പശ്ചാതാപം സ്വീകരിക്കപ്പെടാത്തവർ

"ഇസ്ലാം (ദൈവത്തിനുള്ള ആത്മാര്‍പ്പണം) അല്ലാത്തതിനെ ആരെങ്കിലും മതമായി ആഗ്രഹിക്കുന്ന പക്ഷം അത് അവനില്‍ നിന്ന് ഒരിക്കലും സ്വീകരിക്കപ്പെടുന്നതല്ല. പരലോകത്തില്‍ അവന്‍ നഷ്ടക്കാരില്‍ പെട്ടവനുമായിരിക്കും. വിശ്വാസത്തിന് ശേഷം അവിശ്വാസം സ്വീകരിച്ച ഒരു ജനതയെ അല്ലാഹു എങ്ങനെ നേര്‍വഴിയിലാക്കും? അവരാകട്ടെ ദൈവദൂതന്‍ സത്യവാനാണെന്ന് സാക്ഷ്യം വഹിച്ചിട്ടുണ്ട്‌. അവര്‍ക്ക് വ്യക്തമായ തെളിവുകള്‍ വന്നുകിട്ടിയിട്ടുമുണ്ട്‌. അക്രമികളായ ആ ജനവിഭാഗത്തെ അല്ലാഹു നേര്‍വഴിയിലാക്കുന്നതല്ല. അല്ലാഹുവിന്‍റെയും മലക്കുകളുടെയും മനുഷ്യരുടെയും എല്ലാം ശാപം അവരുടെ മേലുണ്ടായിരിക്കുക എന്നതത്രെ അവര്‍ക്കുള്ള പ്രതിഫലം. അവര്‍ അതില്‍ (ശാപഫലമായ ശിക്ഷയില്‍) സ്ഥിരവാസികളായിരിക്കുന്നതാണ്‌. അവര്‍ക്ക് ശിക്ഷ ലഘൂകരിക്കപ്പെടുന്നതല്ല. അവര്‍ക്ക് അവധി നല്‍കപ്പെടുകയുമില്ല. അതിന് (അവിശ്വാസത്തിനു) ശേഷം പശ്ചാത്തപിക്കുകയും, ജീവിതം നന്നാക്കിത്തീര്‍ക്കുകയും ചെയ്തവരൊഴികെ. അപ്പോള്‍ അല്ലാഹു ഏറെ പൊറുക്കുന്നവനും അത്യധികം കരുണ കാണിക്കുന്നവനുമാകുന്നു. വിശ്വസിച്ചതിന് ശേഷം അവിശ്വാസികളായി മാറുകയും, അവിശ്വാസം കൂടിക്കൂടി വരികയും ചെയ്ത വിഭാഗത്തിന്‍റെ പശ്ചാത്താപം ഒരിക്കലും സ്വീകരിക്കപ്പെടുകയില്ല. അവരത്രെ വഴിപിഴച്ചവര്‍.അവിശ്വസിക്കുകയും അവിശ്വാസികളായിക്കൊണ്ട് മരിക്കുകയും ചെയ്തവരില്‍പെട്ട ഒരാള്‍ ഭൂമി നിറയെ സ്വര്‍ണം പ്രായശ്ചിത്തമായി നല്‍കിയാല്‍ പോലും അത് സ്വീകരിക്കപ്പെടുന്നതല്ല. അവര്‍ക്കാണ് വേദനയേറിയ ശിക്ഷയുള്ളത്‌. അവര്‍ക്ക് സഹായികളായി ആരുമുണ്ടായിരിക്കുന്നതുമല്ല." [അദ്ധ്യായം 3 ആലു ഇംറാൻ 85 - 91]

സത്യവിശ്വാസത്തെ ഏറെ ഇഷ്ടപ്പെടുകയും സത്യനിഷേധത്തെ വെറുക്കുകയും ചെയ്യത്തക്കവിധം ഒരാളുടെ ഹൃദയം വിശാലമായിക്കഴിഞ്ഞ ശേഷം അയാൾ അവിശ്വാസത്തിലേക്കും നിഷേധത്തിലേക്കും തിരിച്ചു പോകാനുള്ള സാധ്യത കുറവാണ്. സ്വാർഥമോ കാപട്യമോ പണക്കൊതിയോ പോലുള്ള കാരണങ്ങളാൽ മനസ്സ്‌ കളങ്കിതമായാലേ ഏതൊരാൾക്കും സത്യനിഷേധത്തിലേക്ക്‌ തിരിച്ചുപോകാൻ തോന്നുകയുള്ളൂ. അതുകൊണ്ടാണ് അവർ അല്ലാഹുവിന്റെ ശാപത്തിനും ശിക്ഷക്കും അർഹരാകുന്നത്‌. എന്നാലും ഒരിക്കൽ സത്യനിഷേധത്തിലേക്ക്‌ വ്യതിചലിച്ചവർ ആത്മാർത്ഥമായി പശ്ചാതപിച്ചാൽ അല്ലാഹു പൊറുത്തു തരുകയും കരുണ കാണിക്കുകയും ചെയ്യുമെന്ന് 3:89 സൂക്തത്തിൽ വാഗ്ദാനം ചെയ്തിരിക്കുന്നു. എന്നാൽ അവിശ്വാസത്തിലേക്ക്‌ വഴുതിപ്പോയ ശേഷം അതിൽ തന്നെ ഉറച്ചുനിൽക്കുകയും നിഷേധമനോഭാവം കൂടി വരുകയും ചെയ്തശേഷം പശ്ചാതപിച്ചാൽ അത്‌ അല്ലാഹു സ്വീകരിക്കുകയേ ഇല്ലെന്ന് 3:90 സൂക്തത്തിൽ വ്യക്തമാക്കിയിരിക്കുന്നു. സത്യമതം തൃപ്തിപ്പെട്ട്‌ സ്വീകരിച്ചശേഷം നിഷേധത്തിന്റെ പാരമ്യത്തിലേക്ക്‌ ഒരാൾ വഴുതിപ്പോവുകയാണെങ്കിൽ അയാൾ തികഞ്ഞ ദുർമ്മാർഗി തന്നെയാകുന്നു. സത്യനിഷേധത്തിൽ നിന്നും വൻപാപങ്ങളിൽ നിന്നും എന്നെന്നേക്കുമായി പിന്മാറിയവരുടെ പശ്ചാതാപം മാത്രമേ അല്ലാഹു സ്വീകരിക്കുകയുള്ളൂ.

By ചെറിയമുണ്ടം അബ്ദുൽ ഹമീദ്‌ മദനി @ ശബാബ് 

എല്ലാം നാഥനോട്‌ ചോദിക്കാം

"നിങ്ങളില്‍ ചിലര്‍ക്ക് ചിലരെക്കാള്‍ കൂടുതലായി അല്ലാഹു നല്‍കിയ അനുഗ്രഹങ്ങളോട് നിങ്ങള്‍ക്ക് മോഹം തോന്നരുത്‌. പുരുഷന്‍മാര്‍ സമ്പാദിച്ചുണ്ടാക്കിയതിന്‍റെ ഓഹരി അവര്‍ക്കുണ്ട്‌. സ്ത്രീകള്‍ സമ്പാദിച്ചുണ്ടാക്കിയതിന്‍റെ ഓഹരി അവര്‍ക്കുമുണ്ട്‌. അല്ലാഹുവോട് അവന്‍റെ ഔദാര്യത്തില്‍ നിന്ന് നിങ്ങള്‍ ആവശ്യപ്പെട്ടുകൊള്ളുക. തീര്‍ച്ചയായും അല്ലാഹു ഏത് കാര്യത്തെപ്പറ്റിയും അറിവുള്ളവനാകുന്നു." [അദ്ധ്യായം 4 നിസാഅ്‌ 32] 

എണ്ണമറ്റ വൈവിധ്യങ്ങളുമായാണ് മനുഷ്യവർഗ്ഗം സൃഷ്ടിക്കപ്പെട്ടിട്ടുള്ളത്‌. ഒരാൾ സമ്പന്നനാണെങ്കിൽ മറ്റൊരാൾ ദരിദ്രനാണ്. ഓരോരുത്തരുടേയും സൗന്ദര്യം വ്യത്യസ്തമാണ്. ശാരീരികവും മാനസികവുമായ കരുത്തിലും ഈ വൈവിധ്യം കാണാം. ചിലർക്ക്‌ ശ്രുതിമധുരമായ സ്വരമാണുള്ളതെങ്കിൽ മറ്റു ചിലരുടേത്‌ പരുക്കൻ സ്വരമാണ്. ജന്മനാ പോരായ്മകളുള്ളവരും ഇല്ലാത്തവരുമുണ്ട്‌. ധനം, ജോലി, മക്കൾ, സൗകര്യങ്ങൾ ഇവയെല്ലാം പലർക്കും ഏറ്റക്കുറവുകളോടേയാണ് ലഭിച്ചിട്ടുള്ളത്‌. ഈ സ്വാഭാവിക വൈവിധ്യങ്ങളെ ഇല്ലായ്മ ചെയ്യാനോ കൃത്രിമ സമത്വം രൂപപ്പെടുത്താനോ ശ്രമിക്കുന്നത്‌ പ്രകൃതി വിരുദ്ധമാണ്.

 എല്ലാവർക്കും എല്ലാം നൽകിയത്‌ സർവ്വശക്തനായ അല്ലാഹുവാണ്. മറ്റൊരാൾക്ക്‌ ലഭിച്ചത്‌ താൻ സ്വന്തമാക്കാൻ ആഗ്രഹിച്ചാൽ അത്‌ നാനാതരത്തിലുള്ള കുഴപ്പങ്ങൾ ക്ഷണിച്ചുവരുത്തും. തനിക്കില്ലാത്ത പലതും മറ്റുള്ളവർക്ക്‌ ലഭിച്ചെന്നിരിക്കാം. എന്നാൽ അവ അന്യായമായ വഴികളിലൂടെ തന്റേതാക്കാൻ കൊതിക്കുന്നത്‌ കൊടും പാതകമാണ്. സുഖസൗകര്യങ്ങൾ, സ്ഥാനമാനങ്ങൾ, നൈസർഗ്ഗിഗ ശേഷികൾ, സ്വഭാവ ഗുണങ്ങൾ എന്നിവയെല്ലാം ചിലരിൽ ഉയർന്ന നിലവാരത്തിലുണ്ടാവും. ഇതിനോട്‌ അസൂയ കാണിക്കുകയോ അവിഹിത വഴികളിലൂടെ അവ തന്റേതാക്കി മാറ്റാൻ ശ്രമിക്കുകയോ അരുത്‌. ഇതെല്ലാം വിഭജിച്ച്‌ നൽകിയത്‌ സർവ്വശക്തനായ അല്ലാഹുവാണ്.

 സ്ത്രീക്കും പുരുഷനും യാതൊരു പക്ഷഭേദവുമില്ലാതെ അല്ലാഹു പ്രതിഫലം നൽകും. ഓരോരുത്തരും പ്രവർത്തിക്കുന്നത്‌ അവർക്കുതന്നെ ഗുണം ചെയ്യുന്നതാണ്. ചെറിയ ഒരു പ്രവർത്തനം പോലും ആത്മാർത്ഥമായുണ്ടായെങ്കിൽ അല്ലാഹു അംഗീകരിക്കും. അവനാണ് ആർക്ക്‌ എങ്ങനെ പ്രതിഫലം നൽകണം എന്ന് തീരുമാനിക്കുന്നതും. അതിനാൽ നമുക്ക്‌ കിട്ടാതെ പോയ അനുഗ്രഹങ്ങൾ നേടിയെടുക്കാനുള്ള വഴി, കിട്ടിയവരോട്‌ അസൂയ പുലർത്താനോ അവ നശിച്ചു കാണാൻ ആഗ്രഹിക്കലോ അല്ല. മറിച്ച്‌ ആത്മാർത്ഥമായി അല്ലാഹുവിനോട്‌ അപേക്ഷിച്ചു കൊണ്ടേയിരിക്കലാണ്. എല്ലാം അറിയുന്ന എല്ലാം കണ്ടുകൊണ്ടിരിക്കുന്ന അല്ലാഹു നമുക്ക്‌ ഏതനുഗ്രഹവും തരാൻ കഴിവുള്ളവനാണ്. ആത്മാർത്ഥമായി അവനോട്‌ നിരന്തരം ചോദിച്ചുകൊണ്ടിരുന്നാൽ അവൻ ഒരിക്കലും ഒഴിവാക്കുന്നവനല്ല. ഇന്നല്ലെങ്കിൽ നാളെ അത്‌ നമ്മെ തേടിയെത്തും. അതിനാൽ അല്ലാഹുവിൽ പ്രതീക്ഷയർപ്പിച്ച്‌ അവനോട്‌ എല്ലാം ചോദിക്കുക.

By അബ്ദു സലഫി @ പുടവ മാസിക

Popular ISLAHI Topics

ISLAHI visitors