നന്മയുടെ പതാകവാഹകരാവുക

"നന്‍മയിലേക്ക് ക്ഷണിക്കുകയും, സദാചാരം കല്‍പിക്കുകയും, ദുരാചാരത്തില്‍ നിന്ന് വിലക്കുകയും ചെയ്യുന്ന ഒരു സമുദായം നിങ്ങളില്‍ നിന്ന് ഉണ്ടായിരിക്കട്ടെ. അവരത്രെ വിജയികള്‍"[ആലുഇംറാന്‍ 104].

ഉത്തമസമൂഹം എന്നാണു മുസ്ലിം സമൂഹത്തെ ഖുര്‍ആന്‍ വിളിക്കുന്നത്‌. നന്മകളെ പ്രോത്സാഹിപ്പിക്കുകയും തിന്മകള്‍ക്കെതിരെ പ്രവര്‍ത്തിക്കുകയും ചെയ്യുന്നു എന്നതാണ് ഈ പേരിനു സമൂഹത്തെ അര്‍ഹമാക്കുന്നത്. സമൂഹത്തില്‍ നിന്ന് ഈ ഗുണം നഷ്ടപ്പെടുമ്പോള്‍ അവര്‍ ഉത്തമ സമൂഹമല്ലാതായിത്തീരും.

മാനവസമൂഹത്തിന്‍റെ ശത്രുവായ ഇബ്'ലീസ് മനുഷ്യമനസ്സുകളില്‍ ദുഷ്ചിന്തകള്‍ വളര്‍ത്താന്‍ ശ്രമിക്കുന്നു. നന്മകളില്‍ നിന്ന് തിന്മകളുടെ ലോകത്തേക്ക് കൊണ്ടുപോകാനുള്ള പ്രേരണകളാണ് അവന്‍റെത്. നിരന്തരം മാറിക്കൊണ്ടിരിക്കുന്ന 'ഖല്‍ബു'കളാവട്ടെ അവന്‍റെ പ്രേരണകളില്‍ അകപ്പെട്ടു തിന്മ പ്രവര്‍ത്തിക്കാന്‍ സാധ്യത കൂടുതലാണ്. സമൂഹത്തില്‍ നന്മയുണ്ടാക്കലാണ് വിശ്വാസികളുടെ ബാധ്യത.

തിന്മകള്‍ക്കെതിരെ മുഖം തിരിച്ചുനിന്നാലും മൌനം പാലിച്ചാലും അത് വളര്‍ന്നു വലുതാകും. തുടക്കത്തിലേ ശക്തമായ നിലപാടെടുത്താല്‍ കുറെ അത് നിയന്ത്രിക്കാനാവും. നബി (സ) പറഞ്ഞു : 'നിങ്ങളാരെങ്കിലും ഒരു ദുഷിച്ചകാര്യം കണ്ടാല്‍ അത് കൈകൊണ്ട് മാറ്റണം. സാധ്യമല്ലെങ്കില്‍ നാവു കൊണ്ട്. അതിനും സാധ്യമല്ലെങ്കില്‍ മനസ്സ് കൊണ്ട് വെറുക്കണം. ഏറ്റവും ബലഹീനമായ വിശ്വാസമാണത്'. [മുസ്ലിം]തിന്മകള്‍ക്കെതിരെ സാധ്യമായതെന്തും പ്രവര്‍ത്തിക്കണമെന്നാണ് നബി (സ) ഇവിടെ പഠിപ്പിക്കുന്നത്‌.

വ്യക്തികള്‍ ദുഷിച്ചാല്‍ അതിന്‍റെ ദുരന്തഫലം അനുഭവിക്കേണ്ടിവരിക സമൂഹത്തിലെ എല്ലാവരുമാണ്. അതിനാല്‍ ചീത്ത വഴിയില്‍ നീങ്ങുന്നവരെ തിരിച്ചുകൊണ്ട് വരേണ്ടത് എല്ലാവരുടെയും ചുമതലയാണ്. അല്ലാഹുവിന്‍റെ ശിക്ഷ വരുന്നത് ഒരു പക്ഷെ എല്ലാവര്‍ക്കുമായിരിക്കാം. നബി (സ) പറഞ്ഞു : "എന്‍റെ ജീവന്‍ ആരുടെ കയ്യിലാണോ അവനില്‍ ആണയിട്ടു ഞാന്‍ പറയുന്നു, നിങ്ങള്‍ നന്മ കല്‍പ്പിക്കുകയും തിന്മ തടയുകയും ചെയ്യുക തന്നെവേണം. അല്ലാത്തപക്ഷം അല്ലാഹു അവന്‍റെ ഭാഗത്തുനിന്ന് നിങ്ങളുടെ നേരെ ശിക്ഷ അയക്കുവാന്‍ തുടങ്ങും. പിന്നെ നിങ്ങള്‍ പ്രാര്‍ഥിച്ചിട്ടും ഫലമുണ്ടാവുകയില്ല. [തുര്‍മുദി]

നമ്മുടെ വിജയത്തിന് വഴി കാണിക്കുന്ന പ്രക്രിയയാണ് നന്മയിലേക്ക് ജനങ്ങളെ ക്ഷണിക്കുക എന്നത്. അവര്‍ സ്വീകരിച്ചു നന്മയുടെ വാക്താക്കളായാല്‍ നമുക്ക് ഇരട്ടി പ്രതിഫലമായി. അവര്‍ നമ്മുടെ ഉപദേശം നിരാകരിച്ചാലും നമുക്ക് പ്രതിഫലം ഉറപ്പ്. നബി (സ) പറയുന്നു : ഒരാള്‍ നല്ല മാര്‍ഗത്തിലേക്ക് ക്ഷണിച്ചാല്‍ അയാളെ പിന്തുടരുന്നവര്‍ക്ക് ലഭിക്കുന്നതിനു തുല്യമായ പ്രതിഫലം ആ ക്ഷണിച്ചയാള്‍ക്കും ലഭിക്കുന്നതാണ്. അവരുടെ പ്രതിഫലത്തില്‍നിന്ന് ഒരു കോട്ടവും തട്ടാതെ തന്നെ. ഒരാള്‍ ഒരു തെറ്റിലെക്കാണ് ക്ഷണിക്കുന്നതെങ്കില്‍ അയാളെ പിന്തുടരുന്നവരുടെതില്‍ നിന്നും തുല്യമായ ഒരു കുറ്റം അയാള്‍ക്കുമുണ്ട്. അവരുടെ കുറ്റത്തില്‍നിന്നും ഒന്നും കുറയാതെ തന്നെ. [മുസ്ലിം]

തിന്മകള്‍ക്കെതിരെ മൌനം പാലിച്ച മുന്‍ സമൂഹങ്ങളെ അല്ലാഹു ശിക്ഷിച്ച ചരിത്രം ഖുര്‍ആന്‍ വിവരിക്കുന്നു. നന്മ ചെയ്യുകയും അതിലേക്കു ക്ഷണിക്കുകയും ചെയ്യുമ്പോഴാണ് നാം ശരിയായ വിശ്വാസികളാവുക.

by അബ്ദു സലഫി @ പുടവ മാസിക

സലാം പറയലും പ്രചരിപ്പിക്കലും

ഒരിക്കല്‍ നബി(സ)യോട് ഒരാള്‍ ചോദിച്ചു : ഇസ്ലാമില്‍ ഏറ്റവും ഉത്തമ മായത് എന്താണ്? നബി (സ) പറഞ്ഞു : 'നീ ഭക്ഷണം നല്‍കുക, അറിയുന്നവര്‍ക്കും അറിയാത്തവര്‍ക്കും സലാം പറയുക' [ബുഖാരി]

മറ്റോരിക്കല്‍ നബി (സ) പറഞ്ഞു : 'നിങ്ങള്‍ വിശ്വാസികളാകുന്നത് വരെ സ്വര്‍ഗത്തില്‍ പ്രവേശിക്കുകയില്ല. നിങ്ങള്‍ പരസ്പരം സ്നേഹിക്കുന്നത് വരെ വിശ്വാസികളാവുകയുമില്ല . നിങ്ങള്‍ക്ക് ഞാനൊരു കാര്യം അറിയിച്ചു തരട്ടെയോ? അത് നിങ്ങള്‍ ചെയ്‌താല്‍ നിങ്ങള്‍ പരസ്പരം സ്നേഹിക്കുന്നതാണ്. നിങ്ങള്‍ക്കിടയില്‍ നിങ്ങള്‍ സലാം പ്രചരിപ്പിക്കുക" [മുസ്‌ലിം]

ഒരിക്കല്‍ ഒരാള്‍ വന്നു നബി (സ)യോട് 'അസ്സലാമു അലൈക്കും' എന്ന് പറഞ്ഞു. നബി(സ) സലാം മടക്കി 'പത്ത്' എന്ന് പറഞ്ഞു. പിന്നെ വേറൊരാള്‍ വന്നു 'അസ്സലാമു അലൈക്കും വ റഹ്മതുള്ളാഹ്' എന്ന് പറഞ്ഞു. നബി(സ) അത് മടക്കി 'ഇരുപത്' എന്ന് പറഞ്ഞു. പിന്നെ വേറൊരാള്‍ വന്നു 'അസ്സലാമു അലൈക്കും വ റഹ്മതുള്ളാഹി വ ബറകാതുഹു' എന്ന് പറഞ്ഞു. അപ്പോള്‍ റസൂല്‍ (സ) അത് മടക്കി 'മുപ്പത്' എന്ന് പറഞ്ഞു. [അബൂദാവൂദ്, തുര്‍മുദി, ദാരിമി]

നബി (സ) പറഞ്ഞു : ജനങ്ങളില്‍ വെച്ച് അല്ലാഹുവിനോട് ഏറ്റവും അടുത്തവന്‍ ആദ്യമായി സലാം പറയുന്നവനാണ്. [അബൂദാവൂദ്]. ഒരു സംഘം ഒന്നിച്ചു വരുമ്പോള്‍ കൂട്ടത്തില്‍ ഒരാള്‍ സലാം പറഞ്ഞാല്‍ മതി എന്ന് നബി (സ) പറഞ്ഞിരിക്കുന്നു. [അബൂദാവൂദ്]. കളിച്ചു കൊണ്ടിരിക്കുന്ന കുട്ടികളോടും സ്ത്രീകളോടും നബി (സ) സലാം പറഞ്ഞിരിക്കുന്നു എന്ന് ഹദീസില്‍ വന്നിട്ടുണ്ട്. നബി(സ) പറഞ്ഞു : നിങ്ങള്‍ ആരെങ്കിലും തന്‍റെ സഹോദരനെ കണ്ടാല്‍ സലാം പറയണം. ഇനി, വല്ല മരമോ മതിലോ കല്ലോ അവര്‍ക്കിടയില്‍ മറയായി വന്നതിനു ശേഷo കണ്ടുമുട്ടുകയാണെങ്കില്‍ അവന്‍ വീണ്ടും സലാം പറയണം, [അബൂദാവൂദ്]

ഒരു സദസ്സിലേക്ക് വരുമ്പോഴും അവിടെ നിന്ന് പിരിഞ്ഞു പോവുമ്പോഴും സലാം പറയണം. വാഹനത്തില്‍ പോകുന്നവന്‍ നടക്കുന്നവനും, നടക്കുന്നവന്‍ ഇരിക്കുന്നവനും, ചെറിയവന്‍ വലിയവനും, ചെറുസംഘം വലിയ സംഘത്തിനുമാണ്‌ സലാം പറയേണ്ടത് എന്ന് ഹദീസില്‍ വന്നിട്ടുണ്ട്. സലാം പറയുമ്പോള്‍ കേള്‍ക്കത്തക്ക വിധം പറയേണ്ടതാണ്. അഥവാ കേട്ടില്ലെങ്കില്‍ വീണ്ടും സലാം ആവര്‍ത്തിച്ചു പറയണം. അല്ലാതെ 'ഞാന്‍ സലാം പറഞ്ഞിട്ടുണ്ട്' എന്ന് പറയുകയല്ല വേണ്ടത്.

സലാം മടക്കല്‍

സലാം പറയുന്നത് കേട്ടാല്‍ അത് മടക്കേണ്ടത് ശ്രോതാവിന്‍റെ കടമയാണ്.

"നിങ്ങള്‍ക്ക് അഭിവാദ്യം അര്‍പ്പിക്കപ്പെട്ടാല്‍ അതിനേക്കാള്‍ മെച്ചമായി (അങ്ങോട്ടും) അഭിവാദ്യമര്‍പ്പിക്കുക. അല്ലെങ്കില്‍ അത് തന്നെ തിരിച്ചു നല്‍കുക. [ഖുര്‍ ആന്‍ 4 :86]

ഈ ആശയത്തിന്റെ വിവരണ ത്തില്‍ ഇബ്നു ജരീര്‍ (റ) റിപ്പോര്‍ട്ട് ചെയ്തിരിക്കുന്ന ഒരു സംഭവം ഇങ്ങനെ വായിക്കാം :

ഒരിക്കല്‍ നബി (സ) യുടെ അടുക്കല്‍ ഒരാള്‍ വന്നു 'അസ്സലാമു അലൈക്കും' എന്ന് പറഞ്ഞു. നബി (സ) 'വ അലൈകുമുസ്സലാം വ റഹ്മതുള്ളാഹ്' എന്ന് മടക്കി. മറ്റൊരാള്‍ വന്നു 'അസ്സലാമു അലൈക്കും വ റഹ്മതുള്ളാഹ്' എന്ന് പറഞ്ഞു. അപ്പോള്‍ നബി(സ) 'വ അലൈകുമു സ്സലാം വ റഹ്മതുള്ളാഹി വ ബറകാത്തുഹു' എന്ന് മടക്കി. പിന്നെ ഒരാള്‍ വന്നു 'അസ്സലാമു അലൈക്കും വ റഹ്മതുള്ളാഹി വ ബറകാത്തുഹു' എന്ന് പറഞ്ഞു. അപ്പോള്‍ നബി (സ) 'വ അലൈകും' എന്ന് മടക്കി. അപ്പോള്‍ അയാള്‍ ചോദിച്ചു : അല്ലാഹുവിന്റെ ദൂതരെ, എന്‍റെ മുമ്പ് വന്ന രണ്ടുപേര്‍ക്കും താങ്കള്‍ കൂടുതല്‍ മടക്കിക്കൊടുത്തു. എനിക്കതുണ്ടായില്ല. അപ്പോള്‍ റസൂല്‍ (സ) പറഞ്ഞു : നിങ്ങള്‍ യാതൊന്നും ഒഴിവാക്കിയിട്ടില്ല. അപ്പോള്‍ ഞാന്‍ അത് അങ്ങോട്ട്‌ മടക്കി തന്നു. ശേഷം റസൂല്‍ (സ) ഈ ആയത്ത് ഓതി.

ഇതിന്‍റെ അടിസ്ഥാനത്തില്‍ സലാം പറയുമ്പോഴും മടക്കുമ്പോഴും ഇതിനേക്കാള്‍ കൂടുതല്‍ പദങ്ങള്‍ പറയേണ്ടതില്ല എന്ന് പണ്ഡിതന്മാര്‍ അഭിപ്രായപ്പെട്ടിട്ടുണ്ട്.

സലാം ആര് തന്നെ പറഞ്ഞാലും അത് മടക്കേണ്ടതാണ്. ഒരു മജൂസിയാണ് സലാം പറയുന്നതെങ്കിലും അത് മടക്കണമെന്നു ഇബ്നു അബ്ബാസ് (റ) പറഞ്ഞതായി റിപ്പോര്‍ട്ട് ചെയ്യപ്പെട്ടിട്ടുണ്ട്. ഒരു സംഘത്തിനു സലാം പറഞ്ഞാല്‍ അതിലൊരാള്‍ മടക്കിയാലും മതിയാവുന്നതാണ്.

വീട്ടിലേക്കു പ്രവേശിക്കുമ്പോള്‍ വീട്ടുകാരന്‍ തന്നെയായാലും സലാം പറയേണ്ടതാണ്. അന്യവീടുകളില്‍ പ്രവേശിക്കുമ്പോള്‍ സലാം പറയുകയും അനുവാദം ചോദിക്കുകയും വേണം. അനുവാദം കിട്ടിയാല്‍ മാത്രമേ അകത്തേക്ക് പ്രവേശിക്കാവൂ. മറുപടി ലഭിച്ചില്ലെങ്കില്‍ തിരിച്ചു മടങ്ങണമെന്ന് ബുഖാരി ഉദ്ധരിക്കുന്ന ഒരു ഹദീസില്‍ വന്നിട്ടുണ്ട്.

by സി പി ഉമര്‍ സുല്ലമി @ പ്രാര്‍ഥനകള്‍ നിത്യജീവിതത്തില്‍

നിക്കാഹ്‌ : സ്വാതന്ത്ര്യവും ബാധ്യതകളും

ഇസ്‌ലാം ഭാര്യാഭര്‍ത്താക്കന്മാര്‍ക്കിടയില്‍ പരസ്‌പരം തെരഞ്ഞെടുക്കാന്‍ സ്വാതന്ത്ര്യം നല്‍കിയിട്ടുണ്ട്‌. തക്കതായ കാരണങ്ങള്‍ ഉണ്ടായാല്‍ അവരില്‍ ഓരോരുത്തര്‍ക്കും അവര്‍ക്കിടയിലെ ബന്ധം നിലനിര്‍ത്താനും മാന്യമായി വേര്‍പിരിയാനും അവകാശവും സ്വാതന്ത്ര്യവും ഉണ്ടെന്ന്‌ സാരം. ഭര്‍ത്താവ്‌ ഭാര്യയെ ഒഴിവാക്കുന്നതിന്‌ ത്വലാഖ്‌ എന്നും ഭാര്യ ഭര്‍ത്താവിനെ ഒഴിവാക്കുന്നതിന്‌ ഫസ്‌ഖ്‌ എന്നുമാണ്‌ സാങ്കേതികമായി പറയുക.

വളരെ വ്യക്തമായി ഞാന്‍ നിന്നെ മോചനം നടത്തിയിരിക്കുന്നു എന്ന്‌ ഭര്‍ത്താവ്‌ ഭാര്യയോട്‌ പറയുകയോ അതല്ലെങ്കില്‍ നീ നിന്റെ വീട്ടുകാരിലേക്കും കുടുംബക്കാരിലേക്കും മടങ്ങുക എന്ന്‌ മനസ്സില്‍ ത്വലാഖാണെന്ന്‌ കരുതിയുറിപ്പിച്ച്‌ ആലങ്കാരികമായി പറയുകയോ ചെയ്‌താല്‍ ത്വലാഖായി ഗണിക്കപ്പെടും. മനസ്സില്‍ കരുതിയതു കൊണ്ടു മാത്രം ആവില്ല. ഭാര്യാഭര്‍ത്താക്കന്മാര്‍ക്കിടയില്‍ പറഞ്ഞു തീര്‍ക്കാനാവാത്ത വിധം ഗുരുതരമായ കാരണങ്ങള്‍ ഉണ്ടെങ്കിലേ ത്വലാഖ്‌ പാടുള്ളൂ. സൂറതുല്‍ബഖറ 229-ാം വചനത്തിലും സൂറതുത്ത്വലാഖ്‌ ഒന്നാം വചനത്തിലും ഈ വിഷയകമായി സൂചനയുണ്ട്‌.

പറയത്തക്ക കാരണങ്ങളൊന്നുമില്ലാതെ വിവാഹമോചനം നടത്തുന്നതും ഫസ്‌ഖ്‌ ചൊല്ലുന്നതും കുറ്റകരമാണ്‌. ഭാര്യ ഭര്‍ത്താവിനോട്‌ അകാരണമായി ത്വലാഖ്‌ ആവശ്യപ്പെടാനും പാടില്ല. ത്വലാഖ്‌ സാധൂകരിക്കപ്പെടണമെങ്കില്‍ ഭര്‍ത്താവ്‌ നിര്‍ബന്ധിക്കപ്പെടാത്തവിധം സ്വയം തീരുമാനത്തില്‍ സ്വബോധത്തോടെ പറഞ്ഞതാവണം.

ഭാര്യ അവളുടെ മാസമുറയുണ്ടായി കുളിച്ചു വൃത്തിയായ ശേഷം ലൈംഗികബന്ധം ഉണ്ടാവാതിരിക്കുന്ന അവസ്ഥയിലായിരിക്കണം ത്വലാഖ്‌ ചൊല്ലേണ്ടത്‌. അവള്‍ മാസമുറയുടെയോ പ്രസവരക്തം നിലച്ച ശേഷം കുളിച്ചു വൃത്തിയാകുന്നതിന്റെയോ ഇടയിലുള്ളപ്പോഴും ലൈംഗികബന്ധം നടന്നുകൊണ്ടിരിക്കുന്ന ശുദ്ധികാലങ്ങളിലും ത്വലാഖ്‌ പാടില്ല.

മൂന്ന്‌ ത്വലാഖും ചൊല്ലിയിരിക്കുന്നു എന്ന്‌ ഒറ്റ ശ്വാസത്തില്‍ പറയുന്നതും മൂന്ന്‌ പ്രാവശ്യങ്ങളിലായി ഒരേ നില്‌പില്‍ തന്നെ പറയുന്നതും പരിഗണിക്കുകയില്ല. ഭാര്യയെ തിരിച്ചെടുക്കാവുന്ന ത്വലാഖ്‌ രണ്ടു പ്രാവശ്യമാണ്‌. മൂന്നാമത്‌ ത്വലാഖ്‌ ചൊല്ലിയാല്‍ അവളെ മറ്റൊരാള്‍ നികാഹ്‌ കഴിഞ്ഞ്‌ ഭാര്യയാക്കിയ ശേഷം അയാള്‍ ഒഴിവാക്കിയിരിക്കുമ്പോഴല്ലാതെ ആദ്യ ഭര്‍ത്താവിന്‌ വിവാഹം കഴിക്കാവതല്ല. മൂന്ന്‌ ത്വലാഖും കഴിഞ്ഞ ശേഷം അയാള്‍ക്ക്‌ അവളെ തിരിച്ചെടുക്കണമെന്ന്‌ തോന്നുകയും മറ്റൊരാള്‍ അവളെ വേള്‍ക്കുന്നത്‌ ഇഷ്‌ടമില്ലാതിരിക്കുകയും എന്നാല്‍ മതപരമായിട്ടുള്ള സാങ്കേതികത്വത്തില്‍ നിന്ന്‌ രക്ഷപ്പെടാനും വേണ്ടി തല്‍ക്കാലികമായി ഒരാളെ കൂലികൊടുത്ത്‌ ചടങ്ങിനൊരു ഭര്‍ത്താവായി നിശ്ചയിച്ച്‌ വിവാഹം കഴിക്കുന്ന രീതിയും ഇസ്‌ലാം വിലക്കിയതാണ്‌. ഹറാമാണ്‌.

`ത്വലാഖ്‌' എന്നത്‌ ജനങ്ങള്‍ ലാഘവമായി കാണാതിരിക്കാന്‍ വേണ്ടി കര്‍മശാസ്‌ത്ര പണ്ഡിതന്മാര്‍ മൂന്ന്‌ ത്വലാഖും ചൊല്ലി എന്ന്‌ ഒറ്റയടിക്കു പറയുന്നത്‌ മൂന്നും സാധൂകരിക്കപ്പെട്ടതായി കാണണമെന്ന അഭിപ്രായക്കാരാണ്‌. എന്നാല്‍ ഇത്തരമൊരു ശൈലി തന്നെ ഖുര്‍ആന്‍ വ്യക്തമാക്കുന്നതിന്‌ എതിരാണ്‌. തെറ്റുകള്‍ ചെയ്‌തതിനു ശേഷം മസ്‌അലകള്‍ പരതുന്നതിനേക്കാള്‍ നിയമങ്ങള്‍ക്കനുസൃതമായി പ്രവര്‍ത്തിക്കുകയാണ്‌ വേണ്ടത്‌. ഒരാള്‍ വ്യക്തമായി നീ വിവാഹമോചിതയാണെന്ന്‌ പറയുമ്പോള്‍ നിയ്യത്ത്‌ പ്രശ്‌നമാവില്ല. എന്നാല്‍ ആലങ്കാരികമായിട്ടുള്ള പദപ്രയോഗത്തില്‍ നിയ്യത്ത്‌ അനിവാര്യമാകും. എന്നാല്‍ ചില ആലങ്കാരികപ്രയോഗങ്ങളില്‍ നിന്നു തന്നെ കാര്യം വ്യക്തമാകുന്നതിനാല്‍ അത്തരം അവസരങ്ങളിലും നിയ്യത്ത്‌ പ്രശ്‌നമാവില്ല.

ഉദാഹരണമായി നിനക്ക്‌ ഇനി മുതല്‍ നിന്റെ വീട്ടില്‍ നില്‌ക്കാം എന്നോ നിനക്ക്‌ മറ്റു പുരുഷന്മാരുമായി വിവാഹബന്ധത്തിലേര്‍പ്പെടാം എന്നോ പറയും പോലെ. എന്നാല്‍ ഒരാള്‍ തന്റെ ഭാര്യയോട്‌ നീ ഇന്ന കാര്യം ചെയ്‌താല്‍ വിവാഹമോചിതയാകുമെന്ന്‌ നിബന്ധനവെച്ചാല്‍ പ്രസ്‌തുത കാര്യം സംഭവിച്ചെങ്കിലല്ലാതെ മോചനം സംഭവിക്കില്ലെന്നാണ്‌ കര്‍മശാസ്‌ത്ര പണ്ഡിതരില്‍ ചിലരുടെ വീക്ഷണം.

വിവാഹമോചനം ഒരാള്‍ സ്വയം എഴുതി അറിയിച്ചാലും മറ്റൊരാളെ ത്വലാഖ്‌ ചെയ്യാനുള്ള `വക്കാലത്ത്‌' കൊടുത്ത്‌ അയാള്‍ ചെയ്‌താലും പരിഗണിക്കപ്പെടും. ഒരാള്‍ തന്റെ ഭാര്യയോട്‌ നീയുമായി ഞാന്‍ ലൈംഗികവേഴ്‌ചയില്‍ ഏര്‍പ്പെടല്‍ എനിക്ക്‌ ഹറാമാണ്‌ എന്ന്‌ പറഞ്ഞുവെങ്കില്‍ ത്വലാഖാണ്‌ അയാള്‍ ഉദ്ദേശിച്ചതെങ്കില്‍ ത്വലാഖും അതല്ലെങ്കില്‍ `ളിഹാറും' ഇതൊന്നുമല്ലെങ്കില്‍ ഒരു അനാവശ്യസത്യം ചെയ്‌തത്‌ മാത്രമായും ഗണിക്കപ്പെടും. `ളിഹാര്‍' എന്നാല്‍ സാങ്കേതികമായി ഒരാള്‍ തന്റെ ഭാര്യയോട്‌ നീ എനിക്ക്‌ എന്റെ ഉമ്മയെപ്പോലെ ലൈംഗികവേഴ്‌ച പാടില്ലാത്തവളാണെന്ന്‌ പറയലാണ്‌. ഇത്തരം ഘട്ടത്തില്‍ `ളിഹാറി'ന്റെ പ്രായശ്ചിത്തമോ അനാവശ്യസത്യം ചെയ്‌തതിനുള്ള പ്രായശ്ചിത്തമോ നല്‌കി തൗബയാവലാണ്‌ പോംവഴി. ഒരു സ്‌ത്രീക്ക്‌ അവളുടെ ഭര്‍ത്താവ്‌ ലൈംഗിക ശേഷിക്കുറവോ ബുദ്ധിഭ്രംശമോ കുഷ്‌ഠം, വെള്ളപ്പാണ്ട്‌ മുതലായ രോഗമോ ഗുഹ്യരോഗങ്ങളോ ഉള്ളവനാണെന്ന്‌ സ്ഥിരീകരിക്കാനായാല്‍ ഫസ്‌ഖ്‌ ചെയ്യാവുന്നതാണ്‌. തനിക്കും കുട്ടികള്‍ക്കും ചെലവ്‌ നല്‌കാതെയും സംരക്ഷണം നല്‍കാതിരുന്നാലും ഫസ്‌ഖ്‌ ചെയ്യാവുന്നതാണ്‌.

by അബ്‌ദുല്‍അലി മദനി @ ശബാബ്

വിമര്‍ശനങ്ങള്‍ ആരോഗ്യകരമാകട്ടെ

കലാ-സാഹിത്യ സൃഷ്ടികളുടെ മികവിനെയും മികവില്ലായ്മയെയും ഉയര്‍ത്തിക്കാട്ടി ആസ്വാദകര്‍ അവയെ വിമര്‍ശന വിധേയമാക്കാറുണ്ട്. ഒരു സൃഷ്ടി നിരൂപണം ചെയ്യപ്പെട്ടിട്ടില്ലെങ്കില്‍ അതിനര്‍ത്ഥം അത് ഗൌനിക്കപ്പെടാന്‍ മാത്രം അര്‍ഹമായ ഒരു പ്രവര്‍ത്തനം അല്ല എന്നാണ്. ഇങ്ങനെ വ്യക്തികളെയും അവരുടെ പ്രവര്‍ത്തികളേയും സ്വഭാവങ്ങളെയും വിമര്‍ശന വിധേയമാക്കാറുണ്ട്. വ്യക്തിയില്‍ എന്തെങ്കിലും ഒരു തിന്മ കണ്ടാല്‍ അത് ദുരീകരിച്ചു അദ്ദേഹത്തെ ശുദ്ധീകരിക്കാന്‍ ശ്രമിക്കേണ്ടത് മാനുഷിക ബാധ്യതയാണ്. അനീതി കാണിക്കുന്ന ഭരണാധികാരിയുടെ മുമ്പില്‍ സത്യത്തിന്‍റെ ശബ്ദം മുഴക്കുന്നതിനെ ഏറ്റവും ശ്രേഷ്ഠമായ സമരം എന്നാണ് പ്രവാചകന്‍ (സ) വിശേഷിപ്പിച്ചത്‌. ജനങ്ങളുടെ കാര്യങ്ങള്‍ ശ്രദ്ധിക്കാന്‍ ഏല്‍പ്പിക്കപ്പെട്ട ഉദ്യോഗസ്ഥരും, പൊതുപ്രവര്‍ത്തനങ്ങളിലും മതപ്രബോധനങ്ങളിലും ഏര്‍പ്പെടുന്ന മനുഷ്യരും സംശുദ്ധവും മാതൃകായോഗ്യവുമായ ജീവിതം നയിക്കാന്‍ ബാധ്യസ്ഥരാണ്. എങ്കിലും മനുഷ്യര്‍ ബോധപൂര്‍വമോ അബദ്ധവശാലോ തെറ്റുകള്‍ ചെയ്യാറുണ്ട്. സദുദേശ്യത്തോടെ അത് ആരെങ്കിലും ചൂണ്ടിക്കാണിച്ചാല്‍ തിരുത്താന്‍ സന്നദ്ധരാവുകയാണ് സുമനസ്സുകള്‍ ചെയ്യുക. വിമര്‍ശകരെ സ്വന്തം മുഖത്തെ അഴുക്കു ചൂണ്ടിക്കാണിച്ചുകൊടുക്കുന്ന കണ്ണാടിയായി വിമര്‍ശിക്കപ്പെടുന്നവര്‍ കാണേണ്ടതുണ്ട്. സ്തുതിപാടകര്‍, യഥാര്‍ത്ഥത്തില്‍ രോഗിയുടെ രോഗങ്ങള്‍ മറച്ചു വെച്ച് ചികിത്സ നിര്‍ദേശിക്കാത്ത ഡോക്ടറെ പോലെയാണ്.

എന്നാല്‍ വിമര്‍ശനങ്ങള്‍ ഉയര്‍ത്തി വ്യക്തികളെ തേജോവധം ചെയ്യുന്ന പ്രവണത പണ്ടേ മനുഷ്യര്‍ക്കുണ്ട്. പൊതുപ്രവര്‍ത്തനങ്ങള്‍ കൊണ്ടോ പ്രത്യേക കഴിവുകള്‍ കൊണ്ടോ പ്രശസ്തിയും ജനസമ്മിതിയും നേടിയവരാണ് അധികവും ഇതിനു ഇരയായിത്തീരുക. മറ്റൊരാളുടെ ഉയര്‍ച്ചയിലും പുരോഗതിയിലുമുള്ള അസൂയയോ വ്യക്തിതാല്പര്യങ്ങളോ ആണ് മനുഷ്യനെ ഇതിനു പ്രേരിപ്പിക്കുക. ഒരു മനുഷ്യന്‍റെ അഭിമാനത്തിന് അയാളുടെ ജീവന് തുല്യമായ സ്ഥാനമാണുള്ളത്‌. അതിനെ അപകീര്‍ത്തിപ്പെടുത്തരുത്. സ്വകാര്യ ജീവിതത്തിലെ രഹസ്യങ്ങള്‍ അങ്ങാടിപ്പാട്ടാക്കിയും വ്യാജ്യാരോപണങ്ങള്‍ ഉന്നയിച്ചു തെറ്റിധാരണ പരത്തിയും ഇഷ്ടമില്ലാത്തവരെ ഹിംസിക്കുന്നത് ഇന്ന് സര്‍വസാധാരണമാണ്‌. പത്ര മാധ്യമങ്ങള്‍, കാസറ്റുകള്‍, പൊതുവേദികള്‍ തുടങ്ങിയവ എല്ലാം ഈ വിഷം പരത്തുന്നതിനു ഉപയോഗിക്കപ്പെടുന്നു. രാഷ്ട്രീയം ഇത്തരം തിന്മകള്‍ക്കെല്ലാം ന്യായീകരണം കാണുന്ന രംഗമാകുന്നതില്‍ അത്ഭുതമില്ല. മത സംഘടനയില്‍ പ്രവര്‍ത്തിക്കുന്നവര്‍ക്ക്പോലും ഇവയില്‍ നിന്നും മുക്തമാകാന്‍ കഴിയാത്തതാണ് ഏറെ ഖേദകരം.

ദുരുദെശ്യത്തോടെയും വ്യക്തിവിരോധം ലക്‌ഷ്യം വച്ചും ഉയര്‍ത്തുന്ന ഇത്തരം വിമര്‍ശനങ്ങള്‍ക്ക് മുന്നില്‍ ഒരിക്കലും ഭീരുക്കളായി ചൂളി നില്‍ക്കാന്‍ പാടുള്ളതല്ല. താന്‍ നിരപരാധിയും സത്യത്തില്‍ നിലകൊള്ളുന്നവനുമാണെന്ന് ഉറപ്പുളെളടത്തോളം കാലം ഇത്തരം വിമര്‍ശനങ്ങള്‍ക്ക് ഒരു വിലയും കല്‍പ്പിക്കേണ്ടതില്ല. വിമര്ശകരെക്കാള്‍ കൂടുതല്‍ അറിവും സ്വഭാവഗുണവും സേവനപ്രവര്‍ത്തനവും കര്മോല്‍സുകതയും ആര്‍ജിച്ചു ജനസമ്മിതി നേടിയതാകാം അസൂയക്ക്‌ പിന്നിലെ പ്രേരകശക്തി. ഇത്തരം വിമര്‍ശകര്‍ക്ക് വഴങ്ങി ഒരിക്കലും അവരുടെ ദുരാഗ്രഹം സാധിച്ചു കൊടുക്കുന്ന നിലപാട് സ്വീകരിക്കരുത്. ഖുര്‍ആന്‍ സൂചിപ്പിക്കുന്നത് പോലെ 'നിങ്ങളുടെ വിരോധവുമായി ചത്ത്‌ കൊള്ളുക' എന്ന അവഗണനാ മനോഭാവമായിരിക്കണം അവരുടെ നേരെ പുലര്‍ത്തേണ്ടത്. ആരുടേയും വിമര്‍ശനത്തിനും പാത്രമാകാതെ എല്ലാവരുടെയും ഇഷ്ടം നേടി ജീവിക്കുക ആര്‍ക്കും സാധ്യമല്ല.

ഒരു പാശ്ചാത്യ സാഹിത്യകാരന്‍റെ വാക്കുകള്‍ ഇവിടെ പ്രസക്തമാണ്‌ : "ശരിയാണെന്ന് ബോധ്യമായത് പ്രവര്‍ത്തിക്കുക. വിലകുറഞ്ഞ വിമര്‍ശനങ്ങള്‍ക്ക് നേരെ പുറം തിരിക്കുക". ഈ ദര്‍ശനം എത്ര വാസ്തവം!

by മുഹമ്മദ്‌ കുട്ടശ്ശേരി @ ജീവിതം സന്തോഷപ്രദമാകാന്‍ from യുവത ബുക്സ്

Popular ISLAHI Topics

ISLAHI visitors