലാമിന്റെയും മുസ്‌ലിംകളുടെയും പേരില്‍ നടക്കുന്ന ബഹുദൈവത്വ ജീര്‍ണത നേരില്‍ കാണാനുള്ള ഭാഗ്യമോ നിര്‍ഭാഗ്യമോ ഓര്‍ത്ത്‌, സമുദായത്തിന്റെ ഗതിയോര്‍ത്ത്‌ ലജ്ജിച്ച്‌ അവിടെ നിന്നും പുറത്തുകടന്നു.

ഡല്‍ഹിയിലെ നിസാമുദ്ദീന്‍ ഔലിയയുടെ മഖ്‌ബറയില്‍ നിന്നുള്ള അനുഭവമാണിത്‌. ഉത്സവങ്ങളും ഉറൂസുകളും നടത്തി പരിപാലിക്കപ്പെടുകയും പരിപോഷിപ്പിക്കപ്പെടുകയും ഖബര്‍ സിയാറത്താണെന്നും മഖ്‌ബറകളില്‍ മറമാടപ്പെട്ട മഹാന്മാരെ മുന്‍ നിര്‍ത്തി അല്ലാഹുവിനോട്‌ `തവസ്സുല്‍' ചെയ്‌തു പ്രാര്‍ഥിക്കുകയാണെന്നും അതില്‍ തെറ്റൊന്നുമില്ലെന്നുമാണ്‌ യാഥാസ്ഥിതിക പണ്ഡിതന്മാരുടെ പക്ഷം.

എന്നാല്‍ പ്രവാചകന്റെ(സ) കാലത്ത്‌ മക്കയിലെ ബഹുദൈവാരാധകര്‍ ഇബ്‌റാഹീം, ഇസ്‌മാഈല്‍(അ) തുടങ്ങിയ നബിമാരുടെയും ലാത്ത, ഉസ്സ തുടങ്ങിയ മഹാന്മാരുടെയും പ്രതിമകളുണ്ടാക്കി അവരോട്‌ പ്രാര്‍ഥിക്കുകയും അവരിലേക്ക്‌ നേര്‍ച്ച നേരുകയും ചെയ്‌തതിനെപ്പറ്റി അവരുടെ വാദഗതികള്‍ എന്തായിരുന്നുവെന്ന്‌ വിശുദ്ധ ഖുര്‍ആന്‍ പറയുന്നത്‌ നോക്കുക: ``അല്ലാഹുവിന്‌ പുറമെ അവര്‍ക്ക്‌ ഉപകാരമോ ഉപദ്രവമോ ചെയ്യാത്തവയെയാണ്‌ അവര്‍ ആരാധിക്കുന്നത്‌. ഇവര്‍ അല്ലാഹുവിങ്കല്‍ ഞങ്ങളുടെ ശുപാര്‍ശകരാണ്‌ എന്നവര്‍ പറയുകയും ചെയ്യുന്നു. (നബിയേ) പറയുക: ആകാശങ്ങളിലും ഭൂമിയിലും അല്ലാഹുവിനറിയാത്തത്‌ നിങ്ങളവനെ അറിയിക്കുകയാണോ? അവനത്രെ പരിശുദ്ധന്‍. അവര്‍ പങ്കുചേര്‍ക്കുന്നതില്‍ നിന്നെല്ലാം അല്ലാഹു ഉന്നതനായിരിക്കുന്നു.'' (യൂനുസ്‌ 18)

``അല്ലാഹുവിന്‌ പുറമെ രക്ഷാധികാരികളെ സ്വീകരിച്ചവര്‍ (പറഞ്ഞിരുന്നത്‌) ഇവര്‍ അല്ലാഹുവിലേക്ക്‌ ഞങ്ങളെ അടുപ്പിക്കുവാന്‍ വേണ്ടി മാത്രമാണ്‌ ഇവരെ ഞങ്ങള്‍ ആരാധിച്ചിരുന്നത്‌ എന്നാണ്‌.'' (സുമര്‍ 3)

മഹാന്മാരായ അമ്പിയാക്കളുടെയും ഔലിയാക്കളുടെയും ബിംബങ്ങളുണ്ടാക്കി പൂജിച്ചപ്പോള്‍ മക്കയിലെ ബഹുദൈവ വിശ്വാസികള്‍ പറഞ്ഞ ഇതേ മറുപടി തന്നെയാണ്‌ ജാറങ്ങളില്‍ ആഗ്രഹസഫലീകരണത്തിന്‌ പോകുന്നവര്‍ക്കും പറയാനുള്ളത്‌. മരണ സ്‌മരണയുണര്‍ത്താനും പരലോക ചിന്തയുണ്ടാക്കാനുമാണ്‌ ഖബര്‍ സിയാറത്ത്‌ നബി(സ) സുന്നത്താക്കിയത്‌. ഇക്കാര്യം സ്വഹീഹായ ഹദീസുകളില്‍ സ്ഥിരപ്പെട്ടതാണ്‌. ഖബര്‍ സിയാറത്തിനെ ആരും എതിര്‍ത്തിട്ടില്ല, എതിര്‍ക്കുന്നുമില്ല. എന്നാല്‍ നിസാമുദ്ദീന്‍ ഔലിയയുടെ ദര്‍ഗയിലും മറ്റും നടക്കുന്നത്‌ ഖബര്‍ സിയാറത്തല്ല, ഖബര്‍പൂജയാണ്‌. ഓരോ ദിവസവും ആയിരക്കണക്കിന്‌ പച്ചത്തുണികളാണ്‌ നേര്‍ച്ചയായി ആ മഖ്‌ബറയില്‍ സമര്‍പ്പിക്കപ്പെടുന്നത്‌. കഅ്‌ബയുടെ പരിസരത്ത്‌ പോലും കാണാത്ത അതിരുവിട്ട ഭക്തി പാരവശ്യമാണ്‌ ദര്‍ഗകളില്‍ കാണുന്നത്‌. ഇവരെ സേവിക്കാന്‍ കുറെ മുസ്‌ലിം `പൂജാരി'മാരുമുണ്ട്‌.

പ്രവാചകന്റെ(സ) അന്തിമ വസിയ്യത്തിനെ കാറ്റില്‍ പറത്തി ഇത്തരം മഖ്‌ബറകള്‍ പൂജാകേന്ദ്രങ്ങളാകുകയാണ്‌! ഇതിനെ ന്യായീകരിക്കാന്‍ കുറെ പുരോഹിതന്മാരും. മുസ്‌ലിംകള്‍ അധസ്ഥിതരും നിന്ദിതരുമാകാന്‍ വേറെ കാരണം തെരയുന്നതെന്തിന്‌? ദൈവിക കാരുണ്യത്തില്‍ നിന്ന്‌ മുസ്‌ലിംകള്‍ അകറ്റപ്പെടാനും ദൈവകോപത്തിന്റെ കാഹളം മുഴങ്ങാനും ഇതില്‍പരം കാരണം വേറെയന്തിന്‌? സമുദായത്തിന്റെ അസ്‌തിത്വം നിലനിര്‍ത്താന്‍ ഇസ്‌ലാമിനോട്‌ സ്‌നേഹമുള്ള, പരലോകബോധമുള്ള മുസ്‌ലിംകളെല്ലാം ഈ കടുത്ത തിന്മക്കെതിരെ ഒറ്റക്കെട്ടായി പ്രതികരിക്കേണ്ടിവരും. ഇതിനോട്‌ മൗനം പാലിക്കുകയോ ഇതിനെ ന്യായീകരിക്കുകയോ ചെയ്യുന്ന പുരോഹിതന്മാരുടെ താല്‌പര്യം ഇസ്‌ലാമിനു പുറത്താണ്‌. ഇത്തരം ദുരാചാരകേന്ദ്രങ്ങളുടെ പാര്‍ശ്വവര്‍ത്തികളായി ജീവിക്കുകയും ഇതിലൂടെ വരുന്ന അവിഹിത വരുമാനത്തിന്റെ വിഹിതം പങ്കിട്ടെടുത്ത്‌ ജീവിതം തള്ളിനീക്കുകയും ചെയ്യുന്നവരാണിവരിലധിക പേരും. പരലോകത്തെക്കാള്‍ ഇഹലോകത്തിന്‌ മുന്‍ഗണന കൊടുക്കുന്ന ഇത്തരം പണ്ഡിത പുരോഹിതന്മാരില്‍ നിന്ന്‌ ഒരു ഗുണവും ഇസ്‌ലാമിക സമൂഹത്തിനുണ്ടാകില്ലെന്നുറപ്പാണ്‌.

സുന്നത്തായ ഖബര്‍ സിയാറത്തും ശിര്‍ക്കിലേക്ക്‌ നയിക്കുന്ന ഖബര്‍ പൂജയും തമ്മിലുള്ള വ്യത്യാസം വ്യക്തമാക്കിത്തരുന്ന ഏതാനും പ്രമാണ വാക്യങ്ങള്‍ താഴെ:

``നബി(സ) പറഞ്ഞു: ഞാന്‍ നിങ്ങളോട്‌ ഖബര്‍ സിയാറത്ത്‌ നിരോധിച്ചിരിക്കുന്നു. ഇനി നിങ്ങള്‍ ഖബ്‌റുകള്‍ സന്ദര്‍ശിച്ചുകൊള്ളുവിന്‍. അത്‌ നിങ്ങളെ മരണത്തെ ഓര്‍മിപ്പിക്കുന്നതാണ്‌.'' (തിര്‍മുദി, മുസ്‌ലിം)

``ജാബിര്‍(റ) പറയുന്നു: ഖബ്‌റുകള്‍ കുമ്മായമിടുക, അതിന്മേല്‍ വല്ലതും നിര്‍മിക്കുക എന്നിവ നബി(സ) നിരോധിച്ചിരിക്കുന്നു.'' (മുസ്‌ലിം)

``നബി(സ) പറഞ്ഞു: അവര്‍ (ജൂത, ക്രിസ്‌ത്യാനികള്‍) അവരുടെ പ്രവാചകന്മാരുടെയും സജ്ജനങ്ങളുടെയും ഖബ്‌റുകള്‍ പ്രാര്‍ഥനാ മന്ദിരങ്ങളാക്കി. എന്നാല്‍ നിങ്ങള്‍ ഖബ്‌റുകളെ പ്രാര്‍ഥനാ മന്ദിരങ്ങളാക്കരുത്‌. ഞാന്‍ അതിനെ നിങ്ങളോട്‌ നിരോധിക്കുന്നു.'' (മുസ്‌ലിം)

``നബി(സ) പ്രഖ്യാപിച്ചു: മൂന്ന്‌ പള്ളികളിലേക്കല്ലാതെ പുണ്യ തീര്‍ഥാടനം പാടില്ല. മസ്‌ജിദുല്‍ ഹറാം, എന്റെ ഈ പള്ളി (മസ്‌ജിദുന്നബവി), മസ്‌ജിദുല്‍ അഖ്‌സ എന്നിവയാണത്‌.'' (ബുഖാരി, മുസ്‌ലിം)

മക്കയിലെ ബഹുദൈവാരാധകര്‍ മഹാന്മാരുടെ ബിംബങ്ങളുണ്ടാക്കി അവയെ വന്ദിക്കുകയും ആരാധിക്കുകയും ചെയ്‌ത സംഭവം വിവരിച്ച ശേഷം ഇമാം റാസി(റ) പറയുന്നു: മഹാത്മാക്കളുടെ ഖബ്‌റുകളെ വന്ദിച്ചാല്‍ അവര്‍ തങ്ങള്‍ക്ക്‌ അല്ലാഹുവിന്റെ അടുക്കല്‍ ശുപാര്‍ശക്കാരാകുമെന്ന വിശ്വാസത്തില്‍ അവരുടെ ഖബ്‌റുകളെ വന്ദിക്കുന്നതില്‍ അനേകമാളുകള്‍ ഇക്കാലത്ത്‌ വ്യാപൃതമായിരിക്കുന്നത്‌ ഇതിന്‌ തുല്യമായത്‌ തന്നെയാണ്‌'' (തഫ്‌സീറുല്‍ കബീര്‍)

ഇതുപോലുള്ള നിരവധി വാക്യങ്ങളില്‍ നിന്ന്‌ വ്യക്തമാകുന്നത്‌ മരണസ്‌മരണയും പരലോക ബോധവുമുണ്ടാക്കാന്‍ വേണ്ടി മുസ്‌ലിംകള്‍ മഖ്‌ബറകള്‍ സന്ദര്‍ശിക്കല്‍ സുന്നത്താണെന്നും ഖബ്‌റാളികള്‍ക്ക്‌ വേണ്ടി പ്രാര്‍ഥിക്കണമെന്നും മഹാന്മാരുടെ ഖബ്‌റുകള്‍ പ്രത്യേകം അടയാളപ്പെടുത്തി കെട്ടിപ്പൊക്കി അവരോട്‌ പ്രാര്‍ഥിക്കാന്‍ അവിടേക്ക്‌ പോകുന്നത്‌ കുറ്റമാണെന്നും ദൈവിക കോപത്തിന്‌ ഇടയാക്കുന്ന സംഗതിയാണതെന്നുമാണ്‌. പക്ഷെ, ഇക്കാര്യം സമൂഹത്തെ ബോധ്യപ്പെടുത്തിക്കൊടുക്കേണ്ട പണ്ഡിതന്മാരില്‍ വലിയൊരു വിഭാഗം ഈ കടുത്ത തിന്മയെ ന്യായീകരിക്കുന്നതാണ്‌ നാം കാണുന്നത്‌.

by കെ പി എസ്‌ ഫാറൂഖി @ ശബാബ്

ദൈവത്തോടുള്ള കടമ പാലിക്കുക

"ഇസ്രായീല്‍ സന്തതികളേ, ഞാന്‍ നിങ്ങള്‍ക്ക് ചെയ്തു തന്നിട്ടുള്ള അനുഗ്രഹം നിങ്ങള്‍ ഓര്‍മിക്കുകയും, എന്നോടുള്ള കരാര്‍ നിങ്ങള്‍ നിറവേറ്റുകയും ചെയ്യുവിന്‍. എങ്കില്‍ നിങ്ങളോടുള്ള കരാര്‍ ഞാനും നിറവേറ്റാം. എന്നെ മാത്രമേ നിങ്ങള്‍ ഭയപ്പെടാവൂ". [അദ്ധ്യായം 2 ബഖറ 40]

യഅ'ഖൂബ് നബി (അ)യുടെ മറ്റൊരു പേരായിരുന്നു ഇസ്റാഈല്‍ എന്നത്. ഇസ്റാഈല്‍ സന്തതികള്‍ എന്നാണു ബനൂഇസ്രാഈല്‍ എന്ന വാക്കിനര്‍ത്ഥം. അല്ലാഹുവിന്‍റെ മിത്രം എന്ന് വിശേഷിക്കപ്പെട്ട ഇബ്രാഹിം നബി (അ)യുടെ പുത്രന്‍ ഈസ്‌ഹാഖ് (അ)യുടെ മകനാണ് യഅ'ഖൂബ് (അ). യൂസുഫ് നബി (അ) അടക്കമുള്ള യഅ'ഖൂബ് നബിയുടെ മക്കളെയും സന്താനപരമ്പരയെയും പില്‍ക്കാലത്ത്‌ ബനൂഇസ്രാഈല്‍ എന്ന് വിളിക്കപ്പെട്ടുവന്നു.

ഏറ്റവും അധികം പ്രവാചകന്മാര്‍ നിയോഗിക്കപ്പെട്ടത് ഇസ്റാഈല്‍ വംശത്തില്‍ നിന്നായിരുന്നു. അല്ലാഹുവിന്‍റെ അളവറ്റ അനുഗ്രഹങ്ങള്‍ അനുഭവിക്കാന്‍ ഭാഗ്യം ലഭിച്ചവരായിരുന്നു അവര്‍. ഈ അനുഗ്രഹങ്ങള്‍ക്ക് അര്‍ഹമായ നിലയില്‍ നന്ദി കാണിക്കാന്‍ അവര്‍ സന്നദ്ധരായില്ല. അതിനാല്‍ ലഭിച്ച അനുഗ്രഹങ്ങളെ ഓര്‍ത്തുനോക്കാനും അവയ്ക്ക് നന്ദി കാണിക്കാനുമുള്ള ആഹ്വാനമാണ് അല്ലാഹു ഇവിടെ നല്‍കുന്നത്. വചനത്തിലെ അഭിസംബോധന ബനൂഇസ്രാഈല്യരാണെങ്കിലും ഇക്കാലത്തെ മുഴുവന്‍ മനുഷ്യര്‍ക്കും ബാധകമാണിത് എന്നതില്‍ തര്‍ക്കമില്ല.

അല്ലാഹുവിന്‍റെ അളവറ്റ അനുഗ്രഹങ്ങള്‍ അനുഭവിച്ചു കൊണ്ടിരിക്കുന്നവരാണ് നാം. എണ്ണിയാലൊതുങ്ങാത്ത ഇവ നമുക്ക് തന്നത് അല്ലാഹു മാത്രം. അത് ഓര്‍ക്കാനും അവന്‍റെ കല്‍പ്പനകള്‍ അനുസരിച്ചു അവനു നന്ദി കാണിക്കാനും നമുക്ക് ബാധ്യതയുണ്ട്. അല്ലാഹുവിനോട് നാം ചെയ്ത പ്രതിജ്ഞകളും കരാറുകളും പാലിക്കാനും നാം ബാധ്യസ്ഥരാണ്. അല്ലാഹുവാണ് സൃഷ്ടാവ് എന്നത് മനുഷ്യര്‍ അംഗീകരിച്ച ഒരു തത്ത്വമാണെന്ന് ഖുര്‍ആന്‍ സൂചിപ്പിക്കുന്നുണ്ട്. "അല്ലാഹുവേ, നിന്‍റെ പ്രീതി ആഗ്രഹിച്ചു കൊണ്ടാണ് ഞാന്‍ ജീവിക്കുന്നതും മരിക്കുന്നതും ആരാധനകളില്‍ മുഴുകുന്നതും' എന്ന് പ്രതിജ്ഞ ചെയ്യാറുള്ളവനാണ് വിശ്വാസി. ഇത് പാലിക്കേണ്ടത് അവന്‍റെ ചുമതല തന്നെ.

എന്നാല്‍ അല്ലാഹു നമുക്ക് വാഗ്ദാനം ചെയ്യുന്ന മഹത്തായ പ്രതിഫലം അവന്‍ തരുമെന്ന കാര്യത്തില്‍ സംശയം വേണ്ട. "നിങ്ങള്‍ നന്ദി കാണിക്കുന്നവരായാല്‍ ഞാന്‍ കൂടുതല്‍ തന്നു കൊണ്ടിരിക്കും" എന്ന് ഖുര്‍ആന്‍ പറയുന്നു. "എന്‍റെ അടിമ എന്നെ ഏതു രീതിയില്‍ സമീപിക്കുന്നുവോ അതിനനുസരിച്ച സമീപനം എന്‍റെ ഭാഗത്തുമുണ്ടാകും" എന്ന് അല്ലാഹു പറഞ്ഞതായി നബി (സ) പഠിപ്പിക്കുന്നു. ഏതു കാലാവസ്ഥയിലും സാഹചര്യങ്ങളിലും അഭൌതികമായി ഭയപെടെണ്ടവന്‍ അല്ലാഹു മാത്രമാണ്. മനുഷ്യന്‍റെ പ്രയാസങ്ങളും ബുദ്ധിമുട്ടുകളും അല്ലാഹുവിന്‍റെ പരീക്ഷണമായിരിക്കാം. എല്ലാ ചുറ്റുപാടുകളിലും മനുഷ്യന്‍ ഭയപ്പെടേണ്ടത് അല്ലാഹുവിനെ മാത്രമാണ്. അവന്‍റെ അറിവില്‍ പെടാതെ ഒന്നും ചെയ്യാനോ പറയാനോ മനുഷ്യന് കഴിയില്ല. അതിനാല്‍ അവനെ സൂക്ഷിക്കുക. അതാണ്‌ വിജയ മാര്‍ഗം.

by അബ്ദു സലഫി @ പുടവ

മന്ത്രവും ഉറുക്കും

പരിശുദ്ധ ഖുര്‍ആനിലും തിരുസുന്നത്തിലും വന്ന പ്രാര്‍ഥനകള്‍ ചൊല്ലി രോഗശമനത്തിനു വേണ്ടി പ്രാര്‍ഥിക്കുന്നതിനാണ് ഇസ്‌ലാമില്‍ മന്ത്രം എന്ന് പറയുന്നത്. ഇസ്ലാം ഇത് അനുവദിച്ചിട്ടുണ്ട്. ചികിത്സ ചെയ്യുന്നതോടൊപ്പമായിരിക്കണം മന്ത്രമെന്നും പ്രവാചകന്‍ (സ) പഠിപ്പിക്കുന്നു (ബുഖാരി). എന്നാല്‍ മന്ത്രിച്ചശേഷം ശരീരത്തില്‍ എന്തെങ്കിലും കെട്ടുകയോ വെള്ളത്തില്‍ മന്ത്രിച്ചു ഊതിയ ശേഷം വെള്ളം കുടിക്കുകയോ മറ്റോ ചെയ്യുന്നത് ഇസ്ലാം അംഗീകരിക്കുന്നില്ല. വെള്ളം, നൂല്, ഉറുക്കു, ഏലസ്സ്, പിഞ്ഞാണമെഴുത്ത് എന്നിവക്കൊന്നുംതന്നെ ഹദീസിന്റെ യാതൊരു പിന്‍ബലവും കാണാന്‍ സാധിക്കുകയില്ല. പ്രത്യുത ഇവയെല്ലാം ഇസ്ലാം വിരോധിക്കുകയാണ് ചെയ്യുന്നത്.

ഇമ്രാന്‍ (റ) നിവേദനം ചെയ്യുന്നു : ഒരിക്കല്‍ നബി (സ) ഒരു മനുഷ്യന്റെ തോള്‍ കയ്യില്‍ ഒരു വട്ടക്കണ്ണി കാണുകയുണ്ടായി. അപ്പോള്‍ നബി (സ) പറഞ്ഞു : നിനക്ക് നാശം! നിനക്ക് നാശം! എന്താണിത്? അയാള്‍ പറഞ്ഞു : വാതരോഗശമാനത്തിനാണ്. അപ്പോള്‍ റസൂലുല്ലാഹ് (സ) പറഞ്ഞു : ഇത് വാതരോഗത്തെ നിനക്ക് വര്‍ധിപ്പിക്കുക മാത്രമാണ് ചെയ്യുന്നത്. നീ അത് ഊരിയെരിയുക. അതുമായി നീ മരണപ്പെട്ടാല്‍ നീ ഒരിക്കലും വിജയിക്കുകയില്ല.(അഹമദ്, ഇബ്നു ഹിബ്ബാന്‍, ഹാക്കിം)

ഖുര്‍ആന്‍ ഓതി ശരീരത്തില്‍ മന്ത്രിച്ച വട്ടക്കണ്ണിയോ മറ്റോ ബന്ധിപ്പിക്കുന്നത് ഇസ്ലാം അനുവദിച്ചിരുന്നുവെങ്കില്‍ അത് കണ്ട ഉടനെത്തന്നെ നിനക്ക് നാശം എന്ന് നബി (സ) പറയുമായിരുന്നില്ല. ഖുര്‍ആന്‍ കൊണ്ടാണോ നീ ഇത് മന്ത്രിച്ചതെന്നു നബി (സ) ചോദിക്കുന്നുമില്ല. നിരുപാധികം വിരോധിക്കുകയാണ് ചെയ്തത്. പുറമേ ഇദ്ദേഹം ഒരു സഹാബിയാണ്. ശിര്‍ക്കിന്റെ പദം വെച്ചു അദ്ദേഹം ഇപ്രകാരം ശരീരത്തില്‍ ബന്ധിപ്പിക്കുകയില്ല.

ഉഖ്ബത് (റ) നിവേദനം : നബി (സ) അരുളി : ആരെങ്കിലും ശരീരത്തില്‍ ഏലസ്സ് കെട്ടിയാല്‍ അല്ലാഹു അവന്റെ രോഗശമനം പൂര്‍ത്തിയാക്കിക്കൊടുക്കാതിരിക്കട്ടെ. ആരെങ്കിലും രക്ഷാകവടി കെട്ടിയാല്‍ അവന്റെ രോഗത്തെ അല്ലാഹു സുഖപ്പെടുത്താതിരിക്കട്ടെ. (അഹമദ്, ഹാക്കിം). ഈ രണ്ടു ഹദീസുകളും ഇമാം ദഹബി സഹീഹാക്കിയിട്ടുണ്ട്. ഇവിടെയും നബി (സ) ഖുര്‍ആന്‍ കൊണ്ട് മന്ത്രിച്ച ഏലസ്സും രക്ഷാകവടിയും ഒഴിവാക്കുന്നില്ല.

ഹുദൈഫത് (റ) ഒരിക്കല്‍ ഒരു രോഗിയെ സന്ദര്‍ശിച്ചു. അപ്പോള്‍ അദ്ദേഹം രോഗിയുടെ കയ്യിന്മേല്‍ ഒരു നൂല്‍ കണ്ടു. അദ്ദേഹം അത് മുറിച്ചു കളഞ്ഞ ശേഷം ഇപ്രകാരം ഓതി : 'അവരില്‍ അധികമാളുകളും അല്ലാഹുവില്‍ ശിര്‍ക്ക് വെച്ച് കൊണ്ടല്ലാതെ വിശ്വസിക്കുന്നില്ല' [അബൂഹാതിം]

ഒരിക്കല്‍ ഹുദൈഫത് (റ) ഒരു രോഗിയെ സന്ദര്‍ശിച്ചു. അദ്ദേഹം രോഗിയുടെ കയ്യില്‍ തടവിക്കൊണ്ടിരുന്നപ്പോള്‍ കയ്യിന്മേല്‍ ഒരു നൂലുള്ളതായി അദ്ദേഹം കണ്ടു. അദ്ദേഹം ചോദിച്ചു : എന്താണിത്? രോഗി പറഞ്ഞു : മന്ത്രിച്ചു കെട്ടിയതാണ്‌. അപ്പോള്‍ നബി (സ) യുടെ അനുചരനായ അദ്ദേഹം അത് മുറിച്ചു മാറ്റിയശേഷം പറഞ്ഞു : ഈ നൂലുമായി നീ മരിച്ചാല്‍ ഞാന്‍ നിനക്ക് മയ്യിത്ത് നമസ്ക്കരിക്കുകയില്ല. [അബൂഹാതിം]. ഖുര്‍ആന്‍ കൊണ്ട് മന്ത്രിച്ചതാണോ എന്ന് ഈ സഹാബി ചോദിക്കുന്നില്ല. ഇക്കാലത്തെ മുസ്ലിങ്ങള്‍ പോലും ശിര്‍ക്കിന്റെ പദം ഉപയോഗിച്ച് മന്ത്രിച്ച നൂല്‍ ബന്ധിപ്പിക്കാറില്ലെങ്കില്‍ ആ കാലത്തെ മുസ്ലിങ്ങള്‍ ചെയ്തിരുന്നെന്ന് എങ്ങനെ വാദിക്കും?

അബൂബഷീര്‍ (റ) നിവേദനം : അദ്ദേഹം ഒരിക്കല്‍ നബി (സ)യുടെ കൂടെ ഒരു യാത്രയിലായിരുന്നു. തത്സമയം നബി (സ) ഒരു ദൂതനെ അയച്ചു. അയാളോടി ഇപ്രകാരം പറഞ്ഞു : ഒട്ടകത്തിന്റെ ശരീരത്തില്‍ (കണ്‍ണേര്‍) ബാധിക്കാതിരിക്കുവാന്‍ കെട്ടിയിട്ടുള്ള മാലകളും ഞാണും മുറിച്ചു കളയണം. [ബുഖാരി, മുസ്ലിം]. ഖുര്‍ആന്‍ കൊണ്ട് കെട്ടിയതാണെങ്കില്‍ ഒഴിവാക്കാന്‍ നബി (സ) ഇവിടെ നിര്‍ദേശിക്കുന്നില്ല. പുറമേ സഹാബികള്‍ ശിര്‍ക്കിന്റെ പദംകൊണ്ട് മന്ത്രിച്ചു ഇപ്രകാരം ചെയ്യുമെന്ന് വിശ്വസിക്കാന്‍ നമുക്ക് സാധ്യമല്ല.

അബ്ദുള്ള (റ) നിവേദനം : ആരെങ്കിലും ശരീരത്തില്‍ എന്തെങ്കിലും കെട്ടിയാല്‍ (അള്ളാഹു രോഗശമനത്തില്‍ നിന്നൊഴിവായി) ആ വസ്തുവില്‍ ഭരമേല്‍പ്പിക്കപ്പെടും. [അഹമദ്, തുര്‍മുദി]

മുകളില്‍ ഉദ്ധരിച്ച ഹദീസുകളില്‍ നിന്നും നബി (സ)യോ സഹാബികളോ ഒരാളുടെയോ ഒരു മൃഗത്തിന്റെയോ ശരീരത്തില്‍ മന്ത്രിച്ചു കെട്ടിയ നൂലോ ഏലെസ്സോ ഉറുക്കോ വട്ടക്കണ്ണിയോ ഞാണോ കണ്ടാല്‍ അത് ഖുര്‍ആന്‍ കൊണ്ടാണോ അല്ലയോ എന്ന് അന്വേഷിക്കാറില്ലെന്നും നിരുപാധികം അവയെ വിരോധിക്കുകയാണ് പതിവെന്നും വ്യക്തമായി. ഒറ്റ ഹദീസുപോലും ഇപ്രകാരം അന്വേഷിച്ചത് കാണാന്‍ സാധിക്കുകയില്ല. രോഗശമനത്തിനാണോ അല്ലയോ എന്നാണു അന്വേഷിക്കാരുള്ളത്.

ഇമാം ശാഫി (റ) അടക്കം നാല് മദ്ഹബുകളുടെയും ഒരു ഇമാമും ഒരു സഹാബിയെയും കണ്ടുമുട്ടിയിട്ടില്ല. എന്നാല്‍ സഹാബികളെ കണ്ടുമുട്ടിയ ഇബ്രാഹീമുന്നഖ്ഈ (റ) പറയുന്നു : അവര്‍ എല്ലാത്തരം എലെസ്സുകളെയും വെറുത്തിരുന്നു. ഖുര്‍ആന്‍ കൊണ്ടായിരുന്നാലും അല്ലെങ്കിലും. [വകീഅ] അവര്‍ എന്നതുകൊണ്ട് ഉദേശിക്കുന്നത് പ്രഗല്‍ഭ സഹാബികലായ അബ്ദുല്ലഹിബ്നു മസ്ഊദും (റ) അദ്ധേഹത്തിന്റെ പ്രഗല്‍ഭ ശിഷ്യന്മാരായ അല്‍ഖമ, അസ്വദ്, അബൂവാഈല്‍, ഹാരിസ്, ഉബൈദത്, മസ്രൂഖ്, റബീഅ, സുബൈദ് മുതലായവരുമാണ്‌. താബിഈകളുടെ നേതാക്കന്മാര്‍ എന്ന പേരില്‍ ഇവര്‍ അറിയപ്പെടുന്നു. ഖുര്‍ആന്‍ കൊണ്ടായിരുന്നാലും ശരീരത്തില്‍ ഒന്നും മന്ത്രിച്ചു കൊണ്ട് ബന്ധിപ്പിക്കാന്‍ പാടില്ലെന്ന് ഇവര്‍ പറയുന്നു. ഉറുക്കും ഏലസ്സും നൂലും എല്ലാം തന്നെ ഇവിടെ സമമാണ്. ഈ അഭിപ്രായം തന്നെയാണ് ഇബ്നു അബ്ബാസ് (റ, ഹുദൈഫത് (റ), ഉഖ്ബത്ബ്നു ആമിര്‍ (റ), ഇബ്നു ഉകൈം (റ) മുതലായ സഹാബികള്‍ക്കും ഉള്ളത്. ഇമാം അഹമ്ദില്‍ നിന്നും ഈ അഭിപ്രായം ഉദ്ധരിക്കുന്നു. അദ്ധേഹത്തിന്റെ ധാരാളം ശിഷ്യന്മാര്‍ ഈ അഭിപ്രായത്തെ ഖണ്ഡിതമായി തന്നെ പ്രഖ്യാപിക്കുന്നു.

ഈസാ നിവേദനം : ഞാന്‍ അബ്ദുല്ലാഹിബ്നു ഉകൈമിന്റെ (റ) അടുത്ത് പ്രവേശിച്ചു. അദ്ധേഹത്തില്‍ ഉമ്രത് ഉണ്ട്. ഞാന്‍ പറഞ്ഞു : താങ്കള്‍ക്കു ഉറുക്കു ബന്ധിപ്പിച്ചു കൂടെ? അപ്പോള്‍ സഹാബിയായ അദ്ദേഹം പറഞ്ഞു : "അതില്‍ നിന്നും ഞാന്‍ അല്ലാഹുവിനോട് രക്ഷ തേടുന്നു. നബി (സ) പറഞ്ഞു : ആരെങ്കിലും ശരീരത്തില്‍ എന്തെങ്കിലും ബന്ധിപ്പിച്ചാല്‍ അതിന്മേല്‍ ഭരമേല്‍പ്പിക്കപ്പെട്ടു." [അബൂദാവൂദ്]

ഇബ്നു അബ്ബാസ് (റ) പറയുന്നു : ഞാന്‍ മുഅവ്വദതൈനി ഓതി മന്ത്രിക്കും. എന്നാല്‍ ബന്ധിപ്പിക്കുകയില്ല. [വകീഅ]

റുവൈഫിഅ (റ) നിവേദനം : നബി (സ) എന്നോട് പറഞ്ഞു : ആരെങ്കിലും കഴുത്തില്‍ ഞാണ്‍ ബന്ധിപ്പിച്ചാല്‍ മുഹമ്മദിന് അവനുമായി ബന്ധമില്ല. [അഹമദ്, നസാഈ]. ഇവിടെ ഞാണ്‍ എന്നതിന്റെ വിവക്ഷ എലസ്സാണെന്ന് മറ്റൊരു നിവേദനത്തില്‍ പറയുന്നു.

ഇബ്നു മസ്ഊദ്‌ (റ) നിവേദനം : നബി (സ) പറയുന്നതായി ഞാന്‍ കേട്ടു : 'നിശ്ചയം മന്ത്രവും ഏലസ്സും ദമ്പതിമാര്‍ പിണങ്ങിയാല്‍ അവരെ യോജിപ്പിക്കുന്ന മന്ത്രവും ശിര്‍ക്കാണ്‌' [അഹമദ്, അബൂദാവൂദ്]

ഇബ്നു ആമിര്‍ (റ) നിവേദനം : നബി (സ) അരുളി : ...വല്ലവനും ഏലസ്സ് ബന്ധിപ്പിച്ചാല്‍ നിശ്ചയം അവന്‍ ശിര്‍ക്ക് ചെയ്തു. [ഹാകിം]

ഇബ്നു മസ്ഊദ്‌ (റ)വിന്റെ ഭാര്യ സൈനബ (റ) നിവേദനം : ഒരിക്കല്‍ എന്റെ ഭര്‍ത്താവ് ഇബ്നു മസ്ഊദ്‌ (റ) എന്റെ കഴുത്തില്‍ ഒരു നൂല് കണ്ടു. അതെന്താണെന്ന് അദ്ദേഹം ചോദിച്ചപ്പോള്‍ മന്ത്രിചൂദിയതാണെന്ന് ഞാന്‍ പറഞ്ഞു. അപ്പോള്‍ അദ്ദേഹം അത് മുറിച്ചു കളഞ്ഞ ശേഷം ഇപ്രകാരം പറഞ്ഞു : 'നിങ്ങള്‍ അബ്ദുള്ളയുടെ കുടുംബമാണ്. ശിര്‍ക്കിന്റെ ആവശ്യം നിങ്ങള്ക്കില്ല. നബി (സ) പ്രാര്‍ഥിച്ച പോലെ ഇപ്രകാരം പ്രാര്‍ഥിച്ചാല്‍ മതി: ജനങ്ങളുടെ നാഥാ! എന്റെ രോഗം നീ ദുരീകരിക്കണേ, ഒരു രോഗത്തെയും അവശേഷിപ്പിക്കാത്തവിധം നീ എനിക്ക് ശമനം നല്‍കേണമേ, നിന്റെ ശമനമല്ലാതെ യഥാര്‍ത്ഥ ശമനമില്ല. [ഇബ്നു ഹിബ്ബാന്‍, ഹാകിം]. ഇലാഹാക്കിയാല്‍ മാത്രമേ ശിര്‍ക്ക് വരുള്ളൂ എന്ന പുരോഹിദ ജല്പനം ഇവിടെ തകരുന്നു. ഇബ്നു മസ്ഊദിന്‍റെ ഭാര്യ നൂലിനെ ഇലാഹാക്കിയിരുന്നുവെന്നു ഈ പുരോഹിദര്‍ വാദിക്കുമോ? നിനക്ക് ഖുര്‍ആന്‍ കൊണ്ട് നൂല്‍ മന്ത്രിച്ചാല്‍ മതിയായിരുന്നില്ലേ എന്ന് ഈ സഹാബിവര്യന്‍ ഇവിടെ പറയുന്നില്ല.

അബൂ ഹുറൈറ (റ) നിവേദനം : ആരെങ്കിലും എന്തെങ്കിലും ബന്ധിച്ചാല്‍ അതിന്മേല്‍ ഭരമെല്‍പ്പിക്കപ്പെട്ടു. [നസാഈ]. ഈ ഹദീസിനെ വ്യാഖ്യാനിച്ചു നസാഈയുടെ ശര്‍ഹില്‍ എഴുതുന്നു : അബൂബക്കര്‍ (റ) തുര്‍മുദിയുടെ ശര്‍ഹില്‍ പറയുന്നു : ഖുര്‍ആന്‍ ഓതിക്കൊണ്ട് മന്ത്രിച്ചു ശരീരത്തില്‍ ബന്ധിപ്പിക്കല്‍ സുന്നത്തിന്റെ മാര്‍ഗ്ഗമല്ല. [നസാഈ].

by അബ്ദുസ്സലാം സുല്ലമി @ തൌഹീദ്, ഒരു സമഗ്ര വിശകലനം

ആയത്തുല്‍ കുര്‍സിയ്യ്

അല്ലാഹു, അവനല്ലാതെ ഒരു ആരാധ്യനുമില്ല. എന്നെന്നും ജീവിച്ചിരിക്കുന്നവനും സ്വയം ഭൂവുമാകുന്നു. അവനെ മയക്കവും നിദ്രയും പിടികൂടുകയില്ല. അവനുള്ളതാണ് ആകാശത്തിലുള്ളതും ഭൂമിയിലുള്ളതും. ആരുണ്ട് അവന്റെ അനുവാദപ്രകാരമല്ലാതെ അവനോടു ശുപാര്‍ശ ചെയ്യുന്നവന്‍. അവന്‍ അറിയുന്നു; അവരുടെ മുമ്പിലുള്ളതും അവരുടെ പിന്നിലുള്ളതും. അവന്റെ അറിവില്‍ നിന്നും അവന്‍ ഉദ്ദേശിച്ചതല്ലാതെ യാതൊന്നും അവര്‍ പ്രാപിക്കുന്നില്ല. അവന്റെ കുര്‍സിയ്യ് (രാജപീഠം) ആകാശങ്ങള്‍ക്കും ഭൂമിക്കും വിശാലമായിരിക്കുന്നു. അവ രണ്ടിന്റെയും സംരക്ഷണം അവനൊരു ഭാരമാവുകയില്ല. അവന്‍ അത്യുന്നതനും മഹാനുമാകുന്നു. [വിശുദ്ധ ഖുര്‍ആന്‍ അദ്ധ്യായം 2 ബഖറ 255]

മഹത്തായ തത്വതിലേക്ക് ഈ സൂക്തം അറിവ് നല്‍കുന്നു.

1. ദൈവം സ്വയം ഭൂവാന്. അതിനാല്‍ അവനെ ആര് സൃഷ്ടിച്ചു എന്ന ചോദ്യത്തിനു പ്രസക്തിയില്ല.

2. സ്വയം ഭൂവിന്റെ സവിശേഷതകള്‍ അവനില്‍ മാത്രമാണുള്ളത്. പ്രപഞ്ചത്തിനു അതില്ല.

3. മരണം സംഭവിക്കുന്നവന്‍ ദൈവമല്ല. ദൈവത്തെ നിദ്രപോലും പിടികൂടാന്‍ പാടില്ല. യേശുക്രിസ്തു ദൈവമല്ല. ബൈബിളില്‍ തന്നെ പറയുന്നു : "കര്‍ത്താവാണ് നിത്യദൈവം. ഭൂമിയുടെ അറുതികളെ സൃഷ്ടിച്ചവന്‍. അവന്‍ തളരുകയോ ക്ഷീണിക്കുകയോ ചെയ്യുന്നില്ല. അവന്റെ ബുദ്ധി അപ്രമേയമാണ്‌" [യെശയ്യാ 40:28]. "ഞാനാണ് ആദിമനും അന്തിമനും. ഞാനല്ലാതെ ദൈവം ഇല്ല. എന്നെപ്പോലെ ആരുണ്ട്?" [44:6]. "കര്‍ത്താവാണ് സത്യദൈവം. അവനാണ് ജീവനുള്ള ദൈവം; നിത്യരാജാവ്" [യിരെമ്യാ 10 :10]. "കര്‍ത്താവേ, എന്റെ ദൈവമേ, എന്റെ പരിശുദ്ധനായവനെ, നീ അനാദി മുതല്‍ ഉള്ളവന്‍ അല്ലെ. നീ അമര്‍ത്യന്‍" [ഹബക്കൂക്ക് 1:12]. യേശു ക്രിസ്തുവിനു മരണം സംഭവിച്ചിട്ടുണ്ടെന്ന് ബൈബിള്‍ തന്നെ പറയുന്നു. ഓശാന പ്രസിദ്ധീകരിച്ച ബൈബിളില്‍ "യേശിവിന്റെ മരണം' എന്നൊരു അദ്ധ്യായം തന്നെ കാണാം. ശേഷം എഴുതുന്നു : "അവന്‍ തലകുനിച്ചു പ്രാണന്‍ വെടിഞ്ഞു" [യോഹന്നാന്‍ 19 :30].

4. ഉറക്കം ബാധിച്ചവനെ വരെ വിളിച്ചാല്‍ കേള്‍ക്കുകയില്ല. അതിനാല്‍ ദൈവം മാത്രമാണ് വിളിച്ചുതേടല്‍ കേള്‍ക്കുന്നവന്‍.

5. പരലോകത്തെ ശുപാര്‍ശയും ഭൌതിക ലോകത്തെ ശുപാര്‍ശയും തമ്മില്‍ ധ്രുവങ്ങള്‍ തമ്മിലുള്ള വ്യത്യാസമുണ്ട്. അല്ലാഹുവിന്റെ അനുവാദത്തിനു ശേഷം അവന്‍ തൃപ്തിപ്പെട്ടു നിര്‍ദ്ദേശിക്കുന്നവര്‍ക്കു മാത്രമാണ് മുഹമ്മദ്‌ നബി (സ) വരെ ശുപാര്‍ശ ചെയ്യുക.

6. പ്രപഞ്ചത്തിന്റെ മുഴുവന്‍ അധികാരമുള്ളവന്‍ മാത്രമേ ദൈവമാവുകയുള്ളൂ.

by അബ്ദുസ്സലാം സുല്ലമി @ ഖുര്‍ആനിന്റെ വെളിച്ചം

പ്രാര്‍ത്ഥന : അര്‍ത്ഥവും ഉദ്ദേശവും

പ്രാര്‍ത്ഥന എന്ന പദത്തിനു അപേക്ഷ, യാചന എന്നെല്ലാം അര്‍ത്ഥങ്ങളുണ്ട്. ഭാഷാപരമായി പ്രാര്‍ത്ഥനക്ക് ഇവ്വിദമുള്ള അര്‍ത്ഥസങ്കല്‍പ്പങ്ങളുണ്ടെങ്കിലും സാധാരണ കേവല അപേക്ഷക്ക് പ്രാര്‍ത്ഥന എന്ന് സാങ്കേതികമായി പറയാറില്ലല്ലോ. ഒരു സ്ഥാപനത്തില്‍ ജോലി ലഭിക്കാന്‍ മാനേജര്‍ക്ക് അപേക്ഷ നല്‍കിയാല്‍ 'ഞാനൊരു ജോലിക്ക് വേണ്ടി മാനേജരോട് പ്രാര്‍ഥിച്ചു' എന്നാരും പറയാറില്ല. എന്നാല്‍ ഒരു ജോലി ലഭിക്കുവാന്‍ സര്‍വ ശക്തനായ സൃഷ്ടാവിനോടോ അല്ലെങ്കില്‍ അഭൌതിക ശക്തിയുണ്ടെന്നു വിശ്വസിക്കപ്പെടുന്ന വ്യക്തിയോടോ വസ്തുവോടോ ശക്തിയോടോ തേടിയാല്‍ ഒരു ജോലി ലഭിക്കാന്‍ വേണ്ടി പ്രാര്‍ഥിച്ചു എന്ന് തന്നെയാണ് പറയുക. അപ്പോള്‍ അഭൌതിക മാര്‍ഗത്തിലൂടെ സഹായവും രക്ഷയും ലഭിക്കുവാനുള്ള തേട്ടമാണ്‌ പ്രാര്‍ത്ഥന.

ഇതിനു തന്നെയാണ് അറബിയില്‍ ദഅ'വത്ത്, ദുആഅ' എന്നൊക്കെ പറയുന്നത്. ക്ഷണിക്കുക, വിളിക്കുക എന്നൊക്കെ ഭാഷയില്‍ അര്‍ത്ഥമുണ്ട്. എന്നാല്‍ "തീര്‍ച്ചയായും ഞാന്‍ എന്റെ രക്ഷിതാവിനോട്‌ മാത്രമാണ് ദുആ ചെയ്യുന്നത്" [72:20 ], "അതിനാല്‍ അല്ലാഹുവോട് കൂടെ മറ്റാരോടും നിങ്ങള്‍ ദുആ ചെയ്യരുത്" [72:18] എന്നിങ്ങനെ ദുആ അല്ലാഹുവിനോട് മാത്രമായി പറയുമ്പോള്‍ മേല്‍ പറഞ്ഞത്പോലെ അഭൌതിക മാര്‍ഗത്തിലൂടെ സഹായവും രക്ഷയും ലഭിക്കുവാനുള്ള തേട്ടമാണ്‌ ഉദ്ദേശ്യം.

ജീവിതത്തിലെ പ്രതിസന്ധിഘട്ടങ്ങളില്‍ നിന്നും രക്ഷനേടാന്‍ മനുഷ്യന്‍ സകലവഴികളും അവലംബിച്ചേക്കും. ഭൌതികവും ദ്രിശ്യവുമായ എല്ലാ വഴികളും അടഞ്ഞതായി കണ്ടാല്‍ ചില അവിവേകികള്‍ ജീവനോടുക്കിയേക്കും. എന്നാല്‍ ഒരു ദൈവവിശ്വാസി പ്രയാസങ്ങളില്‍ നിന്നും രക്ഷനേടാന്‍ എന്ത്ചെയ്യും? താന്‍ വിശ്വസിക്കുന്ന ദൈവത്തോട് പ്രാര്‍ഥിക്കുന്നു. ഈ സമര്‍പ്പണം വിശ്വാസിക്ക് പ്രതീക്ഷയും പ്രത്യാശയും പ്രദാനം ചെയ്യുന്നു. അപ്പോള്‍ ഒരു വിശ്വാസിയില്‍ ആദ്യാന്ത്യമുണ്ടാകുന്ന വിനയത്തിന്റെയും ആരാധനയുടെയും ഭാവമാകുന്നു ദുആ അഥവാ പ്രാര്‍ത്ഥന. അത് കൊണ്ട് തന്നെ പ്രാര്‍ത്ഥന ഇല്ലാത്ത ആരാധനയില്ല. പ്രവര്‍ത്തനമില്ലാതെ പ്രാര്‍ത്ഥന കൊണ്ട് മാത്രം പ്രയോജനവുമില്ല. പ്രവര്‍ത്തനവും പ്രാര്‍ഥനയും പരസ്പര പൂരകങ്ങളാണ്. അഹങ്കാരികള്‍ യാതൊരു ആരാധനയും ചെയ്യുന്നവരല്ല. പ്രാര്‍ഥിക്കാതിരിക്കുന്നത് അഹങ്കാരമാണ്. പ്രാര്‍ത്ഥനക്കര്ഹനായ നാഥനോട് പ്രാര്‍ഥിക്കാത്തവര്‍ നരകത്തില്‍ നിന്ദ്യരായി പ്രവേശിക്കുക തന്നെ ചെയ്യുന്നതാണ്.

"നിങ്ങളുടെ നാഥന്‍ പറഞ്ഞിരിക്കുന്നു, നിങ്ങള്‍ എന്നോട് പ്രാര്‍ഥിക്കുവിന്‍. നിങ്ങള്‍ക്ക് ഞാന്‍ ഉത്തരം ചെയ്യാം. എന്നെ ആരാധിക്കാതെ അഹങ്കരിക്കുന്നവരാരോ അവര്‍ നിന്ദ്യരായി ആളിക്കത്തുന്ന നരകത്തില്‍ പ്രവേശിക്കുന്നതാണ്." [40:60]

പ്രസ്തുത ആയത്തില്‍ 'ദുആഈ' എന്നല്ല 'ഇബാദത്തീ' എന്നാണു പ്രയോഗിച്ചിട്ടുള്ളത്. ആരാധന വിനയത്തിന്റെയും വണക്കത്തിന്റെയും പാരമ്യമാണ്. പ്രാര്‍ത്ഥനയാണെങ്കില്‍ അങ്ങേയറ്റത്തെ വിനയവും വിധേയത്തവും പ്രകടിപ്പിക്കലുമാണ്. അതുകൊണ്ടാണ് 'പ്രാര്‍ത്ഥന, അത് തന്നെയാണ് ആരാധന' 'പ്രാര്‍ത്ഥനയാണ് ആരാധനയുടെ മജ്ജ' എന്നെല്ലാം നബി (സ) വിശേഷിപ്പിച്ചത്‌.

പ്രാര്‍ഥിച്ചാലും ഇല്ലെങ്കിലും വിധി എന്താണോ അതുപോലെ സംഭവിക്കുമെന്ന് സമാശ്വസിച്ചു പ്രാര്‍ഥിക്കാതിരിക്കല്‍ ശരിയാണോ? അതല്ല, വിധിയില്‍ വിശ്വസിക്കുകയും ആശ്വസിക്കുകയും ചെയ്യുന്നതോടൊപ്പം പ്രാര്‍ഥിക്കുകകൂടി ചെയ്യേണ്ടതുണ്ടോ? ഇതില്‍ ഏതാണ് ഉത്തമം എന്ന വിഷയം പൂര്‍വികന്മാര്‍ ചര്‍ച്ച ചെയ്യുകയും 'പ്രാര്‍ഥിക്കണം' എന്നതിനാണ് തെളിവുകളുടെ പിന്‍ബലവും പ്രാധാന്യവും എന്ന് അവര്‍ കണ്ടെത്തുകയും ചെയ്തു. ഉത്തരം കിട്ടിയാലും ഇല്ലെങ്കിലും അല്ലാഹുവിന്റെ കല്പന അനുസരിക്കലായതിനാല്‍ പ്രാര്‍ത്ഥനക്ക് പ്രതിഫലവും ലഭിക്കുന്നതാണ്. എത്ര യോഗ്യനായിരുന്നാലും പ്രാര്‍ത്ഥനയില്ലെങ്കില്‍ അല്ലാഹു പരിഗണിച്ചു കൊള്ളണമെന്നില്ല. ആത്മാര്‍ത്ഥമായി പ്രാര്‍ഥിക്കുന്നവരെയാണ് അല്ലാഹു പരിഗണിക്കുക.

"നബിയെ, പറയുക : നിങ്ങളുടെ പ്രാര്‍ത്ഥനയില്ലെങ്കില്‍ എന്റെ രക്ഷിതാവ് നിങ്ങള്‍ക്ക് എന്ത് പരിഗണന നല്‍കാനാണ്? എന്നാല്‍ നിങ്ങള്‍ നിഷേധിച്ചുതള്ളിയിരിക്കുകയാണ്. അതിനാല്‍ ശിക്ഷ അനിവാര്യമായിരിക്കും." [25 :77]

അല്ലാഹുവോട് മാത്രം

കഷ്ടപ്പെടുന്ന സൃഷ്ടി വിളിച്ചു പ്രാര്‍ഥിച്ചാല്‍ സ്ഥലകാല വ്യത്യാസങ്ങളില്ലാതെ പ്രാര്‍ത്ഥന കേള്‍ക്കുവാനും ഉത്തരം ചെയ്യുവാനും കഷ്ടപ്പാടുകള്‍ തീര്‍ക്കുവാനും സര്‍വശക്തനായ സൃഷ്ടാവിന് അഥവാ അല്ലാഹുവിനു മാത്രമേ സാധിക്കുകയുള്ളൂ. ഏതെങ്കിലും വ്യക്തിക്കോ ശക്തിക്കോ ഈ കഴിവുണ്ടെങ്കില്‍ അതാണ്‌ പ്രാര്‍ഥിക്കാനുള്ള അര്‍ഹത. ആ ശക്തിയായിരിക്കണം ദൈവം. അല്ലാഹുവെ കൂടാതെ മറ്റൊരു ദൈവം ഉണ്ടാവുകയാണെങ്കില്‍ പ്രപഞ്ചവ്യവസ്ഥ തന്നെ തകരാറിലായിപ്പോകുമെന്നു ചിന്തിക്കുന്ന ആര്‍ക്കും മനസ്സിലാക്കാവുന്നതാണ്.

"കഷ്ടപ്പെടുന്നവര്‍ വിളിച്ചു പ്രാര്‍ഥിച്ചാല്‍ അവനു ഉത്തരം നല്‍കുകയും വിഷമം നീക്കി കൊടുക്കുകയും നിങ്ങളെ ഭൂമിയിലെ പ്രതിപുരുഷന്മാരാക്കി വെക്കുകയും ചെയ്യുന്നവനോ (അതോ അവരുടെ ദൈവങ്ങളോ ഉത്തമം?). അല്ലാഹുവോടൊപ്പം വേറെ വല്ല ദൈവവുമുണ്ടോ? വളരെ കുറച്ചേ നിങ്ങള്‍ ചിന്തിക്കുന്നുള്ളൂ" [27:62].

ലൌകിക ജീവിതത്തില്‍ ഉത്തരം ലഭിക്കുവാനും നേട്ടം ഉണ്ടാക്കുവാനും വേണ്ടി മാത്രമുള്ളതല്ല പ്രാര്‍ത്ഥന; മറിച്ചു നരകത്തില്‍ നിന്നും മോക്ഷം ലഭിക്കുവാനും കൂടിയുള്ളതാണ്. ഇത് പറഞ്ഞു കൊടുത്താല്‍ നരകത്തില്‍ നിന്നും കത്തിയെരിയുമ്പോള്‍ തെറ്റുകള്‍ സമ്മദിച്ചുകൊണ്ട് നരക വിമുക്തിക്ക് വല്ല മാര്‍ഗവുമുണ്ടോ എന്ന് അല്ലാഹുവോട് അവിശ്വാസികള്‍ ചോദിക്കും. അപ്പോള്‍ അവര്‍ക്ക് ലഭിക്കുന്ന ഉത്തരം ഇതായിരിക്കും, "അല്ലാഹുവോട് മാത്രം പ്രാര്‍ഥിക്കപ്പെട്ടാല്‍ നിങ്ങള്‍ അവിശ്വസിക്കുകയും അവനോടു പങ്ക് ചേര്‍ക്കപ്പെടുകയാണെങ്കില്‍ നിങ്ങള്‍ വിശ്വസിക്കുകയും ചെയ്തിരുന്നത് നിമിത്തമത്രെ അത്. എന്നാല്‍ (ഇന്ന്) വിധി കല്പിക്കാനുള്ള അധികാരം ഉന്നതനും മഹാനുമായ അല്ലാഹുവിനാകുന്നു" [40 :12].

ഈ ദുരവസ്ഥ വരാതിരിക്കാന്‍ വേണ്ടി അല്ലാഹു വിശ്വാസികള്‍ക്ക് മുന്നറിയിപ്പ് നല്‍കുന്നു. "ആകയാല്‍ മതം അല്ലാഹുവിനു (മാത്രം) നിഷ്കളങ്കമാക്കിക്കൊണ്ട് നിങ്ങള്‍ അവനോടു പ്രാര്‍ഥിക്കുവിന്‍. അവിശ്വാസികള്‍ക്ക്‌ അനിഷ്ടകരമായിരുന്നാലും ശരി" [40 :14 ].

by സി പി ഉമര്‍ സുല്ലമി @ പ്രാര്‍ത്ഥനകള്‍ നിത്യജീവിതത്തില്‍ from യുവത ബുക്സ്

തൌഹീദും ശിര്‍ക്കും

തൌഹീദിന്റെ പ്രാധാന്യം

അല്ലാഹു പറയുന്നു : "നിശ്ചയം ഞാനല്ലാതെ ഒരു ഇലാഹില്ല. അതുകൊണ്ട് എന്നെ നിങ്ങള്‍ ആരാധിക്കുവിന്‍ എന്ന് ദിവ്യസന്ദേശം അറിയിക്കപ്പെട്ടിട്ടല്ലാതെ നിനക്ക് മുമ്പ് ഒരു ദൂതനെയും നാം നിയോഗിച്ചിട്ടില്ല". [അമ്പിയാഅ' 25]

എല്ലാ പ്രവാചകന്മാരും ഏകോപിച്ചു പ്രബോധനം ചെയ്ത തത്വമാണ് 'ലാ ഇലാഹ ഇല്ലല്ലാഹു' എന്ന് ഈ ആയത്ത് സുതാര്യം വ്യക്തമാക്കുന്നു. പ്രവാചകന്മാര്‍ പ്രഥമമായി പ്രബോധനം ചെയ്തതും തൌഹീദായിരുന്നുവെന്ന് പരിശുദ്ധ ഖുര്‍ആനും നബിചര്യയും ചരിത്രവും നമ്മെ പഠിപ്പിക്കുകയും ഉണര്‍ത്തുകയും ചെയ്യുന്നുണ്ട്.

"നൂഹിനെ അദ്ദേഹത്തിന്‍റെ ജനതയിലേക്ക്‌ നാം നിയോഗിക്കുകയുണ്ടായി. (അദ്ദേഹം പറഞ്ഞു:) തീര്‍ച്ചയായും ഞാന്‍ നിങ്ങള്‍ക്ക്‌ സ്പഷ്ടമായ താക്കീത്‌ നല്‍കുന്നവനാകുന്നു. എന്തെന്നാല്‍ അല്ലാഹുവെയല്ലാതെ നിങ്ങള്‍ ആരാധിക്കരുത്‌. വേദനയേറിയ ഒരു ദിവസത്തെ ശിക്ഷ നിങ്ങളുടെ മേല്‍ തീര്‍ച്ചയായും ഞാന്‍ ഭയപ്പെടുന്നു". [ഹൂദ്‌ 25,26]

"ആദ്‌ ജനതയിലേക്ക്‌ അവരുടെ സഹോദരനായ ഹൂദിനെയും (നാം നിയോഗിക്കുകയുണ്ടായി.) അദ്ദേഹം പറഞ്ഞു: എന്‍റെ ജനങ്ങളേ, നിങ്ങള്‍ അല്ലാഹുവിനെ ആരാധിക്കുക. നിങ്ങള്‍ക്ക്‌ അവനല്ലാതെ യാതൊരു ദൈവവുമില്ല. നിങ്ങള്‍ കെട്ടിച്ചമച്ച്‌ പറയുന്നവര്‍ മാത്രമാകുന്നു." [ഹൂദ്‌ 50]

"ഥമൂദ്‌ ജനതയിലേക്ക്‌ അവരുടെ സഹോദരനായ സ്വാലിഹിനെയും (നാം നിയോഗിക്കുകയുണ്ടായി.) അദ്ദേഹം പറഞ്ഞു: എന്‍റെ ജനങ്ങളേ, നിങ്ങള്‍ അല്ലാഹുവെ ആരാധിക്കുക. നിങ്ങള്‍ക്ക്‌ അവനല്ലാതെ യാതൊരു ദൈവവുമില്ല" [ഹൂദ്‌ 61]

"മദ്‌യനിലേക്ക് അവരുടെ സഹോദരനായ ശുഐബിനേയും (നാം നിയോഗിക്കുകയുണ്ടായി.) അദ്ദേഹം പറഞ്ഞു: എന്‍റെ ജനങ്ങളേ, നിങ്ങള്‍ അല്ലാഹുവിനെ ആരാധിക്കുക. നിങ്ങള്‍ക്ക്‌ അവനല്ലാതെ യാതൊരു ദൈവവുമില്ല. അളവിലും തൂക്കത്തിലും നിങ്ങള്‍ കുറവ്‌ വരുത്തരുത്‌" [ഹൂദ്‌ 84]

സാമ്പത്തികമായി വളരെയധികം ദുര്‍മാര്‍ഗ്ഗത്തിലായിരുന്ന ജനസമൂഹത്തോട് ശുഐബ് (അ) ആദ്യമായി പ്രബോധനം ചെയ്യുന്നത് സാമ്പത്തിക നിയമത്തെയല്ല, പ്രത്യുത തൌഹീദാണ്. ഈ ആയത്തിനെ വ്യാഖ്യാനിച്ചു സമസ്തയുടെ ഖുര്‍ആന്‍ പരിഭാഷയില്‍ എഴുതുന്നു : "ആദ്യമായി തൌഹീദിനു അദ്ദേഹം ആജ്ഞാപിച്ചത് അത് സംഗതികളില്‍ വച്ച് ഏറ്റവും മുഖ്യമായതും മൌലികമായതും കൊണ്ടാണ്. മറ്റുള്ളവ അതില്‍നിന്നും പിരിഞ്ഞുണ്ടായവയാണ്. അപ്പോള്‍ മുരട്‌ നന്നായാല്‍ ശാഖയും നന്നാവും." [തഫ്സീരുള്‍ ഖുര്‍ ആണ്‍ പേജ് 234]

ഇബ്നു അബ്ബാസ് (റ) നിവേദനം : നിശ്ചയം മുആദിനെ യമനിലേക്ക് നബി (സ) നിയോഗിച്ചപ്പോള്‍ അദ്ദേഹത്തോട് പറഞ്ഞു : "തീര്‍ച്ചയായും നീ ചെല്ലുന്നത് വേദക്കാരില്‍പ്പെട്ട ഒരു ജനതയിലേക്കാണ്. അതിനാല്‍ നീ അവരെ ആദ്യമായി ക്ഷണിക്കേണ്ടത് "ലാ ഇലാഹ ഇല്ലല്ലാഹു' എന്നതിന് അവര്‍ സാക്ഷികളാവാന്‍ വേണ്ടിയായിരിക്കണം. ഈ പ്രശ്നത്തില്‍ അവര്‍ നിന്നെ അനുസരിച്ചാല്‍ ഒരു രാത്രിയിലും പകലിലുമായി അഞ്ചു നേരത്തെ നമസ്കാരം അല്ലാഹു നിങ്ങളുടെമേല്‍ നിര്‍ബന്ധമാക്കിയിട്ടുണ്ടെന്നു നീ അവരെ അറിയിക്കണം. അതില്‍ അവര്‍ നിന്നെ അനുസരിച്ചാല്‍ നിങ്ങളില്‍ നിന്നുള്ള സമ്പന്നന്മാരില്‍ നിന്ന് പിരിച്ചെടുത്തു നിങ്ങളിലെ ദരിദ്രര്‍ക്ക് വിതരണം ചെയ്യുന്ന സകാത്ത് അല്ലാഹു നിങ്ങളുടെമേല്‍ നിര്‍ബന്ധമാക്കിയിട്ടുണ്ടെന്നു നീ അവരെ അറിയിക്കുക." [ബുഖാരി, മുസ്ലിം]

ജൂത ക്രിസ്ത്യാനികളാണ് ഇവിടെ വേദക്കാര്‍ എന്നത് കൊണ്ടുദ്ദേശിക്കുന്നത്. ഇവര്‍ അന്നും ഇന്നും 'ലാ ഇലാഹ ഇല്ലല്ലാഹ്' എന്ന തത്വവും അല്ലാഹുവിനു മാത്രമേ ഇബാദെത്തെടുക്കാന്‍ പാടുള്ളൂ എന്ന തത്വവും ശിര്‍ക്ക് മഹാപാപമാണെന്ന യാഥാര്‍ത്യവും അംഗീകരിക്കുന്നവരാണ്. പരിശുദ്ധ ഖുര്‍ആന്‍ തന്നെ ഈ സംഗതി വിവരിക്കുന്നുണ്ട്.

അല്ലാഹു പറയുന്നു : '(നബിയേ,) പറയുക: വേദക്കാരേ,ഞങ്ങള്‍ക്കും നിങ്ങള്‍ക്കുമിടയില്‍ സമമായുള്ള ഒരു വാക്യത്തിലേക്ക നിങ്ങള്‍ വരുവിന്‍. അതായത്‌ അല്ലാഹുവെയല്ലാതെ നാം ആരാധിക്കാതിരിക്കുകയും അവനോട്‌ യാതൊന്നിനെയും പങ്കുചേര്‍ക്കാതിരിക്കുകയും നമ്മളില്‍ ചിലര്‍ ചിലരെ അല്ലാഹുവിനു പുറമെ രക്ഷിതാക്കളാക്കാതിരിക്കുകയും ചെയ്യുക (എന്ന തത്വത്തിലേക്ക്‌)' [ആലു ഇമ്രാന്‍ 64].

എന്നാല്‍ ഈ വിഷയത്തില്‍ മുസ്ലിങ്ങളില്‍ ഒരു വിഭാഗത്തിനു സംഭവിച്ചത് പോലെ അവര്‍ക്കും പിഴവ് സംഭവിക്കുകയാണ് ഉണ്ടായത്‌. അതിനാല്‍ നബി (സ) ആദ്യമായി 'ലാ ഇലാഹ ഇല്ലല്ലാഹ്' എന്നതിന്റെ ആശയം മനസ്സിലാക്കുന്നതില്‍ പില്‍ക്കാലത്ത്‌ വന്ന പിഴവുകള്‍ ശരിയാക്കുവാനാണ് മുആദ് (റ)നോട് നിര്‍ദ്ദേശിക്കുന്നത്.

വിശ്വാസികളുടെ ഭൌതിക ജീവിതത്തിന്റെയും പരലോക ജീവിതത്തിന്റെയും വിജയരഹസ്യം തൌഹീദ് ശരിപ്പെടുത്തലാണെന്ന് പരിശുദ്ധ ഖുര്‍ആനും പ്രവാചക പ്രസ്താവനകളും വ്യക്തമാക്കുന്നുണ്ട്. ഒരു വിശ്വാസിയും ഈ യാഥാര്‍ത്യത്തില്‍ സംശയിക്കുവാന്‍ പാടുള്ളതല്ല. മുസ്ലിങ്ങളുടെ ആദ്യകാല ചരിത്രം ഈ സത്യത്തെ സ്ഥിരപ്പെടുത്തുന്നു. സൈന്യത്തിന്റെ അംഗബലവും ആയുധബലവും വളരെ ക്ഷയിച്ചതായിട്ടും മുസ്ലിംകള്‍ ബദര്‍ യുദ്ധത്തില്‍ വിജയിക്കുവാനുള്ള കാരണം പരിശുദ്ധ ഖുര്‍ആന്‍ വ്യക്തമാക്കുന്നത് ശ്രദ്ധിക്കുക :

"ശത്രുക്കള്‍ക്കെതിരില്‍ നിങ്ങള്‍ നിങ്ങളുടെ രക്ഷിതാവിനോട്‌ ഇസ്തിഗാസ തേടിയിരുന്ന സന്ദര്‍ഭം (ഓര്‍ക്കുക.) തുടരെത്തുടരെയായി ആയിരം മലക്കുകളെ അയച്ചുകൊണ്ട്‌ ഞാന്‍ നിങ്ങള്‍ക്ക്‌ സഹായം നല്‍കുന്നതാണ്‌ എന്ന്‌ അവന്‍ അപ്പോള്‍ നിങ്ങള്‍ക്കു മറുപടി നല്‍കി" [അന്‍ഫാല്‍ 9].

എന്നാല്‍ ഇന്ന് മുസ്ലിംകള്‍ അല്ലാഹുവിനോട് ഇസ്തിഗാസ ചെയ്യുന്ന സ്വഭാവത്തെ അഗന്യമാക്കി ദൂരെ വലിച്ചെറിഞ്ഞു. അതിനാല്‍ അംഗസംഖ്യയിലും സാമ്പത്തിക ശക്തിയിലും അവര്‍ ആദ്യകാല മുസ്ലിംകളേക്കാള്‍ പുരോഗതി നേടിയവരായിട്ടും പരാജിതരായി. ഓരോ നിമിഷവും തന്റെ ശത്രുവിനെ ഭയപ്പെട്ടു ജീവിക്കേണ്ടതായ ചുറ്റുപാടിലേക്ക് അവര്‍ ചെന്നെത്തി. നിര്‍ഭയത്വം അവര്‍ക്ക് നഷ്ട്ടപ്പെട്ടു. എന്നാല്‍ അല്ലാഹു പറയുന്നത് തൌഹീദ് അനുസരിച്ച് മുസ്ലിംകള്‍ ജീവിച്ചാല്‍ അവന്‍ അവര്‍ക്ക് നിര്‍ഭയത്വം നല്‍കുമെന്നാണ്.

"നിങ്ങളില്‍ നിന്ന്‌ വിശ്വസിക്കുകയും സല്‍കര്‍മ്മങ്ങള്‍ പ്രവര്‍ത്തിക്കുകയും ചെയ്തവരോട്‌ അല്ലാഹു വാഗ്ദാനം ചെയ്തിരിക്കുന്നു; അവരുടെ മുമ്പുള്ളവര്‍ക്ക്‌ പ്രാതിനിധ്യം നല്‍കിയത്‌ പോലെതന്നെ തീര്‍ച്ചയായും ഭൂമിയില്‍ അവന്‍ അവര്‍ക്ക്‌ പ്രാതിനിധ്യം നല്‍കുകയും; അവര്‍ക്ക്‌ അവന്‍ തൃപ്തിപ്പെട്ട്‌ കൊടുത്ത അവരുടെ മതത്തിന്‍റെ കാര്യത്തില്‍ അവര്‍ക്ക്‌ അവന്‍ സ്വാധീനം നല്‍കുകയും; അവരുടെ ഭയപ്പാടിന്‌ ശേഷം അവര്‍ക്ക്‌ നിര്‍ഭയത്വം പകരം നല്‍കുകയും ചെയ്യുന്നതാണെന്ന്‌. എന്നെയായിരിക്കും അവര്‍ ആരാധിക്കുന്നത്‌. എന്നോട്‌ യാതൊന്നും അവര്‍ പങ്കുചേര്‍ക്കുകയില്ല. അതിന്‌ ശേഷം ആരെങ്കിലും നന്ദികേട്‌ കാണിക്കുന്ന പക്ഷം അവര്‍ തന്നെയാകുന്നു ധിക്കാരികള്‍ "[നൂര്‍ 55]

മുസ്ലിംകള്‍ക്ക് തൌഹീദില്‍ പിഴവ് സംഭവിച്ചിട്ടുണ്ട് എന്നാണോ ഞാന്‍ വിശ്വസിക്കേണ്ടത്? അതല്ല; ഖുര്‍ആനിന്റെ വാഗ്ദാനം പൊള്ളയാണെന്നാണോ? ഞാനൊരു മുസ്ലിമായതു കൊണ്ട് രണ്ടാമത്തെ വിശ്വാസം അംഗീകരിക്കുവാന്‍ എനിക്ക് ഒരിക്കലും സാധ്യമല്ല. മുസ്ലിംകള്‍ക്ക് തൌഹീദില്‍ വ്യതിചലനം സംഭവിച്ചതാണെന്നു ഞാന്‍ അടിയുറച്ചു വിശ്വസിക്കുന്നു.

അല്ലാഹു മറ്റൊരു സ്ഥലത്ത് പറയുന്നു : "നിലനില്‍പ്പിന്റെ വചനം കൊണ്ട് ഐഹികജീവിതത്തിലും പരലോകത്തും സത്യവിശ്വാസികളെ അല്ലാഹു ഉറപ്പിച്ച്‌ നിര്‍ത്തുന്നതാണ്‌" [ഇബ്രാഹിം 27]. 'നിലനില്‍പ്പിന്റെ വചനം' (ഖൌല്സ്സാബിത്) എന്നതുകൊണ്ട് ഉദ്ധേശിക്കുന്നത് 'ലാ ഇലാഹ ഇല്ലല്ലാഹ്' എന്നാണെന്ന് ഇബ്നു അബ്ബാസ് (റ) വ്യാഖ്യാനിക്കുന്നു.

മുഹമ്മദ്‌ നബി (സ) പ്രഖ്യാപിച്ചതായി ഇപ്രകാരം ഉദ്ധരിക്കപ്പെടുന്നു : "ജനങ്ങളെ, 'ലാ ഇലാഹ ഇല്ലല്ലാഹ്' എന്ന് നിങ്ങള്‍ പറയുവിന്‍. എങ്കില്‍ നിങ്ങള്‍ വിജയികളായിത്തീരും. അതുമൂലം നിങ്ങള്‍ക്കു അറബ് അധീനപ്പെടുത്താനും കഴിയും. നിങ്ങള്‍ക്ക് അതുമൂലം അനറബ് കീഴ്പ്പെടുകയും ചെയ്യും".

അല്ലാഹു പറയുന്നു : "ഇക്കൂട്ടരെയും അക്കൂട്ടരെയും എല്ലാം തന്നെ (ഇവിടെ വെച്ച്‌) നാം സഹായിക്കുന്നതാണ്‌. നിന്‍റെ രക്ഷിതാവിന്‍റെ ദാനത്തില്‍ പെട്ടതത്രെ അത്‌. നിന്‍റെ രക്ഷിതാവിന്‍റെ ദാനം തടഞ്ഞ്‌ വെക്കപ്പെടുന്നതല്ല" [ഇസ്റാഅ' 20] തൌഹീദില്‍ നിന്നും മുസ്ലിംകള്‍ അകന്നാലും ചിലപ്പോള്‍ അല്ലാഹുവിന്റെ ഈ പ്രകൃതിനിയമം എന്ന അടിസ്ഥാനത്തില്‍ ഭൌതികവിജയം അവനു നല്കിയേക്കാം. എന്നാല്‍ മനുഷ്യജീവിതത്തിന്റെ പരമലക്ഷ്യമായ പരലോകജീവിതം അവനു പൂര്‍ണ്ണമായും നഷ്ടപ്പെടുന്നു. അല്ലാഹു പറയുന്നു : "അല്ലാഹുവോട്‌ വല്ലവനും പങ്കുചേര്‍ക്കുന്ന പക്ഷം തീര്‍ച്ചയായും അല്ലാഹു അവന്ന്‌ സ്വര്‍ഗം നിഷിദ്ധമാക്കുന്നതാണ്‌. നരകം അവന്‍റെ വാസസ്ഥലമായിരിക്കുകയും ചെയ്യും. അക്രമികള്‍ക്ക്‌ സഹായികളായി ആരും തന്നെയില്ല" [മാഇദ 72]

തൌഹീദ് സംശുദ്ധമാക്കി വിശ്വാസികള്‍ ജീവിക്കുന്നപക്ഷവും ചിലപ്പോള്‍ വിവിധ തരത്തിലുള്ള പരീക്ഷണങ്ങള്‍ക്ക് അവന്‍ വിധേയമായേക്കാം. എങ്കിലും മനുഷ്യന്റെ ജീവിതലക്ഷ്യമായ പരലോകത്ത് എല്ലാ തരത്തിലുള്ള പരീക്ഷണങ്ങളില്‍ നിന്നും അവന്‍ മോചിതനാവുകയും പൂര്‍ണ്ണവിജയം അവനു ലഭിക്കുകയും ചെയ്യും. അല്ലാഹു പറയുന്നു : " കുറച്ചൊക്കെ (ശത്രുവേ സംബന്ധിച്ച) ഭയം, പട്ടിണി, ധനനഷ്ടം, ജീവനഷ്ടം, വിഭവനഷ്ടം എന്നിവ മുഖേന നിങ്ങളെ നാം പരീക്ഷിക്കുക തന്നെ ചെയ്യും. (അത്തരം സന്ദര്‍ഭങ്ങളില്‍ ) ക്ഷമിക്കുന്നവര്‍ക്ക്‌ (സ്വര്‍ഗ്ഗംകൊണ്ട്) സന്തോഷവാര്‍ത്ത അറിയിക്കുക" [ബഖറ 155].

"വിശ്വസിക്കുകയും തങ്ങളുടെ വിശ്വാസത്തില്‍ ദ്രോഹം കൂട്ടികലര്‍ത്താതിരിക്കുകയും ചെയ്തവരാരോ അവര്‍ക്കാണ്‌ നിര്‍ഭയത്വമുള്ളത്‌. അവര്‍ തന്നെയാണ്‌ നേര്‍മാര്‍ഗം പ്രാപിച്ചവര്‍ " [അന്‍ആം 82].ദ്രോഹം എന്നതിന്റെ വിവക്ഷ ശിര്‍ക്കാണെന്ന് പ്രവാചകന്‍ (സ) വിശദീകരിക്കുകയുണ്ടായി. [ബുഖാരി, മുസ്‌ലിം].

നബി(സ) യുടെ മറ്റു ചില ഹദീസുകള്‍ ശ്രദ്ധിക്കുക : ഉത്ബാന്‍ (റ) നിവേദനം : നബി (സ) അരുളി : "നിശ്ചയം, അല്ലാഹുവിന്റെ പ്രീതി ഉദ്ദേശിച്ചു വല്ലവനും 'ലാ ഇലാഹ ഇല്ലല്ലാഹ്' എന്ന് പ്രഖ്യാപിച്ചാല്‍ അവനു നരകം നിഷിദ്ധമാക്കപ്പെടും" [ബുഖാരി, മുസ്ലിം]

ജാബിര്‍ (റ) നിവേദനം : നബി (സ) അരുളി : "നിശ്ചയം,അല്ലാഹുവില്‍ ശിര്‍ക്ക് വെക്കാതെ വല്ലവനും അല്ലാഹുവിനെ അഭിമുഖീകരിച്ചാല്‍ അവന്‍ സ്വര്‍ഗ്ഗത്തില്‍ പ്രവേശിക്കും. അല്ലാഹുവില്‍ എന്തെങ്കിലും ശിര്‍ക്ക് വച്ചുകൊണ്ട് അവനെ അഭിമുഖീകരിച്ചാല്‍ അവന്‍ നരകത്തില്‍ പ്രവേശിക്കും" [മുസ്‌ലിം].

ശിര്‍ക്കിന്റെ ഗൌരവം

അല്ലാഹു നിഷിദ്ധമാക്കിയ സംഗതികളില്‍ പ്രഥമസ്ഥാനത്ത് നില്‍ക്കുന്നതും അവന്‍ ഒരിക്കലും പൊറുക്കാത്തതുമായ പാപമാണ് ശിര്‍ക്ക്. മനുഷ്യന്‍ ചെയ്യുന്ന സര്‍വ്വ പുണ്യകര്‍മ്മങ്ങളെയും ശിര്‍ക്ക് നിഷ്ഫലമാക്കുന്നു. അവയെ ദുര്‍ബലവും നിര്‍വീര്യവുമാക്കുന്നു.

അല്ലാഹു പറയുന്നു : "അവര്‍ (അല്ലാഹുവോട്‌) പങ്കുചേര്‍ത്തിരുന്നുവെങ്കില്‍ അവര്‍ പ്രവര്‍ത്തിച്ചിരുന്നതെല്ലാം അവരെ സംബന്ധിച്ചിടത്തോളം നിഷ്ഫലമായിപ്പോകുമായിരുന്നു".(6 അന്‍ആം 88).

നബി (സ) യോട് പോലും അല്ലാഹു ഉണര്‍ത്തുന്നത് കാണുക : "തീര്‍ച്ചയായും നിനക്കും നിന്‍റെ മുമ്പുള്ളവര്‍ക്കും സന്ദേശം നല്‍കപ്പെട്ടിട്ടുള്ളത്‌ ഇതത്രെ: (അല്ലാഹുവിന്‌) നീ പങ്കാളിയെ ചേര്‍ക്കുന്ന പക്ഷം തീര്‍ച്ചയായും നിന്‍റെ കര്‍മ്മം നിഷ്ഫലമായിപ്പോകുകയും തീര്‍ച്ചയായും നീ നഷ്ടക്കാരുടെ കൂട്ടത്തില്‍ ആകുകയും ചെയ്യും" (39 സുമര്‍ 65).

"തന്നോട്‌ പങ്കുചേര്‍ക്കപ്പെടുന്നത്‌ അല്ലാഹു ഒരിക്കലും പൊറുക്കുകയില്ല. അതൊഴിച്ചുള്ളതെല്ലാം അവന്‍ ഉദ്ദേശിക്കുന്നവര്‍ക്ക്‌ അവന്‍ പൊറുത്തുകൊടുക്കുന്നതാണ്‌. ആര്‍ അല്ലാഹുവോട്‌ പങ്കുചേര്‍ത്തുവോ അവന്‍ തീര്‍ച്ചയായും ഗുരുതരമായ ഒരു കുറ്റകൃത്യമാണ്‌ ചമച്ചുണ്ടാക്കിയിരിക്കുന്നത്‌" (4 നിസാഅ' 48)

"തന്നോട്‌ പങ്കുചേര്‍ക്കപ്പെടുക എന്നത്‌ അല്ലാഹു പൊറുക്കുകയില്ല; തീര്‍ച്ച. അതൊഴിച്ചുള്ളത്‌ അവന്‍ ഉദ്ദേശിക്കുന്നവര്‍ക്ക്‌ അവന്‍ പൊറുത്തുകൊടുക്കുന്നതാണ്‌. ആര്‍ അല്ലാഹുവോട്‌ പങ്കുചേര്‍ക്കുന്നുവോ അവന്‍ ബഹുദൂരം പിഴച്ചു പോയിരിക്കുന്നു" (4 നിസാഅ' 116).

"ലുഖ്മാന്‍ തന്‍റെ മകന്‌ സദുപദേശം നല്‍കികൊണ്ടിരിക്കെ അവനോട്‌ ഇപ്രകാരം പറഞ്ഞ സന്ദര്‍ഭം (ശ്രദ്ധേയമാകുന്നു:) എന്‍റെ കുഞ്ഞുമകനേ, നീ അല്ലാഹുവോട്‌ പങ്കുചേര്‍ക്കരുത്‌. തീര്‍ച്ചയായും അങ്ങനെ പങ്കുചേര്‍ക്കുന്നത്‌ വലിയ അക്രമം തന്നെയാകുന്നു" (31 ലുഖ്മാന്‍ 13).

പ്രവാചകന്റെ ചില ഹദീസുകള്‍ ശ്രദ്ധിക്കുക : ഇബ്നു മസ്ഊദ് (റ) നിവേദനം : നബി (സ) പറഞ്ഞു : "അല്ലാഹുവിനു പങ്കുകാരെ ഉണ്ടാക്കി കൊണ്ട് വല്ലവനും മരിച്ചാല്‍ അവന്‍ നരകത്തില്‍ പ്രവേശിച്ചു" [ബുഖാരി]

ഇബ്നു മസ്ഊദ് (റ) നിവേദനം : ഏറ്റവും വലിയ പാപം ഏതെന്നു ഞാന്‍ പ്രവാചകനോട് ചോദിച്ചു. അപ്പോള്‍ അദ്ദേഹം (സ) പറഞ്ഞു : "നിന്നെ സൃഷ്‌ടിച്ച അല്ലാഹുവില്‍ നീ പങ്കുചേര്‍ക്കലാണ് (ഏറ്റവും വലിയ പാപം)" [ബുഖാരി,മുസ്ലിം]

ശിര്‍ക്ക് വിശ്വാസവും അനുഷ്ടാന കര്‍മ്മങ്ങളും മനുഷ്യസമൂഹത്തില്‍ പ്രചരിപ്പിക്കുന്നവര്‍ക്ക് സാമ്പത്തികമായ ചില ലാഭം കരസ്ഥമാക്കാന്‍ സാധിച്ചേക്കാം. താല്കാലികമായ ഭൌതിക സുഖങ്ങള്‍ ലഭിച്ചേക്കാം.എന്നാല്‍ അല്ലാഹു അവര്‍ക്ക്
നല്‍കുന്ന ഗൌരവമായ താക്കീത് ഖുര്‍ആന്‍ വ്യക്തമാക്കുന്നത്
കാണുക:

"മനുഷ്യന്‌ വല്ല വിഷമവും ബാധിച്ചാല്‍ അവന്‍ തന്‍റെ രക്ഷിതാവിങ്കലേക്ക്‌ താഴ്മയോടെ മടങ്ങിക്കൊണ്ട്‌ പ്രാര്‍ത്ഥിക്കും. എന്നിട്ട്‌ തന്‍റെ പക്കല്‍ നിന്നുള്ള വല്ല അനുഗ്രഹവും അല്ലാഹു അവന്ന്‌ പ്രദാനം ചെയ്താല്‍ ഏതൊന്നിനായി അവന്‍ മുമ്പ്‌ പ്രാര്‍ത്ഥിച്ചിരുന്നുവോ അതവന്‍ മറന്നുപോകുന്നു. അല്ലാഹുവിന്‍റെ മാര്‍ഗത്തില്‍ നിന്ന്‌ വഴിതെറ്റിച്ച്‌ കളയുവാന്‍ വേണ്ടി അവന്ന്‌ സമന്‍മാരെ സ്ഥാപിക്കുകയും ചെയ്യുന്നു. (നബിയേ,) പറയുക: നീ അല്‍പകാലം നിന്‍റെ ഈ സത്യനിഷേധവും കൊണ്ട്‌ സുഖിച്ചു കൊള്ളുക. തീര്‍ച്ചയായും നീ നരകാവകാശികളുടെ കൂട്ടത്തിലാകുന്നു" [39 സുമര്‍ 8].

"അല്ലാഹുവിന്‍റെ മാര്‍ഗത്തില്‍ നിന്ന്‌ (ജനങ്ങളെ) തെറ്റിച്ചുകളയാന്‍ വേണ്ടി അവര്‍ അവന്ന്‌ ചില സമന്‍മാരെ ഉണ്ടാക്കി വെച്ചിരിക്കുന്നു. പറയുക: നിങ്ങള്‍ സുഖിച്ച്‌ കൊള്ളൂ. നിങ്ങളുടെ മടക്കം നരകത്തിലേക്ക്‌ തന്നെയാണ്‌" [14 ഇബ്രാഹിം 30].

"പിന്നെ നിങ്ങളില്‍ നിന്ന്‌ അവന്‍ കഷ്ടത നീക്കിത്തന്നാല്‍ നിങ്ങളില്‍ ഒരു വിഭാഗമതാ തങ്ങളുടെ രക്ഷിതാവിനോട്‌ പങ്കാളികളെ ചേര്‍ക്കുന്നു. നാം അവര്‍ക്ക്‌ നല്‍കിയിട്ടുള്ളതില്‍ അങ്ങനെ അവര്‍ നന്ദികേട്‌ കാണിക്കുന്നു. നിങ്ങള്‍ സുഖിച്ച്‌ കൊള്ളുക. എന്നാല്‍ വഴിയെ നിങ്ങള്‍ക്കറിയാം"
[16 നഹ്ല്‍ 54,55].

"അങ്ങനെ നാം അവര്‍ക്ക്‌ നല്‍കിയതിനു നന്ദികേട്‌ കാണിക്കുകയത്രെ അവര്‍ ചെയ്യുന്നത്‌. ആകയാല്‍ നിങ്ങള്‍ സുഖം അനുഭവിച്ച്‌ കൊള്ളുക. വഴിയെ നിങ്ങള്‍ മനസ്സിലാക്കികൊള്ളും" [30 റൂം 34].

"അങ്ങനെ അല്ലാഹു അവരെ രക്ഷപ്പെടുത്തിയപ്പോള്‍ അവരതാ ന്യായമില്ലാതെ ഭൂമിയില്‍ അതിക്രമം പ്രവര്‍ത്തിക്കുന്നുഃഏ; മനുഷ്യരേ, നിങ്ങള്‍ ചെയ്യുന്ന അതിക്രമം നിങ്ങള്‍ക്കെതിരില്‍ തന്നെയായിരിക്കും (ഭവിക്കുക.) ഇഹലോകജീവിതത്തിലെ സുഖാനുഭവം മാത്രമാണ്‌ (അത്‌ വഴി നിങ്ങള്‍ക്ക്‌ കിട്ടുന്നത്‌) . പിന്നെ നമ്മുടെ അടുത്തേക്കാണ്‌ നിങ്ങളുടെ മടക്കം. അപ്പോള്‍ നിങ്ങള്‍ പ്രവര്‍ത്തിച്ചു കൊണ്ടിരുന്നതിനെപ്പറ്റി നിങ്ങളെ നാം വിവരമറിയിക്കുന്നതാണ്‌" [10 യൂനുസ് 23].

"വക്രതയില്ലാതെ (ഋജുമാനസരായി) അല്ലാഹുവിലേക്ക്‌ തിരിഞ്ഞവരും, അവനോട്‌ യാതൊന്നും പങ്കുചേര്‍ക്കാത്തവരുമായിരിക്കണം (നിങ്ങള്‍.) അല്ലാഹുവോട്‌ വല്ലവനും പങ്കുചേര്‍ക്കുന്ന പക്ഷം അവന്‍ ആകാശത്തു നിന്ന്‌ വീണത്‌ പോലെയാകുന്നു. അങ്ങനെ പക്ഷികള്‍ അവനെ റാഞ്ചിക്കൊണ്ടു പോകുന്നു. അല്ലെങ്കില്‍ കാറ്റ്‌ അവനെ വിദൂരസ്ഥലത്തേക്ക്‌ കൊണ്ടു പോയി തള്ളുന്നു" [22 ഹജ്ജ് 31].

"അല്ലാഹുവോടൊപ്പം മറ്റൊരു ദൈവത്തെയും നീ സ്ഥാപിക്കരുത്‌. എങ്കില്‍ അപമാനിതനും കയ്യൊഴിക്കപ്പെട്ടവനുമായി നീ ഇരിക്കേണ്ടി വരും"
[17 ഇസ്രാഅ' 22].

by അബ്ദുസ്സലാം സുല്ലമി @ തൌഹീദ്, ഒരു സമഗ്ര വിശകലനം

ആരാധ്യനേകന്‍ അനശ്വരശാന്തി

ജീവിത സൌകര്യങ്ങള്‍ കൂടിക്കൂടി വരികയാണ്. പ്രകാശവേഗതയിലുള്ള വാഹനങ്ങളും സുമോഹനങ്ങളായ പാര്‍പ്പിടങ്ങളും അതി ദ്രുതമായ വിവര വിനിമയ ഉപാധികളും അങ്ങനെയങ്ങനെ...

ശാസ്ത്രം പുതിയ കണ്ടെത്തലുകള്‍ ആരംഭിച്ച കഴിഞ്ഞ നൂറ്റാണ്ടിന്‍റെ പുലര്‍ച്ചയില്‍ ആരോ ചോദിച്ചു : "ഇനിയെന്തിനൊരു ദൈവം?". അതിരില്ലാത്ത സുഖാനുഭവങ്ങളും പ്രപഞ്ചരഹസ്യങ്ങളിലേക്ക് ആഴ്ന്നു പറക്കാനുള്ള സാങ്കേതിക വിദ്യകളും മനുഷ്യന് സ്വന്തമാണെങ്കില്‍, വേറൊരു ദൈവം ആവശ്യമില്ലെന്ന് അവര്‍ അഹങ്കരിച്ചു.

ശാസ്ത്രീയ പുരോഗതി ഉത്തുംഗത പ്രാപിക്കുമ്പോഴും സുഖാനുഭവങ്ങള്‍ പുളച്ചു മറിയുമ്പോഴും ഇന്നത്തെ മാനവലോകം അതിനുമപ്പുറം വിശിഷ്ടമായ എന്തോ ഒന്നിന് കൊതിക്കുന്നു. ടെസ്റ്റ്‌ ട്യൂബില്‍ വിരിയിച്ചെടുക്കാനാകാത്ത ഒന്ന്; ആധുനിക മനുഷ്യനെ നിരാശപ്പെടുത്തുന്ന ഒന്ന്; മാര്‍ക്കറ്റില്‍ നിന്ന് വിലകൊടുത്തു വാങ്ങാനാകാത്ത ഒന്ന്; അതത്രേ ജീവിത സന്തോഷവും ശാന്തിയും.

ശാന്തി കൈവിട്ട മനുഷ്യന്റെ നിസ്സഹായത മുതലെടുക്കുവാന്‍ ചൂഷകര്‍ നാല് ദിക്കുകളിലും തിരക്ക് കൂട്ടുന്നു. സ്വാസ്ഥ്യവും ശാന്തിയും സമാധാനവും വെച്ച് നീട്ടി ആള്‍ ദൈവങ്ങള്‍. ഇരട്ട ശ്രീകള്‍, അമ്മമാര്‍, ബാബമാര്‍, ബീവിമാര്‍. മഖ്ബറകളും മഠങ്ങളും ആശ്രമങ്ങളും സ്വലാത്ത് നഗറുകളും. വ്യാജ ആത്മീയകേന്ദ്രങ്ങളില്‍ പണപ്പെട്ടി നിറയുന്നു. സമാധാനം മുന്തിയ വിലക്ക് വില്‍പ്പനക്ക് വെച്ചിരിക്കുന്നു.

യുക്തിബോധവും ശാസ്ത്രജ്ഞാനവുമുള്ള ആധുനികന്‍ ഈ വ്യാജന്മാര്‍ക്ക് മുന്നില്‍ കുമ്പിടുമ്പോള്‍, തമ്മില്‍ ശത്രുതയും ഭിന്നതയും ലേലംവിളിയും നടത്തി സ്വയം സ്വാസ്ഥ്യം തകര്‍ന്നവര്‍ക്ക് മറ്റുള്ളവരെ ആശ്വസിപ്പിക്കാനാവില്ലെന്നു ചിന്തിക്കുന്നില്ല!!

ശാന്തിയും സമാധാനവും ദൈവപ്രോക്തമായ വരദാനമാണ്; അത് സൃഷ്ടികള്‍ക്ക് നിര്‍മ്മിച്ച്‌ നല്‍കാനാവില്ല. അനേകം ദൈവങ്ങളുണ്ടെങ്കില്‍ വിശ്വശാന്തി യാഥാര്‍ത്യമാവില്ല. ദൈവങ്ങളുടെ കുടിപ്പകയില്‍ പ്രപഞ്ചം തകര്‍ന്നേനെ! "നിങ്ങളുടെ ദൈവം ഏക ദൈവം മാത്രമാകുന്നു. അവനല്ലാതെ യാതൊരു ദൈവമുമില്ല. അവന്‍ പരമകാരുണികനും കരുണാനിധിയുമത്രെ." [ഖുര്‍ആന്‍ 2 :166]

കരുണാവാരിധിയും സ്നേഹസമ്പന്നനുമായ സാക്ഷാല്‍ ദൈവത്തെ മാത്രം ആരാധിക്കുമ്പോള്‍ അവാച്യമായ മനശാന്തി കൈവരുന്നു. അവന്‍റെ കാരുണ്യത്തിന്‍റെ മഹാവര്‍ഷത്തില്‍ നാം കുളിരണിയുന്നു. ശാന്തിയടയുന്നു. താല്‍കാലിക സുഖാനുഭവങ്ങളേക്കാള്‍ ശാശ്വതശാന്തിക്ക് വേണ്ടി നാം ആ ആരാധ്യനെ വണങ്ങുക.

"അല്ലാഹു ശാന്തിയുടെ ഭവനത്തിലേക്ക് ക്ഷണിക്കുന്നു. അവന്‍ ഉദ്ദേശിക്കുന്നവരെ അവന്‍ നേരായ പാതയിലേക്ക് നയിക്കുകയും ചെയ്യുന്നു. സുകൃതം ചെയ്തവര്‍ക്ക് ഏറ്റവും ഉത്തമമായ പ്രതിഫലവും കൂടുതല്‍ നേട്ടവുമുണ്ട്‌. ഇരുളോ അപമാനമോ അവരുടെ മുഖത്തെ തീണ്ടുകയില്ല. അവരാകുന്നു സ്വര്‍ഗാവകാശികള്‍. അവരതില്‍ നിത്യവാസികളായിരിക്കും." [ഖുര്‍ആന്‍
10 :25 ,26]

[ഐ എസ് എം കാമ്പയിന്‍ ലഘുലേഖ]


Popular ISLAHI Topics

ISLAHI visitors