അദ്ധ്യായം 99 സൽസല

"ഭൂമി പ്രകമ്പനം കൊള്ളിക്കപ്പെട്ടാല്‍ - അതിന്‍റെ ഭയങ്കരമായ ആ പ്രകമ്പനം . ഭൂമി അതിന്‍റെ ഭാരങ്ങള്‍ പുറം തള്ളുകയും,അതിന് എന്തുപറ്റി എന്ന് മനുഷ്യന്‍ പറയുകയും ചെയ്താല്‍. അന്നേ ദിവസം അത് (ഭൂമി) അതിന്‍റെ വര്‍ത്തമാനങ്ങള്‍ പറഞ്ഞറിയിക്കുന്നതാണ്‌. നിന്‍റെ രക്ഷിതാവ് അതിന് ബോധനം നല്‍കിയത് നിമിത്തം. അന്നേ ദിവസം മനുഷ്യര്‍ പല സംഘങ്ങളായി പുറപ്പെടുന്നതാണ്‌. അവര്‍ക്ക് അവരുടെ കര്‍മ്മങ്ങള്‍ കാണിക്കപ്പെടേണ്ടതിനായിട്ട്‌. അപ്പോള്‍ ആര്‍ ഒരു അണുവിന്‍റെ തൂക്കം നന്‍മചെയ്തിരുന്നുവോ അവനത് കാണും. ആര്‍ ഒരു അണുവിന്‍റെ തൂക്കം തിന്‍മ ചെയ്തിരുന്നുവോ അവന്‍ അതും കാണും." [അദ്ധ്യായം 99 സൽസല 1 - 8] 

അന്ത്യനാളിലെ അതിഭയങ്കര സംഭവങ്ങളെക്കുറിച്ചാണ് പ്രസ്താവിക്കുന്നത്‌. ഭൂമി അതിന്റെ അവസാനത്തേതും ഏറ്റവും ഘോരമായതുമായ കമ്പനത്തിനും ക്ഷോഭത്തിനും വിധേയമാകുന്നു. മരണപ്പെട്ടു മണ്ണടഞ്ഞവരടക്കം ഭൂമിക്കുള്ളിൽ കിടപ്പുള്ള നിക്ഷേപങ്ങളെല്ലാം അത്‌ വെളിക്കുവരുത്തുന്നു. ഇതെല്ലാം കാണുമ്പോൾ മനുഷ്യൻ അന്താളിച്ചു ഭയവിഹ്വലനായിത്തീരും. അവൻ പറയും : 'ഹാ, എന്താണിത്‌! ഭൂമിക്ക്‌ എന്തുപറ്റി?!' എന്നൊക്കെ. ഇങ്ങിനെയുള്ള ആ ഗൗരവഘട്ടത്തിൽ ഭൂമിയിൽ ഒളിഞ്ഞിരിപ്പുള്ള രഹസ്യങ്ങളെല്ലാം വെളിക്കുവരും. അതെ, ഭൂമിക്ക്‌ അതിനുവേണ്ടുന്ന ബോധനവും അനുമതിയും അല്ലാഹു നൽകുകയും ഭൂമി അതെല്ലാം തുറന്നു കാട്ടുകയും ചെയ്യും. നാലാമത്തെ വചനം ഓതിക്കൊണ്ട്‌ റസൂൽ (സ) പറഞ്ഞു: "അതിന്റെ വർത്തമാനങ്ങൾ എന്നാൽ,ആണും പെണ്ണുമായ ഓരോ മനുഷ്യനും ഭൂമിക്കു മീതെ പ്രവർത്തിച്ചതിനെപ്പറ്റി സാക്ഷി പറയലാകുന്നു. അതായത്‌, ഇന്നിന്ന ദിവസം അവൻ ഇന്നിന്നത്‌ ചെയ്തു എന്ന് പറയും" (അഹമദ്‌, നസാഈ, തുർമുദി) സന്തുഷ്ടരായിക്കൊണ്ടും സങ്കടപ്പെട്ടുകൊണ്ടും, വെളുത്ത പ്രസന്ന മുഖത്തോടെയും കറുത്ത വിഷാദമുഖത്തോടെയും, വലതുപക്ഷക്കാരായും ഇടതുപക്ഷക്കാരായും, സത്യവിശ്വാസവും സൽക്കർമ്മവും സ്വീകരിച്ചവരായും അവ നിഷേധിച്ചവരായും അങ്ങിനെ പലതരക്കാരുമായി ജനങ്ങളെല്ലാം ഖബറുകളിൽ നിന്ന് വിചാരണ സ്ഥലത്തേക്ക്‌ രംഗപ്രവേശനം ചെയ്യുന്നു. ഓരോരുത്തരുടേയും സകലകർമ്മങ്ങളും ചെയ്തികളും അവിടെ തുറന്നുകാട്ടി ബോദ്ധ്യപ്പെടുത്തുന്നതാണ്. നിസ്സാരമെന്നുവെച്ച്‌ ഒന്നും ഒഴിവാക്കപ്പെടുകയില്ല. ഒരണുവോളം നന്മ ചെയ്തിട്ടുണ്ടെങ്കിൽ അതും ഒരണുവോളം തിന്മ ചെയ്തിട്ടുണ്ടെങ്കിൽ അതും മനുഷ്യനു കാണിച്ചുകൊടുക്കും. അതതിന്റെ ഫലം അതതിന്റെ ആളുകൾക്ക്‌ അനുഭവപ്പെടുകയും ചെയ്യും.

 നബി (സ)യുടെ ചില വചനങ്ങൾ ഇവിടെ സ്മരിക്കുന്നത്‌ സമയോചിതമായിരിക്കും. പ്രവാചകൻ (സ) പറയുന്നു : 

 1. "സദാചാരത്തിൽ (സൽക്കാര്യത്തിൽ) പെട്ട ഒന്നിനേയും നീ അവഗണിക്കരുത്‌. വെള്ളം കുടിക്കുവാൻ വരുന്നവന്റെ പാത്രത്തിൽ നിന്റെ കൊട്ടക്കോരിയിൽ നിന്ന് അൽപം വെള്ളം ഒഴിച്ചുകൊടുക്കുക എന്നുള്ളതായാലും ശരി. അല്ലെങ്കിൽ നിന്റെ സഹോദരനെ പ്രസന്നതയോടെ അഭിമുഖീകരിക്കുക എന്നതായാലും ശരി." (ബുഖാരി) 

2. "സത്യവിശ്വാസിനികളേ, ആടിന്റെ കുളമ്പാണുള്ളതെങ്കിലും ഒരു അയൽക്കാരി അവളുടെ അയൽക്കാരിക്ക്‌ (ഒട്ടും കൊടുക്കാതെ) അവഗണിക്കരുത്‌." (ബുഖാരി) 

3. "ആയിശാ, നിസ്സാര പാപങ്ങളെ സൂക്ഷിച്ചു കൊള്ളണം. കാരണം, അല്ലാഹുവിങ്കൽ നിന്നും അവയെ അന്വേഷിക്കുന്നതായ ഒരാളുണ്ട്‌." (അഹമദ്‌, നസാഈ) 

4. "നിസ്സാരമായി ഗണിക്കപ്പെടുന്ന പാപങ്ങളെ നിങ്ങൾ സൂക്ഷിക്കണം. കാരണം, അവ മനുഷ്യന്റെമേൽ ഒരുമിച്ചു കൂടുകയും അങ്ങനെ അവ അവനെ നാശത്തിലകപ്പെടുത്തുകയും ചെയ്യും." (അഹ്മദ്‌)

ഒരു കാര്യം ഇവിടെ ഓർമ്മിക്കേണ്ടതുണ്ട്‌. ഒരു അണുവോളം നന്മയോ തിന്മയോ ചെയ്താൽ അതിന്റെ ഫലം മനുഷ്യർ അനുഭവിക്കുമെന്നു പറയുമ്പോൾ അല്ലാഹുവിലും അന്ത്യനാളിലും വിശ്വസിക്കാത്ത ആളുകൾ സൽകർമ്മങ്ങൾ ചെയ്തിട്ടുണ്ടെങ്കിൽ അതിനു പരലോകത്ത്‌ നല്ല പ്രതിഫലം ലഭിക്കുമെന്ന് വല്ലവരും ധരിച്ചേക്കാം. എന്നാൽ അത്തരക്കാരുടെ സൽക്കർമ്മങ്ങൾക്ക്‌ പരലോകത്ത്‌ അല്ലാഹു യാതൊരു പ്രതിഫലവും നൽകുകയില്ലെന്നും അവരുടെ പ്രതിഫലം ഇഹലോകത്ത്‌ തന്നെ അല്ലാഹു നിറവേറ്റിക്കൊടുക്കുമെന്നും അദ്ധ്യായം ഹൂദ്‌, ഫുർഖാൻ തുടങ്ങിയവയിൽ അല്ലാഹു വ്യക്തമാക്കിയിട്ടുണ്ട്‌.

by മുഹമ്മദ്‌ അമാനി മൗലവി @ വിശുദ്ധ ഖുർആൻ വിവരണം 

ഈദുൽഫിത്‌റിന്റെ സന്ദേശം

ഈദുല്‍ ഫിത്വ്‌ര്‍ ദിനത്തില്‍ വിശ്വാസികള്‍ `അല്ലാഹു അക്‌ബര്‍' എന്ന ധ്വനി അത്യുച്ചത്തില്‍ ആഹ്ലാദപൂര്‍വം മുഴക്കുകയാണ്‌. ഇതിന്‌ വലിയ അര്‍ഥതലങ്ങളുണ്ട്‌. മനുഷ്യന്‌ അല്ലാഹു എണ്ണിയാല്‍ കണക്കാക്കാന്‍ കഴിയാത്ത അത്ര ഗ്രന്ഥങ്ങള്‍ നല്‌കിയിട്ടുണ്ട്‌. എന്നാല്‍ അവയില്‍ ഏറ്റവും മഹത്തരമായതത്രെ ഖുര്‍ആന്റെ അവതരണം. കാരണം അത്‌ മുഖേനയാണ്‌ മനുഷ്യന്‍ സ്വര്‍ഗപാത കണ്ടെത്തിയത്‌. സത്യവും അസത്യവും, ഇരുട്ടും വെളിച്ചവും വേര്‍തിരിച്ചറിഞ്ഞത്‌. ഈ ഖുര്‍ആന്റെ അവതരണം ആരംഭിച്ച ദിനത്തിന്റെ പേരില്‍ നിശ്ചയിക്കപ്പെട്ട ഒരു മാസത്തെ ആഘോഷമത്രെ നോമ്പ്‌. ഈ പുണ്യകര്‍മമാകട്ടെ മനുഷ്യന്‌ സംശുദ്ധവും സുകൃതങ്ങള്‍ കൊണ്ട്‌ സജീവവുമായ ഒരു ജീവിതം നയിക്കാനുള്ള പരിശീലനവും. ഇത്‌ പൂര്‍ത്തീകരിക്കാന്‍ കഴിഞ്ഞതിലുള്ള സന്തോഷവും, ഈ അനുഗ്രഹങ്ങളെല്ലാം നല്‌കിയ അല്ലാഹുവിനുള്ള നന്ദിയുമാണ്‌ തക്‌ബീര്‍ ധ്വനിയിലൂടെ വിശ്വാസികള്‍ പ്രകടിപ്പിക്കുന്നത്‌. സന്തോഷം നിറഞ്ഞ പെരുന്നാള്‍ സുദിനം എത്ര സുന്ദരമാണ്‌. ഈദുല്‍ ഫിത്വ്‌ര്‍ അല്ലാഹു മനുഷ്യന്‌ നല്‌കിയ ഒരു ഉപഹാരമാണ്‌.

റസൂല്‍(സ) പറയുന്നു: "പെരുന്നാള്‍ ദിവസം മലക്കുകള്‍ വഴിയോരങ്ങളില്‍ നിന്ന്‌ ഇങ്ങനെ വിളിച്ചുപറയും: `മുസ്‌ലിംകളേ, നിങ്ങള്‍ അല്ലാഹുവിന്റെ അടുത്തേക്ക്‌ പോവുക. അവന്‍ നിങ്ങള്‍ക്ക്‌ നന്മ നേടാനുള്ള ഒരു മാര്‍ഗം നിര്‍ദേശിച്ചു. പിന്നെ അതിന്‌ മഹത്തായ പ്രതിഫലവും നല്‌കി. രാത്രി എഴുന്നേറ്റു നമസ്‌കരിക്കാന്‍ നിങ്ങളോട്‌ കല്‌പിച്ചു. നിങ്ങള്‍ അപ്രകാരം ചെയ്‌തു. പകല്‍ നോമ്പനുഷ്‌ഠിച്ചു. നിങ്ങള്‍ നിങ്ങളുടെ നാഥന്റെ കല്‌പന അനുസരിച്ചു. അതിനാല്‍ നിങ്ങളുടെ ഉപഹാരം സ്വീകരിക്കുക.' പെരുന്നാള്‍ നമസ്‌കാരം കഴിഞ്ഞാല്‍ മലക്ക്‌ ഇങ്ങനെ വിളിച്ചുപറയും : 'അറിയുക, നിങ്ങളുടെ നാഥന്‍ നിങ്ങള്‍ക്ക്‌ മാപ്പ്‌ നല്‍കിയിരിക്കുന്നു. നിങ്ങള്‍ സന്മാര്‍ഗം പ്രാപിച്ചവരായി വീടുകളിലേക്ക്‌ തിരിച്ചുപോവുക. ഇന്ന്‌ ഉപഹാരദിനമാണ്‌.' ഈ ദിനത്തിന്‌ ആകാശത്തും ഉപഹാരദിനം എന്നുതന്നെയാണ്‌ പറയുക.'' (ത്വബ്‌റാനി) 

നോമ്പ്‌ വ്യക്തിനിഷ്‌ഠമായ ആരാധനയാണെങ്കിലും പെരുന്നാള്‍ ആഘോഷം സാമൂഹ്യാരാധനയാണ്‌. അതുകൊണ്ടാണ്‌ പെരുന്നാള്‍ പ്രാര്‍ഥനാസ്ഥലത്ത്‌ നമസ്‌കരിക്കാന്‍ പാടില്ലാത്ത സ്‌ത്രീകള്‍ പോലും പങ്കെടുക്കാന്‍ നബി കല്‌പിച്ചത്‌. പെരുന്നാള്‍ ദിവസം പരസ്‌പരം കണ്ടുമുട്ടുമ്പോള്‍ തഖബ്ബലല്ലാഹു മിന്നാ വമിന്‍കും എന്നിങ്ങനെ പരസ്‌പരം ആശംസിക്കാന്‍ നബി കല്‌പിക്കുന്നു.സ്‌നേഹത്തിന്റെയും ഐക്യത്തിന്റെയും ബോധമാണ്‌ ഈ ദിനം നല്‍കുന്ന സന്ദേശം. മുസ്‌ലിംകളോട്‌ മാത്രമല്ല, അമുസ്‌ലിംകളോടും ബന്ധം സുദൃഡമാക്കാനും സ്‌നേഹത്തിന്റെ പൊട്ടിയ സ്വര്‍ണക്കമ്പികള്‍ വിളക്കിച്ചേര്‍ക്കാനും ഈ ദിനം ഉപയോഗപ്പെടുത്തേണ്ടതുണ്ട്‌. നബിയുടെ കാലത്ത്‌ നടന്ന ഈ സംഭവം മനുഷ്യര്‍ക്ക്‌ എന്നും പാഠമായിരിക്കട്ടെ. ഒരു മനുഷ്യന്‍ ഇങ്ങനെ പരാതിപ്പെട്ടു: "ഞാന്‍ കുടുംബബന്ധമുള്ളവരോട്‌ ബന്ധം ചേര്‍ക്കുന്നു. അവരാകട്ടെ എന്നോട്‌ ബന്ധം മുറിക്കുന്നു. ഞാന്‍ അവര്‍ക്ക്‌ ഉപകാരം ചെയ്യുന്നു. അവരാകട്ടെ എനിക്ക്‌ ഉപദ്രവമാണ്‌ ചെയ്യുന്നത്‌. ഞാന്‍ അവരില്‍ നിന്ന്‌ എല്ലാം സഹിക്കുന്നു. അവരാകട്ടെ എന്നോട്‌ അതിക്രമമാണ്‌ കാണിക്കുന്നത്‌." നബി അയാളോട്‌ അയാള്‍ സ്വീകരിച്ച അതേ നിലപാട്‌ തന്നെ തുടരാന്‍ നിര്‍ദേശിച്ചുകൊണ്ട്‌ പറഞ്ഞു: "താങ്കള്‍ ആ നിലപാട്‌ സ്വീകരിക്കുന്നേടത്തോളം കാലം താങ്കള്‍ക്ക്‌ ദൈവസഹായമുണ്ടാകും''. 

സ്‌നേഹത്തിന്റെയും സൗഹൃദത്തിന്റെയും പാത സ്വീകരിക്കാന്‍ ഈദുല്‍ഫിത്വ്‌ര്‍ വെളിച്ചമേകട്ടെ. ഈദുല്‍ഫിത്വ്‌ര്‍ മുസ്‌ലിം സമൂഹത്തില്‍ കൂരിരുള്‍ നീക്കി ഒരു പുതിയ പ്രഭാതത്തിന്റെ ഉദയത്തെപ്പറ്റിയുള്ള ശുഭപ്രതീക്ഷയുണര്‍ത്തുന്നു. കൂടുതല്‍ ഊര്‍ജസ്വലതയോടെ മുന്നോട്ട്‌ നീങ്ങാന്‍ കരുത്തേകുന്നു. ആഘോഷങ്ങള്‍ തളര്‍ന്ന ശക്തിക്ക്‌ പുനര്‍ജീവന്‍ നല്‍കി നവോന്മേഷം പ്രദാനം ചെയ്യും. നോമ്പ്‌ വ്യക്തിയില്‍ വല്ല മാറ്റവും സൃഷ്‌ടിച്ചിട്ടുണ്ടോ? അതോ അന്ന്‌ പ്രകടമായിരുന്ന ഭക്തിയും കര്‍മാവേശവും ആവര്‍ത്തിക്കപ്പെടുന്ന വെറുമൊരു ചടങ്ങ്‌ മാത്രമായിരുന്നുവോ? തുടര്‍ന്നുള്ള ജീവിതമാണ്‌ നോമ്പിന്റെ ഗുണഫലവും സ്വാധീനതയും തെളിയിക്കേണ്ടത്‌. ഭക്തിയും സ്‌നേഹവും ഐക്യവും നിറഞ്ഞ പ്രസന്നമായ ജീവിതം -ഇതായിരിക്കട്ടെ ഈദിന്റെ സന്ദേശം.

by പി മുഹമ്മദ്‌ കുട്ടശ്ശേരി @ ശബാബ് വാരിക 

Popular ISLAHI Topics

ISLAHI visitors