മരണം നല്‍കുന്ന സന്ദേശം

നമുക്ക് ചുറ്റും ദിനേനയെന്നോണം നടക്കുന്ന നൂറുക്കണക്കിന് മരണങ്ങള്‍! ചിലത് നാം ശ്രദ്ധിക്കുന്നു. ചിലത് നമുക്ക് ചെറുതോ വലുതോ ആയ രൂപത്തില്‍ 'ഫീല്‍' ചെയ്യുന്നു. എന്നാല്‍ കുറച്ചു ദിവസങ്ങളോ മണിക്കൂറുകളോ കഴിയുമ്പോള്‍ നാം അതെല്ലാം മറക്കുന്നു. എന്നാല്‍ നമുക്ക്ചുറ്റും നടക്കുന്ന ഓരോ മരണവും ജീവിച്ചിരിക്കുന്നവര്‍ക്കുള്ള ശക്തമായ കുറെ സന്ദേശങ്ങള്‍ ബാക്കി വെക്കുന്നുണ്ട്. നാമൊരിക്കലും മറന്നു പോകാന്‍ പാടില്ലാത്ത ജീവിതസന്ദേശങ്ങള്‍! അവയില്‍ ചിലത് താഴെ കൊടുക്കുന്നു:

1. മരണം എപ്പോള്‍, എവിടെവച്ചു, എങ്ങനെ കടന്നുവരും എന്ന് മുന്‍കൂട്ടി അറിയുക സാധ്യമല്ല.

2. സമയമാകുമ്പോള്‍ എല്ലാവരും മരണത്തിന്‍റെ രുചിയറിയും.

3. ആശയും അഭിലാഷവും സഫലമാകാതെയാണ് പലരുടെയും മരണയാത്ര.

4. മരണം ചിലര്‍ക്ക് നല്ല അനുഭവമാണ്. മറ്റുചിലര്‍ക്ക് ചീത്ത അനുഭവവും.

5. ആര്‍ത്തിയും സ്വാര്‍ഥതയും നിഷേധവും അധര്‍മവുമായി ജീവിച്ചവര്‍ മരണസമയത്ത് കുറ്റബോധത്തിന്‍റെ കണ്ണീര്‍ കുടിക്കും.

6. മരണത്തില്‍ നിന്ന് ഓടിരക്ഷപ്പെടാന്‍ എവിടെയും ഒളിച്ചിട്ടോ ഓടിയിട്ടോ പ്രയോജനമില്ല.

7. ഹൃദയമിടിപ്പിന്‍റെ ടക്ട-ക് ശബ്ദം മരണത്തിലേക്ക് മനുഷ്യന്‍ നടന്നടുക്കുന്ന കാലടിശബ്ദമാണ്.

8. പ്രഭാതത്തില്‍ പ്രതീക്ഷയോടെ ഉണരുന്ന മനുഷ്യന്‍ ഓര്‍ക്കുന്നുണ്ടോ, മരണം തന്‍റെ പാദരക്ഷയുടെ വള്ളിയെക്കാള്‍ തന്നോടടുത്തുണ്ടെന്നു!

9. മരണം ജീവിതത്തിന്‍റെ അവസാനമല്ല പരലോകജീവിതത്തിലേക്കുള്ള കവാടമാകുന്നു.

10. ശ്വസിക്കാന്‍ വായുവും കുടിക്കാന്‍ വെള്ളവും ഒരുക്കിത്തന്ന പ്രപഞ്ചനാഥനെ മാത്രം നമിക്കുകയും നമസ്ക്കരിക്കുകയും ചെയ്യുന്ന വിശ്വാസികള്‍ മരണസ്മരണയോടെ ജീവിക്കും. അവര്‍ ഒരിക്കലും മരണത്തെ ഭയപ്പെടുകയില്ല.

(വിശദമായ ഉള്‍ക്കാഴ്ച ലഭിക്കാന്‍ ഖുര്‍ആന്‍ 29:57, 31 :34, 4:78, 63:10, 47:27, 89:27-30 എന്നീ ദിവ്യവചനങ്ങള്‍ കാണുക)

by ഷംസുദ്ദീന്‍ പാലക്കോട്

ആത്മഹത്യ : പരാജിതന്റെ പോംവഴി

പരാജിതന്റെ പോംവഴിയാണ് സ്വയംഹത്യ. സ്വപ്‌നങ്ങള്‍ വീണടിയുന്നവന്റെ സ്വപ്നമാണത് . വിശ്വാസത്തകര്ച്ചയും ആദര്‍ശരാഹിത്യവും സൃഷ്ടിച്ച അപകടകരമായ പരിണാമങ്ങളിലൊന്ന്.

ആത്മഹത്യയെ കണിശമായി നിരോധിക്കുന്നുണ്ട് ഇസ്‌ലാം. ആത്മഹത്യയെ വ്യക്തമായും എതിര്‍ക്കുന്ന വചനം : "വിശ്വസിച്ചവരേ, നിങ്ങളുടെ മുതലുകള്‍ നിഷിദ്ധമാര്‍ഗത്തിലൂടെ പരസ്പരം ഭക്ഷിക്കരുത്. ഉഭയസമ്മതത്തോടെയുള്ള വിനിമയമായിരിക്കണം. നിങ്ങള്‍ നിങ്ങളെത്തന്നെ വധിക്കരുത്. അല്ലാഹു നിങ്ങളോട് കരുണയുള്ളവനാണെന്ന് ഗാഡമായി അറിയുക" [4 :29]. മരണം ആഗ്രഹിക്കാന്‍ പാടില്ലെന്ന് തിരുനബി (സ) പറയുന്നു : "നിങ്ങളാരും മരണം ആഗ്രഹിക്കുകയോ അതിനുവേണ്ടി പ്രാര്‍ഥിക്കുകയോ ചെയ്യരുത്. മരണത്തോടെ കര്‍മ്മങ്ങള്‍ നിലച്ചുപോകും. ദീര്‍ഘായുസ്സ്കൊണ്ട് സത്യവിശ്വാസിയുടെ നന്മ വര്‍ദ്ധിക്കുകയേ ഉള്ളൂ".

ആത്മഹത്യ ചെയ്തവരുടെ പരലോക ജീവിതത്തെക്കുറിച്ചു തിരുനബി (സ) വിവരിക്കുന്നതിങ്ങ നെ : "മലമുകളില്‍ നിന്നും താഴേക്കു ചാടി ആത്മഹത്യ നടത്തിയവന്‍ നരകത്തിലും കീഴ്പ്പോട്ട് ചാടിക്കൊണ്ടിരിക്കും. വിഷം കഴിച്ചു ആത്മഹത്യ ചെയ്യുന്നവന്‍ നരകത്തിലും വിഷം കഴിച്ചുകൊണ്ടിരിക്കും. ആയുധം കൊണ്ട് ആത്മഹത്യ ചെയ്തവന്‍ നരകത്തിലും അത് ചെയ്തുകൊണ്ടിരിക്കും". ആത്മഹത്യ ചെയ്തവന്‍ സ്വര്‍ഗ്ഗഗന്ധം അനുഭവിക്കില്ലെന്നും നബി (സ) പറയുന്നു.

ആത്മഹത്യ ചെയ്തയാളുടെ മരണാനന്തര കര്‍മങ്ങളില്‍ പങ്കെടുക്കാമെന്നും അയാള്‍ക്ക്‌ വേണ്ടി മയ്യിത്ത്നമസ്കാരം നിര്‍വഹിക്കാമെന്നും ഭൂരിപക്ഷം പണ്ഡിതന്‍മാരും അഭിപ്രായപ്പെടുന്നു. നബി (സ) അങ്ങനെ നമസ്കരിച്ചിട്ടില്ലെന്നു ചില റിപ്പോര്‍ട്ടുകളുണ്ട്. ആ പ്രവൃത്തിയോടുള്ള വെറുപ്പ്‌ പ്രകടിപ്പിക്കാനാണ് അങ്ങനെ ചെയ്തതെന്നു പണ്ഡിതന്‍മാര്‍ പറയുന്നു. ആത്മഹത്യ ചെയ്തതിന്‍റെ കാരണങ്ങള്‍ വിലയിരുത്തിയാണ് അങ്ങനെ ചെയ്തവരുടെ പ്രതിഫലം നിര്‍ണ്ണയിക്കുന്നതെന്നാണ് ശിആ വിശ്വാസം. ജൂത, ക്രിസ്തു മതങ്ങള്‍ ആത്മഹത്യയെ കണിശമായി വിലക്കുന്നുണ്ടെങ്കിലും അവര്‍ക്ക് സ്വാധീനമുള്ള രാജ്യങ്ങളില്‍ ആത്മഹത്യക്ക് കുറവില്ലെന്നാണ് കണക്കുകള്‍ സൂചിപ്പിക്കുന്നത്.

തനിക്കുമുന്നിലെ ജീവിതം ദുര്‍ഘടമാകുമ്പോള്‍ ഈ ജീവിതം അവസാനിപ്പിച്ചാല്‍ രക്ഷപ്പെടാമെന്ന ചിന്തയാണ് ആത്മഹത്യയിലേക്ക് നയിക്കുന്നത്. ജീവിതത്തിന്‍റെ അവസാനം മരണമാണെന്ന വിശ്വാസമാണ് ഇതിന്‍റെ കാരണം. എന്നാല്‍ വിശ്വാസം ഒരു പരിധിവരെ ആത്മഹത്യയെ തടയുന്നു.

"മരണമാണ് നല്ലതെങ്കില്‍ എനിക്ക് മരണം, ജീവിതമാണ് ഗുണമെങ്കില്‍ ജീവിതം" എന്ന് പ്രാര്‍ഥിക്കാനാണ് നബി (സ)യുടെ നിര്‍ദേശം. കടുത്ത മനോവേദനകള്‍ തളര്ത്തുമ്പോള്‍ അവരോടു നിര്‍ദേശിക്കപ്പെട്ടതാണത്. പ്രാര്‍ത്ഥനക്കും ആത്മനിര്‍ദേശങ്ങള്‍ക്കും (ഓട്ടോ സജഷന്‍സ്) വളരെയധികം പ്രാധാന്യമുണ്ട് ഇസ്‌ലാമില്‍.

ആത്മഹത്യയെ തടയാനുള്ള അന്വേഷണങ്ങള്‍ ഇന്നും പൂര്‍ണതയില്‍ എത്തിയിട്ടില്ല. ശക്തമായ നിയമങ്ങള്‍ക്കു തടയാനാകുന്നതല്ല ഇത്. മരിച്ചുകഴിഞ്ഞ വ്യക്തിക്ക് ശിക്ഷകൊണ്ട് കാര്യമില്ലല്ലോ. എന്നാല്‍ മരിച്ചുകഴിഞ്ഞാലും അനുഭവിക്കുന്ന ശിക്ഷയെക്കുറിച്ചാണ് ഇസ്‌ലാം താക്കീത് നല്‍കുന്നത്. ഈ വിശ്വാസം മൂലമാകാം, ഇസ്ലാമിക രാജ്യങ്ങളില്‍ ആത്മഹത്യാപ്രവണത ഏറ്റവും കുറഞ്ഞു കാണുന്നത്.

സമൂഹബന്ധങ്ങളുടെയും കുടുംബജീവിതത്തിന്‍റെയും നാഗരികതയുടെയും പ്രശ്നങ്ങളുമായി ബന്ധപ്പെടുത്തിയാണ് സാമൂഹ്യശാസ്ത്രം ആത്മഹത്യയെ കാണുന്നത്.

ദൈവവിശ്വാസം ശക്തമായ പോംവഴി

ജീവിക്കാന്‍ പ്രേരിപ്പിക്കുന്ന ഘടകമാണ് ദൈവവിശ്വാസം. എതുവിധമുള്ള നിറംമാറ്റങ്ങള്‍ ജീവിതത്തില്‍ സംഭവിച്ചാലും പിടിച്ചുനില്‍ക്കാനുള്ള ഉള്‍ക്കരുത്ത് പ്രദാനം ചെയ്യുകയാണത്. അല്ലാഹുവില്‍ നിന്നുള്ള യാതൊന്നും നിങ്ങള്‍ക്ക് വരാതെ സംരക്ഷിക്കാന്‍ എനിക്കാവില്ല എന്ന് യൂസുഫ് പ്രവാചകന്‍ (അ) പറയുന്നതായി ഖുര്‍ആനിലുണ്ട്. ജീവിതത്തെ യാഥാര്‍ത്യബോധത്തോടെ കാണുന്ന രീതിയാണത്. അനിഷ്ടകരമായ അനുഭവങ്ങളിലും ആദര്‍ശശക്തിയോടെ നിലയുറപ്പിക്കാനാകണം. അധീനതയില്‍ യാതൊന്നുമില്ലാത്ത ശൂന്യനാണ് താനെന്ന ബോധമാണ് ദൈവവിശ്വാസത്തിന്‍റെ സദ്ഫലങ്ങളില്‍ പ്രധാനം. അല്ലാഹു വിചാരിച്ചതെന്തോ അത് സംഭവിച്ചു. അവന്‍ വേണ്ടെന്നു വെച്ചതെന്തോ അത് സംഭവിച്ചില്ല. ഇത് നബി (സ) പതിവാക്കിയ മന്ത്രമായിരുന്നു. ചിലതൊന്നും ലഭിക്കില്ലെന്നും ചിലതൊന്നും ലഭിക്കാതിരിക്കില്ലെന്നുമുള്ള ഉറപ്പാണിത്. അനുഭവിക്കുന്നതെല്ലാം തനിക്കു മാത്രമായി അല്ലാഹു വിധിച്ചതാണെന്നും അല്ലാഹു ഏറ്റവും വലിയ കാരുണ്യവാന്‍ തന്നെയാണെന്നുമുള്ള തീര്‍ച്ച, അത്യസാധാരണമായ നിര്‍ഭയത്വമാണ് നല്‍കുന്നത്. ഈ നിര്‍ഭയത്വം സത്യവിശ്വാസിയുടെ മൂലധനമാണ്. സ്വയം തീര്‍ച്ചപ്പെടുത്തിയ ഇഷ്ടാനിഷ്ടങ്ങളെ ഒട്ടും പരിഗണിക്കാതെ സര്‍വലോക രക്ഷിതാവിന്‍റെ ഇഷ്ടങ്ങളെ തിരിച്ചറിയുമ്പോള്‍ മാത്രം ലഭിക്കുന്ന സൌഭാഗ്യമാണിത്.

by പി എം എ ഗഫൂര്‍ @ അത്തൌഹീദ് ദ്വൈമാസിക

തൌഹീദ് : അനശ്വരശാന്തിയുടെ ആത്മാവ്‌

ശാന്തമായി ഒഴുകുന്ന ഒരു നീരൊഴുക്കല്ല മനുഷ്യജീവിതം. മറിച്ച്‌ സംഘര്‍ഷങ്ങളും അസമാധാനങ്ങളും നിറഞ്ഞതാണത്‌. പരീക്ഷണങ്ങളുടെ പാരാവാരത്തെയും പ്രതിസന്ധികളുടെ കൂരമ്പുകളെയും നേരിട്ടുകൊണ്ട്‌ മാത്രമേ അത്‌ മുന്നോട്ട്‌ പോവുകയുള്ളൂ. ഒട്ടും പരീക്ഷിക്കപ്പെടാതെ കഴിഞ്ഞുകൂടുക

എന്നത്‌ അസംഭവ്യമാണ്‌. അതുകൊണ്ടു തന്നെ ജീവിതത്തെക്കുറിച്ചുള്ള കൃത്യമായ വിവരണം മനുഷ്യര്‍ക്ക്‌ ലഭ്യമാകേണ്ടത്‌ അനിവാര്യമാണ്‌. അതിനു വേണ്ടി ലോകരക്ഷിതാവ്‌ അവതരിപ്പിച്ച വിമോചനത്തിന്റെ സന്ദേശമാണ്‌ ഇസ്‌ലാം. ഏകദൈവത്വമാണതിന്റെ അടിസ്ഥാനാദര്‍ശം. ഈ ആദര്‍ശത്തെ അടിയാധാരമായി സ്വീകരിച്ചാണ്‌ വിശ്വാസിയുടെ ജീവിതം പടര്‍ന്നുപന്തലിക്കുന്നത്‌. ജീവിതത്തിലുണ്ടാവുന്ന മുഴുവന്‍ പ്രതിസന്ധികള്‍ക്കും പരിഹാരമോതുന്ന ദിവ്യസന്ദേശമാണതിന്റെ സവിശേഷത. സമാധാനപൂര്‍ണമായ ജീവിതവും ഇഹപര ജീവിതവിജയവുമാണത്‌ വാഗ്‌ദാനം ചെയ്യുന്നത്‌.

അനശ്വരശാന്തിയുടെ ആത്മാവ്‌ കുടികൊള്ളുന്നത്‌ ഏകദൈവ വിശ്വാസത്തിലാണ്‌. ഏകനായ ദൈവത്തെ ആരാധ്യനായും അവലംബമായും കരുതിയുറപ്പിക്കുന്ന ജീവിത നിലപാടാണത്‌. ജീവിതത്തിനൊരു ശക്തമായ പിന്തുണയും ശക്തിയും പ്രദാനംചെയ്യുന്ന ഊര്‍ജമാണത്‌. ഈ ഊര്‍ജം ഉള്ളിലേറ്റിയവനാണ്‌ സത്യവിശ്വാസി. അതുകൊണ്ടു തന്നെ സത്യവിശ്വാസിയുടെ ജീവിതം എല്ലായ്‌പ്പോഴും ഏകദൈവത്വത്തെ പ്രതിനിധീകരിക്കുന്നതാണ്‌. ``പറയുക: അല്ലാഹു ഏകനാണ്‌. അവന്‍ ഏവര്‍ക്കും ആശ്രയമായിട്ടുള്ളവനാണ്‌. അവന്‌ ആരുടെയും ആശ്രയം ആവശ്യമില്ല. അവനു പിതാവില്ല, പുത്രനുമില്ല. അവന്‌ തുല്യമായി ആരും ഇല്ലതാനും.'' (വി.ഖു 112:1-4).

മുഴുവന്‍ ശക്തിയുടെയും പ്രഭവകേന്ദ്രമാണ്‌ ലോകരക്ഷിതാവായ അല്ലാഹു. ആ മഹാശക്തിയുടെ അറിവോ സമ്മതമോ ഇല്ലാതെ ലോകത്ത്‌ യാതൊന്നും സംഭവിക്കുന്നില്ല. പരമാണു മുതല്‍ അനന്ത വിഹായസ്സിലെ നക്ഷത്രങ്ങള്‍ വരെ അവന്റെ അധികാരത്തിന്‌ കീഴിലാണ്‌ നിലകൊള്ളുന്നത്‌. ഈയൊരു ശക്തിയില്‍ ജീവിതം സമര്‍പ്പിക്കാനും ഈ ശക്തിയെക്കുറിച്ചുള്ള ശരിയായ അറിവിലേക്കെത്തിച്ചേരാനും സാധിക്കുന്നവര്‍ക്കേ ജീവിതമോക്ഷം ലഭ്യമാകൂ. ദൈവത്തെ നേരിട്ട്‌ നമുക്ക്‌ സമീപിക്കാനാവില്ലെന്നും ഇടയാളുകളുടെയോ പൂജാരികളുടെയോ സഹായം അതിനാവശ്യമാണെന്നും വിശ്വസിക്കുന്നത്‌ ഏകദൈവ വിശ്വാസത്തിന്‌ വിരുദ്ധമാണ്‌. നിന്നെ മാത്രം ഞങ്ങള്‍ ആരാധിക്കുന്നു. നിന്നോട്‌ മാത്രം ഞങ്ങള്‍ സഹായം തേടുന്നുവെന്ന്‌ ദിനേന ആവര്‍ത്തിച്ചുരുവിടുന്നവനാണ്‌ സത്യവിശ്വാസി.

ഏകനായ അല്ലാഹുവിനോട്‌ പ്രാര്‍ഥിക്കുന്നതിലൂടെ മനുഷ്യന്‍ പ്രതീക്ഷയുടെയും പ്രത്യാശയുടെയും വിതാനത്തിലേക്കുയരുകയാണ്‌. താന്‍ തനിച്ചല്ലെന്നും, ലോകത്തെ സൃഷ്‌ടിച്ച നാഥന്റെ സഹായവും രക്ഷയും തനിക്ക്‌ ലഭ്യമാവുമെന്നുമുള്ള പ്രതീക്ഷാബോധം വിശ്വാസിയുടെ ഓരോ നിമിഷത്തെയും സജീവമാക്കും. ലോകത്തുള്ള മുഴുവന്‍ മനുഷ്യരും ഒരു നന്മ വരുത്തണമെന്ന്‌ വിചാരിച്ചാലും, ഒരു തിന്മ നടപ്പിലാക്കണമെന്ന്‌ വിചാരിച്ചുറപ്പിച്ച്‌ പ്രവര്‍ത്തിച്ചാലും അല്ലാഹുവിന്റെ അനുമതിയില്ലാതെ യാതൊന്നും സംഭവിക്കുകയില്ലെന്ന്‌ ഉറച്ചു വിശ്വസിക്കുന്ന സത്യവിശ്വാസി, മറ്റാര്‍ക്കും അനുഭവിക്കാനാവാത്ത സുരക്ഷിതത്വം അനുഭവിക്കുന്നു. അവന്റെ ഹൃദയത്തില്‍ മനശ്ശാന്തി നിറഞ്ഞുപൂക്കുന്നു. അവന്റെ ഹൃദയവിചാരങ്ങള്‍ അല്ലാഹുവുമായി ബന്ധമുള്ളതായിത്തീരുന്നു. അവന്റെ ഇടപാടുകളും നയനിലപാടുകളുമെല്ലാം ഉറച്ച വിശ്വാസത്തിന്റെ സരണിയിലും നന്മയിലുമായിത്തീരുന്നു. അവന്റെ മനസ്സ്‌ ശാന്തമായിത്തീരുന്നു. ദൈവസ്‌മരണ കൊണ്ട്‌ മാത്രമാണ്‌ മനുഷ്യന്‌ പൂര്‍ണമായ മനശ്ശാന്തി ലഭിക്കുന്നത്‌ എന്നാണ്‌ ഖുര്‍ആനിക കാഴ്‌ചപ്പാട്‌.

മനുഷ്യനെ ശിക്ഷിക്കാന്‍ വേണ്ടി കാത്തിരിക്കുന്ന ക്രൂരനല്ല അല്ലാഹു. മറിച്ച്‌ മനുഷ്യര്‍ക്ക്‌ കാരുണ്യത്തിന്റെയും രക്ഷയുടെയും സമാധാനത്തിന്റെയും വാതായനങ്ങള്‍ തുറന്നുവെച്ചവനാണവന്‍. തന്നോട്‌ തന്റെ അടിമ ആവശ്യങ്ങളുന്നയിക്കുന്നതില്‍ ഏറെ സന്തുഷ്‌ടനാണ്‌ അല്ലാഹു. ആവശ്യങ്ങളും തേട്ടങ്ങളും അവനില്‍ മാത്രം കേന്ദ്രീകരിച്ചുകൊണ്ടായിരിക്കണമെന്നതാണ്‌ അല്ലാഹു നമ്മെ അറിയിക്കുന്നത്‌. ``എന്റെ ദാസന്മാര്‍ എന്നെക്കുറിച്ച്‌ നിന്നോട്‌ ചോദിച്ചാല്‍ ഞാന്‍ അവര്‍ക്ക്‌ ഏറ്റവും അടുത്തുള്ളവനാകുന്നു (എന്ന്‌ പറയുക.) പ്രാര്‍ഥിക്കുന്നവന്‍ എന്നെ വിളിച്ച്‌ പ്രാര്‍ഥിച്ചാല്‍ ഞാന്‍ ആ പ്രാര്‍ഥനക്ക്‌ ഉത്തരം നല്‌കും. അതുകൊണ്ട്‌ എന്റെ ആഹ്വാനം അവന്‍ സ്വീകരിക്കുകയും എന്നില്‍ അവര്‍ വിശ്വസിക്കുകയും ചെയ്യട്ടെ. അവര്‍ നേര്‍വഴി പ്രാപിക്കാന്‍ വേണ്ടി.'' (2:186) തന്റെ രക്ഷിതാവിനോട്‌ ചോദിച്ചാല്‍ ഉത്തരം നല്‌കപ്പെടുമെന്നും നിരാശനാവേണ്ടി വരില്ലെന്നുമുള്ള ഉറച്ച വിശ്വാസത്തോടു കൂടി അല്ലാഹുവിനു മുമ്പില്‍ കൈനീട്ടുന്ന ഒരു സത്യവിശ്വാസി വളരെ വലിയ മനസ്സുഖമാണ്‌ അനുഭവിക്കുന്നത്‌. എന്തും നേരിടാന്‍ മാത്രം വിശാലമായ മനസ്സ്‌ ഇതിലൂടെ വിശ്വാസിക്ക്‌ കൈവരുന്നു. അവന്‍ ദൈവത്തിന്റെ വിശാലമായ കാരുണ്യത്തിലും തണലിലുമായിത്തീരുന്നു. എന്നാലിന്ന്‌ ദൈവത്തില്‍ വിശ്വസിക്കുന്നവര്‍ തന്നെ ദൈവത്തിന്‌ സമന്മാരെ സ്ഥാപിക്കുകയും അവര്‍ തങ്ങളുടെ ജീവിതര ക്ഷയ്‌ക്കെത്തുമെന്ന്‌ വിശ്വസിക്കുകയും ചെയ്യുന്നു. സൃഷ്‌ടികളിലെ ചിലരില്‍ ദിവ്യത്വം ആരോപിക്കുകയും അവര്‍ അല്ലാഹുവിന്റെയടുക്കല്‍ തങ്ങള്‍ക്ക്‌ വേണ്ടി ശുപാര്‍ശ ചെയ്യുമെന്ന്‌ വിശ്വസിക്കുകയും ചെയ്യുന്നു.

അങ്ങനെ അല്ലാഹുവിന്‌ മാത്രം നല്‌കേണ്ട നേര്‍ച്ചകളും വഴിപാടുകളും അര്‍ച്ചനകളും ആരാധനകളും മറ്റുള്ളവര്‍ക്ക്‌ നല്‌കുന്ന ഗുരുതരമായ പാപത്തിനവര്‍ കാരണക്കാരായിത്തീരുന്നു. ദൈവം അല്ലാഹു മാത്രമാണെന്നും, അവന്റെ കഴിവില്‍ മറ്റാര്‍ക്കും യാതൊരു വിധത്തിലുമുള്ള സ്വാധീനവുമില്ലെന്നും അവന്‍ എല്ലാറ്റിന്റെയും സ്രഷ്‌ടാവാണെന്നുമുള്ള നിരവധി വാക്യങ്ങള്‍ ഖുര്‍ആന്‍ മനുഷ്യര്‍ക്ക്‌ മുമ്പില്‍ വരച്ചുകാട്ടുന്നുണ്ട്‌. ``(നബിയേ) പറയുക: അല്ലാഹുവിന്‌ പുറമെ നിങ്ങള്‍ വിളിച്ചു പ്രാര്‍ഥിക്കുന്നതിനെപ്പറ്റി നിങ്ങള്‍ ചിന്തിച്ചു നോക്കിയിട്ടുണ്ടോ? ഭൂമിയില്‍ അവര്‍ എന്താണ്‌ സൃഷ്‌ടിച്ചിട്ടുള്ളതെന്ന്‌ നിങ്ങള്‍ എനിക്ക്‌ കാണിച്ചുതരൂ. അതല്ല, ആകാശങ്ങളുടെ സൃഷ്‌ടിപ്പില്‍ അവര്‍ക്ക്‌ വല്ല പങ്കും ഉണ്ടോ?'' (ഖു. 46:4)

ഏകദൈവവിശ്വാസി വെളിച്ചത്തിലാണ്‌. സമാധാനത്തിലും ശാന്തിയിലുമാണ്‌. അവന്റെ ജീവിതവഴി ഖുര്‍ആനാണ്‌. ജീവിതശൈലി സുന്നത്താണ്‌. അവന്റെ വിചാരണ പരലോകത്താണ്‌. യഥാര്‍ഥ ജീവിതത്തിന്റെ ആരംഭം മരണശേഷമാണ്‌. ഏകദൈവവിശ്വാസത്തിന്‌ വിരുദ്ധമായതെല്ലാം ഇരുട്ടുകളാണ്‌. അസമാധാനമാണതിന്റെ ആകെത്തുക. അന്ധകാരത്തിന്റെ ആഴിയിലാണതിന്റെ പര്യവസാനം. ഇരുട്ടുകള്‍ പലവിധമുണ്ട്‌. ഇരുട്ടുകളുടെ ഇരുട്ടാകുന്ന ശിര്‍ക്കിലേക്ക്‌ വഴിനടത്തുന്നതിനെയെല്ലാം ഇസ്‌ലാം നിരോധിച്ചു. നബി(സ) പറഞ്ഞു: ``ആരെങ്കിലും ഒരു പ്രശ്‌നക്കാരനെ സമീപിച്ചു. എന്നിട്ട്‌ അവനോട്‌ വല്ലതിനെ സംബന്ധിച്ചും ചോദിച്ചു. അങ്ങനെ അവന്‍ പറയുന്നത്‌ വിശ്വസിക്കുകയും ചെയ്‌തു. അങ്ങനെയെങ്കില്‍ അവന്റെ നാല്‌പത്‌ ദിവസത്തെ നമസ്‌കാരം സ്വീകരിക്കപ്പെടുകയില്ല.'' (തിര്‍മിദി)

വെളിച്ചത്തിന്‌ ഒരു ദൈവം, ഇരുട്ടിന്‌ ഒരു ദൈവം, സംഹാരത്തിന്‌ മറ്റൊരു ദൈവം എന്ന കാഴ്‌ചപ്പാടും വിശ്വാസവും തെറ്റാണെന്നും ദൈവം ഏകന്‍ മാത്രമാണെന്നും വിശുദ്ധ ഖുര്‍ആന്‍ അടിക്കടി ഉണര്‍ത്തുന്നു. (വി.ഖു 23:91)

അന്യൂനനും അജയ്യനുമായ ഏക ഇലാഹിനെ ആരാധിക്കുമ്പോള്‍ മാത്രമാണ്‌ മനുഷ്യന്‌ ആത്മീയമായ ഉണര്‍വ്‌ സാധ്യമാവുന്നത്‌. അതുകൊണ്ടു തന്നെ മനുഷ്യജീവിതത്തിലെ ന്യൂക്ലിയസ്‌ ആയി പരിഗണിക്കേണ്ടത്‌ ഏകദൈവ വിശ്വാസത്തെയാകുന്നു. ഇതിന്‌ ചുറ്റുമായിട്ടാണ്‌ വിശ്വാസിയുടെ ജീവിതം ചുറ്റിക്കറങ്ങേണ്ടത്‌. ഇവിടെ വീഴ്‌ച സംഭവിച്ചാല്‍ കെട്ടിപ്പൊക്കിയതെല്ലാം തകര്‍ന്നുവീഴും. പടച്ചുവെച്ചതെല്ലാം ഉടഞ്ഞുവീഴും. ഒരുപാട്‌ അസ്വസ്ഥതകള്‍ അനുഭവിക്കേണ്ടി വരും. എന്നാല്‍ ആരാധ്യന്‍ ഏകനാണെന്ന്‌ ഉറച്ചുവിശ്വസിക്കുകയും അവനില്‍ ഭരമേല്‌പിച്ചുകൊണ്ട്‌ ജീവിക്കുകയും ചെയ്യുന്നവന്‌ ഇഹപര ജീവിതം മനശ്ശാന്തി നിറഞ്ഞതായിരിക്കും. പ്രതിസന്ധികളുടെ കാറ്റിലും കോളിലും കടപുഴകാതെ ഉറച്ച മുരടുള്ള മരത്തെപ്പോലെ നിലകൊള്ളാന്‍ അവന്‌ കഴിയും. ആകാശത്തേക്കുയര്‍ന്നു നില്‍ക്കുന്ന വൃക്ഷത്തിന്റെ ശിഖരങ്ങള്‍ പോലെ അവന്റെ ജീവിതം ലോകത്ത്‌ തണല്‍വിരിക്കും. വെയിലത്തും മഴയത്തും നശിക്കാത്ത, കടപുഴകി വീഴാത്ത മരത്തെപ്പോലെ വിശ്വാസിയുടെ ജീവിതം ഉറച്ചതും ശക്തവുമായിത്തീരുന്നു. വിശുദ്ധ ഖുര്‍ആന്‍ പറയുന്നതിങ്ങനെ: ``അല്ലാഹു നല്ല വചനത്തിന്‌ എങ്ങനെയാണ്‌ ഉപമ നല്‌കിയിരിക്കുന്നത്‌ എന്ന്‌ നീ കണ്ടില്ലേ? അത്‌ ഒരു നല്ല മരം പോലെയാകുന്നു. അതിന്റെ മുരട്‌ ഉറച്ചുനില്‌ക്കുകയും അതിന്റെ ശാഖകള്‍ ആകാശത്തേക്ക്‌ ഉയര്‍ന്നു നില്‍ക്കുന്നതുമാകുന്നു. അതിന്റെ രക്ഷിതാവിന്റെ ഉത്തരവനുസരിച്ച്‌ അത്‌ എല്ലാ കാലത്തും അതിന്റെ ഫലം നല്‍കിക്കൊണ്ടിരിക്കും. മനുഷ്യര്‍ക്ക്‌ അവര്‍ ആലോചിച്ച്‌ മനസ്സിലാക്കുന്നതിനായി അല്ലാഹു ഉപമകള്‍ വിവരിച്ചുകൊടുക്കുന്നു.'' (വി.ഖു 14:24,25)

ഇന്ന്‌ ലോകത്ത്‌ ജീവിച്ചുകൊണ്ടിരിക്കുന്ന മനുഷ്യരിലധികവും അസ്വസ്ഥതകളും ആകുലതകളുമായിട്ടാണ്‌ കഴിഞ്ഞുകൂടുന്നത്‌. എല്ലാവിധത്തിലുമുള്ള ഭോഗവസ്‌തുക്കളും ആസ്വാദന വിഭവങ്ങളുമെല്ലാമുണ്ടായിട്ടും മനസ്സുഖം അവര്‍ക്കെല്ലാം മരീചികയായിത്തീരുന്നു. ജീവിതത്തിന്‌ പൂര്‍ണമായ രുചിയോ സ്വാദോ കിട്ടാത്ത അവസ്ഥ വന്നുചേരുന്നു. എല്ലാമുണ്ടായിട്ടും എന്തിന്റെയൊക്കെയോ കുറവുണ്ടെന്ന തോന്നല്‍, സുഖസൗകര്യങ്ങളുടെ നിറവിലും ഞെരുക്കത്തിന്റെ നീറ്റല്‍, സുഖാഡംബരങ്ങള്‍ക്കിടയിലും ആത്മീയമായ ശൂന്യത, അസ്വസ്ഥജനകമായ ജീവിതാവസ്ഥകള്‍. ഇവിടെയാണ്‌ മനുഷ്യന്‌ വിശ്വാസം തുണയായിത്തീരുന്നത്‌. ഏകനായ ദൈവത്തിലുള്ള ഇളക്കം തട്ടാത്ത വിശ്വാസം മനുഷ്യനെ ഒരേ സമയം ദൃഢചിത്തനും ശാന്തശീലനുമാക്കിത്തീര്‍ക്കുന്നു. അപ്പോള്‍ അശാന്തിയും അസമാധാനവും അവന്റെ ജീവിതവഴിയില്‍ നിന്നും വഴിമാറുന്നു. സംശയം വേണ്ട, അനശ്വരശാന്തിയുടെ ആത്മാവ്‌ ഏകദൈവവിശ്വാസമാകുന്നു.

by ജംഷിദ് നരിക്കുനി @ ശബാബ്

ആചാരങ്ങള്‍ വെടിയുക, ഖുര്‍ആനെ സ്വീകരിക്കുക

"നിങ്ങള്‍ സത്യം അസത്യവുമായി കൂടി ക്കുഴക്കരുത്. അറിഞ്ഞു കൊണ്ട് സത്യം മറച്ചു വെക്കുകയും ചെയ്യരുത്". [അദ്ധ്യായം 2 ബഖറ 42]

പ്രപഞ്ചത്തിനു ഒരു സൃഷ്ടാവ് ഉണ്ടെന്നതും സര്‍വശക്തനായ അവന്‍ ഏകനാണെന്നതും നേര്‍ക്ക്‌നേരെ ചിന്തിക്കുന്നവര്‍ക്ക് നിഷേധിക്കുവാന്‍ കഴിയാത്ത യാഥാര്‍ത്യമാണ്. പ്രപഞ്ചവസ്തുക്കളെ നിരീക്ഷിക്കുന്നവര്‍ക്ക് സുവ്യക്തമാകുന്ന അത്ഭുതങ്ങള്‍ അല്ലാഹുവിന്‍റെ അസ്തിത്വത്തിന്‍റെ തെളിവുകളാണ്. അവന്‍ മാനവസമൂഹത്തിന്‍റെ മാര്‍ഗദര്‍ശനത്തിനാവശ്യമായ വേദഗ്രന്ഥങ്ങള്‍ പ്രവാചകന്മാര്‍ മുഖേന മനുഷ്യര്‍ക്ക്‌ നല്‍കി എന്നതും ഒരു യാഥാര്‍ത്യമാണ്.

പ്രവാചകപരമ്പരയിലെ അവസാനത്തെ കണ്ണിയാണ് മുഹമ്മദ്‌ നബി (സ). വേദഗ്രന്ഥങ്ങളുടെ അവസാന പതിപ്പാണ്‌ വിശുദ്ധ ഖുര്‍ആന്‍. ഈ യാഥാര്‍ത്ഥ്യം അറിയാത്തവരല്ല ജൂതരും ക്രൈസ്തവരുമായ ഇസ്രാഈല്‍ സമൂഹം. ദൈവത്തെയും ദൂതന്മാരെയും വേദഗ്രന്ഥങ്ങളെയും അംഗീകരിക്കുന്ന ഇവര്‍തന്നെ മുഹമ്മദ്‌ നബി (സ)യെയും ഖുര്‍ആനിനെയും അംഗീകരിക്കാന്‍ സന്നദ്ധരാവുന്നില്ല. സത്യവും അസത്യവും കൂട്ടിക്കലര്‍ത്തിയും സത്യത്തെ വികൃതമാക്കിയും മൂടിവെച്ചും ആശയക്കുഴപ്പം സൃഷ്ട്ടിക്കുകയാണ് അവര്‍ ചെയ്യുന്നത്. ഖുര്‍ആന്‍ ശക്തമായ ഭാഷയില്‍ ഈ പ്രവര്‍ത്തനത്തെ എതിര്‍ക്കുന്നു.

സത്യവും അസത്യവും കൂട്ടിക്കലര്‍ത്തി ആശയക്കുഴപ്പം സൃഷ്ട്ടിക്കുന്നവരെ ഇന്നും കാണാം. ഖബര്‍ സന്ദര്‍ശനവും ഖബരാരാധനയും ചിലര്‍ കൂട്ടി ക്കലര്‍ത്തുന്നത് ഇതിനുദാഹരണമാണ്. ഒന്ന് സുന്നത്തും മറ്റൊന്ന് ശിര്‍ക്കുമാണ്. എന്നാല്‍ ഇത് രണ്ടും കൂട്ടിക്കലര്‍ത്തി വിശദീകരിച്ചു ആളുകളെ ഖബര്‍ പൂജയിലേക്ക് ഇവര്‍ നയിക്കുന്നു.

വിശുദ്ധ ഖുര്‍ആന്‍ പകല്‍പോലെ വ്യക്തമാക്കിയ ചില ആശയങ്ങള്‍പോലും ദുര്‍വ്യാഖ്യാനം ചെയ്തു സത്യത്തെ മൂടിവെക്കുന്നവരുമുണ്ട്. അല്ലാഹു അല്ലാത്തവരോടുള്ള പ്രാര്‍ത്ഥന മഹാപാതകമാണെന്ന് ഖുര്‍ആന്‍ വിശദീകരിച്ചതാണ്. എന്നാല്‍ പല പേരുകളും വ്യാഖ്യാനങ്ങളും നല്‍കി അത്തരം പ്രാത്ഥന ശരിയാണെന്ന് സമര്‍ഥിക്കുന്നവര്‍ സത്യത്തെ അസത്യവുമായി കൂട്ടിച്ചേര്‍ക്കുന്നു.

ഖുര്‍ആനിന്‍റെയും ഹദീസിന്‍റെയും പിന്‍ബലമില്ലാത്ത നാട്ടാചാരങ്ങള്‍ സമൂഹത്തില്‍ പ്രചരിച്ചത് കാണാം. ഇതിനെ എതിര്‍ക്കേണ്ടവര്‍ മൌനം പാലിക്കുന്നത് സത്യത്തെ മൂടിവെക്കലും അസത്യവുമായി കൂട്ടിക്കലര്‍ത്തലുമാണ് ചെയ്യുന്നത്. ചില ഭൌതികനേട്ടങ്ങള്‍ക്ക്‌ വേണ്ടി മാത്രമാണ് ഇവര്‍ അതിനെ പ്രോത്സാഹി പ്പിക്കുന്നത്. സത്യം കൈപ്പുള്ളതാണെങ്കിലും തുറന്നുപറയണമെന്നാണ് നബി (സ) പഠിപ്പിച്ചത്. അക്രമിയായ രാജാവിന്‍റെ മുന്നില്‍ സത്യം തുറന്നു പറയലാണ് ഏറ്റവും വലിയ ജിഹാദ്.

സത്യവും അസത്യവും ഒന്നിക്കാത്ത രണ്ടു വഴികളാണ്. ഖുര്‍ആന്‍ പ്രഖ്യാപിച്ചു : സത്യം വന്നിരിക്കുന്നു. അസത്യം തകര്‍ന്നിരിക്കുന്നു. നിശ്ചയം അധര്‍മ്മം തകര്‍ന്നു തരിപ്പണമാവുകതന്നെ ചെയ്യും.

by അബ്ദു സലഫി @ പുടവ കുടുംബ മാസിക

മതം സ്നേഹമാണ്

മതത്തെ ജനങ്ങള്‍ ഭയപ്പെടേണ്ടിവരുന്ന അവസ്ഥ എത്ര അപമാനകരമാണ്; ആപല്‍കരമാണ്. ദൌര്‍ഭാഗ്യവശാല്‍ അത് ലോകത്ത് സംഭവിച്ചു കൊണ്ടിരിക്കുന്നു. ഭീകരപ്രവര്‍ത്തനങ്ങള്‍, തീവ്രവാദം, ബോംബ്‌ സ്ഫോടനങ്ങള്‍, സ്വത്ത് നശീകരണം തുടങ്ങിയ അക്രമങ്ങളെ മതവുമായും മാതാനുയായികളുമായും ബന്ധപ്പെടുത്തി അവതരിപ്പിക്കപ്പെടുന്നു. ദൈവഭക്തി ശക്തിപ്പെടുത്തിക്കൊണ്ട് ഓരോ വ്യക്തിയുടെ മനസ്സിലും സമൂഹമനസ്സാക്ഷിയിലും സ്നേഹവും സമാധാനവും സൃഷ്ടിക്കലാണ് മതത്തിന്‍റെ ദൌത്യം. ഇതിനു വിപരീതമായി മതം ഭീതിപരത്തുന്നതും ഹിംസക്കു പ്രേരണ നല്‍കുന്നതുമാണെന്നുമുള്ള ആരോപണം വിചിത്രമായിരിക്കുന്നു.

അഹിംസ എല്ലാ മതങ്ങളും ഉദ്ഘോഷിക്കുന്ന ഒന്നാണ്. മനസാ വാചാ കര്‍മണാ ആരെയും ദ്രോഹിക്കാവതല്ല. മഹാഭാരതം അനുശാസിക പര്‍വതത്തില്‍ പറയുന്നുണ്ട് : 'അഹിംസ പരമ ധര്‍മ്മമാണ്. പരമമായ തപസ്സും പരമസത്യവും അഹിംസയാണ്. സര്‍വ ഭൂതങ്ങളോടുള്ള സ്നേഹത്തില്‍ നിന്നാണ് അത് ഉദിക്കുന്നത്. എല്ലാവര്‍ക്കും നല്ലത് വരട്ടെ എന്നായിരിക്കണം ഒരോരുത്തരുടേയും വിചാരം. ലോകസമസ്താ സുഖിനോ ഭവന്തു'. ശ്രീബുദ്ധന്‍ അഹിംസയുടെ മഹാ പ്രവാചകനായിരുന്നു. എല്ലാ ജീവജാലങ്ങളെയും ദുഖത്തില്‍ നിന്നും മോചിപ്പിക്കുക എന്ന ലക്ഷ്യത്തില്‍ നിന്ന് ഉയിര്‍ക്കൊണ്ട ബുദ്ധദര്‍ശനത്തില്‍ അഹിംസാവ്രതം പരമപ്രധാനമാണ്. ക്ഷുദ്രപ്രാണികളുടെ ഹിംസപോലും ഒഴിവാക്കുന്ന തരത്തിലുള്ള ജീവിതചര്യയാണ് ജൈനമതത്തിലുള്ളത്. ശത്രുവിനെപ്പോലും സ്നേഹിക്കാനും വലതു കവിളിലടിച്ചാല്‍ ഇടതുകവിളും കാണിച്ചു കൊടുക്കാനും ഉപദേശിച്ച ക്രിസ്തു സ്നേഹത്തിന്‍റെയും അഹിംസയുടെയും അതുന്ന്യത സന്ദേശമാണ് പ്രചരിപ്പിച്ചത്.

തീവ്രവാദി ആക്രമണാരോപണത്തിനു ഏറ്റവുമധികം വിധേയമായ മതമാണ്‌ ഇസ്‌ലാം. ഇസ്‌ലാം എന്ന വാക്കില്‍ തന്നെ സമാധാനം, രക്ഷ എന്നീ ആശയങ്ങള്‍ അടങ്ങിയിരിക്കുന്നു. ജീവന്‍ നല്‍കിയ ദൈവത്തിനല്ലാതെ മറ്റാര്‍ക്കും ജീവനെടുക്കാനോ ഒന്നിനെയും നശിപ്പിക്കാനോ അവകാശമില്ലെന്നതാണ് ഇസ്ലാമിന്‍റെ കാഴ്ചപ്പാട്. മനുഷ്യവധത്തെ അത് മഹാപാപമായി കാണുന്നു. ദൈവം ഭക്ഷ്യാവശ്യ ത്തിനു മനുഷ്യന് അനുവദിച്ചതോ ഉപദ്രവകാരിയോ ആയ ജീവികളെയല്ലാതെ മറ്റൊന്നിനെയും വധിക്കാവതല്ല. നിരപരാധികളായ മനുഷ്യര്‍ക്ക്‌ ജീവഹാനിയും സ്വത്തുക്കള്‍ക്ക് നാശവുമുണ്ടാക്കുന്ന എത്രയെത്ര സ്ഫോടനങ്ങളും ഭീകരാക്രമണങ്ങളും നടക്കുന്നു! കാരുണ്യം പ്രവാചകന്‍ മുഹമ്മദ്‌ (സ)യുടെ മുഖമുദ്രയാണ്. ഒരാള്‍ ഇസ്‌ലാംമത വിശ്വാസിയാവണമെങ്കില്‍ അയാളുടെ എല്ലാതരം ഉപദ്രവത്തില്‍ നിന്നും മറ്റുള്ളവര്‍ക്ക് സുരക്ഷ വേണമെന്നു നബി (സ) നിര്‍ദേശിക്കുന്നു.

മനുഷ്യരുടെ രക്തവും ധനവും അഭിമാനവും പരസ്പരം ഹറാം (നിഷിദ്ധം) ആണെന്ന് പ്രവാചകന്‍ (സ) വ്യക്തമാക്കുന്നു. യുദ്ധവേളയില്‍ ശത്രുക്കളുടെ ആക്രമണത്തെ പ്രതിരോധിക്കേണ്ട സന്ദര്‍ഭത്തില്‍പോലും ആക്രമണകാരികളെയല്ലാതെ നിരപരാധികളായ സ്ത്രീകളെയും കുട്ടികളെയും വൃദ്ധന്‍മാരെയും ഉപദ്രവിക്കാന്‍ പാടില്ലെന്ന് നബിയും പിന്‍ഗാമികളും പ്രത്യേകം നിഷ്കര്‍ശിച്ചിരുന്നു. ആരോടെങ്കിലുമുള്ള വിരോധം ഒരിക്കലും നീതിരഹിതമായി പ്രവര്‍ത്തിക്കുന്നതിന് പ്രേരിപ്പിക്കരുതെന്നു ഖുര്‍ആന്‍ കല്‍പ്പിക്കുന്നു. തിന്മകളെ നിര്‍മാര്‍ജനം ചെയ്യേണ്ടത് കൂടുതല്‍ വലിയ തിന്മകളെക്കൊണ്ടല്ല; നന്മകള്‍ കൊണ്ടായിരിക്കണമെന്നാണ് മതത്തിന്‍റെ കാഴ്ചപ്പാട്.

ബാബരി മസ്ജിദ് തകര്‍ത്തവരും ഗുജറാത്തില്‍ അത്യാചാരങ്ങള്‍ നടത്തിയവരും ഇറാഖ് അധിനിവേശത്തിലൂടെ നിരവധിപേരുടെ ജീവനും സ്വത്തിനും നാശം വരുത്തിയവരും അമേരിക്കയിലും ബ്രിട്ടനിലും ആക്രമണങ്ങള്‍ അഴിച്ചുവിട്ടവരും വിവിധ മതങ്ങളുടെ അനുയായികളാണെങ്കിലും അവര്‍ ചെയ്ത കുറ്റം ആ മതങ്ങളുടെമേല്‍ കെട്ടി വെക്കാമോ? മതം സ്നേഹവും സൌഹൃദവും സമാധാനവും സുരക്ഷയുമാണ്‌. നര്നിലാവ് പോലെ തെളിഞ്ഞ മതത്തിന്‍റെ പരിശുദ്ധിയെ ഇല്ലാതാക്കുന്ന പ്രവണതയെ നാം അപലപിക്കേണ്ടതുണ്ട്.

by മുഹമ്മദ്‌ കുട്ടശ്ശേരി @ ജീവിതം സന്തോഷപ്രദമാകാന്‍ from യുവത ബുക്സ്

ഐക്യം മഹാനുഗ്രഹം

ഐക്യം അനുഗ്രഹമാണ്. അല്ലാഹു നല്‍കുന്ന അപാരമായ അനുഗ്രഹം. പരിശുദ്ധ ഖുര്‍ആനിന്റെ അടിസ്ഥാനത്തിലായിരിക്കണം ഐക്യം. "നിങ്ങളൊന്നിച്ച് അല്ലാഹുവിന്‍റെ കയറില്‍ മുറുകെപിടിക്കുക. നിങ്ങള്‍ ഭിന്നിച്ച് പോകരുത്‌. നിങ്ങള്‍ അന്യോന്യം ശത്രുക്കളായിരുന്നപ്പോള്‍ നിങ്ങള്‍ക്ക് അല്ലാഹു ചെയ്ത അനുഗ്രഹം ഓര്‍ക്കുകയും ചെയ്യുക. അവന്‍ നിങ്ങളുടെ മനസ്സുകള്‍ തമ്മില്‍ കൂട്ടിയിണക്കി. അങ്ങനെ അവന്‍റെ അനുഗ്രഹത്താല്‍ നിങ്ങള്‍ സഹോദരങ്ങളായിത്തീര്‍ന്നു" [ഖുര്‍ആന്‍ 3 :103].

ആദര്‍ശബന്ധുക്കള്‍ക്കിടയില്‍ ഉണ്ടായിത്തീരേണ്ടത് മാനസികമായ ഐക്യമാണെന്ന് ഖുര്‍ആന്‍ ആവര്‍ത്തിക്കുന്നു. ഭൌതികമായ താല്‍പര്യങ്ങളുടെപേരില്‍ ഐക്യപ്പെടുന്നവര്‍ക്ക് ഈ മാനസികമായ ഐക്യം പടച്ചവന്‍ കനിഞ്ഞരുളണമെന്നില്ല. "അവരുടെ (വിശ്വാസികളുടെ) ഹൃദയങ്ങള്‍ തമ്മില്‍ അവന്‍ ഇണക്കിചേര്‍ക്കുകയും ചെയ്തിരിക്കുന്നു. ഭൂമിയിലുള്ളത് മുഴുവന്‍ നീ ചെലവഴിച്ചാല്‍ പോലും അവരുടെ ഹൃദയങ്ങള്‍ തമ്മില്‍ ഇണക്കിചേര്‍ക്കാന്‍ നിനക്ക് സാധിക്കുമായിരുന്നില്ല. എന്നാല്‍ അല്ലാഹു അവരെ തമ്മില്‍ ഇണക്കിചേര്‍ത്തിരിക്കുന്നു. തീര്‍ച്ചയായും അവന്‍ പ്രതാപിയും യുക്തിമാനുമാകുന്നു" [ഖുര്‍ആന്‍ 8:63].

ആദര്‍ശതലത്തിലുള്ള മാനസികമായ ഐക്യപ്പെടലാണ് കാലഘട്ടം സമൂഹത്തോട് ആവശ്യപ്പെടുന്നത്. ഇത്തരത്തിലുള്ള ഐക്യത്തിലാണ് പടച്ചവന്‍റെ കാരുണ്യവും അനുഗ്രഹങ്ങളും ഉണ്ടാവുക എന്ന് ഖുര്‍ആന്‍ ആവര്‍ത്തിച്ചു വ്യക്തമാക്കുന്നു. എന്നാല്‍ ആദര്‍ശത്തിനും വിശ്വാസത്തിനും വിരുദ്ധമായി പടച്ചവന്‍റെ എകത്വത്തിനും ഇസ്ലാമിന്‍റെ നിയമങ്ങള്‍ക്കും എതിരായി പ്രവര്‍ത്തിച്ചു കക്ഷികളായി പിരിഞ്ഞവരെക്കുറിച്ചു വിശ്വാസികള്‍ ആശങ്കപ്പെടേണ്ടതില്ലെന്നും ഖുര്‍ആന്‍ ശക്തമായി ഉണര്‍ത്തുന്നു. ഇത്തരത്തിലുള്ള ആദര്‍ശവിരുദ്ധ പ്രവര്‍ത്തനങ്ങള്‍ക്കെതിരില്‍ സംഘടിക്കുന്നതു അനിവാര്യവും ആക്ഷേപാര്‍ഹമല്ലാത്തതും ആണെന്നും നാം തിരിച്ചറിയണം. "തങ്ങളുടെ മതത്തില്‍ ഭിന്നതയുണ്ടാക്കുകയും, കക്ഷികളായിത്തീരുകയും ചെയ്തവരാരോ അവരുമായി നിനക്ക് യാതൊരു ബന്ധവുമില്ല. അവരുടെ കാര്യം അല്ലാഹുവിങ്കലേക്ക് തന്നെയാണ് (മടക്കപ്പെടുന്നത്‌.) അവര്‍ ചെയ്തു കൊണ്ടിരുന്നതിനെപ്പറ്റി അവന്‍ അവരെ അറിയിച്ച് കൊള്ളും" [ഖുര്‍ആന്‍ 6 :159].

അല്ലാഹുവിന്‍റെയും പ്രവാചകന്മാരുടെയും നിര്‍ദേശങ്ങള്‍ ജീവിതത്തില്‍ നിലനിര്‍ത്തി അതിനനുസരിച്ചുള്ള പ്രവര്‍ത്തനങ്ങളാണ് സമൂഹത്തിനു ശക്തിയും പ്രതാപവും പ്രൌഡിയും തേജസ്സും നേടിത്തരുന്നത്‌. ഈ അടിസ്ഥാനപ്രമാണങ്ങളില്‍ നിന്നുള്ള അകല്‍ച്ച സമൂഹത്തിലെ ഭിന്നിപ്പിനും ശക്തിക്ഷയത്തിനും കാരണമായത്തീരുന്നുവെന്ന് വിശുദ്ധ ഖുര്‍ആന്‍ മുന്നറിയിപ്പ് നല്‍കുന്നു. "അല്ലാഹുവെയും അവന്‍റെ ദൂതനെയും നിങ്ങള്‍ അനുസരിക്കുകയും ചെയ്യുക. നിങ്ങള്‍ ഭിന്നിച്ചുപോകരുത്‌. എങ്കില്‍ നിങ്ങള്‍ക്ക് ധൈര്യക്ഷയം നേരിടുകയും നിങ്ങളുടെ വീര്യം (നശിച്ചു) പോകുകയും ചെയ്യും. നിങ്ങള്‍ ക്ഷമിക്കുക. തീര്‍ച്ചയായും അല്ലാഹു ക്ഷമാശീലരുടെ കൂടെയാകുന്നു" [ഖുര്‍ആന്‍ 8 :46]. അപ്പോള്‍ ആദര്‍ശത്തിലും വിശ്വാസത്തിലും ഖുര്‍ആനിന്റെയും തിരുസുന്നത്തിന്‍റെയും അടിസ്ഥാനത്തില്‍ ചിന്തകളെയും വാക്കുകളെയും പ്രവര്‍ത്തനങ്ങളെയും ക്രമപ്പെടുത്തി മുന്നേറുന്ന കൂട്ടായ്മയിലാണ് പടച്ചവന്‍റെ സഹായം ഉണ്ടാവുക. അവരെ മാത്രമാണ് പടച്ചവന്‍ ഇഷ്ടപ്പെടുക. "സുദൃഢമായി സംയോജിപ്പിച്ച ഒരു മതില്‍ പോലെ അണിചേര്‍ന്നുകൊണ്ട് തന്‍റെ മാര്‍ഗത്തില്‍ യുദ്ധം ചെയ്യുന്നവരെ തീര്‍ച്ചയായും അല്ലാഹു ഇഷ്ടപ്പെടുന്നു" [ഖുര്‍ആന്‍ 61:4].

അതോടൊപ്പം കളവും വഞ്ചനയും ഏഷണിയും കൈമുതലാക്കി ആദര്‍ശസമൂഹത്തിന്‍റെ പൊതുനന്മക്കെതിരെ പ്രവര്‍ത്തിക്കുകയും അവരുടെ പുരോഗതിക്കു തടസ്സം നില്‍ക്കുകയും നാട്ടില്‍ കുഴപ്പമുണ്ടാക്കുകയും ചെയ്യുന്നവര്‍ക്കെതിരെ ജാഗ്രത പുലര്‍ത്താനും ഐക്യത്തിലൂടെ നമുക്ക് സാധിക്കണം. കാരണം ഇത്തരക്കാര്‍ എത്ര വല്യവരാണെങ്കിലും അവരെ അംഗീകരിക്കരുതെന്ന അല്ലാഹുവിന്‍റെ കല്പന വളരെ ഗൌരവമുള്ളതാണ്.
"അധികമായി സത്യം ചെയ്യുന്നവനും, നീചനും കുത്തുവാക്ക് പറയുന്നവനും ഏഷണിയുമായി നടക്കുന്നവനും നന്‍മക്ക് തടസ്സം നില്‍ക്കുന്നവനും, അതിക്രമിയും മഹാപാപിയും ക്രൂരനും അതിനു പുറമെ ദുഷ്കീര്‍ത്തി നേടിയവനുമായ യാതൊരാളെയും നീ അനുസരിച്ചു പോകരുത്‌" [ഖുര്‍ആന്‍ 68 : 10 -13].

by അലി മദനി മൊറയൂര്‍ @ അല്‍ ഇസ്ലാഹ്

Popular ISLAHI Topics

ISLAHI visitors