യേശുക്രിസ്തു (ഈസാ നബി) ഖുർആനിൽ

ആദം നബി (അ) മാതാവും പിതാവുമില്ലാതെയാണു ജനിക്കുന്നത്‌. എന്നാൽ യേശുക്രിസ്തു [ഈസാ നബി (അ)]വിനു മാതാവുണ്ട്‌. പിതാവില്ല. 'മറിയമിന്റെ ഉദരത്തിൽ നീ ജന്മം കൊള്ളുക' എന്ന ദൈവവചനം കാരണം അദ്ദേഹം മനുഷ്യനായിട്ടു തന്നെ ജന്മം കൊണ്ടു. മനുഷ്യന്റെ ന്യൂനതകൾ അദ്ദേഹത്തിൽ ഉണ്ടായിരുന്നു. ദൈവത്തിനു മാത്രം അവകാശപ്പെട്ട യാതൊരു സ്വഭാവ വിശേഷണവും അദ്ദേഹത്തിനു ഉണ്ടായിരുന്നില്ല. വിശുദ്ധഖുർആൻ ഈ യാഥാർത്ഥ്യങ്ങൾ വ്യക്തമാക്കുന്നു.

 "അല്ലാഹുവെ സംബന്ധിച്ചിടത്തോളം ഈസായെ ഉപമിക്കാവുന്നത് ആദമിനോടാകുന്നു. അവനെ (അവന്‍റെ രൂപം) മണ്ണില്‍ നിന്നും അവന്‍ സൃഷ്ടിച്ചു. പിന്നീട് അതിനോട് ഉണ്ടാകൂ എന്ന് പറഞ്ഞപ്പോള്‍ അവന്‍ (ആദം) അതാ ഉണ്ടാകുന്നു." [അദ്ധ്യായം 3 ആലു ഇം റാൻ 59]. ശേഷം വിശുദ്ധ ഖുർആൻ പ്രസ്താവിക്കുന്നു : "സത്യം നിന്‍റെ രക്ഷിതാവിങ്കല്‍ നിന്നുള്ളതാകുന്നു. ആകയാല്‍ നീ സംശയാലുക്കളില്‍ പെട്ടുപോകരുത്‌. ഇനി നിനക്ക് അറിവ് വന്നുകിട്ടിയതിനു ശേഷം അവന്‍റെ (ഈസായുടെ) കാര്യത്തില്‍ നിന്നോട് ആരെങ്കിലും തര്‍ക്കിക്കുകയാണെങ്കില്‍ നീ പറയുക: നിങ്ങള്‍ വരൂ. ഞങ്ങളുടെ മക്കളെയും, നിങ്ങളുടെ മക്കളെയും, ഞങ്ങളുടെ സ്ത്രീകളെയും നിങ്ങളുടെ സ്ത്രീകളെയും നമുക്ക് വിളിച്ചുകൂട്ടാം. ഞങ്ങളും നിങ്ങളും (കൂടുകയും ചെയ്യാം.) എന്നിട്ട് കള്ളം പറയുന്ന കക്ഷിയുടെ മേല്‍ അല്ലാഹുവിന്‍റെ ശാപമുണ്ടായിരിക്കാന്‍ നമുക്ക് ഉള്ളഴിഞ്ഞ് പ്രാര്‍ത്ഥിക്കാം." [അദ്ധ്യായം 3 ആലു ഇംറാൻ 60,61]. നജ്‌റാനിലെ ക്രിസ്ത്യാനികളുടെ സംഘത്തെ നബി (സ) ഇപ്രകാരം പ്രാർത്ഥനക്ക്‌ വേണ്ടി ക്ഷണിച്ചപ്പോൾ അവർ പിന്മാറുകയാണുണ്ടായത്‌.

 "വേദക്കാരേ, നിങ്ങള്‍ മതകാര്യത്തില്‍ അതിരുകവിയരുത്‌. അല്ലാഹുവിന്‍റെ പേരില്‍ വാസ്തവമല്ലാതെ നിങ്ങള്‍ പറയുകയും ചെയ്യരുത്‌. മര്‍യമിന്‍റെ മകനായ മസീഹ് ഈസാ അല്ലാഹുവിന്‍റെ ദൂതനും, മര്‍യമിലേക്ക് അവന്‍ ഇട്ടുകൊടുത്ത അവന്‍റെ വചനവും, അവങ്കല്‍ നിന്നുള്ള ഒരു ആത്മാവും മാത്രമാകുന്നു. അത് കൊണ്ട് നിങ്ങള്‍ അല്ലാഹുവിലും അവന്‍റെ ദൂതന്‍മാരിലും വിശ്വസിക്കുക. ത്രിത്വം എന്ന വാക്ക് നിങ്ങള്‍ പറയരുത്‌. നിങ്ങളുടെ നന്‍മയ്ക്കായി നിങ്ങള്‍ (ഇതില്‍ നിന്ന്‌) വിരമിക്കുക. അല്ലാഹു ഏക ആരാധ്യന്‍ മാത്രമാകുന്നു. തനിക്ക് ഒരു സന്താനമുണ്ടായിരിക്കുക എന്നതില്‍ നിന്ന് അവനെത്രയോ പരിശുദ്ധനത്രെ. ആകാശങ്ങളിലുള്ളതും ഭൂമിയിലുള്ളതുമെല്ലാം അവന്‍റെതാകുന്നു. കൈകാര്യകര്‍ത്താവായി അല്ലാഹു തന്നെ മതി. അല്ലാഹുവിന്‍റെ അടിമയായിരിക്കുന്നതില്‍ മസീഹ് ഒരിക്കലും വൈമനസ്യം കാണിക്കുന്നതല്ല. (അല്ലാഹുവിന്‍റെ) സാമീപ്യം സിദ്ധിച്ച മലക്കുകളും (വൈമനസ്യം കാണിക്കുന്നതല്ല.) അവനെ (അല്ലാഹുവെ) ആരാധിക്കുന്നതില്‍ ആര്‍ വൈമനസ്യം കാണിക്കുകയും, അഹംഭാവം നടിക്കുകയും ചെയ്യുന്നുവോ അവരെ മുഴുവനും അവന്‍ തന്‍റെ അടുക്കലേക്ക് ഒരുമിച്ചുകൂട്ടുന്നതാണ്‌." [അദ്ധ്യായം 4 നിസാഅ് 171,172]

 "അല്ലാഹു പറയുന്ന സന്ദര്‍ഭവും (ശ്രദ്ധിക്കുക.) 'മര്‍യമിന്‍റെ മകന്‍ ഈസാ, അല്ലാഹുവിന് പുറമെ എന്നെയും, എന്‍റെ മാതാവിനെയും ദൈവങ്ങളാക്കിക്കൊള്ളുവിന്‍. എന്ന് നീയാണോ ജനങ്ങളോട് പറഞ്ഞത്‌?' അദ്ദേഹം പറയും : 'നീയെത്ര പരിശുദ്ധന്‍! എനിക്ക് (പറയാന്‍) യാതൊരു അവകാശവുമില്ലാത്തത് ഞാന്‍ പറയാവതല്ലല്ലോ? ഞാനത് പറഞ്ഞിരുന്നെങ്കില്‍ തീര്‍ച്ചയായും നീയത് അറിഞ്ഞിരിക്കുമല്ലോ. എന്‍റെ മനസ്സിലുള്ളത് നീ അറിയും. നിന്‍റെ മനസ്സിലുള്ളത് ഞാനറിയില്ല. തീര്‍ച്ചയായും നീ തന്നെയാണ് അദൃശ്യകാര്യങ്ങള്‍ അറിയുന്നവന്‍. നീ എന്നോട് കല്‍പിച്ച കാര്യം അഥവാ 'എന്‍റെയും നിങ്ങളുടെയും രക്ഷിതാവായ അല്ലാഹുവെ നിങ്ങള്‍ ആരാധിക്കണം' എന്ന കാര്യം മാത്രമേ ഞാനവരോട് പറഞ്ഞിട്ടുള്ളൂ. ഞാന്‍ അവര്‍ക്കിടയില്‍ ഉണ്ടായിരുന്നപ്പോഴൊക്കെ ഞാന്‍ അവരുടെ മേല്‍ സാക്ഷിയായിരുന്നു. പിന്നീട് നീ എന്നെ പൂര്‍ണ്ണമായി ഏറ്റെടുത്തപ്പോള്‍ നീ തന്നെയായിരുന്നു അവരെ നിരീക്ഷിച്ചിരുന്നവന്‍. നീ എല്ലാകാര്യത്തിനും സാക്ഷിയാകുന്നു. നീ അവരെ ശിക്ഷിക്കുകയാണെങ്കില്‍ തീര്‍ച്ചയായും അവര്‍ നിന്‍റെ ദാസന്‍മാരാണല്ലോ. നീ അവര്‍ക്ക് പൊറുത്തുകൊടുക്കുകയാണെങ്കില്‍ നീ തന്നെയാണല്ലോ പ്രതാപിയും യുക്തിമാനും'." [അദ്ധ്യായം 5 മാഇദ 116 - 118]

 "(നബിയേ,) പറയുക : കാര്യം അല്ലാഹു ഏകനാണ് എന്നതാകുന്നു. അല്ലാഹു ഏവര്‍ക്കും ആശ്രയമായിട്ടുള്ളവനാകുന്നു. അവന്‍ (ആര്‍ക്കും) ജന്‍മം നല്‍കിയിട്ടില്ല. (ആരുടെയും സന്തതിയായി) ജനിച്ചിട്ടുമില്ല. അവന്ന് തുല്യനായി ആരും ഇല്ലതാനും." [അദ്ധ്യായം 112 ഇഖ്‌ലാസ്‌] 

"മര്‍യമിന്‍റെ മകന്‍ മസീഹ് തന്നെയാണ് അല്ലാഹു എന്ന് പറഞ്ഞവര്‍ തീര്‍ച്ചയായും അവിശ്വാസികളായിരിക്കുന്നു. (നബിയേ,) പറയുക : മര്‍യമിന്‍റെ മകന്‍ മസീഹിനെയും അദ്ദേഹത്തിന്‍റെ മാതാവിനെയും, ഭൂമിയിലുള്ള മുഴുവന്‍ പേരെയും അല്ലാഹു നശിപ്പിക്കാന്‍ ഉദ്ദേശിക്കുകയാണെങ്കില്‍ അവന്‍റെ വല്ല നടപടിയിലും സ്വാധീനം ചെലുത്താന്‍ ആര്‍ക്കാണ് കഴിയുക? ആകാശങ്ങളുടെയും, ഭൂമിയുടെയും, അവയ്ക്കിടയിലുള്ളതിന്‍റെയും എല്ലാം ആധിപത്യം അല്ലാഹുവിന്നത്രെ. അവന്‍ ഉദ്ദേശിക്കുന്നത് അവന്‍ സൃഷ്ടിക്കുന്നു. അല്ലാഹു ഏത് കാര്യത്തിനും കഴിവുള്ളവനത്രെ." [അദ്ധ്യായം 5 മാഇദ 17]

 "മര്‍യമിന്‍റെ മകന്‍ മസീഹ് തന്നെയാണ് അല്ലാഹു എന്ന് പറഞ്ഞവര്‍ തീര്‍ച്ചയായും അവിശ്വാസികളായിരിക്കുന്നു. എന്നാല്‍ മസീഹ് പറഞ്ഞത്‌; 'ഇസ്രായീല്‍ സന്തതികളേ, എന്‍റെയും നിങ്ങളുടെയും രക്ഷിതാവായ അല്ലാഹുവെ നിങ്ങള്‍ ആരാധിക്കുവിന്‍. അല്ലാഹുവോട് വല്ലവനും പങ്കുചേര്‍ക്കുന്ന പക്ഷം തീര്‍ച്ചയായും അല്ലാഹു അവന്ന് സ്വര്‍ഗം നിഷിദ്ധമാക്കുന്നതാണ്‌. നരകം അവന്‍റെ വാസസ്ഥലമായിരിക്കുകയും ചെയ്യും. അക്രമികള്‍ക്ക് സഹായികളായി ആരും തന്നെയില്ല' എന്നാണ്‌. അല്ലാഹു മൂവരില്‍ ഒരാളാണ് എന്ന് പറഞ്ഞവര്‍ തീര്‍ച്ചയായും അവിശ്വാസികളാണ്‌. ഏക ആരാധ്യനല്ലാതെ യാതൊരു ആരാധ്യനും ഇല്ല തന്നെ. അവര്‍ ആ പറയുന്നതില്‍ നിന്ന് വിരമിച്ചില്ലെങ്കില്‍ അവരില്‍ നിന്ന് അവിശ്വസിച്ചവര്‍ക്ക് വേദനയേറിയ ശിക്ഷ ബാധിക്കുക തന്നെ ചെയ്യും. ആകയാല്‍ അവര്‍ അല്ലാഹുവിലേക്ക് ഖേദിച്ചുമടങ്ങുകയും, അവനോട് പാപമോചനം തേടുകയും ചെയ്യുന്നില്ലേ? അല്ലാഹു ഏറെ പൊറുക്കുന്നവനും കരുണാനിധിയുമത്രെ. മര്‍യമിന്‍റെ മകന്‍ മസീഹ് ഒരു ദൈവദൂതന്‍ മാത്രമാകുന്നു. അദ്ദേഹത്തിന് മുമ്പ് ദൂതന്‍മാര്‍ കഴിഞ്ഞുപോയിട്ടുണ്ട്‌. അദ്ദേഹത്തിന്‍റെ മാതാവ് സത്യവതിയുമാകുന്നു. അവര്‍ ഇരുവരും ഭക്ഷണംകഴിക്കുന്നവരായിരുന്നു. നോക്കൂ; എന്നിട്ടും അവര്‍ എങ്ങനെയാണ് (സത്യത്തില്‍ നിന്ന്‌) തെറ്റിക്കപ്പെടുന്നതെന്ന്‌." [അദ്ധ്യായം 5 മാഇദ 72 - 75]

 By അബ്ദുസ്സലാം സുല്ലമി @ ഇസ്‌ലാം മൗലിക പഠനങ്ങൾ from യുവത

ദൈവ പ്രീതിയിൽ സമ്പന്നനാവാം

"സത്യവിശ്വാസികളേ, നിങ്ങള്‍ പരസ്പരം സംതൃപ്തിയോടുകൂടി നടത്തുന്ന കച്ചവട ഇടപാടു മുഖേനയല്ലാതെ നിങ്ങളുടെ സ്വത്തുക്കള്‍ അന്യായമായി നിങ്ങള്‍ അന്യോന്യം എടുത്ത് തിന്നരുത്‌. നിങ്ങള്‍ നിങ്ങളെത്തന്നെ കൊലപ്പെടുത്തുകയും ചെയ്യരുത്‌. തീര്‍ച്ചയായും അല്ലാഹു നിങ്ങളോട് കരുണയുള്ളവനാകുന്നു. ആരെങ്കിലും അതിക്രമമായും അന്യായമായും അങ്ങനെ ചെയ്യുന്ന പക്ഷം നാമവനെ നരകാഗ്നിയിലിട്ട് കരിക്കുന്നതാണ്‌. അത് അല്ലാഹുവിന് എളുപ്പമുള്ള കാര്യമാകുന്നു." [അദ്ധ്യായം 4 നിസാഅ് 29,30] 

വിശുദ്ധിയുടെ മതമാണ് ഇസ്‌ലാം. അല്ലാഹു പരിശുദ്ധനും വിശിഷ്ടമായതിനെ ഇഷ്ടപ്പെടുന്നവനുമാണ്. തന്റെ അടിമകളുടെ മനസ്സും ശരീരവും സമ്പത്തും ശുദ്ധമാവണമെന്ന് അല്ലാഹു ആവശ്യപ്പെടുന്നു. അതിനാൽ നിഷിദ്ധമാർഗ്ഗങ്ങളിലൂടെയുള്ള ധനസമ്പാദനത്തെ അവൻ നിരോധിച്ചിട്ടുണ്ട്‌. സത്യവിരുദ്ധവും മതനിയമത്തിൽ നിരുത്സാഹപ്പെടുത്തുന്നതുമായ എല്ലാ മാർഗ്ഗങ്ങളും നിഷിദ്ധ മാർഗ്ഗമാണ്. പരസ്പരം സംതൃപ്തമായ ക്രയവിക്രയങ്ങളിലൂടെ മാത്രമേ ഒരാളുടെ സമ്പത്ത്‌ മറ്റൊരാൾക്ക്‌ അനുവദനീയമാവുകയുള്ളൂ. കൂലി, ശമ്പളം, ദാനം, ലാഭം തുടങ്ങിയ രൂപത്തിൽ ഒരാൾക്ക്‌ മറ്റൊരാളിൽ നിന്ന് നിയമാനുസൃതമായ രീതിയിൽ ധനം ലഭിക്കാം. വാണിജ്യം, വ്യവസായം, തൊഴിൽ തുടങ്ങിയ ഇടപാടുകളിൽ ഒരാൾ ഇതരന്റെ ആവശ്യാർത്ഥം അധ്വാനിക്കുകയും ഇതരൻ ആ അധ്വാനത്തിനു പ്രതിഫലം നൽകുകയും ചെയ്യുന്നു. അതിനാൽ ഈ വിനിമയങ്ങൾ കച്ചവട ഇടപാടുകളുടെ പരിധിയിൽ വരുന്നു.

പരസ്പരം സംതൃപ്തി ഉണ്ടാകണമെങ്കിൽ ഏതെങ്കിലും തരത്തിലുള്ള സമ്മർദ്ദമോ ചതിയോ ഈ ഇടപാടുകളിൽ കടന്നു വരരുത്‌. സ്ത്രീധനം, കൈക്കൂലി, പലിശ, കരിഞ്ചന്ത, മായം ചേർക്കൽ തുടങ്ങിയ ഇടപാടുകളിൽ പരസ്പര സംതൃപ്തി ഇല്ല. ചില നിർബന്ധിതാവസ്ഥകളാണവയ്ക്ക്‌ പിന്നിലുള്ളത്‌. ചൂതാട്ടം, ലോട്ടറി തുടങ്ങിയവയിലും ചിലരുടെ വ്യാമോഹങ്ങളും മറ്റു ചിലരുടെ മോഹഭംഗങ്ങളുമാണ് പ്രവർത്തിക്കുന്നത്‌. അതിനാൽ സുതാര്യവും നിയമാനുസൃതവുമല്ലാത്ത എല്ലാ ഇടപാടുകളും കുറ്റാർഹമാണ്. താൽക്കാലിക നേട്ടത്തിനു വേണ്ടി വളഞ്ഞ മാർഗ്ഗത്തിലൂടെ ധനം കൈക്കലാക്കുന്നവർ തങ്ങളെതന്നെ കൊന്ന് കളയുകയാണ് ചെയ്യുന്നത്‌. അഥവാ തങ്ങളുടെ ഭാവി അവർ അപകടത്തിലാക്കുന്നു. എന്നാൽ ഒരു വിശ്വാസി ഒരിക്കലും സ്വയം മരിക്കുന്നവനും മറ്റുള്ളവരെ കൊല്ലുന്നവനും ആവരുത്‌. അറിഞ്ഞുകൊണ്ട്‌ അപകടത്തിൽ പോയി ചാടുന്നവനാകരുത്‌ വിശ്വാസി. പരസ്പര സംതൃപ്തിയില്ലാത്ത ഇടപാടുകളിലൂടെ അവൻ എത്തിച്ചേരുന്നത്‌ കത്തിയാളുന്ന നരകാഗ്നിയിലായിരിക്കും.

നമ്മുടെ ഭാവി അപകടം നിറഞ്ഞതാവാതിരിക്കാൻ കാരുണ്യവാനായ അല്ലാഹു ഇക്കാര്യം നമ്മെ ഓർമ്മപ്പെടുത്തുന്നു. കാര്യങ്ങൾ മനസ്സിലായിട്ടും അന്യായമായ പാത പിന്തുടർന്ന് ഹറാം തീനികളായി മുന്നോട്ട്‌ പോയാൽ കല്ലും മനുഷ്യരും ഇന്ധനമായ നരകാഗ്നിയാണ് അവരുടെ സങ്കേതം. എല്ലാം സൃഷ്ടിച്ച്‌ സംരക്ഷിച്ചു കൊണ്ടിരിക്കുന്ന സർവ്വശക്തനായ അല്ലാഹുവിന് ധിക്കാരികളെ ശിക്ഷിക്കുന്നത്‌ ഒട്ടും പ്രയാസമുള്ള കാര്യമല്ല എന്നോർക്കുക.

 by അബ്ദു സലഫി @ പുടവ മാസിക

Popular ISLAHI Topics

ISLAHI visitors