അമാനത്ത്‌ കൃത്യമായി നിർവ്വഹിക്കുക

സ്രഷ്ടാവ് നമ്മെ ഏല്പിക്കുന്നതും നാം ഏറ്റെടുക്കുന്നതുമായ അമാനത്തുകളുണ്ട്. ഭൂമിയിലെ പ്രാതിനിധ്യം നിര്‍വഹിക്കുന്ന ‘ഖിലാഫത്ത്’ (2:30) നമ്മെ നാഥന്‍ ഏല്പിച്ചതാണ്. ഹാജറുള്ളവര്‍ ഹാജറില്ലാത്തവര്‍ക്ക് എത്തിക്കുക’യെന്ന പ്രവാചകന്റെ (സ) കല്പനയും തഥൈവ. ഏത് വിധേനയാണെങ്കിലും ദൗത്യനിര്‍വഹണത്തില്‍ അണു അളവുപോലും ബോധപൂര്‍വമായ ‘വഞ്ചന’ ഉണ്ടാവാന്‍ പാടില്ല. വ്യക്തികളുടെ ജീവിതം, കഴിവ്, സിദ്ധികള്‍, സാഹചര്യങ്ങള്‍ തുടങ്ങി പലതിലും പ്രകടമാകുന്ന ‘വൈവിധ്യം’ പോലെ (തീര്‍ച്ചയായും നിങ്ങളുടെ പരിശ്രമം വിഭിന്ന രൂപത്തിലുള്ളതാകുന്നു - 92:4) തന്നെയാണ് ദൗത്യ നിര്‍വഹണത്തിന്റെ കാര്യവും. ഞാന്‍ ചെയ്തുതീര്‍ക്കേണ്ടതാവില്ല നിങ്ങള്‍ കൈകാര്യം ചെയ്യേണ്ടത്. അപ്പോഴാണ് പ്രബോധന ദൗത്യം സര്‍ഗാത്മകവും ക്രിയാത്മകവുമാവുന്നത്. അല്ലാഹുവിന്റെ തൃപ്തിയും സ്വര്‍ഗീയാനുഗ്രഹങ്ങളും, നമ്മെ തിരിച്ചറിഞ്ഞും നമ്മളിലുള്ളതിനെ സക്രിയമാക്കിയും നമുക്ക് നേടാനാവണം (അല്ലാഹു നിനക്ക് നല്‍കിയിട്ടുള്ളതിലൂടെ നീ പരലോകവിജയം തേടുക. ഐഹികജീവിതത്തില്‍ നിന്ന് നിനക്കുള്ള ഓഹരി നീ വിസ്മരിക്കുകയും വേണ്ട. അല്ലാഹു നിനക്ക് നന്‍മ ചെയ്തത് പോലെ നീയും നന്‍മചെയ്യുക - 28:77). അതാണ് യഥാര്‍ഥ വിജയം (ആര്‍ നരകത്തില്‍ നിന്ന് അകറ്റിനിര്‍ത്തപ്പെടുകയും സ്വര്‍ഗത്തില്‍ പ്രവേശിപ്പിക്കപ്പെടുകയും ചെയ്യുന്നുവോ അവനാണ് വിജയം നേടുന്നത്‌ - 3:185).

 തന്റെ കഴിവുകള്‍ എല്ലാം അല്ലാഹു നമുക്ക് തന്ന് അനുഗ്രഹിച്ച ‘ഇഹ്‌സാനു’കളാണ്. അവക്കുള്ള നന്ദിയായി നാം നിര്‍വഹിക്കേണ്ട ദൗത്യത്തില്‍ വരുന്ന അപരാധങ്ങള്‍ ‘ഫസാദുകളാ’ണ് എന്നും ഖുര്‍ആന്‍ പഠിപ്പിക്കുന്നു (അല്ലാഹു നിനക്ക് നന്‍മ ചെയ്തത് പോലെ നീയും നന്‍മചെയ്യുക. നീ നാട്ടില്‍ കുഴപ്പത്തിന് മുതിരരുത്‌. കുഴപ്പമുണ്ടാക്കുന്നവരെ അല്ലാഹു തീര്‍ച്ചയായും ഇഷ്ടപ്പെടുന്നതല്ല - 28:77). നാം ഏറ്റെടുത്തതും ഏല്പിച്ചതുമായ മതപ്രബോധന പ്രവര്‍ത്തനങ്ങളല്ലാത്ത മിക്ക മേഖലകളിലും നമ്മുടെ കഴിവുകള്‍ തിരിച്ചറിഞ്ഞ് നാം പ്രവര്‍ത്തിക്കാറുണ്ട്. രാപ്പകലുകള്‍ വ്യത്യാസമില്ലാതെ അധ്വാനിക്കുന്നു. ബന്ധങ്ങളില്‍ പരിക്കു പറ്റാതിരിക്കാന്‍ സന്ദര്‍ശനങ്ങളും യാത്രകളും സജീവമാക്കുന്നു. യോഗങ്ങള്‍, പരിശീലനങ്ങള്‍ തുടങ്ങിയ രംഗങ്ങളില്‍ സാന്നിധ്യം ഉറപ്പുവരുത്തുന്നു. ചിലര്‍ സ്വയം സന്നദ്ധരായി ‘പണം മുടക്കി’ വിദഗ്ധ പരിശീലനം നേടുന്നു. ഉത്തരവാദിത്വങ്ങള്‍ സ്വയം സന്നദ്ധരായി ഏറ്റെടുക്കുന്നു. തൻ്റെ ഇടം തിരിച്ചറിഞ്ഞ് നല്ല ‘റിസള്‍ട്ട്’ ഉണ്ടാക്കുന്നതിന് വിയര്‍പ്പ് പൊടിഞ്ഞ് അധ്വാനിക്കുന്നു. പ്രാതികൂല്യങ്ങള്‍ വകവെക്കാതെ സധൈര്യം മുന്നോട്ടു കുതിക്കുന്നു. ഇതെല്ലാം തെറ്റായ കാര്യമൊന്നുമല്ല. എന്നാല്‍ ആദര്‍ശപ്രബോധന സംഘടനാ രംഗങ്ങളില്‍ നമ്മുടെ ‘അമാനത്തുകള്‍’ കേവലം അലങ്കാരങ്ങളായി മാറുന്നുവെങ്കില്‍ അത് ശിക്ഷാര്‍ഹമാണ്. അതുകൊണ്ടായിരിക്കണം പ്രവാചകന്‍(സ) ഇപ്രകാരം പറഞ്ഞത്. "നിങ്ങള്‍ അധികാരം കൊതിക്കരുത്. അത് പരലോകത്ത് നിന്ദ്യതയും ദു:ഖവുമായിരിക്കും” (ബുഖാരി). സംഘടനാ പ്രവര്‍ത്തകന്റെ ഉള്ളുണര്‍ത്തേണ്ട ഒരു വചനമാണിത്.

 നേതൃത്വം ദൗത്യനിര്‍വഹണത്തിന്റെ ഉന്നത തലമാണ്. ശാഖ മുതല്‍ സംസ്ഥാന തലം വരെ ഒരേ സമയം അണികളും നേതാക്കളുമാണ് നമ്മള്‍ ഓരോരുത്തരും. അമാനത്തിന്റെ ‘ഭാരം’ നെഞ്ചേറ്റിയ ഭാരവാഹികള്‍ നാഥന്റെ മുന്‍പില്‍ തലയുയര്‍ത്തി നില്ക്കാനുള്ള നെഞ്ചുറപ്പ് നേടിയെടുക്കുക എന്നത് പരിശ്രമം ആവശ്യമുള്ള കാര്യമാണ്. നേതാവായതോടെ ഉറക്കം നഷ്ടപ്പെട്ടവരുടെ ചരിത്രം നമ്മുടെ മുന്‍പിലുണ്ട്. സമുദായം ഉല്‍കൃഷ്ടാവസ്ഥ നേടാതെ ഉറക്കം വരില്ലെന്ന് പ്രഖ്യാപിച്ച സമുന്നതരായ നേതാക്കള്‍ കൊണ്ട വെയിലാണ് നാം അനുഭവിക്കുന്ന തണുപ്പ് എന്ന് മറന്നുപോവരുത്. തര്‍ബിയ്യത്ത്, തസ്‌കിയത്ത്, സമകാലിക ബോധനങ്ങള്‍, സമര്‍പ്പണത്തിന് അണികളെ സജ്ജമാക്കല്‍, ഭാഷണങ്ങള്‍, സാമൂഹ്യ ജീര്‍ണതകള്‍ക്കെതിരെയുള്ള പോരാട്ടം തുടങ്ങി ഒരു ‘വടവൃക്ഷ’ മായി വരുംവിധം കര്‍മങ്ങള്‍ക്ക് കരുത്തുപകരേണ്ടവരാണ് നാം. നമ്മുടെ ഒരു മയക്കം, ക്ഷീണം നവോത്ഥാനത്തിന്റെ വേഗതയും ആവേശവും തണുപ്പിക്കുന്നുവെങ്കില്‍ കാലം മാപ്പു നല്കില്ല. ഒരു വ്യക്തിയെ സജീവനാക്കുന്നത് ദൗത്യനിര്‍വഹണമാണെങ്കില്‍ ഒരു വ്യക്തി ഒരു ഘടകം നിര്‍ജീവമായതിന് ശിക്ഷയും നേരിടേണ്ടി വരും. ഉള്ളുണര്‍ത്തുന്ന ഭീതിയോടെ ഈ വചനം നാം ഗ്രഹിക്കുക. പ്രവാചകന്‍ പറഞ്ഞു: "അമാനത്ത് കൃത്യമായി നിര്‍വഹിക്കാത്തവന് ഈമാന്‍ ഇല്ല. ഏറ്റെടുത്ത കരാറുകള്‍ പാലിക്കാത്തവന് മതവുമില്ല." (അഹ്മദ്‌).

 From ശബാബ്‌ വാരിക

മുഹമ്മദ് നബിയുടെ കാരുണ്യസന്ദേശം

വിശുദ്ധ മക്കയിൽ അനാഥനായി വളർന്നുവന്ന മുഹമ്മദ്(സ) സൽസ്വഭാവിയും എല്ലാവർക്കും ഇഷ്ടപ്പെട്ടവനുമായിരുന്നു. ഇബ്രാഹിംനബിയുടെ മകനായ ഇസ്മായിൽ നബിയുടെ കുടുംബത്തിൽ ജനിച്ച മുഹമ്മദ്(സ) ആ പ്രവാചകന്മാരുടെ ആദർശമനുസരിച്ചാണ് ജീവിച്ചുപോന്നത്. അതുകൊണ്ടുതന്നെ മുഹമ്മദ് (സ) ഒരിക്കലും വിഗ്രഹാരാധന നടത്തിയിരുന്നില്ല. നാട്ടിൽ നിറഞ്ഞുനിന്ന മദ്യപാനം, ചൂതാട്ടം, വ്യഭിചാരം തുടങ്ങിയ എല്ലാ തിന്മകളിൽനിന്നും അകൽച്ച പാലിച്ചുകൊണ്ടുള്ള ഒരു ജീവിതമായിരുന്നു അദ്ദേഹം നയിച്ചിരുന്നത്. ധ്യാനം ഇഷ്ടപ്പെട്ട മുഹമ്മദ് (സ) ദിവസങ്ങളോളം നൂർ മലയിലെ ഹിറാ ഗുഹയിൽ ആരാധനാനിരതനായി കഴിയുക പതിവായിരുന്നു. അങ്ങനെയിരിക്കെ അദ്ദേഹത്തിന് നാല്പത് വയസ്സായപ്പോൾ ജിബ്‌രിൽ എന്ന മാലാഖ അവിടെ പ്രത്യക്ഷപ്പെടുകയും ഖുർആനിലെ ആദ്യമായി അവതരിച്ച അഞ്ച് വചനങ്ങൾ ഓതിക്കേൾപ്പിക്കുകയും ചെയ്തു. ഇഖ്‌റഅ് (നീ വായിക്കുക) എന്ന് തുടങ്ങുന്ന ആ വചനങ്ങൾ ഖുർആനിന്റെ രത്നച്ചുരുക്കമാണെന്നു പറയാം. വായന, എഴുത്ത്, പഠനം, ഗവേഷണം, സൃഷ്ടിപ്പിലെ അദ്‌ഭുതങ്ങൾ, വിജ്ഞാനത്തിന്റെ അനന്തത തുടങ്ങിയവയായിരുന്നു ആ വചനങ്ങളുടെ ഉള്ളടക്കം. അന്നുമുതൽ മുഹമ്മദ് (സ) ഒരു നബിയായി മാറി. പിന്നീടങ്ങോട്ട് അടുത്ത കുടുംബക്കാരെയും നാട്ടുകാരെയും തന്റെ ദൗത്യമറിയിച്ചുകൊണ്ട് നബി (സ) പുതിയൊരു സംസ്കാരത്തിന് അടിത്തറ പാകി. ക്രിസ്തുവർഷം 610 ഓഗസ്റ്റ് പത്തിനായിരുന്നു ഈ മഹാ വെളിപാടിന്റെ തുടക്കമെന്നാണ് ചരിത്രകാരന്മാർ കണക്കാക്കിയിട്ടുള്ളത്. തുടർന്നുള്ള വെറും 23 വർഷങ്ങളാണ് നബി(സ)യുടെ പ്രവർത്തനകാലം.

 കാലുഷ്യം നിറഞ്ഞ ലോകത്തേക്ക് സമാധാനത്തിന്റെ ദീപശിഖയുമായാണ് മുഹമ്മദ് നബി (സ) കടന്നുവന്നത്. ഗോത്ര മഹിമയുടെ പേരിൽ പരസ്പരം പോരടിച്ചുകഴിഞ്ഞ മക്കയിലെ ജനങ്ങളോട് ‘‘ആദമിന്റെ മക്കളേ!’’ എന്ന് വിളിച്ചുകൊണ്ടാണ് നബി (സ) തന്റെ ദൗത്യം നിർവഹിച്ചത്. ആദ്യപിതാവായ ആദമിന്റെ സന്തതികളാണ് മനുഷ്യരെല്ലാമെന്ന സാർവലൗകിക സാഹോദര്യത്തിന്റെ പ്രഖ്യാപനമായിരുന്നു ആ അഭിസംബോധന. വർഗ, വർണ വ്യത്യാസങ്ങളാൽ ഉച്ചനീചത്വങ്ങൾ നിലനിന്ന അറേബ്യൻ സമൂഹത്തോട് മനുഷ്യരെല്ലാം ഒരു ദൈവത്തിന്റെ സൃഷ്ടികളും ഒരേ മാതാപിതാക്കളുടെ മക്കളുമാണെന്ന് തെളിവു സഹിതം വിളിച്ചു പറയുകയായിരുന്നു അദ്ദേഹം. നബി(സ)യുടെ സഖാക്കളിൽ പ്രമുഖരായിരുന്ന ഖുറൈശി വംശജനായ അബൂബക്കറും റോമക്കാരനായ സുഹൈബും പേർഷ്യക്കാരനായ സൽമാനും ആഫ്രിക്കൻ അടിമയായിരുന്ന ബിലാലും ഒരു വ്യത്യാസവുമില്ലാതെ ഒരുമിച്ചാണ് ജീവിച്ചത്.

 മനുഷ്യർക്കിടയിൽ നിലനില്ക്കുന്ന വംശവ്യത്യാസങ്ങളും കുടുംബവൈവിധ്യവും മനുഷ്യരെ തിരിച്ചറിയാനുള്ള അടയാളം മാത്രമാണെന്ന ഖുർആൻ വചനം അദ്ദേഹം പ്രഘോഷണം ചെയ്തു. നബി(സ)യുടെ അന്ത്യപ്രഭാഷണത്തിൽ സകലമനുഷ്യാവകാശ നിയമങ്ങളും സവിസ്തരം പരാമർശിക്കുകയുണ്ടായി. അദ്ദേഹം പറഞ്ഞു: ‘‘ഒരു അറബിക്ക് അനറബിയെക്കാളോ വെളുത്തവന് കറുത്തവനെക്കാളോ യാതൊരു ശ്രേഷ്ഠതയുമില്ല. ഓരോരുത്തരിലുമുള്ള സൂക്ഷ്മതാബോധമാണ് ശ്രേഷ്ഠതയുടെ മാനദണ്ഡം’’. പ്രമുഖ ചരിത്രകാരൻ മൈക്കിൾ എച്ച്‌. ഹാർട്ട് രചിച്ച ലോകചരിത്രത്തിൽ പ്രമുഖസ്ഥാനം നേടിയ നൂറ് മഹാന്മാരുടെ ഹ്രസ്വചരിത്രഗ്രന്ഥമാണ് ദി ഹൺട്രഡ്. അതിൽ ഒന്നാം സ്ഥാനം നല്കിയിട്ടുള്ളത് മുഹമ്മദ് നബി(സ)ക്കാണ്. അതിനദ്ദേഹം നല്കുന്ന ന്യായീകരണം തന്റെ ആദർശങ്ങളും സന്ദേശങ്ങളും ഹ്രസ്വകാലംകൊണ്ട് ലോകത്തിന് പരിചയപ്പെടുത്തുന്നതിലും നടപ്പാക്കുന്നതിലും നബി (സ) വിജയം വരിച്ചുവെന്നതാണ്. നബിയുടെ ജീവിതവും സന്ദേശവും പഠിപ്പിച്ച ശ്രീ നാരായണഗുരു പറഞ്ഞത്: ‘‘കരുണാവാൻ നബി മുത്തു രത്നമോ’’ എന്നാണ്. ജനപ്രിയനായ ആ മനുഷ്യസ്നേഹിയെ മക്കയിലെ ജനങ്ങൾ വിളിച്ചിരുന്ന ഓമനപ്പേരായിരുന്നു അൽ അമീൻ (വിശ്വസ്തൻ) എന്നത്. 

അവർക്കിടയിലുണ്ടായിരുന്ന തർക്കങ്ങൾ പരിഹരിക്കാൻ കക്ഷിഭേദമെന്യേ അവർ തിരഞ്ഞെടുക്കാറുള്ള മധ്യസ്ഥനും മുഹമ്മദ് നബി(സ)യായിരുന്നു. അബ്രഹാം (ഇബ്രാഹിം) പ്രവാചകന്റെ അനുയായികളാണ് തങ്ങളെന്ന് മക്കയിലെ ജനങ്ങൾ സ്വയം വാദിക്കുമായിരുന്നു. കാലക്രമേണ ഏകദൈവാരാധനയുടെ പാതവിട്ട് വിഗ്രഹാരാധന ശീലമാക്കിയ അവരെ കൃത്യമായ ഏക ദൈവാരാധനയിലേക്ക് തിരിച്ചുവിളിക്കുകയായിരുന്നു നബി (സ). മുൻ പ്രവാചകന്മാരായി ഖുർആൻ പരിചയപ്പെടുത്തിയ ഈസ (യേശു), മൂസ (മോസസ്) തുടങ്ങിയ എല്ലാ പ്രവാചകന്മാരെയും ആദരിക്കാനും ബഹുമാനിക്കാനുമാണ് നബി (സ) പഠിപ്പിച്ചത്. ദൈവത്തിന്റെയും ദേവാലയങ്ങളുടെയും പ്രവാചകന്മാരുടെയും പേരിൽ കലഹിക്കുന്ന സമൂഹങ്ങൾക്ക് നബി(സ)യുടെ ജീവിതത്തിൽ നിന്ന്‌ ഒരുപാട് പഠിക്കാനുണ്ട്. ബഹുസ്വര സമൂഹത്തിൽ ഇടപഴകി ജീവിക്കുന്ന ഒരു മനുഷ്യനായിരുന്നു നബി (സ). മതത്തിന്റെയോ സമുദായത്തിന്റെയോ പേരിൽ ഒരു ധ്രുവീകരണം ഉണ്ടാക്കാൻ അദ്ദേഹം അനുവദിച്ചില്ല.

 വ്യക്തിജീവിതത്തിലും സാമൂഹികജീവിതത്തിലും മാനുഷികബന്ധങ്ങൾ കാത്തുസൂക്ഷിച്ചുപോന്നു. നബി(സ)യുടെ മുസ്‌ലിമല്ലാത്ത പിതൃവ്യൻ അബൂത്വാലിബിന്റെ സഹായം സ്വീകരിച്ചാണ് നബി (സ) ദീർഘകാലം ജീവിച്ചത്. ശത്രുക്കൾ മക്കയിൽ നബി(സ)യെ ഊരുവിലക്കിയപ്പോൾ നബി(സ)യുടെ കൂടെ കഴിയുകയും നബി(സ)ക്കുവേണ്ടി എല്ലാ സഹായസഹകരണങ്ങളും ചെയ്തുകൊടുക്കുകയും ചെയ്ത നിരവധി അമുസ്‌ലിം സുഹൃത്തുക്കളുണ്ടായിരുന്നു. മക്കയിൽ നിന്ന്‌ മദീനയിലേക്കുള്ള ചരിത്രപ്രസിദ്ധമായ ഹിജ്‌റയിൽ നബി(സ)യുടെ വഴികാട്ടിയായിരുന്നത് ഒരു അമുസ്‌ലിം ചെറുപ്പക്കാരനായിരുന്നു. മദീനയിലെത്തിയ നബി (സ) ഉടൻ തന്നെ അവിടെയുള്ള യഹൂദ, ക്രൈസ്തവ വിഭാഗങ്ങളുമായി കൂടിയാലോചനകൾ നടത്തി സമാധാനത്തിന്റെ വഴികൾ രൂപപ്പെടുത്തുകയുണ്ടായി. സുപ്രസിദ്ധമായ തന്റെ മദീനാ പ്രഖ്യാപനത്തിൽ ഓരോ മത വിഭാഗത്തിനും അവരുടെ മതമനുസരിച്ച് ജീവിക്കാനുള്ള അവകാശം ഉറപ്പുവരുത്തി. 

 ഖുർആൻ വ്യക്തമാക്കിയ ‘‘നിങ്ങൾക്ക് നിങ്ങളുടെ മതം, എനിക്ക് എന്റെ മതം’’ എന്ന വിശാലമായ മതസ്വാതന്ത്ര്യം നബി (സ) ജീവിതത്തിലൂടെ നടപ്പാക്കി. നജ്റാനിൽ നിന്ന് തന്നെ കാണാൻ വന്ന ക്രൈസ്തവ നേതാക്കളെ മദീനാ പള്ളിയിൽ സ്വീകരിച്ചിരുത്തിയാണ് നബി (സ) അവരുമായി സംഭാഷണം നടത്തിയിരുന്നത്. അതിനിടയിൽ ആ ക്രൈസ്തവ സഹോദരങ്ങൾക്ക് പ്രാർഥനയുടെ സമയമായപ്പോൾ ആ പള്ളിയിൽ വെച്ചുതന്നെ അവർക്ക് പ്രാർഥനയ്ക്ക് സൗകര്യം ചെയ്തുകൊടുത്തു നബി. നബി(സ)യുടെ അന്ത്യകാലത്ത് അദ്ദേഹത്തിന്റെ പടയങ്കി ഒരു ജൂതന്റെ പക്കൽ പണയം വെച്ചിരുന്നുവെന്നും ചരിത്രം പറയുന്നുണ്ട്.

 ജീവിതവ്യാപാരങ്ങളിലും ഇടപെടലുകളിലും യാതൊരുവിധ വിഭാഗീയതയും വർഗീയതയും കാണിക്കാതെയായിരുന്നു നബി(സ)യുടെ ജീവിതം. നബി(സ)യെക്കുറിച്ച് ഖുർആൻ പറയുന്നത് ലോകത്തിന്റെ കാരുണ്യം (റഹ്‌മത്തുൻലിൽ ആലമീൻ) എന്നാണ് .മനുഷ്യരോട് മാത്രമല്ല പക്ഷികളോടും മൃഗങ്ങളോടും പോലും കരുണയോടെ പെരുമാറണമെന്ന് അദ്ദേഹം പഠിപ്പിച്ചു. ദാഹിച്ചു വലഞ്ഞ ഒരു പട്ടിക്ക് വെള്ളം നല്കിയയാൾ സ്വർഗാവകാശിയായെന്നും ഒരു പൂച്ചയെ കെട്ടിയിട്ട് ഭക്ഷണവും വെള്ളവും കൊടുക്കാതെ കഷ്ടപ്പെടുത്തിയതിന്റെ പേരിൽ ഒരു സ്ത്രീ നരകാവകാശിയായെന്നും നബി (സ) പറഞ്ഞത് വളരെ പ്രസിദ്ധമാണ്. യുദ്ധവും സംഘട്ടനങ്ങളും ഇല്ലാതാക്കാൻ വിട്ടുവീഴ്ചയുടെ മാർഗം സ്വീകരിച്ച നബി ഒരിക്കലും യുദ്ധം വിളിച്ചുവരുത്തിയിട്ടില്ല. നിർബന്ധിത സാഹചര്യത്തിൽ വന്നുപെട്ടതായിരുന്നു അന്നത്തെ യുദ്ധങ്ങൾ. യുദ്ധത്തിൽ കുട്ടികളെയും സ്ത്രീകളെയും വൃദ്ധന്മാരെയും ഉപദ്രവിക്കരുതെന്നും മരങ്ങളും ജലസ്രോതസ്സുകളും നശിപ്പിക്കരുതെന്നും നബി (സ) പ്രത്യേകം ഉപദേശിച്ചിട്ടുണ്ട്. എന്നും പ്രവാചകനോട് ശത്രുത പുലർത്തിപ്പോന്ന ഒരു ജൂതന്റെ മൃതശരീരം കൊണ്ടുപോകുമ്പോൾ എഴുന്നേറ്റുനിന്ന നബി (സ) പറഞ്ഞത് അതൊരു മനുഷ്യനാണല്ലോ എന്നായിരുന്നു. മാനുഷിക ബന്ധങ്ങൾ കാത്തുസൂക്ഷിക്കുന്നതിന് മതവ്യത്യാസം തടസ്സമായിക്കൂടെന്നു പഠിപ്പിക്കുകയായിരുന്നു അദ്ദേഹം. എല്ലാ അർഥത്തിലും കാരുണ്യവും സമാധാനവും സമ്മാനിച്ച നബിയുടെ ജീവിതവും സന്ദേശവും ജീവിതത്തിൽ പകർത്താൻ നാം സദാ ശ്രദ്ധിക്കേണ്ടതാണ്.

By ഡോ. ഹുസൈൻ മടവൂർ @ മാതൃഭൂമി ദിനപത്രം 

പ്രവാചക സ്നേഹം

സ്‌നേഹമെന്ന വികാരവും സ്‌നേഹപ്രകടനവും മനുഷ്യസഹജമാണ്‌ എന്നതോടൊപ്പം ഇസ്‌ലാം അത്‌ പ്രോത്സാഹിപ്പിക്കുന്നുമുണ്ട്‌. വിശ്വാസികള്‍ എന്ന നിലയില്‍ നാം ഈ പ്രശ്‌നം വിലയിരുത്തേണ്ടതുണ്ട്‌. വിശുദ്ധ ഖുര്‍ആന്‍ പറയുന്നു : "അല്ലാഹുവിന് പുറമെയുള്ളവരെ അവന് സമന്‍മാരാക്കുന്ന ചില ആളുകളുണ്ട്‌. അല്ലാഹുവെ സ്നേഹിക്കുന്നത് പോലെ ഈ ആളുകള്‍ അവരെയും സ്നേഹിക്കുന്നു. എന്നാല്‍ സത്യവിശ്വാസികള്‍ അല്ലാഹുവോട് അതിശക്തമായ സ്നേഹമുള്ളവരത്രെ." [അദ്ധ്യായം 2 ബഖറ 165]. ഉള്ളറിഞ്ഞ്‌ സ്‌നേഹിക്കേണ്ടതും ഇഷ്‌ടപ്പെടേണ്ടതും നമുക്ക്‌ അസ്‌തിത്വം നല്‍കിയ സ്രഷ്‌ടാവിനോടാണ്‌. അതുവഴി അവന്റെ സ്‌നേഹം കരസ്ഥമാക്കുക എന്നതാണ്‌ മുഅ്‌മിന്റെ ലക്ഷ്യം. സ്രഷ്‌ടാവിനെ സ്‌നേഹിക്കുന്നതിന്റെ കൂടെ വിശ്വാസി ഏറ്റവുമധികം കടപ്പെട്ടത്‌ ആ സ്രഷ്‌ടാവിന്റെ ദൂതനായ മുഹമ്മദ്‌ നബി(സ)യോടാണ്‌ എന്നും അല്ലാഹു വ്യക്താക്കുന്നു : "പ്രവാചകന്‍ സത്യവിശ്വാസികള്‍ക്ക് സ്വദേഹങ്ങളെക്കാളും അടുത്ത ആളാകുന്നു." [അദ്ധ്യായം 33 അഹ്സാബ്‌ 6]. നബി(സ) സ്വന്തം വാക്കുകളില്‍ ഇത്‌ ഒന്നുകൂടി വ്യക്തമാക്കുന്നു : "തന്റെ മാതാപിതാക്കള്‍, മക്കള്‍ എന്നുവേണ്ട സകല മനുഷ്യരെക്കാളും ഒരാള്‍ക്ക്‌ ഏറ്റവും ഇഷ്‌ടപ്പെട്ടത്‌ ഞാന്‍ ആകുന്നതു വരെ അയാള്‍ വിശ്വാസി ആയിത്തീരുകയില്ല". ഇതാണ്‌ അല്ലാഹുവിനെയും റസൂലിനെയും സ്‌നേഹിക്കുന്നതിന്റെ മര്‍മം.

 എന്നാല്‍ വിശ്വാസി തന്റെ മനസ്സിലുള്ള ഈ സ്‌നേഹം എങ്ങനെയാണ്‌ പ്രകടിപ്പിക്കേണ്ടത്‌ എന്നുകൂടി നോക്കണം. അല്ലാഹുവിനിഷ്‌ടമുള്ള കാര്യങ്ങള്‍ ചെയ്യുകയും അവനിഷ്‌ടമില്ലാത്ത കാര്യങ്ങള്‍ വെടിയുകയും ചെയ്യുക. ഇതാണ്‌ ദൈവപ്രീതി നേടാനുള്ള മാര്‍ഗം. ഇതിനുവേണ്ടി വിശ്വാസി അവലംബിക്കേണ്ട വഴികള്‍ വിശുദ്ധ ഖുര്‍ആന്‍ വ്യക്തമാക്കുന്നു : " (നബിയേ,) പറയുക: നിങ്ങള്‍ അല്ലാഹുവെ സ്നേഹിക്കുന്നുണ്ടെങ്കില്‍ എന്നെ നിങ്ങള്‍ പിന്തുടരുക. എങ്കില്‍ അല്ലാഹു നിങ്ങളെ സ്നേഹിക്കുകയും നിങ്ങളുടെ പാപങ്ങള്‍ പൊറുത്തുതരികയും ചെയ്യുന്നതാണ്‌." [അദ്ധ്യായം 3 ആലു ഇംറാൻ 31]. "അല്ലാഹുവിന്‍റെ) ദൂതനെ ആര്‍ അനുസരിക്കുന്നുവോ തീര്‍ച്ചയായും അവന്‍ അല്ലാഹുവെ അനുസരിച്ചു. " [അദ്ധ്യായം 4 നിസാഅ് 8]. എന്തിനാണ്‌ ദൂതനെ അഥവാ മുഹമ്മദ്‌ നബിയെ അനുസരിക്കുന്നത്‌ എന്നും അല്ലാഹു വ്യക്തമാക്കുന്നു : "തീര്‍ച്ചയായും നിങ്ങള്‍ക്ക് അല്ലാഹുവിന്‍റെ ദൂതനില്‍ ഉത്തമമായ മാതൃകയുണ്ട്‌." [അദ്ധ്യായം 33 അഹ്സാബ്‌ 21]. ഇത്രയും വ്യക്തമാക്കിയതില്‍ നിന്ന്‌ അല്ലാഹുവിനെയും റസൂലിനെയും സ്‌നേഹിക്കുക എന്ന ഇസ്‌ലാമികാദര്‍ശത്തിന്റെ മര്‍മം നാം മനസ്സിലാക്കി. അല്ലാഹുവിനെയും റസൂലിനെയും സ്‌നേഹിക്കുക എന്ന ആദര്‍ശം എക്കാലത്തും പ്രാവര്‍ത്തികമാക്കാന്‍ സാധിക്കും. പ്രവാചകന്‍ ഇവിടെ നമുക്കുവേണ്ടി ബാക്കിവെച്ച വിശുദ്ധ ഖുര്‍ആനും നബിചര്യയും മുറുകെപിടിച്ചു ജീവിച്ചുകൊണ്ടാണ്‌ അല്ലാഹുവിന്റെ പ്രീതി നേടേണ്ടത്‌.

എന്നാല്‍ പ്രവാചകനോടുള്ള സ്‌നേഹപ്രകടനങ്ങള്‍ വഴിവിട്ടുപോകുകയും ഇതരമതസ്ഥരെ അനുകരിച്ചുകൊണ്ട്‌ പ്രവാചകസ്‌നേഹത്തിന്റെ പേരില്‍ മതത്തില്‍ പുതിയ ആചാരങ്ങള്‍ സൃഷ്‌ടിക്കപ്പെടുകയും ചെയ്യുന്ന കാഴ്‌ചയാണ്‌ നാടെങ്ങും കണ്ടുകൊണ്ടിരിക്കുന്നത്‌. നബി(സ)യുടെ അപദാനങ്ങള്‍ വാഴ്‌ത്തുക എന്ന പേരില്‍ അതിശയോക്തികളും ഭാവനയില്‍ മെനഞ്ഞെടുത്ത സിദ്ധാന്തങ്ങളും ഉള്‍പ്പെട്ട കീര്‍ത്തനങ്ങള്‍ ദിനചര്യയെന്നോണം പാടുക, നബി(സ)യുടെ ജയന്തി ആഘോഷിക്കുക, നബിജനിച്ച മാസമെന്ന നിലയില്‍ റബീഉല്‍ അവ്വലിന്‌ പുണ്യംകല്‌പിച്ച്‌ ആഘോഷിക്കുക, നബിയുടെ പേരില്‍ ജാഥകളും ഘോഷയാത്രകളും സംഘടിപ്പിക്കുക, പള്ളികളും മദ്‌റസകളും അലങ്കരിക്കുക തുടങ്ങിയ ജാടകളാണ്‌ പ്രവാചക സ്‌നേഹപ്രകടനങ്ങള്‍ എന്ന പേരില്‍ മുസ്‌ലിംകളില്‍ ചിലര്‍ നടത്തിക്കൊണ്ടിരിക്കുന്നത്‌. വിശുദ്ധ ഖുര്‍ആനില്‍ പരാമര്‍ശിക്കാത്ത, പ്രവാചകന്‍ പഠിപ്പിക്കാത്ത, സ്വഹാബികള്‍ക്ക്‌ പരിചയമില്ലാത്ത, ആദ്യകാല മഹാന്മാര്‍ ആലോചിക്കാത്ത, മദ്‌ഹബിന്റെ ഇമാമുകള്‍ എന്നറിയപ്പെടുന്ന പണ്ഡിതന്മാര്‍ മനസ്സിലാക്കിയിട്ടില്ലാത്ത തികച്ചും നൂതനമായ സമ്പ്രദായങ്ങള്‍ ഇസ്‌ലാമിന്റെ പേരില്‍ ഇന്ന്‌ ആചാരമായി നടമാടുന്നു. ഇത്‌ സത്യവിശ്വാസികളെ സംബന്ധിച്ചേടത്തോളം ഗുരുതരമായ ആപത്താണ്‌. അല്ലാഹുവിനെയും റസൂലിനെയും സ്‌നേഹിക്കുക എന്ന അടിസ്ഥാനാശയത്തില്‍ നിന്നു മാറി, ശരിയായ നിലയില്‍ ജീവിക്കാന്‍ പോലും തയ്യാറാകാത്ത ആളുകള്‍ റബീഉല്‍ അവ്വല്‍ ആഘോഷിക്കുന്നതില്‍ നിര്‍വൃതി കണ്ടെത്തുന്നതില്‍ വിശ്വാസപരമായ വലിയ അപകടമുണ്ട്‌. മുസ്‌ലിംകള്‍ ഇക്കാര്യം ഉള്‍ക്കൊണ്ട്‌ ബിദ്‌അത്തുകളില്‍ നിന്ന്‌ പിന്മാറുകയും സുന്നത്തിന്റെ ശരിയായ പാതയിലേക്ക്‌ നീങ്ങുകയും ചെയ്യണമെന്നുണര്‍ത്തട്ടെ.

 `നബിമാസാചരണ'ത്തിലെ അപകടങ്ങള്‍ എത്ര ഗുരുതരമാണെന്നറിയാമോ? 

ഒന്ന്‌) ജന്മദിനാഘോഷം (ബര്‍ത്ത്‌ഡെ ആചരണം) നബി(സ) പഠിപ്പിച്ചതല്ല. 

രണ്ട്‌) നബിയെ ജീവനു തുല്യം സ്‌നേഹിച്ച സ്വഹാബികള്‍ അങ്ങനെ ചെയ്‌തിട്ടില്ല,

 മൂന്ന്‌) ഉത്തമ നൂറ്റാണ്ടുകളെന്ന്‌ പ്രവാചകന്‍ വിശേഷിപ്പിച്ച ഹിജ്‌റ ഒന്നും രണ്ടും മൂന്നും നൂറ്റാണ്ടുകാര്‍ക്ക്‌ പരിചയമില്ലാത്ത പുതിയ സമ്പ്രദായങ്ങള്‍ ദീനിന്റെ പേരില്‍ കടന്നുവരുന്നു.

 നാല്‌) `ഈസാ നബിയെ നസാറാക്കള്‍ പുകഴ്‌ത്തിയതു പോലെ എന്നെ നിങ്ങള്‍ പുകഴ്‌ത്തിപ്പറയരുത്‌' എന്ന നബിയുടെ താക്കീത്‌ അവഗണിച്ചുകൊണ്ട്‌ ക്രൈസ്‌തവ സംസ്‌കാരം നാം പിന്‍പറ്റുന്നു.

 അഞ്ച്‌) ആചാര്യന്മാരുടെ ജനിമൃതികള്‍ ആഘോഷിക്കുക എന്ന ഇതരമതങ്ങളിലെ ആചാരങ്ങള്‍ നാം സ്വായത്തമാക്കുന്നു.

 ആറ്‌) ഇതിനൊക്കെ പുറമെ നബിചര്യ ജീവിതത്തില്‍ പകര്‍ത്തുന്നതിനു പകരം ചില ജാട പ്രകടനങ്ങള്‍ കൊണ്ട്‌ മോക്ഷം നേടാമെന്ന തെറ്റായ `മെസ്സേജ്‌' പാമരസമൂഹത്തിലേക്ക്‌ നല്‌കുന്നു.

From ശബാബ്‌ വാരിക 

ഒരു കാര്യവും നിസ്സാരമല്ല

കുറഞ്ഞ സമയം കൊണ്ട് തീരുന്ന ചെറിയ ജീവിതമാണ് നമ്മുടേത്‌. എപ്പോള്‍ എങ്ങനെ എന്ന് നിശ്ചയമില്ലെങ്കിലും തീര്‍ച്ചയായും നമ്മുടെ തിരിച്ചുപോക്കിന് കൃത്യമായ ഒരു സമയമുണ്ട്. എല്ലാ സന്തോഷങ്ങളോടും വിട ചോദിച്ച്, എല്ലാ സുഖങ്ങളെയും ഉപേക്ഷിച്ച്, എല്ലാ ബന്ധങ്ങളെയും തിരസ്ക്കരിച്ചു നാം പോയേ പറ്റൂ. ഇത്രയും ചെറുതും നിസ്സാരവുമായ ജീവിതത്തില്‍ നമ്മുടെ മുന്നിലുള്ളത് കുറഞ്ഞ സമയമാണ്. സെക്കന്റുകളും നിമിഷങ്ങളും! ചെയ്യാവുന്ന നല്ല കാര്യങ്ങള്‍ ചെയ്യുക. ചെയ്യുന്നവയില്‍ ആത്മാര്‍ത്ഥതയുണ്ടാവുക – ഇത്രയുമായാല്‍ ജീവിതം വിജയകരമെന്ന് തീര്‍ച്ചപ്പെടുത്താം. വലിയ കാര്യങ്ങള്‍ കുറേയുണ്ട്, അതിലേറെ ചെറിയ കാര്യങ്ങളുമുണ്ട്. നിസ്സാരമെന്നു നാം ഗണിക്കുന്ന കാര്യങ്ങള്‍ ഒരു പക്ഷെ, മികച്ച പ്രതിഫലത്തിലേക്ക്‌ നമ്മെ നയിച്ചേക്കാം. അഥവാ ഒരു കാര്യവും നിസ്സാരമല്ല.

 'മിസ്ഖാലുദര്‍റതിന്‍’ എന്നാണു നന്മതിന്മകളുടെ അളവിന് അടയാളപ്പെടുത്താന്‍ ഖുര്‍ആന്‍ (99:7.8) പ്രയോഗിച്ചത്. ‘കുഞ്ഞുറുമ്പിന്‍റെ കാലിന്‍റെ കഷ്ണം’ തൂക്കമുള്ള അളവാണ് ‘മിസ്ഖാലുദര്‍റതിന്‍’ എന്ന് ചില തഫ്സീറുകളില്‍ കാണാം. അഥവാ അത്രയും നിസ്സാരമായ അളവ്‌ നന്മയോ തിന്മയോ പ്രവര്‍ത്തിച്ചാല്‍ അതിനുള്ള പ്രതിഫലം അള്ളാഹു തരിക തന്നെ ചെയ്യും. അല്ലാഹുവിന്‍റെ ഈ വചനം നമ്മെ അങ്ങേയറ്റം ജാഗരൂഗരാക്കേണ്ടതില്ലേ? നഷ്ട്ടപ്പെട്ടുകൊണ്ടിരിക്കുന്ന നിമിഷങ്ങളെ തിന്മകളില്‍ നിന്നൊഴിഞ്ഞും നന്മകളില്‍ കഴിഞ്ഞും ഗുണപരമായി വിനിയോഗിക്കാന്‍ നമ്മെ ഉത്സുകരാക്കേണ്ടതില്ലേ? റസൂല്‍ തിരുമേനി (സ) പറയുന്നു: “അത്രയൊന്നും കാര്യമാക്കാതെ അല്ലാഹുവിനു തൃപ്തികരമായ ഒരു കാര്യം ഉച്ചരിക്കുക വഴി അല്ലാഹു ഒരാളെ പല പടികളുയര്‍ത്തും.” നേരെ തിരിച്ചുള്ള കാര്യവും റസൂല്‍ താക്കീത് ചെയ്യുന്നുണ്ട്. "അത്രയൊന്നും കാര്യമാക്കാതെ അല്ലാഹുവിനു ദേഷ്യമുണ്ടാക്കുന്ന ഒരു കാര്യം ഉച്ചരിക്കുക വഴി ഒരാള്‍ നരകത്തില്‍ പതിക്കുകയും ചെയ്യാം” (ബുഖാരി).

നന്മകളില്‍ നിന്നൊന്നിനെയും ചെറുതായി കാണാതിരിക്കല്‍ തന്നെ ഒരു നന്മയാണ്. ‘ഒരു നന്മയെയും നിസ്സാരമാക്കരുത്’ എന്ന ആമുഖത്തോടെയാണ്, 'സഹോദരനെ കാണുമ്പോള്‍ പുഞ്ചിരിക്കുന്നത് നന്മയാണ്' എന്ന് റസൂല്‍ (സ) പറയുന്നത്. 'നിന്‍റെ തൊട്ടിയിലെ വെള്ളം സഹോദരന്‍റെ പാത്രത്തിലേക്ക് ഒഴിച്ചുകൊടുക്കുന്നതും പുണ്യമാണ്’ എന്ന ഉപദേശത്തോടെയാണ് ആ ഹദീസ് അവസാനിക്കുന്നത്. ബുഖാരി ഉദ്ദരിച്ച മറ്റൊരു ഹദീസ്: റസൂല്‍ (സ) തിരുമേനി പറയുന്നു: "രണ്ടു പേര്‍ക്കിടയില്‍ നീതി കാണിക്കുന്നത് പുണ്യമാണ്. നിങ്ങളുടെ വാഹനത്തില്‍ ഒരാളെ കയറ്റുകയോ അയാളുടെ ഭാരം കയറ്റുകയോ ചെയ്യുന്നതും പുണ്യമാണ്. നമസ്ക്കാരത്തിനു വേണ്ടി നിങ്ങള്‍ നടക്കുന്ന ഓരോ കാലടിയിലും പുണ്യമുണ്ട്. വഴിയില്‍ നിന്നും ഉപദ്രവം നീക്കുന്നതും പുണ്യമാണ്".

 ചെറിയ ജീവിതം, കുറഞ്ഞ സമയം. നന്മകള്‍ ചെയ്യാന്‍ ധാരാളം അവസരങ്ങള്‍ . തിന്മകള്‍ ചെയ്യാനും കുറെ അവസരങ്ങള്‍ . എന്ത് ചെയ്യണം എങ്ങനെ ജീവിക്കണം എന്ന് നമുക്ക് തീരുമാനിക്കാം. സദ്‌കര്‍മങ്ങള്‍ കൊണ്ട് നമ്മുടെ തുലാസ് തൂങ്ങട്ടെ. ‘ജന്മം കൊണ്ടെന്തു ചെയ്തു’ എന്ന അല്ലാഹുവിന്‍റെ ചോദ്യത്തിന് ധൈര്യപൂര്‍വ്വം മറുപടി പറയാന്‍ നമുക്കെന്തെങ്കിലും വേണ്ടേ? കര്‍മങ്ങള്‍ പൂത്തുലയട്ടെ! പ്രതിഫലം കാത്തിരിക്കുന്നു.

By പി എം എ ഗഫൂർ @ വിശ്വാസി ഓർമ്മിക്കേണ്ടത്‌ (യുവത)

വീട് നിർമാണവും വിശ്വാസങ്ങളും

ആഹാരം പോലെ തന്നെ, മനുഷ്യന്റെ പ്രാഥമികാവശ്യങ്ങളിലൊന്നാണ്‌ ആവാസത്തിന്നൊരു കേന്ദ്രമെന്നത്‌. ഇതര ജന്തുക്കളില്‍ നിന്ന്‌ മനുഷ്യന്‍ വ്യതിരിക്തനാകുന്ന ഒരു ഘടകമാണ്‌ വീട്‌ എന്ന സങ്കല്‌പം. വീട്‌ കുടുംബത്തിന്റെ ആവാസകേന്ദ്രമാണ്‌. മുസ്‌ലിം എന്ന നിലയില്‍ നാം വീടുനിര്‍മിക്കുമ്പോള്‍ എന്തെല്ലാം ശ്രദ്ധിക്കണം? ജലലഭ്യത, യാത്രാസൗകര്യം, പള്ളി സൗകര്യം, മക്കളുടെ വിദ്യാഭ്യാസത്തിന്‌ പ്രാഥമിക വിദ്യാലയങ്ങളുടെ സാമീപ്യം, ഒരുവിധം നല്ല അയല്‍പക്കം. ഏതാണ്ടിത്രയൊക്കെ ഉണ്ടെങ്കില്‍ അനുയോജ്യമായ സ്ഥലം ആണെന്ന്‌ പറയാം. കൂടുതല്‍ അധ്വാനം കൂടാതെ തറകെട്ടാന്‍ പറ്റുന്നത്‌ എവിടെയാണോ അവിടെ വീടുവയ്‌ക്കാം.

 ഇനി വീട്‌ എങ്ങനെയായിരിക്കണം? തന്റെ സാമ്പത്തിക ശേഷിക്കനുസരിച്ചേ നിര്‍മാണപദ്ധതി പാടുള്ളൂ. മുറികള്‍ക്കകത്ത്‌ കാറ്റും വെളിച്ചവും കിട്ടണം. ആറുമാസം മഴ പെയ്യുന്ന കേരളത്തിന്റെ നിര്‍മിതിയല്ല മണല്‍കാറ്റടിക്കുന്ന മരുഭൂമിയിലും ഹിമപാതമുള്ള ഗിരിശൃംഗങ്ങളിലും ഭൂകമ്പസാധ്യതകളുള്ള ജപ്പാന്‍ പോലുള്ള പ്രദേശങ്ങളിലും വീടിനു വേണ്ടത്‌. വീടുനിര്‍മാണത്തിലും ധൂര്‍ത്ത്‌ പാടില്ല. ആവശ്യത്തിലേറെയുള്ള വീടിന്റെ മുറികള്‍ പിശാചിന്റെ കേന്ദ്രമാണ്‌. വീടിനുള്ളില്‍ നമസ്‌കാരത്തിന്‌ പ്രത്യേകം ഇടം കരുതിവയ്‌ക്കുന്നത്‌ അഭികാമ്യമാണ്‌. വീടിനകത്ത്‌ വിശുദ്ധ ഖുര്‍ആന്‍ പാരായണം ചെയ്യാതെ വീട്‌ ശ്‌മശാനമാക്കരുത്‌. ദൈവത്തില്‍ ഭരമേല്‍പിക്കുന്ന പ്രാര്‍ഥനയോടെ നിത്യവും വീടുവിട്ടിറങ്ങണം. ദൈവാനുഗ്രഹത്തില്‍ പ്രതീക്ഷയര്‍പ്പിച്ചു കൊണ്ടും വീടെന്ന അഭയകേന്ദ്രത്തിന്‌ അനുഗ്രഹം ചൊരിയണമെന്ന്‌ പ്രാര്‍ഥിച്ചുകൊണ്ടും വീട്ടില്‍ പ്രവേശിക്കണം. (ഗൃഹപ്രവേശമല്ല; നിത്യപ്രവേശം). ഇതെല്ലാം പ്രവാചകന്‍(സ) പഠിപ്പിച്ച മര്യാദകളാണ്‌. ഇതിലപ്പുറം വച്ചുപുലര്‍ത്തുന്ന അന്ധവിശ്വാസങ്ങള്‍ ഇസ്‌ലാമിനന്ന്യമാണ്‌.

സ്ഥാനം നോക്കല്‍, കുറ്റിയടിക്കല്‍, കട്ടിലവയ്‌ക്കല്‍ തുടങ്ങിയവ ആത്മീയ പ്രധാനമായ കര്‍മങ്ങളായി കാണുകയും അവയ്‌ക്കൊക്കെ കാര്‍മികന്മാരെ കണ്ടെത്തുകയും ചെയ്യുന്നത്‌ പാരമ്പര്യത്തിന്റെ അടിസ്ഥാനത്തില്‍ മാത്രം. അതിന്‌ പ്രമാണങ്ങളുടെയോ ശാസ്‌ത്രീയ തത്വങ്ങളുടെയോ പിന്‍ബലമില്ല. കന്നി മൂലയ്‌ക്ക്‌ (തെക്കുപടിഞ്ഞാറ്‌) കുറ്റിയടിച്ച്‌ തേങ്ങയുടച്ച്‌ വെറ്റിലവച്ച്‌ പുണ്യകര്‍മം ചെയ്‌തിട്ടേ പഴയ ആശാരിമാര്‍ വീടിന്‌ സ്ഥാനമുറപ്പിക്കൂ. മുസ്‌ലിംകളുടെ വീടിനും. നിര്‍മാണം കഴിഞ്ഞാല്‍ കുറ്റിപ്പൂജ (കുറ്റൂസ എന്ന്‌ പാഠഭേദം) നടത്തിയേ ഗൃഹപ്രവേശം നടത്തൂ. കെട്ടിടനിര്‍മാണം പൂര്‍ത്തിയായാല്‍ വാസ്‌തുദേവനെ ഉദ്ദേശിച്ച്‌ തച്ചന്മാര്‍ നടത്തുന്ന പൂജ എന്നാണ്‌ `കുറ്റിപൂജ' യുടെ അര്‍ഥമെന്ന്‌ ശ്രീകണ്‌ഠേശ്വരം (ശബ്‌ദതാരാവലി) സാക്ഷ്യപ്പെടുത്തുന്നു. എത്രയോ സുഹൃത്തുക്കള്‍ തങ്ങളുടെ ഗൃഹപ്രവേശം നിശ്ചയിച്ചപ്പോള്‍ സ്വകാര്യമായി, നല്ല ഉദ്ദേശ്യത്തോടെ, ചോദിക്കുന്നു; എന്തെങ്കിലും ശ്രദ്ധിക്കേണ്ടതുണ്ടോ? സുബ്‌ഹിക്ക്‌ പോകണമെന്നുണ്ടോ? ആദ്യം പാല്‍ കാച്ചണമെന്നുണ്ടോ? അന്ധമായ വിശ്വാസങ്ങളും അബദ്ധ ധാരണകളുമാണിതെല്ലാം. സമൂഹസ്വാധീനത്തിന്റെ സമ്മര്‍ദമാണ്‌ ഈ സംശയങ്ങള്‍.

 ഇസ്‌ലാമിക ദൃഷ്‌ട്യാ നല്ല സമയമെന്നോ ചീത്ത സമയമെന്നോ ഉള്ള സങ്കല്‌പമില്ല. ശകുനവും ദുശ്ശകുനവും ഇല്ല. നമുക്ക്‌ സൗകര്യപ്പെടുന്ന ദിവസം, സൗകര്യപ്പെടുന്ന സമയത്ത്‌, ബിസ്‌മി ചൊല്ലി പുതിയ വീട്ടില്‍ താമസം തുടങ്ങുക. വീട്ടിലേക്ക്‌ കടന്നുചെല്ലുമ്പോള്‍, എല്ലാ ദിവസവും പ്രാര്‍ഥിക്കാന്‍ നബി(സ) പഠിപ്പിച്ച ദുആ ചൊല്ലുക. ബന്ധുക്കളെയും സുഹൃത്തുക്കളെയും വിളിച്ച്‌ സദ്യയുണ്ടാക്കി സന്തോഷത്തില്‍ പങ്കാളികളാക്കാം. കെട്ടിക്കുടുക്കുകളോ സങ്കീര്‍ണതകളോ ഇല്ലാത്ത ഇസ്‌ലാമിന്റെ സുതാര്യ സമീപനത്തെ ഇറക്കുമതി ചെയ്‌ത അന്ധവിശ്വാസങ്ങളില്‍ കെട്ടി ദുര്‍ഗ്രഹവും ദുസ്സഹവും ആക്കാതിരിക്കുക. നന്മതിന്മകള്‍ അല്ലാഹുവിന്റെ പരീക്ഷണങ്ങളാണെന്ന വിധിവിശ്വാസമുള്ള മുസ്‌ലിമിന്‌ ആശാരിക്കണക്കിലെ ചെകുത്താന്‍ ദോഷത്തെ ഭയക്കേണ്ടതില്ല എന്ന്‌ തിരിച്ചറിയുക. ഇസ്‌ലാമിക വിശ്വാസമേത്‌, കടന്നുകൂടിയതേത്‌ എന്ന്‌ വിവേചിച്ചറിയുക. ഇല്ലെങ്കില്‍ പനി വരുമ്പോഴേക്ക്‌ ആശങ്കയാല്‍ മനസ്സ്‌ തളരും.

കക്കൂസിന്റെ സ്ഥാനത്തില്‍ ശ്രദ്ധിക്കേണ്ടത്‌ സാനിറ്റേഷന്‍ ശരിയായ വിധത്തിലാണോ, വെയ്‌സ്റ്റ്‌ ടാങ്ക്‌ കിണറില്‍ നിന്ന്‌ ആവശ്യമായ അകലത്തിലായിട്ടില്ലേ എന്നൊക്കെയാണ്‌. കന്നിമൂലയിലോ അഗ്നിമൂലയിലോ എവിടെയാണ്‌ സൗകര്യമെങ്കില്‍ അവിടെ കക്കൂസ്‌ നിര്‍മിക്കാം. കിണറിന്റെ കാര്യവും തഥൈവ. ശാസ്‌ത്രീയമായി ജലലഭ്യത കണ്ടെത്താന്‍ ഇന്ന്‌ സംവിധാനമുണ്ട്‌. ചില പ്രത്യേക രക്തഗ്രൂപ്പുള്ളവര്‍ക്ക്‌ ജലലഭ്യത അറിയാന്‍ കഴിയുമത്രേ. ചിരപരിചിതമായി വിദഗ്‌ധര്‍ക്ക്‌ ഭൂമിയുടെ കിടപ്പുകണ്ടാല്‍ കുറേയൊക്കെ ജലലഭ്യത ഊഹിക്കാന്‍ കഴിയൂ. എന്നാല്‍ തങ്ങള്‍ക്കും പൂജാരിക്കും അതില്‍ പ്രത്യേകിച്ച്‌ ഒന്നും ചെയ്യാനില്ല. ചില നാട്ടിലൊക്കെ `കുറ്റിയടി തങ്ങന്മാര്‍' ഉണ്ട്‌. ഓരോ കുറ്റിയടിക്കും അഞ്ഞൂറും ആയിരവും വീമ്പുവാക്കും; വെള്ളം കണ്ടാലും കണ്ടില്ലെങ്കിലും. അന്ധവിശ്വാസം കൈവെടിയുക. ഇസ്‌ലാമിന്റെ ലളിതവും സുതാര്യവുമായ സംസ്‌കാരവും അന്യൂനമായ ഏകദൈവവിശ്വാസവും കൈമുതലാക്കി ജീവിക്കുക. അതിലാണ്‌ വിജയം.

 By അബ്‌ദുല്‍ജബ്ബാര്‍ തൃപ്പനച്ചി @ ശബാബ് വാരിക 

നമസ്കാരം വിരോധിക്കപ്പെട്ട സമയങ്ങൾ

1. അസർ നമസ്കാരത്തിനു ശേഷം 

 അസർ നമസ്കാരത്തിനു ശേഷം സുന്നത്ത്‌ നമസ്കരിക്കുന്നതിനെ നബി (സ) ശക്തിയായി വിരോധിച്ച ധാരാളം ഹദീസുകൾ ഇബ്നു അബ്ബാസ്‌ (റ), ഉമർ (റ), അബൂഹുറൈറ (റ), മുആവിയ (റ) തുടങ്ങിയ സ്വഹാബി വര്യന്മാരിൽ നിന്ന് ഇമാം ബുഖാരിയും ഇമാം മുസ്‌ലിമും ഉദ്ധരിക്കുന്നുണ്ട്‌. അസർ നമസ്കാരശേഷം സുന്നത്ത്‌ നമസ്കരിക്കുന്നവരെ ഉമർ (റ) ചാട്ടവാർ കൊണ്ട്‌ അടിക്കാറുണ്ടെന്നും ഇബ്നു അബ്ബാസ്‌ (റ) വടി കൊണ്ട്‌ അടിക്കാറുണ്ടെന്നും ഇമാം ബുഖാരി ഉദ്ധരിക്കുന്നു.

 എന്നാൽ നബി (സ) അസർ നമസ്കാര ശേഷം രണ്ട്‌ റകഅത്ത്‌ സുന്നത്തു നമസ്കരിക്കാറുണ്ടെന്ന് ആയിശ (റ) ഉദ്ധരിക്കുന്ന ഹദീസുകളിൽ പ്രസ്താവിക്കുന്നുണ്ട്‌ [ബുഖാരി]. എന്നാൽ അത്‌ നബി (സ)ക്ക്‌ മാത്രം പ്രത്യേകമാക്കപ്പെട്ടതാണെന്നും മറ്റുള്ളവർക്ക്‌ നിഷിദ്ധമാണെന്നും ആയിശ (റ) തന്നെ വ്യക്തമാക്കിയത്‌ സഹീഹായ ഹദീസുകളിൽ ഉദ്ധരിക്കുന്നുണ്ട്‌. അതിനാൽ പരസ്പര വൈരുദ്ധ്യം ഇവിടെ ഇല്ല.

 2. സുബ്‌ഹ്‌ നമസ്കാരത്തിനു ശേഷം 

 നബി (സ) സുബ്‌ഹ്‌ നമസ്കാരത്തിന്ന് ശേഷം സുന്നത്ത്‌ നമസ്കാരം ശക്തിയായി വിരോധിച്ച ധാരാളം ഹദീസുകൾ മുകളിൽ ഉദ്ധരിച്ച സ്വഹാബികളിൽ നിന്നു തന്നെ ഇമാം ബുഖാരിയും മുസ്‌ലിമും ഏകോപിച്ചു കൊണ്ട്‌ ഉദ്ധരിക്കുന്നു. എന്നാൽ സുബ്‌ഹിന്റെ മുമ്പുള്ള സുന്നത്ത്‌ നമസ്കാരം നഷ്ടപ്പെട്ടാൽ സുബ്‌ഹിനു ശേഷം നമസ്കരിക്കാമെന്ന് പറയുന്ന ചില ഹദീസുകൾ ഇമാം തുർമുദിയും മറ്റും ഉദ്ധരിക്കുന്നുണ്ട്‌. എന്നാൽ അവയെല്ലാം തന്നെ വിമർശ്ശിക്കപ്പെട്ട നിവേദകന്മാർ സ്ഥലംപിടിച്ച പരമ്പരകളിൽ നിന്ന് ഉദ്ധരിക്കുന്നവയാണ്. പുറമേ സൂര്യൻ ഉദിച്ച ശേഷമായിരുന്നു നബി (സ) അത്‌ വീട്ടിയിരുന്നതെന്ന് അത്തരം ഹദീസുകളിൽ കൂടുതൽ പ്രബലമായവയിൽ പ്രസ്താവിക്കുകയും ചെയ്യുന്നുണ്ട്‌.

 3. സൂര്യന്റെ ഉദയാസ്തമന വേളയിൽ 

 സൂര്യൻ ഉദിച്ചുകൊണ്ടിരിക്കുന്ന സന്ദർഭത്തിലും അസ്തമിക്കുന്ന സന്ദർഭത്തിലും നമസ്കരിക്കുന്നതിനെ നബി (സ) വിരോധിക്കുന്നു [ബുഖാരി, മുസ്‌ലിം]. മറ്റൊരു റിപോർട്ടിൽ സൂര്യൻ ആകാശ മാധ്യത്തിൽ നിൽക്കുന്ന സന്ദർഭത്തിലും നമസ്കരിക്കുന്നതിനെ നബി (സ) വിരോധിക്കുന്നുണ്ട്‌ [മുസ്‌ലിം].

by അബ്ദുസ്സലാം സുല്ലമി @ സുന്നത്ത് നമസ്കാരങ്ങൾ 

ചൂഷകർക്ക് നരകം

"സത്യവിശ്വാസികളേ, പണ്ഡിതന്‍മാരിലും പുരോഹിതന്‍മാരിലും പെട്ട ധാരാളം പേര്‍ ജനങ്ങളുടെ ധനം അന്യായമായി തിന്നുകയും, അല്ലാഹുവിന്‍റെ മാര്‍ഗത്തില്‍ നിന്ന് (അവരെ) തടയുകയും ചെയ്യുന്നു. സ്വര്‍ണവും വെള്ളിയും നിക്ഷേപമാക്കിവെക്കുകയും, അല്ലാഹുവിന്‍റെ മാര്‍ഗത്തില്‍ അത് ചെലവഴിക്കാതിരിക്കുകയും ചെയ്യുന്നവരാരോ അവര്‍ക്ക് വേദനയേറിയ ശിക്ഷയെപ്പറ്റി സന്തോഷവാര്‍ത്ത അറിയിക്കുക. നരകാഗ്നിയില്‍ വെച്ച് അവ ചുട്ടുപഴുപ്പിക്കപ്പെടുകയും, എന്നിട്ടത് കൊണ്ട് അവരുടെ നെറ്റികളിലും പാര്‍ശ്വങ്ങളിലും മുതുകുകളിലും ചൂടുവെക്കപ്പെടുകയും ചെയ്യുന്ന ദിവസം (അവരോട് പറയപ്പെടും) : നിങ്ങള്‍ നിങ്ങള്‍ക്ക് വേണ്ടി തന്നെ നിക്ഷേപിച്ചുവെച്ചതാണിത്‌. അതിനാല്‍ നിങ്ങള്‍ നിക്ഷേപിച്ച് വെച്ചിരുന്നത് നിങ്ങള്‍ ആസ്വദിച്ച് കൊള്ളുക." [അദ്ധ്യായം 9 തൗബ 34,35]

 മനുഷ്യജീവിതം ദുസ്സഹമാക്കുന്ന ചൂഷണ വ്യവസ്ഥകളെ നിശിതമായി വിമർശിക്കുന്ന വിശുദ്ധവാക്യങ്ങളാണ് മേൽ സൂക്തങ്ങൾ. ഈ സൂക്തങ്ങളിൽ പ്രഥമമായി താക്കീതു ചെയ്യുന്നത് ദൈവത്തിന്റേയും മതത്തിന്റേയും പേരിൽ നടക്കുന്ന ചൂഷണങ്ങളെയാണ്. മതത്തിന്റെ നീതിസാരങ്ങൾ മനുഷ്യർക്ക് വിവരിച്ചുകൊടുക്കാൻ ബാധ്യതപ്പെട്ട പണ്ഡിതന്മാരും പുരോഹിതന്മാരും സ്വാർത്ഥതാല്പര്യങ്ങൾക്ക് വേണ്ടി ദൈവവചനങ്ങൾ ജനങ്ങളിൽ നിന്ന് മറച്ചുവെക്കുകയോ വക്രീകരിക്കുകയോ ദുർവ്യാഖ്യാനം ചെയ്യുകയോ അരുത്. ദൈവാവതാരം, സിദ്ധൻ, പുണ്യാളൻ, മധ്യവർത്തി എന്നിങ്ങനെ ദൈവത്തിന്റെ സ്വന്തക്കാരനായി വേഷമണിയുന്ന സകല വ്യാജന്മാരും ദൈവത്തോടു തന്നെ കടുത്ത വഞ്ചനയും ധിക്കാരവുമാണ് കാണിക്കുന്നത്. 

സ്വത്തും പണവും കുന്നുകൂട്ടി വെച്ച് അതിന്റെ വളർച്ച സ്തംഭിപ്പിക്കുന്ന മുതലാളിത്ത ചൂഷണത്തെയാണ് മേൽവചനത്തിന്റെ രണ്ടാംഭാഗത്ത് കടന്നാക്രമിക്കുന്നത്. സ്വത്തും ധനവും സമൂഹത്തിന്റെ വളർച്ചക്ക് ഉപയുക്തമാകും വിധം ഒഴുക്കിക്കൊണ്ടിരിക്കണമെന്ന ധനതത്വമാണ് ഖുർആൻ അവതരിപ്പിക്കുന്നത്. ക്ഷേമമാർഗങ്ങളിലുള്ള ധനവിനിയോഗം ദൈവമാർഗത്തിലുള്ള ചെലവിടലാണെന്ന ആശയം പ്രസക്തമാണ്. സ്വർണം, വെള്ളി, ഭൂസ്വത്ത്, ബാങ്ക്‌നിക്ഷേപം എന്നിങ്ങനെ ഏതുവിധേനയായാലും ശരി, ഉത്പാദനക്ഷമമല്ലെങ്കിൽ അത്തരം നിക്ഷേപങ്ങൾ അനീതിയും അക്രമവുമാണ്. പ്രകൃതിവിഭവങ്ങളേയും മനുഷ്യന്റെ അദ്ധ്വാനത്തേയും മുതലിറക്കി സ്വരൂപിക്കുന്ന എല്ലാ ധനവും സമൂഹത്തിലെ താഴെത്തട്ടു വരെ നീതിപൂർവം വിതരണം ചെയ്യപ്പെടുന്നില്ലെങ്കിൽ അത് സാമ്പത്തിക അസമത്വം സൃഷ്ടിക്കും. ന്യായമായി ചെലവഴിക്കാതെ സ്വത്ത് കേന്ദ്രീകരിക്കുന്നവർക്ക് കഠോരശിക്ഷ ലഭിക്കും.

By മുജീബുറഹ്മാൻ കിനാലൂർ @ മാതൃഭൂമി ദിനപത്രം

വിശ്വമാനവികതയുടെ ഓർമപ്പെരുന്നാൾ

മക്കയിൽ വിശുദ്ധ ഹജ്ജ്കർമം നടക്കുമ്പോൾ ലോകമെമ്പാടുമുള്ള മുസ്‌ലിങ്ങൾ ബലിപെരുന്നാൾ ആഘോഷിക്കുകയാണ്. വിശ്വമാനവികതയുടെയും സമസൃഷ്ടിസ്നേഹത്തിന്റെയും പ്രതീകമായ ഹജ്ജിനോടുള്ള ഐക്യദാർഢ്യം പെരുന്നാളാഘോഷത്തിൽ ദൃശ്യമാണ്. മനുഷ്യമനസ്സുകളെ കൂട്ടിയിണക്കാനും അവർക്കിടയിൽ സൗഹാർദവും സ്നേഹവും വളർത്തിയെടുക്കാനും വേണ്ടിയാണല്ലോ നാം ആഘോഷങ്ങൾ സംഘടിപ്പിക്കുന്നത്. എല്ലാ മതവിഭാഗങ്ങൾക്കും അവരുടേതായ ആഘോഷങ്ങളും ഉത്സവങ്ങളുമുണ്ട്. അവയെല്ലാം ചില ചരിത്രങ്ങളും ഐതിഹ്യങ്ങളുമായി ബന്ധപ്പെട്ടതായിരിക്കും. ഹജ്ജും ബലിപെരുന്നാളും ചരിത്രപുരുഷനായ ഇബ്രാഹീം നബിയുടെ ജാജ്ജ്വലമായ ത്യാഗജീവിതവുമായി ബന്ധപ്പെട്ടിരിക്കുന്നു. മാനവരാശിയെ സന്മാർഗത്തിലേക്ക് നയിക്കാനായി എല്ലാ സമൂഹത്തിലേക്കും പ്രവാചകന്മാർ വന്നിട്ടുണ്ടെന്ന് ഖുറാൻ ഒന്നിലധികം സ്ഥലങ്ങളിൽ പറഞ്ഞിട്ടുണ്ട്. ആ പ്രവാചകന്മാരിൽ പ്രമുഖനാണ് ഇബ്രാഹീം അഥവാ അബ്രഹാം. അബ്രഹാംപ്രവാചകനെ ആദരിക്കുകയും ബഹുമാനിക്കുകയും ചെയ്യുന്നവരാണ് യഹൂദരും ക്രിസ്ത്യാനികളും മുസ്‌ലിങ്ങളും. മോശയും യേശുവും മുഹമ്മദും ഒരുപോലെ ആദരിക്കുകയും അംഗീകരിക്കുകയും ചെയ്യുന്ന മാതൃകാപുരുഷനാണ് ഇബ്രാഹീംനബി.

ഇബ്രാഹീം ഒരു പ്രസ്ഥാനമായിരുന്നുവെന്നും ലോകജനതയുടെ നേതാവായിരുന്നുവെന്നുമുള്ള ഖുറാനിന്റെ പ്രസ്താവന അബ്രഹാമിന്റെ അനുയായികളെന്നവകാശപ്പെടുന്ന വിവിധ മതവിഭാഗങ്ങൾക്കിടയിൽ സാഹോദര്യത്തിന്റെ സന്ദേശം പരത്തുമെന്നതുറപ്പാണ്. ഇബ്രാഹീമിനോട് പുത്രബലി നടത്തി ദൈവത്തിന്‌ സമർപ്പണം കാണിക്കാൻ പറഞ്ഞ സംഭവം ബലിപെരുന്നാളിന്റെ ആത്മാവും സത്തയുമായി വേണം മനസ്സിലാക്കാൻ. ബലിമൃഗത്തിന്റെ മാംസവും രക്തവുമല്ല, മറിച്ച് മനുഷ്യമനസ്സിലെ സൂക്ഷ്മതാബോധമാണ് ദൈവത്തിലേക്കെത്തുകയെന്നും ഖുറാൻ പറഞ്ഞിട്ടുണ്ട്. എല്ലാ സമൂഹങ്ങളിലും പ്രവാചകന്മാർ വന്നിട്ടുണ്ടെന്ന ഖുറാനിന്റെ പരാമർശം സഹസ്രാബ്ദങ്ങളുടെ ചരിത്രപാരമ്പര്യമുള്ള ഭാരതത്തിലും പ്രവാചകന്മാർ വന്നിട്ടുണ്ടാകുമെന്ന് ബോധ്യപ്പെടുത്തുന്നുണ്ട്. നോഹ (നൂഹ്) പ്രവാചകന്റെ പുത്രൻ യാഷിദ് കിഴക്കൻ രാജ്യത്തേക്ക് യാത്രപോയെന്നും ചരിത്രത്തിന്റെ പിൻബലത്തിൽ ഇന്ത്യയിലെ പ്രാചീനസമൂഹമായ ദ്രാവിഡന്മാർ യാഷിദിന്റെ സന്തതികളായിരിക്കുമെന്നും പല ചരിത്രപണ്ഡിതന്മാരും അഭിപ്രായപ്പെട്ടിട്ടുണ്ട്. ബ്രാഹ്‌മണർ അബ്രഹാമിന്റെ പരമ്പരയിൽപ്പെട്ടവരാണെന്നും ചില പണ്ഡിതന്മാർ നിരീക്ഷിക്കുന്നുണ്ട്.

ഏകദൈവവിശ്വാസം, പരലോകവിശ്വാസം, ധർമനിഷ്ഠ എന്നിവയിലൂന്നിനിൽക്കുന്ന എല്ലാ വേദഗ്രന്ഥങ്ങളും ദൈവികമായിരിക്കുമെന്നതിനാൽ ഭാരതീയ തത്ത്വശാസ്ത്രങ്ങളുടെ അടിസ്ഥാനസിദ്ധാന്തങ്ങളും സെമിറ്റിക് മതഗ്രന്ഥങ്ങളും ഒരേ സ്രോതസ്സിൽനിന്നുള്ള പ്രകാശകിരണങ്ങളായിവേണം മനസ്സിലാക്കാൻ. മതത്തിന്റെയും ദൈവത്തിന്റെയും പേരിൽ കലഹിക്കുന്ന സമൂഹങ്ങൾ പ്രവാചകദൗത്യത്തിന്റെ ഈ ഐകരൂപ്യം അറിഞ്ഞേ മതിയാവൂ. മതാന്ധതയാൽ ഭീകരതയിലേക്കും തീവ്രവാദത്തിലേക്കും തിരിയുന്നവർ മനസ്സിലാക്കണം, മതം ഒരിക്കലും സംഘർഷത്തിനു കൂട്ടുനിൽക്കുകയില്ലെന്നും മതം സമന്വയത്തിന്റെ പാതയാണ്‌ ആഗ്രഹിക്കുന്നതെന്നും.

ഇബ്രാഹീം, ഭാര്യ ഹാജറ, മകൻ ഇസ്മാഈൽ ഈ മൂന്നു മഹാന്മാരുടെയും ജീവിതത്തിന്റെ തിളങ്ങുന്ന ചിത്രങ്ങൾ ഹജ്ജിലും പെരുന്നാളിലുമുടനീളം കാണാം. ഇതിൽ ഏറ്റവും പ്രധാനപ്പെട്ടതാണ് ഹാജിമാരുടെ അറഫാസംഗമം. ക്രിസ്‌ത്വബ്ധം 623 മാർച്ച് 6-ന് വെള്ളിയാഴ്ച (ഹിജ്റ 632 ദുൽഹജ്ജ് 9) മുഹമ്മദ് നബിയുടെ ചരിത്രപ്രസിദ്ധമായ അവസാന പ്രഭാഷണം നടന്നത് മക്കയിലെ അറഫാ മൈതാനത്തുവെച്ചാണ്. അന്ന് ഒരു ലക്ഷത്തോളംവരുന്ന തീർഥാടകർ അവിടെ ധ്യാനനിരതരായി സമ്മേളിച്ചിട്ടുണ്ടായിരുന്നു. മനുഷ്യസമൂഹത്തെ അഭിസംബോധനചെയ്തുകൊണ്ട് നബി ആരംഭിച്ചു. ‘‘മനുഷ്യരെല്ലാം ആദ്യപിതാവായ ആദമിന്റെ മക്കളാണ് ആദമാകട്ടെ മണ്ണിൽനിന്നു സൃഷ്ടിക്കപ്പെട്ടൻ, അതിനാൽ അറിയുക. ഒരു അറബിക്ക് അനറബിയേക്കാളോ വെളുത്തവന് കറുത്തവനേക്കാളോ യാതൊരു ശ്രേഷ്ഠതയുമില്ല’’. മനുഷ്യർക്കിടയിൽ നിലനിൽക്കുന്ന എല്ലാവിധ വിവേചനങ്ങളെയും ഉച്ചനീചത്വങ്ങളെയും വിപാടനം ചെയ്യാനുള്ള ശക്തമായ ആഹ്വാനമായിരുന്നു ആ പ്രഖ്യാപനം. ജാതി-മത-വർണ-വർഗ വ്യത്യാസങ്ങളുടെ പേരിൽ മനുഷ്യർ പരസ്പരം കലഹിക്കുന്ന സമകാലീന സമൂഹത്തിൽ മനുഷ്യരെല്ലാം ഒരേ മാതാപിതാക്കളുടെ സന്തതികളാണെന്ന പ്രഖ്യാപനത്തിന് വലിയ പ്രസക്തിയുണ്ട്. വസുധൈവകുടുംബകമെന്ന ഭാരതീയദർശനത്തിന്റെ ആശയംതന്നെയായിരുന്നു അത്. പരസ്പരസ്നേഹവും ബഹുമാനവും വിട്ടുവീഴ്ചയുമാണല്ലോ ഭദ്രമായ സാമൂഹികജീവിതത്തിന്റെ ആണിക്കല്ലുകൾ. അതുകൊണ്ടുതന്നെ എല്ലാവരും ഒരുമയിൽ കഴിയണമെന്നും പരസ്പരം കഴുത്തറുക്കുന്ന സാഹചര്യമുണ്ടാകരുതെന്നും നബി അനുചരന്മാരെ ഉണർത്തിയിരുന്നു. 

എല്ലാവിധ ചൂഷണത്തിന്റെയും മാർഗങ്ങളെ എരിച്ചുകളയാനുള്ള സന്ദേശമായിരുന്നു ആ മഹാപ്രഭാഷണത്തിൽ നിറഞ്ഞുനിന്നിരുന്നത്. കടംവാങ്ങുന്ന പാവങ്ങളെ കൂടുതൽ ദാരിദ്ര്യത്തിലേക്ക് തള്ളിവിടുന്ന പലിശ നിരോധിക്കുകയായിരുന്നു നബി. ‘‘ഇന്നിവിടെവെച്ച് ഞാനിതാ പലിശയിടപാടുകൾ ചവിട്ടിത്താഴ്ത്തുന്നു. ഇനി ആരും പലിശവാങ്ങരുത്‌, കൊടുക്കരുത്.’’ ആ പ്രഖ്യാപനം അപ്പോൾത്തന്നെ നടപ്പാക്കുകയായിരുന്നു അദ്ദേഹം. ഇതൊരു അപ്രായോഗികമായ കല്പനയായിരുന്നില്ല. നബിയുടെ കുടുംബക്കാർക്ക് കിട്ടേണ്ട പലിശ ഇനി ആരും നൽകേണ്ടതില്ലെന്ന പ്രഖ്യാപനത്തിലൂടെ അദ്ദേഹമത് നടപ്പാക്കി. ദൈവത്തിനും മനുഷ്യർക്കുമിടയിൽ ഉയർന്നുവരുന്ന ഇടത്തട്ടുകേന്ദ്രങ്ങൾക്കെതിരെയുള്ള ശക്തമായ നിലപാടും നബി പ്രഖ്യാപിച്ചു. ചൂഷകരായ ആൾദൈവങ്ങളും ദിവ്യന്മാരുമില്ലാത്ത കൃത്യവും വ്യക്തവുമായ വിശ്വാസമായ തൗഹീദിന്റെ നാനാവശങ്ങളും തന്റെ പ്രഭാഷണങ്ങളിൽ അദ്ദേഹം ഉൾപ്പെടുത്തി. സ്രഷ്ടാവായ ദൈവമല്ലാതെ ആരാധ്യനില്ലാ എന്ന വിളംബരത്തിലൂടെ വിശ്വാസത്തിന്റെ പേരിലുള്ള സർവചൂഷണങ്ങളും അവസാനിപ്പിക്കാനും കേവലം ഇരുപത്തിമൂന്ന് വർഷക്കാലംകൊണ്ട് നബിക്ക് സാധിച്ചു.

 തൊഴിലാളികളോടും അടിമകളോടുമുള്ള മാന്യമായ പെരുമാറ്റവും ആ പ്രഭാഷണത്തിൽ വിഷയീഭവിച്ചു. ആറാം നൂറ്റാണ്ടിലെ വലിയൊരു സാമൂഹികപ്രശ്നമായിരുന്ന അടിമവ്യവസ്ഥ ഘട്ടംഘട്ടമായി ഇല്ലായ്മചെയ്യാൻ പ്രവാചകന്റെ ക്രമപ്രവൃദ്ധമായ പ്രവർത്തനങ്ങളാൽ സാധ്യമായി. അടിമകളെ മോചിപ്പിക്കാൻ ഉപദേശിക്കുക മാത്രമല്ല വിവിധ കുറ്റങ്ങൾക്ക് പ്രായശ്ചിത്തമായി അടിമമോചനം നിർബ ന്ധമാക്കി. അടിമമോചനം വലിയ പുണ്യകർമമായി വിളംബരംചെയ്തു. അതോടെ നിരവധി അടിമകൾ സ്വതന്ത്രരായി. പിന്നെയും അവശേഷിച്ച അടിമകൾക്ക് മറ്റുള്ളവരെപ്പോലെയുള്ള മനുഷ്യാവശ്യങ്ങൾ ഉറപ്പുവരുത്തി. അടിമകൾ നമ്മുടെ സഹോദരന്മാരാണെന്നും അവരെ കൂടെയിരുത്തി ആഹാരം കഴിക്കണമെന്നും നബി ഉപദേശിച്ചു. ലോകത്തുനടന്ന ഏറ്റവും വലിയ പന്തിഭോജനവും അടിമത്ത വിമോചനപ്രഖ്യാപനവുമായിരുന്നു അത്. തൊഴിലാളിയുടെ വേതനം അവന്റെ വിയർപ്പുവറ്റുന്നതിനുമുമ്പായി നൽകണമെന്നു പഠിപ്പിച്ച മുഹമ്മദ് നബി ക്രമേണ തൊഴിലാളികൾക്കും കഷ്ടപ്പെടുന്നവർക്കും ഏറെ പ്രിയപ്പെട്ടവനായിത്തീർന്നു.

 ഹജ്ജ് കർമത്തിന്റെ വലിയൊരു പ്രത്യേകതയാണ് അതിൽ പ്രകടമായിക്കാണുന്ന സ്ത്രീസാന്നിധ്യം. എക്കാലത്തും ഹജ്ജിൽ സ്ത്രീകളുണ്ട്. മുസ്‌ലിങ്ങളുടെ ഏറ്റവും പ്രധാനപ്പെട്ട മക്ക, മദീന, ജറുസലേം പള്ളികളിൽ പണ്ടുമുതലേ സ്ത്രീകൾക്കും രാപകൽ പ്രവേശനവും ആരാധനയ്ക്കുള്ള അനുവാദവുമുണ്ട്. അറഫയിൽ കൂടിയ സ്ത്രീകളുടെ സാന്നിധ്യത്തിൽ പുരുഷന്മാരെ നബി ഓർമിപ്പിച്ചു. ‘‘സ്ത്രീകളുടെ കാര്യത്തിൽ നിങ്ങൾ ദൈവത്തെ സൂക്ഷിക്കുക’’ എന്ന്. മരണസമയത്ത് നബിനൽകിയ ഉപദേശത്തിലും സ്ത്രീകളുടെ അവകാശവും സ്ത്രീസുരക്ഷയും ഓർമിപ്പിച്ചിട്ടുണ്ട്. സ്ത്രീസുരക്ഷയ്ക്ക് പുരുഷന്മാർ മാന്യന്മാരാവുകയല്ലാതെ വേറെ എളുപ്പമാർഗമൊന്നുമില്ലെന്ന ആശയമാണ് പ്രസ്തുത നബിവചനത്തിൽ കാണുന്നത്.

മാനവികൈക്യവും സമസൃഷ്ടിസ്നേഹവും വിളിച്ചോതുന്ന അറഫാസംഗമം സമത്വത്തിന്റെ വിളംബരംകൂടിയാണ്. ഉന്നതനും താഴ്ന്നവനുമെന്ന വ്യത്യാസമില്ലാതെയാണ് മുപ്പത് ലക്ഷത്തോളം തീർഥാടകർ ഹജ്ജ്‌വേളയിൽ അറഫയിൽ സമ്മേളിക്കുന്നത്. ഒരേവേഷമാണെല്ലാവർക്കും. ആർക്കും സ്ഥിരതാമസം സാധ്യമല്ലാത്ത ഈ ഭൂമിയിൽ ഒരു യാത്രക്കാരനെപ്പോലെ താത്‌കാലിക തമ്പുകളിലാണ് അറഫയിലും മിനായിലും ഹാജിമാർ കഴിഞ്ഞുകൂടുന്നത്. മുസ്‌ദലിഫയിൽ രാപാർക്കുന്നത് വെറും മണൽപ്പരപ്പിൽ, മുകളിൽ ഒരു മറയുമില്ലാതെ വിശാലമായ ആകാശത്തിന്റെ ചുവട്ടിലാണ് ആ ഒരു രാത്രി മുഴുവൻ വിശ്വാസികൾ അവിടെ താമസിക്കുന്നത്. എല്ലാവരും ദൈവത്തിന്റെ സ്തുതിഗീതങ്ങൾ വാഴ്ത്തുന്നു. പ്രാർഥിക്കുന്നു. ലാളിത്യവും വിനയവുമാണ് ഹജ്ജ് വേളയിലെ ഈ പ്രത്യേക ജീവിതരീതിയിൽനിന്നു നേടിയെടുക്കാവുന്ന സദ്ഗുണങ്ങൾ. വർഗവർണഭാഷാ വ്യത്യാസങ്ങളില്ലാതെ മനുഷ്യരൊന്നാണെന്ന യാഥാർഥ്യം അനുഭവിച്ചറിയുകയാണവർ ഹജ്ജിന്റെ രാപലുകളിൽ. ഉള്ളത് പങ്കുവെച്ചും പരസ്പരം സ്നേഹിച്ചും ബഹുമാനിച്ചും ഒന്നിച്ചുകഴിയുന്ന ദിനരാത്രങ്ങൾ.

പെരുന്നാൾ സുദിനത്തിൽ ആലപിക്കുന്ന തക്ബീർ ധ്വനികളുടെ അർഥം ദൈവമാണ് ഏറ്റവും വലിയവൻ (അല്ലാഹു അക്ബർ) എന്നാണ്. അല്ലാഹു ആണ് ഏറ്റവും വലിയവനെങ്കിൽ വലിപ്പം സ്ഥാപിക്കാനായി മനുഷ്യർ തമ്മിൽ മത്സരിക്കേണ്ടതില്ല. മനുഷ്യരെല്ലാം ചെറിയവരാണ്. ദൈവമാണ് വലിയവൻ. ശാന്തതയും സമാധാനവുമാണല്ലോ മതത്തിന്റെ ലക്ഷ്യവും വഴിയും. എന്നാൽ, ഭീകരന്മാർ ദുരുപയോഗം ചെയ്യുന്നതും മതത്തെത്തന്നെ. ഭീകരതയും തീവ്രവാദവും മതമല്ലെന്ന് നാമൊന്നിച്ച് പറഞ്ഞേ മതിയാവൂ. ഐ.എസ്സും മതങ്ങളുടെ പേരിൽ പ്രത്യക്ഷപ്പെടുന്ന മറ്റു ഭീകരസംഘങ്ങളും മതവിരുദ്ധമാണെന്നകാര്യത്തിൽ സംശയമില്ല. ഈ നാടിനെ സമാധാനപ്രദേശമാക്കേണമേയെന്നും നാട്ടിൽ സുഭിക്ഷതയും ക്ഷേമവും വരുത്തേണമേ എന്നും പ്രാർഥിച്ച ഇബ്രാഹിം നബിയുടെ പ്രാർഥനയ്ക്ക് ഇന്ന് കൂടുതൽ പ്രസക്തിയുണ്ട്. ആ മഹാപ്രവാചകന്റെ ജീവിതശേഷിപ്പുകൾ തുടിച്ചുനിൽക്കുന്ന ഹജ്ജ്‌വേളയിലും ബലിപെരുന്നാളിലും നമുക്കും അതിനായി പ്രാർഥിക്കാം.

By ഹുസൈൻ മടവൂർ @ മാതൃഭൂമി ദിനപത്രം 

മഖ്‌ബൂലും മബ്‌റൂറുമായ ഹജ്ജ്‌

കൃത്യമായ ബാഹ്യരൂപവും ആന്തരികശുദ്ധിയും പൂർണ്ണമായും പാലിക്കപ്പെടുമ്പോൾ മാത്രമാണ് ഏതൊരു ആരാധനാകർമ്മവും ഇസ്‌ലാമിൽ സ്വീകാര്യയോഗ്യവും പ്രതിഫലാർഹവുമായിത്തീരുന്നത്. ഒരു നാണയത്തിൻ്റെ രണ്ട് വശങ്ങൾ പോലെയാണവ.അതുകൊണ്ട് തങ്ങൾ ചെയ്യുന്ന ഹജ്ജും ഉംറയും മഖ്‌ബൂലും മബ്‌റൂറുമാകണമെന്ന് ആഗ്രഹിക്കുന്നവർ താഴെ പറയുന്ന കാര്യങ്ങൾ പ്രത്യേകം ശ്രദ്ധിക്കുക : 

ഹജ്ജിൽ അല്ലാഹുവിന്റെ പ്രീതിയല്ലാതെ മറ്റൊന്നും കൂടിക്കലരാൻ പാടില്ല. ഭൗതികനേട്ടം, പ്രകടനമോഹം, പ്രശസ്തിക്കു വേണ്ടിയുള്ള ആഗ്രഹം തുടങ്ങിയ കാര്യങ്ങൾ ഇതിന്നെതിരാണ്. അല്ലാഹു പറയുന്നു : "ക്ഷണികമായതിനെ (ഇഹലോകത്തെ) യാണ് വല്ലവരും ഉദ്ദേശിക്കുന്നതെങ്കില്‍ അവര്‍ക്ക് അഥവാ (അവരില്‍ നിന്ന്‌) നാം ഉദ്ദേശിക്കുന്നവര്‍ക്ക് നാം ഉദ്ദേശിക്കുന്നത് ഇവിടെ വെച്ച് തന്നെ വേഗത്തില്‍ നല്‍കുന്നതാണ്‌. പിന്നെ നാം അങ്ങനെയുള്ളവന്ന് നല്‍കുന്നത് നരകമായിരിക്കും. അപമാനിതനുംടവനുമായിക്കൊണ്ട് അവന്‍ അതില്‍ കടന്നെരിയുന്നതാണ്‌.'' [അദ്ധ്യായം 17 ഇസ്രാഅ് 18]. ''തീര്‍ച്ചയായും കപടവിശ്വാസികള്‍ അല്ലാഹുവെ വഞ്ചിക്കാന്‍ നോക്കുകയാണ്‌. യഥാര്‍ത്ഥത്തില്‍ അല്ലാഹു അവരെയാണ് വഞ്ചിക്കുന്നത്‌. അവര്‍ നമസ്കാരത്തിന് നിന്നാല്‍ ഉദാസീനരായിക്കൊണ്ടും, ആളുകളെ കാണിക്കാന്‍ വേണ്ടിയുമാണ് നില്‍ക്കുന്നത്‌. കുറച്ച് മാത്രമേ അവര്‍ അല്ലാഹുവെ ഓര്‍മിക്കുകയുള്ളൂ.''  [അദ്ധ്യായം 4 നിസാഅ് 142] നബി (സ) പറഞ്ഞു : ''കർമ്മങ്ങൾ (അത് നിർവഹിക്കുന്ന ആളുടെ) ഉദ്ദേശ്യങ്ങൾക്കനുസരിച്ചാണ്. ഓരോരുത്തർക്കും അവനവൻ എന്തു കരുതിയോ അത് ലഭിക്കുന്നു.'' [ബുഖാരി]

ഹലാലായ ധനം ഉപയോഗപ്പെടുത്തുക, പാപകർമ്മങ്ങളിൽ നിന്ന് വിരമിക്കുകയും കഴിഞ്ഞുപോയ തെറ്റുകളിൽ പശ്ചാത്തപിക്കുകയും ചെയ്യുക, യാത്രക്കായി നല്ല കൂട്ടുകാരെ സ്വീകരിക്കുക, സഹയാത്രികരോട് നല്ല നിലക്ക് പെരുമാറുക, അസഭ്യഭാഷണം, തർക്ക-വിതർക്കങ്ങൾ, ശണ്ഠ, ദുർവിചാര വികാരങ്ങൾ തുടങ്ങിയവയിൽ നിന്ന് അകന്നുനിൽക്കുക ഇതെല്ലാം ഹജ്ജിന്റെയും ഉംറയുടെയും പൂർണതക്ക്‌ അനിവാര്യമാണ്.മേൽപറഞ്ഞ കാര്യങ്ങളിൽ വീഴ്ച വരുത്തിയാൽ ഈ തീർഥാടനകർമത്തിന്റെ ആന്തരിക വശത്തിനാണ് പോറലേൽക്കുന്നത്. ഹജ്ജ്,ഉംറ എന്നിവയുടെ ബാഹ്യരൂപങ്ങൾകൃത്യമായി വിശുദ്ധഖുർ ആനിനും സുന്നതിനും യോജിച്ചതായിരിക്കണം. അതിനു ശ്രദ്ധിക്കേണ്ട കാര്യങ്ങൾ താഴെ കൊടുക്കുന്നു.

ഹജ്ജിനു വരുന്ന ലക്ഷക്കണക്കിനു തീർത്ഥാടകർ പല തരക്കാരായിരിക്കും. അവരിൽ ഓരോരുത്തരുടേയും കർമ്മങ്ങളെ അനുകരിക്കാൻ നിന്നാൽ അത്‌ അബദ്ധമായിത്തീരും. അതിനാൽ ഹജ്ജ്‌ ചെയ്യുന്നവർ നിർവ്വഹിക്കേണ്ട കർമ്മങ്ങളെക്കുറിച്ച്‌ സ്വയം ബോധമാവാന്മാരായിരിക്കണം. ഹജ്ജ്‌, ഉംറ കർമ്മങ്ങളെക്കുറിച്ച്‌ വിവരിക്കുന്ന ധാരാളം പുസ്തകങ്ങളുണ്ട്‌. അവയിൽ പലതിലും പ്രവാചകന്റെ പേരിലുള്ള വ്യാജ വചനങ്ങളും ദുർബല വചനങ്ങളും കാണാം. അതിനാൽ അത്തരം കാര്യങ്ങളിൽ സത്യസന്ധരും സൂക്ഷ്മതാബോധവുമുള്ള പണ്ഡിതന്മാരിൽ നിന്ന് സത്യം മനസ്സിലാക്കി അവയിൽ നിന്ന് മാറി നിൽക്കണം. എങ്കിൽ മാത്രമേ നമ്മൾ ചെയ്യുന്ന ഹജ്ജും ഉംറയും മഖ്‌ബൂലും മബ്‌റൂറുമായിത്തീരുകയുള്ളൂ.

From ഇസ്‌ലാം വാല്യം 2 കർമ്മാനുഷ്ഠാനങ്ങൾ

നിലപാട്‌ നന്നാക്കുക

"ഏതൊരു ജനതയും തങ്ങളുടെ സ്വന്തം നിലപാടുകളില്‍ മാറ്റം വരുത്തുന്നത് വരെ അല്ലാഹു അവരുടെ സ്ഥിതിക്ക് വ്യത്യാസം വരുത്തുകയില്ല; തീര്‍ച്ച. ഒരു ജനതയ്ക്ക് വല്ല ദോഷവും വരുത്താന്‍ അല്ലാഹു ഉദ്ദേശിച്ചാല്‍ അത് തട്ടിമാറ്റാനാവില്ല. അവന്നു പുറമെ അവര്‍ക്ക് യാതൊരു രക്ഷാധികാരിയുമില്ല." [അദ്ധ്യായം 13 റഅദ്‌ 11]

ഒരു ജനത അവരുടെ സ്ഥിതിഗതികളിൽ മാറ്റം വരുത്തുന്നതു വരെ അല്ലാഹു അവരുടെ സ്ഥിതിയിൽ മാറ്റം വരുത്തുകയില്ല. ഒരു ജനസമൂഹത്തിന്റെ അഭിവൃദ്ധിക്കോ ഭദ്രതക്കോ സമാധാനത്തിനോ തകരാർ ബാധിക്കുന്നുവെങ്കിൽ അത്‌ അവരുടെ തന്നെ ചെയ്തികളുടെ ഫലമായിട്ടായിരിക്കുമെന്ന് ഇതിൽ നിന്ന് വ്യക്തമാകുന്നു. സമൂഹത്തിലെ ഓരോ വ്യക്തിക്കും ആ ചെയ്തികളിൽ പങ്കുണ്ടാകണമെന്നില്ല. ചിലപ്പോൾ അവരിൽപെട്ട ഒരു വിഭാഗത്തിന്റേയോ ചില വ്യക്തികളുടേയോ ചെയ്തികളായിരിക്കും സമൂഹത്തിനു പൊതുവേ നാശകരമായി കലാശിക്കുന്നത്‌.

ഏതെങ്കിലും ഒരു കൂട്ടർക്ക്‌ വല്ല തിന്മയും ബാധിക്കണമെന്ന് അല്ലാഹു ഉദ്ദേശിച്ചാൽ പിന്നെ അതിനു യാതൊരു തടസ്സവും ഉണ്ടാവുകയില്ല. രോഗം, ക്ഷാമം, പരാജയം, ഭയം, ദേഹനഷ്ടം, ധനനഷ്ടം തുടങ്ങിയ എല്ലാതരം തിന്മകളും ഇതിൽ ഉൾപ്പെടുന്നു. പക്ഷേ അവരിൽ നിന്നുള്ള ചില പ്രത്യേക കാരണമോ യുക്തമായ ലക്ഷ്യമോ കൂടാതെ അങ്ങിനെ അല്ലാഹു ഉദ്ദേശിക്കുകയില്ലെന്ന് തീർച്ച തന്നെ. അല്ലാഹു അങ്ങനെ ഉദ്ദേശിച്ചു കഴിഞ്ഞാൽ പിന്നെ ഒരാൾക്കും ഒരു കാരണത്താലും അത്‌ തടയുവാൻ സാധിക്കില്ല എന്ന് സാരം.

മനുഷ്യരുടെ കൈകാര്യങ്ങൾ നടത്തുന്ന യഥാർത്ഥ രക്ഷാധികാരി അല്ലാഹുവല്ലാതെ മറ്റാരുമല്ല. മലക്കുകൾക്കോ ജിന്നുകൾക്കോ പുണ്യാത്മാക്കൾക്കോ ദിവ്യന്മാർക്കോ ഒന്നും തന്നെ അതിൽ പങ്കില്ല. മനുഷ്യർക്ക്‌ വല്ല ഗുണമോ ദോഷമോ ചെയ്‌വാനും നന്മയോ തിന്മയോ നൽകുവാനുള്ള യഥാർത്ഥ കഴിവു അല്ലാഹുവിനു മാത്രമേയുള്ളൂ.

By മുഹമ്മദ്‌ അമാനി മൗലവി

സ്ത്രീകളുടെ വസ്ത്രധാരണം ഇസ്ലാമിൽ

അല്ലാഹു പറയുന്നു : "സത്യവിശ്വാസിനികളോടും അവരുടെ ദൃഷ്ടികള്‍ താഴ്ത്തുവാനും അവരുടെ ഗുഹ്യാവയവങ്ങള്‍ കാത്തുസൂക്ഷിക്കുവാനും, അവരുടെ അലങ്കാരങ്ങളിൽ നിന്ന് പ്രത്യക്ഷമായതൊഴിച്ച് മറ്റൊന്നും വെളിപ്പെടുത്താതിരിക്കുവാനും നീ പറയുക. അവരുടെ മക്കനകള്‍ കുപ്പായമാറുകള്‍ക്ക് മീതെ അവര്‍ താഴ്ത്തിയിട്ടുകൊള്ളട്ടെ. അവരുടെ ഭര്‍ത്താക്കന്‍മാര്‍, അവരുടെ പിതാക്കള്‍, അവരുടെ ഭര്‍തൃപിതാക്കള്‍, അവരുടെ പുത്രന്‍മാര്‍, അവരുടെ ഭര്‍തൃപുത്രന്‍മാര്‍, അവരുടെ സഹോദരന്‍മാര്‍, അവരുടെ സഹോദരപുത്രന്‍മാര്‍, അവരുടെ സഹോദരീ പുത്രന്‍മാര്‍, മുസ്ലിംകളില്‍ നിന്നുള്ള സ്ത്രീകള്‍, അവരുടെ വലംകൈകള്‍ ഉടമപ്പെടുത്തിയവര്‍ (അടിമകള്‍) , ലൈംഗികാസക്തി ഉള്ളവരല്ലാത്ത പുരുഷന്‍മാരായ പരിചാരകര്‍, സ്ത്രീകളുടെ രഹസ്യങ്ങള്‍ മനസ്സിലാക്കിയിട്ടില്ലാത്ത കുട്ടികള്‍ എന്നിവരൊഴിച്ച് മറ്റാര്‍ക്കും തങ്ങളുടെ ഭംഗി അവര്‍ വെളിപ്പെടുത്തരുത്‌. തങ്ങള്‍ മറച്ചു വെക്കുന്ന തങ്ങളുടെ അലങ്കാരം അറിയപ്പെടുവാന്‍ വേണ്ടി അവര്‍ കാലിട്ടടിക്കുകയും ചെയ്യരുത്‌." [അദ്ധ്യായം 24 നൂർ 31]

 മേൽ ആയത്തിൽ ഒരു സ്ത്രീക്ക്‌ അന്യപുരുഷന്റെ മുന്നിൽ 'മാളഹറ മിൻഹാ ' (അലങ്കാരങ്ങളിൽ പ്രത്യക്ഷമായവ) എന്ന ആശയം ഉൾക്കൊള്ളുന്നവ പ്രകടിപ്പിക്കാമെന്ന് അല്ലാഹു പ്രസ്താവിക്കുന്നു. എന്താണ് ഇത്‌ കൊണ്ട്‌ ഉദ്ദേശിക്കുന്നതെന്ന് പരിശോദിക്കാം :

ഇബ്നു അബ്ബാസ്‌ (റ), ഖതാദ (റ), മിസ്‌വർ (റ) തുടങ്ങിയ സഹാബികൾ പറയുന്നു : "(പ്രത്യക്ഷമായ) സൗന്ദര്യം എന്നതിന്റെ ഉദേശ്യം സുറുമ, വളകൾ, ചായം, മുഴങ്കൈയുടെ പകുതി (മുൻകൈ ഉൾപ്പടെ കൈമുട്ടിന്റേയും മണികണ്ഠത്തിന്റേയും ഇടയിലുള്ള ഭാഗത്തിന്റെ പകുതി), കമ്മൽ അല്ലെങ്കിൽ റിങ്‌, മോതിരം എന്നിവയെല്ലാമാണ്." [തഫ്സീർ ഖുർതുബി]. "സൗന്ദര്യത്തിൽ നിന്ന് പ്രത്യക്ഷമായത്‌ എന്നതിന്റെ വിവക്ഷയിൽ ഏറ്റവും ശരിയായത്‌ മുഖവും മുൻ കൈയുമാണ്. സുറുമ, മോതിരം, മൈലാഞ്ചി എന്നിവയെല്ലാം ഇതിന്റെ പരിധിയിൽ പെടുന്നു." [ഇബ്നു ജരീർ]

അന്യ സ്ത്രീ-പുരുഷന്മാർ ധാരാളമായി പങ്കെടുക്കുന്ന രംഗമാണ് ഹജ്ജിന്റേത്‌. ആ സന്ദർഭത്തിൽ പോലും സ്ത്രീയോട്‌ ഇസ്‌ലാം മുഖം മറക്കാനല്ല നിർദ്ദേശിക്കുന്നത്‌. മറിച്ച്‌ ഹജ്ജിൽ മുഖം മറക്കുന്നത്‌ ഹറാമാക്കുകയാണ് ചെയ്യുന്നത്‌. ഇമാം നവവി എഴുതുന്നു : "സ്വതന്ത്ര സ്ത്രീയുടെ മുഖവും കൈപടങ്ങളും നഗ്നതയല്ലെന്ന് അല്ലാഹുവിന്റെ പ്രസ്താവനയിൽ നിന്ന് വ്യക്തമാവുന്നു. ഇബ്നു അബ്ബാസ്‌ (റ) പറയുന്നു : "ഹജ്ജിൽ പ്രവേശിച്ച സ്ത്രീകൾ കൈ ഉറകളും മുഖംമൂടികളും ധരിക്കുന്നത്‌ പ്രവാചകൻ നിഷിദ്ധമാക്കുന്നു." മുഖവും കൈകളും നഗ്നതയായിരുന്നെങ്കിൽ അവ മറക്കുന്നത്‌ നിഷിദ്ധമാക്കുമായിരുന്നില്ല. പുറമേ സ്ത്രീകൾ വിൽക്കുകയും വാങ്ങുകയും ചെയ്യുമ്പോൾ അവരുടെ മുഖം വെളിവാക്കേണ്ടത്‌ ആവശ്യമാണ്. പിടിക്കുകയും നൽകുകയും ചെയ്യുന്ന സന്ദർഭത്തിൽ കൈ വെളിവാക്കുകയും വേണം. അതിനാൽ അവ നഗ്നതയാക്കിയിട്ടില്ല." [ശർഹുൽ മുഹദ്ദബ്‌]

 സ്ത്രീകളുടെ കാൽപാദങ്ങളും നഗ്നതയല്ല. അവയും സ്ത്രീകൾക്ക്‌ വെളിവാക്കാം. ഇമാം നവവി (റ) ഉദ്ധരിക്കുന്നു : "ഇമാം അബൂഹനീഫ (റ), സൗരി (റ), മുസ്നി (റ) മുതലായവർ സ്ത്രീയുടെ പാദങ്ങൾ നഗ്നതയിൽ ഉൾപ്പെടുകയില്ലെന്ന് പ്രസ്താവിക്കുന്നു." [ശറഹുൽ മുഹദ്ദബ്‌] ഇമാം മാലിക്‌, ഹദീസ്‌ പണ്ഡിതന്മാരുടെ ഇമാമായ സുഹ്‌രി (റ)വിൽ നിന്ന് ഉദ്ദരിക്കുന്നു : "അന്യപുരുഷന്മാരുടെ മുന്നിൽ പ്രകടിപ്പിക്കാമെന്ന് അല്ലാഹു പ്രസ്താവിച്ച പ്രത്യക്ഷമായ സൗന്ദര്യത്തിൽ മോതിരം, കാലിൽ ധരിക്കുന്ന തണ്ട (കാൽത്തള) എന്നിവയും ഉൾപ്പെടുന്നു." [ഇബ്നു കസീർ]. പള്ളി ദർസ്സുകളിൽ പഠിപ്പിക്കുന്ന തഫ്സീർ മദാരിക്കിൽ എഴുതുന്നു : "ബാഹ്യസൗന്ദര്യം എന്നതുകൊണ്ട്‌ ഉദ്ദേശിക്കുന്നത്‌ പതിവും പ്രകൃതിയും വെളിവാക്കുവാൻ ആവശ്യപ്പെടുന്നവയാണ്. അത്‌ മുഖം, കൈപടങ്ങൾ, കാൽപാദങ്ങൾ മുതലായവയാണ്. ഇവ മറക്കൽ ഒരു സ്ത്രീയെ സംബന്ധിച്ച്‌ വളരെ പ്രയാസമുണ്ടാക്കുന്നതാണ്. പ്രത്യേകിച്ച്‌ സാക്ഷി പറയുകയും കേസ്‌ വാദിക്കുകയും ചെയ്യുമ്പോൾ. വിവാഹ സന്ദർഭങ്ങളിലും യാത്രാവേളയിലുമൊക്കെ കാൽപാദം വെളിവാക്കേണ്ടി വരും." 

 By അബ്ദുസ്സലാം സുല്ലമി @ ഇളവുകൾ ഇസ്ലാമിക വിധികളിൽ (യുവത)

നന്മകൾക്ക്‌ പ്രചോദനമാവുക

''വല്ലവനും ഒരു നല്ല ശുപാര്‍ശ ചെയ്താല്‍ ആ നന്‍മയില്‍ ഒരു പങ്ക് അവന്നുണ്ടായിരിക്കും. വല്ലവനും ഒരു ചീത്ത ശുപാര്‍ശ ചെയ്താല്‍ ആ തിന്‍മയില്‍ നിന്ന് ഒരു പങ്കും അവന്നുണ്ടായിരിക്കും. അല്ലാഹു എല്ലാകാര്യങ്ങളുടെയും മേല്‍നോട്ടം വഹിക്കുന്നവനാകുന്നു.'' [അദ്ധ്യായം 4 നിസാഅ് 85]

വൈവിധ്യമാർന്ന പ്രവർത്തനങ്ങൾ ചെയ്യുന്നവരാണ് മനുഷ്യർ. ആത്മപ്രേരണയാലും പരപ്രേരണ കൊണ്ടും കാര്യങ്ങൾ ചെയ്യുന്നവരുണ്ട്‌. പൊതുവേ ചെറുതും ലളിതവുമായ കാര്യങ്ങൾ സ്വയം ചെയ്യാൻ തയ്യാറാവുന്നവർ, സങ്കീർണ്ണവും ത്യാഗപൂർണ്ണവുമായ കാര്യങ്ങൾ മറ്റുള്ളവരുടെ പ്രേരണകളും മാതൃകകളും ഉണ്ടാവുമ്പോഴാണ് പ്രവർത്തിക്കാറുള്ളത്‌. മറ്റുള്ളവരെ നന്മയിലേക്ക്‌ ആകർഷിക്കാൻ ഉപയുക്തമായ പ്രവർത്തനങ്ങളും പ്രേരണകളും നമ്മിൽ നിന്നുണ്ടാവണം. ഇത്‌ നന്മകളുടെ വേലിയേറ്റം സൃഷ്ടിക്കുമെന്ന് മാത്രമല്ല; നന്മകളെ നമ്മുടെ പങ്കാളിത്തം ഉറപ്പിക്കുന്നതും പ്രതിഫലം നേടിത്തരുന്നതുമായിരിക്കും. വ്യക്തിക്കും സമൂഹത്തിനും നാടിനും ഗുണകരമായ കാര്യങ്ങൾ ഉണ്ടാവുന്നതിനു വേണ്ടിയുള്ള നമ്മുടെ പ്രോൽസാഹനങ്ങളും ശുപാർശകളും നിർദേശങ്ങളും വളരെ പ്രധാനപ്പെട്ടതാണ്. ഒരാൾ നല്ല തരത്തിലുള്ള വല്ല ശുപാർശകളും ഒരാൾക്ക്‌ വേണ്ടി നിർവ്വഹിച്ചാൽ അതിന്റെ ഗുണങ്ങളിൽ നിന്നുള്ള ഒരു വിഹിതവും ചീത്തയായ കാര്യങ്ങൾക്ക്‌ വേണ്ടി ശുപാർശയും പ്രേരണയും നടത്തിയാൽ അതിന്റെ തിന്മകളിൽ നിന്നുള്ള ഒരു പങ്കും അവനു ലഭ്യമായിത്തീരും എന്ന് അല്ലാഹു അറിയിക്കുന്നു. കാരണം അവന്റെ പ്രവർത്തനങ്ങളുടെ അനന്തരഫലമായാണ് ആ നന്മയും തിന്മയും നിലവിൽ വരുന്നത്‌.

നല്ല ഒരു കാര്യത്തിന്ന് വേണ്ടി നാം നടത്തുന്ന ഉപദേശനിർദ്ദേശങ്ങൾ, പ്രേരണകൾ, പ്രോൽസാഹനങ്ങൾ, പ്രാർത്ഥനകൾ, സഹായങ്ങൾ എല്ലാം നമ്മെ ആ നന്മയുടെ ഭാഗമാക്കിത്തീർക്കുന്നതാണ്. അതിന്റെ പ്രതിഫലം മരണാനന്ത ജീവിതത്തിലേക്ക്‌പോലും നമുക്ക്‌ ലഭ്യമായിത്തീരുന്നു. എന്നാൽ ചീത്തയായ കാര്യത്തിനാണ് നമ്മുടെ ശുപാർശയും ഒത്താശയും പ്രോൽസാഹനവും നിമിത്തമാവുന്നതെങ്കിൽ നാം ഏറെ ഭയപ്പെടേണ്ടതുണ്ട്‌. കാരണം നാമും ആ തെറ്റിൽ അറിയാതെ പങ്കാളിയായിത്തീരുകയാണ്.

"നീ മുഖേന ഒരാൾ സന്മാർഗ്ഗത്തിലായാൽ ഈ ലോകത്തെ മുഴുവൻ സ്വത്തും ലഭിക്കുന്നതേക്കാൾ നല്ലതാണ്" എന്ന് നബി (സ) പഠിപ്പിക്കുന്നു. നന്മകളുടെ മാതൃകകളായി ജീവിക്കാനും നന്മയും ക്ഷമയും പരസ്പരം ഉപദേശിച്ച്‌ സൽകർമ്മ ജീവിതത്തിന് വഴികാട്ടാനുമായിരിക്കണം ഒരു വിശ്വാസിയുടെ ശ്രമം. നാം ചെയ്യുന്ന ഓരോ കാര്യവും അല്ലാഹുവിന്റെ മേൽനോട്ടത്തിലാണ് എന്നോർക്കുക. അവൻ നമ്മുടെ അകവും പുറവും കണ്ടുകൊണ്ടിരിക്കുന്നു. അതിനാൽ നമ്മുടെ വാക്കും പ്രവൃത്തിയും മറ്റുള്ളവരിൽ നന്മകൾ വളർത്താൻ പര്യാപ്തമാവുന്നതാകട്ടെ.

By അബ്‌ദു സലഫി @ പുടവ മാസിക 

ദൗത്യം ഓഡിറ്റ് ചെയ്യുക

വിശുദ്ധ ഖുര്‍ആനില്‍ പരാമര്‍ശിച്ച യുവതയുടെ ചരിത്രങ്ങളില്‍ ധാരാളം സമാനതകള്‍ കാണാം. തിന്മകള്‍ക്കെതിരില്‍ ചോദ്യങ്ങളുയര്‍ത്തി, നന്മയുടെ പക്ഷത്ത് ആത്മാര്‍പ്പണം ചെയ്ത ആദര്‍ശയൗവനത്തിന്റെ ചരിത്രമാണത്. അവര്‍ ചോദ്യം ചെയ്തത് സാധാരണക്കാരെയോ അബലരെയോ അല്ല, ജീവിച്ചുവളരുന്ന നാട്ടിലെ രാജാക്കന്മാരെയായിരുന്നു. തഖ്‌യാനൂസ് രാജാവും നുംറൂദും. ഇടര്‍ച്ചയോ പതര്‍ച്ചയോ ഇല്ലാതെ കഹ്ഫിലെ യുവാക്കളും യുവാവായ ഇബ്‌റാഹീം നബി(അ)യും അചഞ്ചലമായി പോരാടി. ഇത്തരം സംഭവങ്ങളെ പരിചയപ്പെടുത്തുന്ന ഖുര്‍ആനിക ശൈലിയും ചിന്തോദ്ദീപകമാണ്. ശിര്‍ക്കിനെതിരില്‍ പോരാടിയ മഹാന്മാരുടെ പേരുകള്‍ക്ക് പകരം ദൗത്യനിര്‍വഹണ സന്ദര്‍ഭമാണ് അവരിലേക്ക് ചേര്‍ത്തുവെച്ചത്. സമിഅ്‌നാ ഫതന്‍ (21:60) ഒരു യുവാവിനെ ഞങ്ങള്‍ കേട്ടു പരിചയിച്ചിട്ടുണ്ട്. ഇന്ന ഹും ഫിത്‌യതുന്‍ (18:10) 'അവര്‍ യുവാക്കളായിരുന്നു.' മനുഷ്യായുസ്സിലെ വിവിധ ഘട്ടങ്ങളിലെ 'ദൗത്യ'ത്തെ അങ്ങനെ ക്രിയാത്മകമാക്കണമെന്ന സാമൂഹ്യബോധനം കൂടി ഈ പ്രഖ്യാപനങ്ങളിലുണ്ട്. യുവത്വം കരുത്തുള്ളതാണ്. ശരീരത്തിനും മനസ്സിനും ആര്‍ജവം നല്കുന്നതാണ് (30:54). അതിനാല്‍ അവര്‍ ചോദ്യങ്ങളുന്നയിച്ചു. രാജാവിനോടുള്ള ചോദ്യം പക്ഷേ, ആത്യന്തികമായി തങ്ങളോട് തന്നെയായിരുന്നു. ദൗത്യനിര്‍വഹണത്തിന്റെ വീര്യം ചോരാതിരിക്കാന്‍ ആവര്‍ത്തിച്ച് ചോദ്യം ചെയ്തുകൊണ്ടിരുന്നു. സൃഷ്ടി പൂജക്കെതിരില്‍, വിഗ്രഹാരാധനക്കെതിരില്‍ ഏകദൈവ വിശ്വാസം പ്രബോധനം ചെയ്യുകയെന്ന ദൗത്യ നിര്‍വഹണത്തെ നിര്‍ഭയം നിര്‍വഹിക്കുകയായിരുന്നു. അതാണ് മാതൃകയും. (5:54, 33:39)

സാമ്പത്തിക വിനിമയ രംഗത്ത് ഓഡിറ്റിംഗ് സര്‍വസാധാരണമാണ്. അവയുടെ കൃത്യതക്കും കണിശതക്കും നാം ശ്രദ്ധിക്കാറുണ്ട്. സ്വജീവിതത്തിലും ഒരു പരിധി വരെ സാമ്പത്തിക ചിട്ടയും ക്രമീകരണവും വരുത്തുന്നവരാണ് നമ്മില്‍ അധിക പേരും. ദൈനംദിന കാര്യങ്ങള്‍ രേഖപ്പെടുത്തുന്നവരും കുറവല്ല. എന്നാല്‍ യഥാര്‍ഥത്തില്‍ നമ്മുടെ ജയാപചയങ്ങളെ ആത്യന്തികമായി നിശ്ചയിക്കുന്ന 'ദൗത്യ'ത്തെ ആരാണ് ഓഡിറ്റ് ചെയ്തിട്ടുള്ളത്? 'പരലോക വിചാരണക്ക് മുന്‍പ് സ്വയം വിചാരം വേണം' എന്നതിന്റെ താല്പര്യമാണ് ഇത്. മൂല്യനിര്‍ണയവും സംശോധനയും അപഗ്രഥനങ്ങളും ശാസ്ത്രീയമായി പുരോഗതി പ്രാപിച്ച കാലത്തും നാം ഇക്കാര്യത്തില്‍ അലസത പുലര്‍ത്തുന്നു. നാഥന്‍ നമ്മെ ഏല്പിച്ചതും (22:78) നാം ഏറ്റെടുത്തതുമായ ദൗത്യങ്ങളുടെ കോളവും നിര്‍വഹണത്തിന്റെ കോളവും പരസ്പരം പൊരുത്തമുള്ളതാണോ? എന്തെങ്കിലും ചെയ്തതിലെ ആശ്വാസമല്ല, ചെയ്യാവുന്നത് നിര്‍വഹിച്ചിട്ടുണ്ടോ എന്ന ആകുലതയാണ് ഒരു യുവാവില്‍ ഉണ്ടാകേണ്ടത്. 'ഇത്രയെങ്കിലും ആയല്ലോ' എന്ന അലസ യുക്തിയല്ല. 'ഞാന്‍ എന്ത് ചെയ്തു എന്നതല്ല, എനിക്ക് എന്തെല്ലാം ചെയ്യാന്‍ സാധിക്കുമായിരുന്നു' എന്ന് തിരിച്ചറിയണം. 'അടങ്ങിയിരുന്ന് ആരാധനയില്‍ മുഴുകി ജീവിക്കുന്നവനല്ല, സമൂഹത്തിന്റെ തുടിപ്പുകളിലേക്ക് പകലന്തികളില്‍ പോരാടി ജയിക്കുന്നവനാണ് ശരിയായ വിശ്വാസി' (ബുഖാരി) എന്ന നബി വചനം നമ്മെ ഉള്ളുണര്‍ത്തേണ്ടതുണ്ട്. ഒരു മാസത്തെ ഇഅ്തികാഫിനെക്കാള്‍ പുണ്യകരമായത് ആവശ്യം തേടിവരുന്നവന്റെ സഹായിയായി പുറപ്പെടലാണെന്ന ഇബ്‌നുഅബ്ബാസിന്റെ(റ) വാക്കുകള്‍ആദര്‍ശ പ്രവര്‍ത്തകര്‍ക്ക് കരുത്തുപകരുന്നു. മതജീവിതത്തില്‍ മാതൃകയാവുന്നതോടൊപ്പം ദൗത്യങ്ങള്‍ക്ക് 'ജീവന്‍' നല്കുമ്പോഴാണ് ആദര്‍ശയൗവനം സാര്‍ഥകമാവുന്നത് (7:157). ചുറ്റുപാടുകള്‍ പരിശോധിക്കുക. നമ്മുടെ ഇടം നമുക്കവിടങ്ങളില്‍ കാണാം. മതത്തിന്റെ മഹിത സന്ദേശം ഗുണകാംക്ഷയോടെ കൈമാറേണ്ടവര്‍, ഇസ്‌ലാമിന്റെ കര്‍മതലം സജീവമാക്കേണ്ടത്, ആത്മീയതയെ 'നാട്ടുവൈദ്യമാക്കി' മതത്തെ മലിനപ്പെടുത്തിയവര്‍, പരിരക്ഷ തേടുന്ന പരിസ്ഥിതി, തണലേകേണ്ട അശരണര്‍, കൈത്താങ്ങാവേണ്ട അനാഥര്‍... നീയും നിന്റെ കുടുംബവും.

സുഹൃത്തേ നമ്മുടെ ദൗത്യമേഖല ചെറുതല്ല. ക്ഷുഭിത യൗവ്വനം, സമരോത്സുക യൗവ്വനം എന്നൊന്നും ഇന്ന് ആരേയും വിശേഷിപ്പിക്കാനാവുന്നില്ല. 'വിരല്‍ മുറിച്ച്' സത്യത്തിന്റെ പക്ഷത്ത് നില്ക്കുന്നത് പോയിട്ട് വിരലുയര്‍ത്താന്‍ പോലും വാക്കുകള്‍ മുന്നോട്ട് വരുന്നില്ല. സ്മാര്‍ട്ട് ഫോണില്‍ തള്ളവിരല്‍ കൊണ്ട് അക്ഷരങ്ങള്‍ അടുക്കി 'ചാറ്റു'മ്പോള്‍ താന്‍ ബോധപൂര്‍വം മടക്കി പൂഴ്ത്തി വെച്ചത് ഉശിരുള്ള തന്റെ 'ചൂണ്ടുവിരലാ'ണെന്ന് നാം നാം മറക്കുന്നു! ദൗത്യം ഓഡിറ്റ് ചെയ്യുമ്പോഴാണ് ചോദ്യങ്ങള്‍ ജനിക്കുന്നത്. തന്നോടും സമൂഹത്തോടും കുറേ ചോദ്യങ്ങള്‍. ചോദ്യങ്ങളുടെ ഉത്തരങ്ങളാണ് എന്റെ 'ദൗത്യം'. ഇരുട്ടുകള്‍ അടിസ്ഥാനമില്ലാത്തതാണത്. പ്രകാശം പരക്കുമ്പോള്‍ വിട്ടൊഴിയുന്ന പ്രതിഭാസം. ആ പ്രകാശമാണ് നെഞ്ചിലേറ്റേണ്ടത് (7:157). 'വത്തബഉന്നൂറല്ലദീ ഉന്‍സില മഅഹു'.. കൂര്‍പ്പിക്കും തോറും മുനയൊടിയാത്ത അകക്കാമ്പുള്ള പെന്‍സിലുപോലെ, കട്ടപിടിച്ച തിന്മയുടെ ഇരുട്ടുകള്‍ക്കെതിരില്‍ മുനയൊടിയാത്ത ആദര്‍ശവുമായി പൊരുതുക. അതാണ് യുവത്വം.

By  ജാബിര്‍ അമാനി @ ശബാബ് വാരിക 

നന്മ ചെയ്താല്‍ പകരം നന്മ

തോട്ടം കാവല്‍ക്കാരനായ യുവാവ് ഉച്ചഭക്ഷണമായ റൊട്ടി തിന്നുകയാണ്. എവിടെനിന്നോ ഒരു നായ അവന്‍െറ മുന്നില്‍ പ്രത്യക്ഷപ്പെട്ടു. വാലാട്ടി യുവാവിന്‍െറ കണ്ണിലേക്ക് ആര്‍ത്തിയോടെ നോക്കുന്നു. അവന് ദയ തോന്നി. റൊട്ടി മുറിച്ച് ഒരു കഷണം വായിലിടുമ്പോള്‍ മറ്റൊരു കഷണം നായക്ക് ഇട്ടുകൊടുക്കുന്നു. അന്നേരം ആ വഴി ഒരു യാത്രക്കാരന്‍ കടന്നുവന്നു -പ്രവാചകന്‍െറ പൗത്രന്‍ ഹസന്‍ ഇബ്നു അലി. അദ്ദേഹം രംഗം കൗതുകത്തോടെ നോക്കിനിന്നു. ‘എന്താണ് ഈ നായക്ക് റൊട്ടി കൊടുക്കാന്‍ നിന്നെ പ്രേരിപ്പിച്ചത്?’ -ഹസന്‍ ചോദിച്ചു. ‘അത് വായിലേക്ക് നോക്കിനില്‍ക്കുന്നു. അപ്പോള്‍ അതിന് കൊടുക്കാതെ ഞാന്‍ എങ്ങനെ തിന്നും’? - മറുപടി കേട്ടയുടന്‍ ഹസന്‍ തോട്ടമുടമയുടെ വീട്ടിലേക്ക് പോയി. പണംകൊടുത്ത് അടിമയായ ആ യുവാവിനെ സ്വതന്ത്രനാക്കി. പിന്നെ തോട്ടം വിലക്കുവാങ്ങി അതവന് ദാനമായി നല്‍കി. നായ - ഇസ്ലാമിക വിധിപ്രകാരം അത് തലയിട്ട പാത്രം വൃത്തിയാകാന്‍ ഏഴുപ്രാവശ്യം കഴുകണം. ചീത്ത മനുഷ്യരെ നായയോട് ഉപമിക്കുക സാധാരണം. ഈ മിണ്ടാപ്രാണിക്ക് വിശപ്പടക്കാന്‍ റൊട്ടി കൊടുക്കുമ്പോള്‍ ആ സദ്കൃത്യം ആരെങ്കിലും കാണണമെന്ന് യുവാവ് കൊതിച്ചില്ല, പ്രതീക്ഷിച്ചതുമില്ല. മറിച്ച് നായയോട് സ്നേഹവും ദയയും തോന്നി. അതിന് വിശപ്പടക്കാന്‍ കൊടുക്കേണ്ടത് തന്‍െറ കടമയാണെന്ന് കണ്ടു.

ഒരു വിശ്വാസിയുടെ മനസ്സ് എപ്പോഴും ഇങ്ങനെയായിരിക്കണം. താന്‍ വിശപ്പടക്കുമ്പോള്‍ വിശന്നുവലയുന്നവരെപ്പറ്റി ചിന്തയുണ്ടാകണം. ‘അണുത്തൂക്കം നന്മ ആരെങ്കിലും ചെയ്താല്‍ അത് അവന്‍ കാണും’ -ഖുര്‍ആന്‍ വാഗ്ദത്തം ചെയ്യുന്നു. എന്നാല്‍, ദൈവത്തിലും പരലോകത്തിലും വിശ്വസിക്കുന്ന ഒരാള്‍ നന്മ ചെയ്യുമ്പോള്‍ ദൈവപ്രീതിയല്ലാതെ മറ്റൊരു താല്‍പര്യവും ഉള്ളിലുണ്ടാകാന്‍ പാടില്ല. മാനുഷികമായ ഒരു കടമ നിര്‍വഹിക്കുകയാണെന്ന വിചാരം മാത്രം. ഇങ്ങനെ ശുദ്ധമായ മനസ്സോടെ നന്മ ചെയ്താല്‍ നന്മ തിരിച്ചുകിട്ടുകതന്നെ ചെയ്യും. ഇഹലോകത്തും അവര്‍ ആഗ്രഹിക്കാതെയും പ്രതീക്ഷിക്കാതെയും അതിന്‍െറ സ്വാഭാവിക ഗുണം ലഭിച്ചെന്നു വരും. ഇതിന് ധാരാളം ഉദാഹരണങ്ങള്‍ പറയാനുണ്ട്. ഒരു ബ്രിട്ടീഷ് സമ്പന്നകുടുംബം വാരാന്ത്യ വിശ്രമത്തിനായി ഗ്രാമത്തിലെ ഒരു തോട്ടത്തിലത്തെി. കുടുംബത്തിലെ രണ്ട് കൊച്ചുകുട്ടികള്‍ രക്ഷിതാക്കളുടെ കണ്ണുവെട്ടിച്ച് അടുത്തുള്ള ഒരു കുളത്തില്‍ നീന്താനിറങ്ങി. ഒരു കുട്ടി വെള്ളത്തിനടിയിലേക്ക് താഴുന്നു. തോട്ടക്കാരന്‍െറ പുത്രനായ ബാലന്‍ ഈ രംഗം കണ്ടു. അവന്‍ കുളത്തിലേക്ക് എടുത്തുചാടി കുട്ടിയെ മരണത്തില്‍നിന്ന് രക്ഷിച്ചു. കഥയറിഞ്ഞ സമ്പന്നകുടുംബത്തിന് അവന് എന്തെങ്കിലും പാരിതോഷികം കൊടുക്കണമെന്ന് നിര്‍ബന്ധം. ബാലന്‍െറ പിതാവിനോട് സംസാരിച്ചു. അവന് പഠിക്കാന്‍ വലിയ മോഹമാണ്. വിദ്യാഭ്യാസത്തിനായി എന്തെങ്കിലും ചെയ്താല്‍ മതി -അയാള്‍ പറഞ്ഞു. അവര്‍ അപ്രകാരം ചെയ്തു. ആ ദരിദ്ര ബാലനാണ് പിന്നീട് വലിയ ശാസ്ത്രജ്ഞനായി മാറിയ, പെന്‍സിലിന്‍ കണ്ടുപിടിച്ച ഡോ. അലക്സാണ്ടര്‍ ഫ്ളെമിങ്! ആ ബാലന്‍ രക്ഷിച്ച കുട്ടിയാണ് പിന്നീട് ബ്രിട്ടീഷ് പ്രധാനമന്ത്രിയായി ഉയര്‍ന്ന വിന്‍സ്റ്റണ്‍ ചര്‍ച്ചില്‍!

ഒരു ഭൗതിക താല്‍പര്യവുമില്ലാതെ മറ്റുള്ളവര്‍ക്ക് നന്മ ചെയ്യുക. ഇങ്ങനെ നന്മ ചെയ്യുന്നവര്‍ക്ക് ദൈവം എത്രയോ ഇരട്ടി ഗുണങ്ങള്‍ പകരമായി തരും. നന്മ പ്രവര്‍ത്തിക്കുന്നതിന്‍െറ പ്രതിഫലം നന്മയല്ലാതെ മറ്റെന്തെങ്കിലുമാണോ? -ഖുര്‍ആന്‍ ചോദിക്കുന്നു.

By മുഹമ്മദ് കുട്ടശ്ശേരി @ മാധ്യമം ദിനപത്രം 

ആത്മനിയന്ത്രണത്തിന്‍െറ വ്രതം

റമദാനിലാണ് നോമ്പ് നിര്‍ബന്ധമാക്കിയ കല്‍പന വരുന്നത്. വിശുദ്ധ ഖുര്‍ആനിന്‍െറ അവതരണമാസത്തെയാണ് നിര്‍ബന്ധ നോമ്പിനായി അല്ലാഹു തെരഞ്ഞെടുത്തത്. മൂന്ന് ഘട്ടങ്ങളായാണ് നോമ്പ് നിര്‍ബന്ധമായി മാറിയത്. നോമ്പ് അനുഷ്ഠിക്കുകയോ അല്ലെങ്കില്‍ ഒരു അഗതിക്ക് ആഹാരം നല്‍കുകയോ ചെയ്യുക, അതില്‍ ഇഷ്ടമുള്ളത് തെരഞ്ഞെടുക്കാമായിരുന്നു. അതായിരുന്നു ഒന്നാമത്തെ ഘട്ടം. രണ്ടാം ഘട്ടം നോമ്പ് നിര്‍ബന്ധമാണെന്ന കല്‍പനയാണ്. യാത്രക്കാരോ രോഗികളോ ആണെങ്കില്‍ ആ എണ്ണം മറ്റൊരു ദിവസം പൂര്‍ത്തിയാക്കിയാല്‍ മതിയെന്ന് നിര്‍ദേശിക്കപ്പെട്ടു. നോമ്പിന്‍െറ സ്വഭാവത്തിലുള്ള വ്യത്യാസമാണ് മൂന്നാംഘട്ടം. അല്ലാഹുവിന്‍െറ നിര്‍ദേശം വന്നത് പ്രഭാതം പൊട്ടിവിടരുമ്പോള്‍ നോമ്പ് തുടങ്ങാനും സൂര്യാസ്തമയം വരെ അത് തുടരാനുമാണ്. രാത്രിയില്‍ ആഹാരപദാര്‍ഥവും സ്ത്രീ പുരുഷ ബന്ധവും അനുവദിച്ചു. ഈ രൂപത്തിലുള്ള വ്രതാനുഷ്ഠാനമാണ് സത്യവിശ്വാസികള്‍ നിര്‍വഹിക്കേണ്ടത്.

ആത്മനിയന്ത്രണമാണ് നോമ്പുകൊണ്ടുദ്ദേശിക്കുന്നത്. ജീവിതത്തില്‍ വീഴ്ച വന്നാല്‍ പ്രായശ്ചിത്തമായി നോമ്പ് എടുക്കണമെന്നാണ് നിര്‍ദേശം. സാമൂഹികഭദ്രത, പട്ടിണി നിര്‍മാര്‍ജനം ഇതിനെല്ലാം വ്രതം പ്രയോജനം നല്‍കും. അതുകൊണ്ടാണ് നോമ്പിന് പരിഹാരമായി ആഹാരം നല്‍കണമെന്ന നിര്‍ദേശം നല്‍കിയത്. ഹജ്ജിലെ നിര്‍ബന്ധാനുഷ്ഠാനങ്ങളില്‍ വല്ല തകരാറും സംഭവിച്ചാല്‍ നോമ്പ് എടുക്കുകയോ പാവങ്ങള്‍ക്ക് ധര്‍മം ചെയ്യുകയോ മൃഗത്തെ ബലി നല്‍കി ദാനം നല്‍കുകയോ വേണമെന്ന് നിര്‍ദേശിച്ചു. അബദ്ധത്തില്‍ കൊലപാതകം സംഭവിച്ചാലും പ്രതിജ്ഞ ലംഘിച്ചാലും ഹറമില്‍നിന്ന് വല്ല ജീവികളെയും വേട്ടയാടി വധിച്ചാലും പ്രായശ്ചിത്തമായി നോമ്പ് അനുഷ്ഠിക്കാനാണ് മതം പറയുന്നത്.

ചുരുക്കത്തില്‍, മനുഷ്യനെ അടിമത്തത്തില്‍നിന്ന് മോചിപ്പിച്ച് സ്വതന്ത്രനാക്കുകയും പട്ടിണിപ്പാവങ്ങള്‍ക്ക് ആഹാരം നല്‍കി ജീവിതസൗകര്യം നല്‍കുകയും ചെയ്യുകയെന്നതിന് വ്രതാനുഷ്ഠാനം പ്രചോദനം നല്‍കുന്നു. ശരീരവികാരമാണ് ഏറ്റവുമധികം നിയന്ത്രിക്കേണ്ടത്. വല്ലവനും നോമ്പ് അനുഷ്ഠിച്ച് ഇണയുമായി ലൈംഗിക ബന്ധത്തിലേര്‍പ്പെട്ടാല്‍ തുടര്‍ച്ചയായി രണ്ടുമാസം നോമ്പ് അനുഷ്ഠിക്കണമെന്നും അല്ലെങ്കില്‍ 50 പാവങ്ങള്‍ക്ക് ആഹാരം നല്‍കണമെന്നുമാണ് ഇസ്ലാം നിര്‍ദേശിക്കുന്നത്. ഈ പ്രത്യേക നിര്‍ദേശമെല്ലാംതന്നെ പാവങ്ങളുടെ വിശപ്പ് മനസ്സിലാക്കി ആഹാരം നല്‍കാനുള്ള പ്രചോദനമാണെന്ന് വ്യക്തമാക്കുന്നു.

By സി പി ഉമർ സുല്ലമി @ മാധ്യമം ദിനപത്രം 

വ്രതം: പകരമാകില്ല, മറ്റൊന്നും

റമസാനിലെ വ്രതാനുഷ്ഠാനത്തിന് പകരം വയ്ക്കാൻ മറ്റൊന്നില്ല. പ്രവാചകാനുചരൻ അബൂഉമാമ ഒരിക്കൽ ചോദിച്ചു:‘പ്രവാചകരേ! എന്നെ സ്വർഗത്തിൽ പ്രവേശിപ്പിക്കുന്ന ഒരു കർമം പറഞ്ഞു തരൂ’. പ്രവാചകൻ:‘നീ വ്രതമനുഷ്ഠിക്കുക, അതിന് തുല്യമായി മാറ്റൊന്നില്ല’. അനുചരൻ വീണ്ടും: ‘മറ്റൊരു കർമം പറഞ്ഞു തരൂ’. പ്രവാചകൻ: ‘നോമ്പെടുക്കൂ അതിനെക്കാൾ നല്ലതൊന്ന് വേറെയില്ല’. അനുചരൻ: ‘മറ്റൊന്നു കൂടി പറഞ്ഞു തരൂ’. മൂന്നാമതും പ്രവാചകൻ ആവർത്തിച്ചു: ‘വ്രതമനുഷ്ഠിക്കൂ, അതിന് പകരം വയ്ക്കാൻ മറ്റൊന്നില്ല’. ഇതാണ് വ്രതാനുഷ്ഠാനത്തിന്റെ മഹത്വം.

മറ്റാർക്കും കണ്ടെത്താനാവാത്ത വിധം കുറ്റകൃത്യങ്ങൾ സ്വകാര്യവത്കരിക്കപ്പെട്ട ലോകമാണ് നമ്മുടേത്. സ്വകാര്യതകളിലെ പോരായ്മകൾ മറച്ചുപിടിച്ച് മറ്റൊരു മുഖവുമായാണ് മനുഷ്യരിലധികവും പുറത്തിറങ്ങുന്നത്. ഏത് ദുർമോഹവും നിമിഷവേഗം കൊണ്ട് കൈവരിക്കാനും എത്രയും നിഗൂഢമാക്കാനും വളരെ എളുപ്പം. ചീഞ്ഞുനാറുന്ന പാപങ്ങളുടെ സ്വകാര്യലോകത്തെയാണ് റമസാൻ കാര്യമായി ചികിത്സിക്കുന്നത്. അവിടെയുള്ള അഴുക്കിനെ അകറ്റുകയും ശീലങ്ങളെ മാറ്റുകയും മോഹങ്ങളെ മെരുക്കുകയും ചെയ്തുകൊണ്ട് അകവും പുറവും ശുദ്ധമാക്കി പൂർണവിശുദ്ധിയോടെ ജീവിക്കാൻ പരിശീലിപ്പിക്കുന്നു. ഭക്തിയും ശുദ്ധിയും പരസ്യമെന്നതിലേറെ രഹസ്യമാണല്ലോ! അതാണ് വ്രതാനുഷ്ഠാനത്തിന്റെ അന്തസ്സാരവും ചൈതന്യവും.

‘നന്മ ചെയ്യുക, പ്രചരിപ്പിക്കുക; തിന്മ വർജിക്കുക, അത് പ്രതിരോധിക്കുക’ എന്നതാണ് ഇസ്‌ലാമിക ആശയങ്ങളുടെ ആകെത്തുക. തിന്മ ഉപേക്ഷിക്കുന്നതിനെക്കാൾ എളുപ്പമാണ് നന്മ ചെയ്യൽ. ആരാധനാ കർമങ്ങൾ, ദാനധർമങ്ങൾ, ഖുർആൻ പാരായണം, രോഗികളെ സന്ദർശിക്കൽ തുടങ്ങിയവയെല്ലാം എളുപ്പമാണ്. അത്ര എളുപ്പമല്ല, നാവിനെ സൂക്ഷിക്കലും കണ്ണിനെ നിയന്ത്രിക്കലും കോപം അടക്കലും. ഇതിനു കൂടുതൽ അധ്വാനവും ശ്രമവും ആവശ്യമാണ്. അനുവദനീയമായ ഭക്ഷണവും പാനീയങ്ങളും പോലും നിശ്ചിത സമയത്തേക്കു വേണ്ടെന്നുവച്ച് ശക്തമായ പരിശീലനം നൽകി, നിഷിദ്ധമായതിലേക്ക് അടുക്കാതിരിക്കുവാനുള്ള വഴിയൊരുക്കുകയാണ് റമസാൻ വ്രതം.

 by എം.സ്വലാഹുദ്ദീൻ മദനി @ മനോരമ ദിനപത്രം 

കേട്ടതെല്ലാം സത്യമോ?

"സമാധാനവുമായോ ഭീതിയുമായോ ബന്ധപ്പെട്ട വല്ല വാര്‍ത്തയും അവര്‍ക്ക് വന്നുകിട്ടിയാല്‍ അവരത് പ്രചരിപ്പിക്കുകയായി. അവരത് റസൂലിന്‍റെയും അവരിലെ കാര്യവിവരമുള്ളവരുടെയും തീരുമാനത്തിന് വിട്ടിരുന്നുവെങ്കില്‍ അവരുടെ കൂട്ടത്തില്‍ നിന്ന് നിരീക്ഷിച്ച് മനസ്സിലാക്കാന്‍ കഴിവുള്ളവര്‍ അതിന്‍റെ യാഥാര്‍ത്ഥ്യം മനസ്സിലാക്കിക്കൊള്ളുമായിരുന്നു. നിങ്ങളുടെ മേല്‍ അല്ലാഹുവിന്‍റെ അനുഗ്രഹവും കാരുണ്യവും ഇല്ലായിരുന്നുവെങ്കില്‍ നിങ്ങളില്‍ അല്‍പം ചിലരൊഴികെ പിശാചിനെ പിന്‍പറ്റുമായിരുന്നു." [അദ്ധ്യായം 4 നിസാഅ് 83] 

 മനുഷ്യർ ഒട്ടേറെ കാര്യങ്ങളിൽ വൈവിധ്യം പുലർത്തുന്നതുപോലെ കാര്യഗ്രഹണത്തിലും ചിന്താശേഷിയിലും വ്യത്യസ്തത പുലർത്തുന്നുണ്ട്‌. ഒരു ക്ലാസിലോ സദസ്സിലോ പറയുന്ന ഒരു കാര്യം പലരും വിവിധ രൂപത്തിൽ മനസ്സിലാക്കാറുണ്ട്‌. കേട്ട കാര്യം മുൻപിൻ നോക്കാതെ വിശ്വസിക്കുകയും പ്രചരിപ്പിക്കുകയും ചെയ്യുന്നവരെ കാണാം. ചിലർ കാര്യങ്ങൾ പഠിച്ചും അന്വേഷിച്ചും മാത്രമേ മറ്റുള്ളവർക്ക്‌ കൈമാറുകയുള്ളൂ. കപട വിശ്വാസികളുടേയും ചില ദുർബലരായ മുസ്‌ലിംകളുടേയും ഒരു തെറ്റായ പ്രവണതയേയാണ് മേൽ ഖുർആനിക വചനം സൂചിപ്പിക്കുന്നത്‌. ഭയപ്പെടുത്തുന്നതോ സന്തോഷിപ്പിക്കുന്നതോ ആയ എന്തെങ്കിലും കാര്യം കേട്ടാൽ അതിന്റെ യാഥാർത്ഥ്യമോ പൊരുളോ അന്വേഷിക്കാൻ തുനിയാതെ ഉടനെ അതങ്ങ്‌ പ്രചരിപ്പിച്ചു തുടങ്ങും. കാര്യങ്ങൾ കൂടുതൽ ഗൗരവത്തിൽ ചിന്തിച്ചു മനസ്സിലാക്കാൻ പ്രാപ്തിയുള്ള പ്രവാചകനോടോ തന്റേടവും ചിന്താശീലവുമുള്ള നേതാക്കളോടോ അക്കാര്യം കൂടിയാലോചിച്ച്‌ തികച്ചും യുക്തവും സത്യസന്ധവുമായ ഒരു നിലപാടാണ് അവർ കൈകൊള്ളേണ്ടത്‌. കാര്യങ്ങളുടെ നിജസ്ഥിതി ബോധ്യപ്പെട്ട ശേഷമേ അത്‌ പ്രചരിപ്പിക്കാൻ തുനിയാവൂ.

 ആരെങ്കിലും സോഷ്യൽ മീഡിയകളിൽ ഫോർ വേഡ്‌ ചെയ്യുന്ന പല മെസേജുകളും യാഥാർത്ഥ്യം അന്വേഷിക്കാതെ മറ്റുള്ളവരുമായി പങ്കുവെക്കുന്നവർ മേൽ വചനത്തിന്റെ ഗൗരവം ഉൾക്കൊള്ളേണ്ടതുണ്ട്‌. ഊഹങ്ങളുടേയും അസത്യങ്ങളുടേയും പ്രചാരകരാവരുത്‌ മുസ്‌ലിംകൾ. അറിഞ്ഞകാര്യം ഉത്തരവാദപ്പെട്ട നേതാക്കളോടോ കാര്യപ്രാപ്തിയുള്ള വ്യക്തികളോടോ കൂടിയാലോചിച്ച്‌ സമൂഹത്തിൽ ഗുണകരമാകുന്ന തരത്തിൽ മാത്രമേ പ്രചരിപ്പിക്കാവൂ. നമുക്ക്‌ മനസ്സിലാകത്തക്കകാര്യം അറിവുള്ളവരോട്‌ ആരാഞ്ഞ്‌ മനസ്സിലുറപ്പിക്കണം. "കേട്ടതെല്ലാം പ്രചരിപ്പിക്കുന്ന സ്വഭാവം മാത്രം മതി ഒരാൾ കുറ്റവാളിയായിത്തീരാൻ" എന്ന് നബി (സ) പഠിപ്പിക്കുന്നു. ''നിങ്ങൾ ഊഹത്തിന്റെ പിന്നാലെ പോകരുത്‌. ഊഹം വലിയ കളവാകാം" എന്നു ഇസ്‌ലാമിക അധ്യാപനങ്ങളിൽ കാണാം. അസത്യവും അർദ്ധസത്യവും പ്രചരിപ്പിക്കുന്നത്‌ പിശാചിനെ സഹായിക്കലാണ്. സമൂഹത്തിൽ ദൂരവ്യാപകമായ വിപത്തുകൾ സൃഷ്ടിക്കാൻ അത്‌ കാരണമാവും. പിശാച്‌ വിജയിക്കുന്ന സാഹചര്യം ഉടലെടുക്കും. അതിനാൽ എന്ത്‌ കേട്ടാലും അതിന്റെ സത്യാവസ്ഥ മനസ്സിലാക്കാൻ ശ്രമിക്കണം.

By പി അബ്ദു സലഫി @ പുടവ

തബ്‌ലീഗ് ജമാഅത്തും വ്യതിയാനങ്ങളും

തബ്‌ലീഗ് ജമാഅത്ത് എന്ന പേര് വാക്കിലും അര്‍ഥത്തിലും കേള്‍ക്കാന്‍ സുന്ദരമാണ്.ജമാഅതുത്തബ്‌ലീഗ് എന്ന വാക്കിന്റെ അര്‍ഥം പ്രബോധകസംഘം എന്നാണ്. സംഘടനയുടെ പേരുപോലെ തന്നെ സംഘടനയില്‍ പ്രവര്‍ത്തിക്കുന്നവരുടെ വേഷവും സ്വഭാവങ്ങളും ആകര്‍ഷകമാണ്. പക്ഷെ പ്രസ്തുത സംഘടന ഇസ്‌ലാമികാദര്‍ശ പ്രകാരം ഒരുപാട് വ്യതിയാനങ്ങള്‍ നിറഞ്ഞതാണ് എന്ന യാഥാര്‍ഥ്യം അതില്‍ പ്രവര്‍ത്തിക്കുന്ന പലര്‍ക്കും അറിഞ്ഞുകൂടാ. ഇവരുടെ ലക്ഷ്യം പരലോക വിജയമാണെങ്കിലും അതിലേക്കുള്ള മാര്‍ഗവും പ്രമാണങ്ങളും പൂര്‍ണമായും ഇസ്‌ലാമികമല്ല. ചില വസ്തുതകള്‍ ചൂണ്ടിക്കാണിക്കാം.

ഒന്ന്) സത്യവിശ്വാസികള്‍ പ്രമാണമായി സ്വീകരിക്കേണ്ടത് ഖുര്‍ആനും സുന്നത്തുമാണെന്നത് മുസ്‌ലിം ലോകത്ത് തര്‍ക്കമില്ലാത്ത കാര്യമാണല്ലോ. എന്നാല്‍ തബ്‌ലീഗ് ജമാഅത്തുകാര്‍ പ്രമാണമാക്കി ജീവിക്കുന്നത് സൂഫിയും ഹനഫീ മദ്ഹബുകാരനുമായ മുഹമ്മദ് ഇല്‍യാസ് എന്ന വ്യക്തിയെയാണ്. അവര്‍ ജനങ്ങളെ പഠിപ്പിക്കുന്നത് ഖുര്‍ആനോ സുന്നത്തോ അല്ല, മറിച്ച് അല്‍ബലാഗ് എന്ന ഗ്രന്ഥത്തില്‍ രേഖപ്പെടുത്തിയ ചില കഥകളാണ്.

രണ്ട്) ഇവര്‍ പ്രബോധനരംഗത്തും പ്രവര്‍ത്തന രംഗത്തും ഒന്നാംസ്ഥാനം നല്കുന്നത് തൗഹീദിനല്ല. മറിച്ച് നമസ്‌കാരത്തിനാണ്. അതുകൊണ്ടു തന്നെ തബ്‌ലീഗ് ജമാഅത്തില്‍ പ്രവര്‍ത്തിക്കുന്ന മിക്ക ആളുകളും ശിര്‍ക്കില്‍ നിന്ന് മുക്തരല്ല. പ്രവാചകന്മാരും സത്യവിശ്വാസികളും എക്കാലത്തും പ്രബോധനരംഗത്ത് ഒന്നാം സ്ഥാനം നല്കിവരുന്നത് തൗഹീദിനാണ്. ''ഞാനല്ലാതെ യാതൊരു ദൈവവുമില്ല. അതിനാല്‍ എന്നെ നിങ്ങള്‍ ആരാധിക്കൂ എന്ന് ബോധനം നല്കിക്കൊണ്ടല്ലാതെ താങ്കള്‍ക്കു മുമ്പ് ഒരു ദൂതനെയും അയച്ചിട്ടില്ല'' (അന്‍ബിയാഅ് 25). നബി(സ) പറയുന്നു: ''ഞാനും എനിക്കു മുമ്പ് കഴിഞ്ഞുപോയിട്ടുള്ള പ്രവാചകന്മാരും പറഞ്ഞിട്ടുള്ള വചനങ്ങളില്‍ ഏറ്റവും ശ്രേഷ്ഠമായിട്ടുള്ളത് ലാഇലാഹ ഇല്ലല്ലാഹ് എന്ന തൗഹീദിന്റെ വചനമാണ്'' (മാലിക്, തിര്‍മിദി, മുവത്വ 1:215)

ഇവര്‍ക്ക് തൗഹീദുര്‍റുബൂബിയ്യത്ത്(സംരക്ഷണത്തിലെ ഏകത്വം) മാത്രമേയുള്ളൂ. തൗഹീദുല്‍ ഉലൂഹിയത്ത്(ആരാധനയിലെ ഏകത്വം) ഇല്ല എന്നതാണ് വസ്തുത. കേരളത്തിലെ സമസ്തക്കാര്‍ നിലനിര്‍ത്തിപ്പോരുന്ന അന്ധവിശ്വാസങ്ങളും അനാചാരങ്ങളും ഇവരും നിലനിര്‍ത്തിപ്പോരുന്നു എന്ന കാര്യം ഇവരുടെ ഗ്രന്ഥങ്ങള്‍ തന്നെ തെളിയിക്കുന്നു. നബി(സ)യെ വസീലയാക്കി പ്രാര്‍ഥിക്കാമെന്ന് സമസ്തക്കാര്‍ സൂറത്തുന്നിസാഇലെ 64-ാം വചനം ദുര്‍വ്യാഖ്യാനിച്ച് ജനങ്ങളെ തെറ്റിദ്ധരിപ്പിക്കാറുണ്ട്. അതേ വാദം ഇവരും അംഗീകരിക്കുന്നു. ആദം നബി(അ) പോലും നബി(സ)യെ തവസ്സുലാക്കി പ്രാര്‍ഥിച്ചു എന്ന് ഇവര്‍ രേഖപ്പെടുത്തുന്നു. (സ്വലാത്തിന്റെ മഹത്വങ്ങള്‍, പേജ് 33)

മൂന്ന്) ഏതുതരം ശിര്‍ക്കും കുഫ്‌റും ചെയ്യുന്ന വ്യക്തികള്‍ക്കും അവരോടൊപ്പം അണിചേരാം. നമസ്‌കാരം നിലനിര്‍ത്തിയാല്‍ മാത്രം മതി. ഏതു ത്വരീഖത്തുകാരനും അവരോടൊപ്പം പ്രവര്‍ത്തിക്കാം. അവരുടെ നേതാവിനെ പ്രശംസിച്ചുകൊണ്ട് രേഖപ്പെടുത്തിയതു ശ്രദ്ധിക്കുക: ''ചിശ്ത്തിയ്യ, ഖാദിരിയ്യ, മാതുരീദിയ്യ, നഖ്ശബന്ദിയ്യ എന്നിങ്ങനെ നാലു ത്വരീഖത്തിന്റെ ശൈഖാണ് സകരിയ്യാ സാഹിബ്''(തബ്‌ലീഗിന്റെ മഹത്വങ്ങള്‍, മുഖവുര, പേജ് 3). ത്വരീഖത്തുകാരെപ്പോലെ തന്നെ ശൈഖിന്റെ മുന്നില്‍ എല്ലാം അര്‍പ്പിച്ച് മയ്യിത്തുപോലെ കിടക്കണം എന്നത് ഇവരുടെ ദര്‍ശനമാണ് (അമലുകളുടെ മഹത്വങ്ങള്‍, പേജ് 395,396).

നാല്) സമസ്തക്കാരെപ്പോലെ മദ്ഹബുകള്‍ നിര്‍ബന്ധമാണെന്ന് ഇവരും വാദിക്കുന്നു. സമസ്തക്കാര്‍ മദ്ഹബ് വലിച്ചെറിഞ്ഞ് നാട്ടാചാരം സ്വീകരിക്കുന്നു. ഇവര്‍ മദ്ഹബ് വലിച്ചെറിഞ്ഞു മുഹമ്മദ് ഇല്‍യാസിനെ അന്ധമായി അനുകരിക്കുന്നു. സമസ്തക്കാരെപ്പോലെ സ്ത്രീപള്ളി പ്രവേശനം ഇവര്‍ക്കും ഹറാമാണ്.

അഞ്ച്) ഹഖ്ഖ്, ജാഹ്, ബര്‍ക്കത്ത് എന്നിവ മുന്‍നിര്‍ത്തി തവസ്സുല്‍ ചെയ്യല്‍ ഇവരും അനുവദനീയമാക്കുന്നു. (അമലുകളുടെ മഹത്വങ്ങള്‍, പേജ് 94.)

ആറ്) മഹത്തുക്കള്‍ മുഖേന പരലോകത്ത് പാപമോചനം ലഭിക്കും എന്ന ശിര്‍ക്കന്‍ വാദവും ഇവര്‍ രേഖപ്പെടുത്തി വെച്ചിട്ടുണ്ട്. (അമലുകളുടെ മഹത്വങ്ങള്‍, പേജ് 353)

ഏഴ്) നന്മ കല്പിക്കാറുണ്ടെങ്കിലും തിന്മ നിരോധിക്കല്‍ പ്രവര്‍ത്തി പഥത്തില്‍ ഇല്ല. പ്രത്യേകിച്ചും ശിര്‍ക്ക് അവര്‍ വിരോധിക്കാറില്ല. അല്ലാഹുവല്ലാത്ത മഹത്തുകളോട് സഹായപ്രാര്‍ഥന നടത്തുന്നവരാണ് സമൂഹം പൊതുവില്‍. ശിര്‍ക്ക് എന്ന പാപം സകല സല്‍ക്കര്‍മങ്ങളെയും നിഷ്ഫലമാക്കിക്കളയും എന്നാണ് വിശുദ്ധ ഖുര്‍ആന്‍ പഠിപ്പിക്കുന്നത്. അക്കാര്യം തബ്‌ലീഗ് ജമാഅത്തിലെ നേതാക്കള്‍ അവരുടെ അനുയായികളെ പഠിപ്പിക്കാറില്ല. അല്ലാഹു പറയുന്നു: ''തീര്‍ച്ചയായും താങ്കള്‍ക്കും താങ്കളുടെ മുമ്പുള്ളവര്‍ക്കും സന്ദേശം നല്‍കപ്പെട്ടിട്ടുള്ളത് ഇപ്രകാരമാകുന്നു. താങ്കള്‍ അല്ലാഹുവിന് പങ്കുകാരനെ ചേര്‍ക്കുന്നപക്ഷം തീര്‍ച്ചയായും താങ്കളുടെ കര്‍മം നിഷ്ഫലമായിപ്പോകുകയും തീര്‍ച്ചയായും താങ്കള്‍ നഷ്ടക്കാരുടെ കൂട്ടത്തില്‍ ആകുകയും ചെയ്യും.''(സുമര്‍ 65)

തബ്‌ലീഗ് ജമാഅത്തുകാരെ സംബന്ധിച്ചേടത്തോളം നമസ്‌കാരം നിലനിര്‍ത്തിയാല്‍ മതി. നമസ്‌കാരം ഉള്‍പ്പെടെ എല്ലാ സല്‍കര്‍മങ്ങളെയും ബാത്വിലാക്കിക്കളയുന്ന ശിര്‍ക്കിനെ അവര്‍ ഒട്ടും ഭയപ്പെടാറില്ല. അതിനെ അവര്‍ എതിര്‍ക്കാതിരിക്കുന്നത്, എതിര്‍ത്താല്‍ അവരുടെ സംഘടന തന്നെ നിലനില്ക്കുകയില്ല എന്നതുകൊണ്ടും പണ്ഡിതനും പാമരനും ഒരേ അന്ധവിശ്വാസത്തില്‍ ഉറച്ചു നില്ക്കുന്നവരാണെങ്കില്‍ ആര്‍ക്കും ആരെയും എതിര്‍ക്കാന്‍ അവകാശമില്ല എന്നതുകൊണ്ടുമാണ്.

എട്ട്) ഇവരുടെ പ്രബോധന മേഖല പള്ളികളാണ്. പള്ളികളിലിരുന്ന് അവരുടെ നേതാവെന്ന പേരിലറിയപ്പെടുന്ന പണ്ഡിതന്‍, അവരുടെ തന്നെ മറ്റൊരു പണ്ഡിതന്‍ എഴുതിയ ഒരു കഥാപുസ്തകം വായിച്ചുകൊടുക്കലാണ് ഇവരുടെ പ്രബോധനരീതി. പ്രസ്തുത പുസ്തകത്തില്‍ നിര്‍മിതങ്ങളും ദുര്‍ബലങ്ങളുമായ കഥകളായിരിക്കും ബഹുഭൂരിപക്ഷവും. അമുസ്‌ലിംകളെ ഇസ്‌ലാമിലേക്ക് ക്ഷണിക്കുകയെന്ന അജണ്ടയും ഇവര്‍ക്കില്ല. കാരണം ഇവരുടെ പ്രബോധന പ്രവര്‍ത്തനങ്ങള്‍ അധികവും പള്ളികളെ കേന്ദ്രീകരിച്ചുകൊണ്ടുള്ളതാണ്.

ഒന്‍പത്) ഇവര്‍ ജനങ്ങളെ പഠിപ്പിക്കാറുള്ളത് ഫദ്വാഇലുകള്‍ (ശ്രേഷ്ഠതകള്‍) മാത്രമാണ്. അഥവാ ചെറിയ കര്‍മങ്ങള്‍ക്ക് വലിയ പ്രതിഫലം വാഗ്ദാനം ചെയ്യുന്നതും ചെറിയ കുറ്റങ്ങള്‍ക്ക് വലിയ ശിക്ഷ അറിയിക്കുന്നതുമായി ഒരുപാട് റിപ്പോര്‍ട്ടുകള്‍ നിലവിലുണ്ട്. ഇവയില്‍ മിക്കതും ഹദീസ് നിദാനശാസ്ത്ര പണ്ഡിതന്മാര്‍ തള്ളിയതും തെളിവിനു കൊള്ളാത്തതുമായ നിര്‍മിതങ്ങളോ ദുര്‍ബലങ്ങളോ ആയിട്ടുള്ള വാറോലകളാണ്. ഇസ്‌ലാം പ്രതിഫലം വാഗ്ദാനം ചെയ്യുന്നത് ദൃഢമായ ഏകദൈവ വിശ്വാസത്തിന്റെയും അതിന്റെ അടിസ്ഥാനത്തിലുള്ള ത്യാഗസമ്പൂര്‍ണമായ കര്‍മങ്ങളുടെയും അടിസ്ഥാനത്തിലാണ്. ഭൗതികമായി കണ്ണഞ്ചിപ്പിക്കുന്ന പല പ്രസ്ഥാനങ്ങളും ആത്മീയമായി വിലയിരുത്തുമ്പോള്‍ വട്ടപ്പൂജ്യമായിരിക്കും എന്ന് ഓര്‍ക്കുക.

By പി കെ മൊയ്തീന്‍ സുല്ലമി @ ശബാബ്‌ വാരിക

കൈകൾ ഉയർത്തുക

വേനൽ കടുത്തു. കുടിനീർ വറ്റി. പതിവിലും കവിഞ്ഞ ചൂട്‌. അഗോള താപനം. കാരണങ്ങളിൽ ചിലതെങ്കിലും മനുഷ്യപ്രവർത്തനം. ശാസ്ത്രം കണ്ടെത്തിപ്പറയുന്നു : 'അനിയന്ത്രിതമായ പ്രകൃതി ചൂഷണവും ആസക്തി നിറഞ്ഞ ആഢംബര ഭ്രമവും ആഗോളതാപത്തിന് വഴിയൊരുക്കുന്നു'. മനുഷ്യർ കൈവരിച്ച നേട്ടമാണ് ശാസ്ത്ര പുരോഗതി. ജീവിതം സൗകര്യപ്രദമായി മാറുന്നു. പക്ഷേ, സമാധാനം നഷ്ടപ്പെടുകയാണ്. ജൈവ വനങ്ങൾ വെട്ടിക്കുറക്കുന്നു. കോൺഗ്രീറ്റ്‌ കാടുകൾ കൂടുന്നു. കെട്ടിടങ്ങൾക്കകത്ത്‌ ഏസികൾ പെരുകുന്നു. എണ്ണമറ്റ വാഹനങ്ങൾ വിഷപ്പുക തുപ്പുന്നു. ഇതിലപ്പുറം എന്താണ് സംഭവിക്കാനുള്ളത്‌? മുൻ കലങ്ങളിലില്ലാത്തവിധം സൂര്യതാപം മനുഷ്യനെ പിടികൂടുന്നു. പക്ഷേ, എന്തുണ്ട്‌ പരിഹാരം? ഏതു പ്രതിസന്ധികൾക്കും പരിഹാരം കാണുന്ന ശാസ്ത്ര സാങ്കേതികത തികച്ചും നിസ്സഹായമായി കൈമലർത്തുന്നു. ഒരു തുള്ളിവെള്ളം താഴേക്കിറക്കാൻ, ഉറവയാക്കാൻ മനുഷ്യനാവില്ല.

പ്രപഞ്ചനാഥന്റെ ചിന്തോദ്ദീപകമായ ഒരു ചോദ്യം വിശുദ്ധ ഖുർആൻ നമ്മുടെ മുന്നിലേക്ക്‌ ഇട്ടുതരുന്നു. "(നബിയേ) പറയുക: 'നിങ്ങള്‍ ചിന്തിച്ച് നോക്കിയിട്ടുണ്ടോ? നിങ്ങളുടെ വെള്ളം വറ്റിപ്പോയാല്‍ ആരാണ് നിങ്ങള്‍ക്ക് ഒഴുകുന്ന ഉറവു വെള്ളം കൊണ്ട് വന്നു തരിക?'." [അദ്ധ്യായം 67 മുൽക്ക്‌ 30] 'ആരുമില്ല തമ്പുരാനേ, നീയല്ലാതെ' എന്നുമാത്രമേ മറുപടിയുള്ളൂ. ഇതാണ് വിശ്വാസിയുടെ ജീവിത ദർശനം. വിശ്വാസമില്ലാത്തവർക്കും വേറൊരു ഉത്തരമില്ല. ഇവിടെയാണ് വിനയാന്വിതനായ അടിമയുടെ താഴ്മയോടെയുള്ള പ്രാർത്ഥന. ഓരോ വിശ്വാസിയും നിരന്തരമായി മഴക്കുവേണ്ടി പ്രാർത്ഥിച്ചു കൊണ്ടിരിക്കുക. വ്യക്തിഗതവും സാമൂഹികവുമായ ഈ ആവശ്യം മറ്റാരുടെ മുന്നിലും തുറന്നു വെക്കാനില്ല. നമസ്കാര വേളയിലും അല്ലാത്തപ്പോഴും കുടിവെള്ളത്തിന്റെ കാര്യം അല്ലാഹുവിനോട്‌ പറയുക.

 ഒരിക്കൽ നബി (സ) ജുമുഅയിൽ പ്രസംഗിച്ചു കൊണ്ടിരിക്കേ ഒരാൾ എഴുനേറ്റുനിന്ന് പറയുന്നു : 'പ്രവാചകരേ, വരൾച്ച കൊണ്ട്‌ ഞങ്ങൾ വിഷമിക്കുന്നു. കാലികൾ ചത്തൊടുങ്ങുന്നു. അങ്ങ്‌ മഴക്കുവേണ്ടി പ്രാർത്ഥിച്ചാലും'. തിരുനബി (സ) ഉടനെ ഇരുകരങ്ങളും ഉയർത്തി പ്രാർത്ഥിച്ചു : "അല്ലാഹുവേ ഞങ്ങൾക്ക്‌ മഴ വർഷിപ്പിച്ചു തരണേ". ജുമുഅ തീരുന്നതിനു മുമ്പായി മഴ പെയ്തു. ഇത്‌ നമുക്ക്‌ മാതൃകയാക്കാം. റസൂൽ (സ) കാണിച്ചുതന്ന മറ്റൊരു മാതൃകയാണ് 'സ്വലാത്തുൽ ഇസ്തിസ്ഖാഅ്' അഥവാ മഴ തേടിക്കൊണ്ടുള്ള നമസ്കാരം. ഇമാം ജനങ്ങളോട്‌ ഉപദേശിക്കുന്നു. ശേഷം ഖിബ്‌ലക്ക്‌ നേരെ തിരിഞ്ഞ്‌ ദീർഘമായി പ്രാർത്ഥിക്കുന്നു. തുടർന്ന് ഫാതിഹയും സൂറത്തും ഉറക്കെ ഓതിക്കൊണ്ട്‌ രണ്ട്‌ റകഅത്‌ നമസ്കരിക്കുന്നു. ഇതാണ് ഇസ്തിസ്ഖാഅ്. ഒരു വശത്ത്‌ അതിശക്തനായ മനുഷ്യൻ. മറുവശത്ത്‌ നിസ്സഹായനായി കൈനീട്ടുന്നു! ഇത്‌ തന്നെയാണ് സ്രഷ്ടാവായ അല്ലാഹുവും സൃഷ്ടികളായ മനുഷ്യരും തമ്മിലുള്ള ബന്ധം. ഇത്‌ മറക്കാതിരിക്കുക.

 📖 ശബാബ്‌ വാരിക

കണ്ണേറും പിരാക്കും

ഒരാളുടെ നോട്ടം കാരണം മറ്റൊരാളുടെ വിലപിടിച്ച വസ്‌തു നശിക്കുമെന്നോ നാക്കുകൊണ്ടുള്ള ശാപം കാരണം മറ്റൊരാളുടെ വസ്‌തുവിന്‌ കേടുപാടുകൾ സംഭവിക്കുമെന്നോ വിശ്വസിച്ചുപോരുന്നവരാണ്‌ വിവിധ മതങ്ങളിൽപെട്ട ബഹുഭൂരിപക്ഷം ആളുകളും. നോട്ടം കാരണത്താൽ സംഭവിക്കുന്ന നാശത്തിന് `കണ്ണേറ്‌' എന്നും നാക്കുകൊണ്ടുള്ള നാശത്തിന്‌ `പിരാക്ക്‌' എന്നും പറയപ്പെടുന്നു. ഇത്തരം കാര്യങ്ങൾ വിശുദ്ധ ഖുർആനിനും സാമാന്യബുദ്ധിക്കും അനുഭവ സത്യങ്ങൾക്കും വിരുദ്ധമാണ്‌. അദൃശ്യവും അഭൗതികവും കാര്യകാരണ ബന്ധങ്ങൾക്കതീവുമായ നിലയിൽ മനുഷ്യന്‌ നന്മയും തിന്മയും ചെയ്യാൻ അല്ലാഹു ഒരു കണ്ണിനും നാക്കിനും കഴിവു നൽകിയിട്ടില്ല. അദൃശ്യവും അഭൗതികവും കാര്യകാരണ ബന്ധങ്ങൾക്കതീതവുമായ നിലയിൽ ഖൈറും ശർറും വരുത്താൻ അല്ലാഹുവിന്‌ മാത്രമേ സാധിക്കൂ. ഖൈറും ശർറും (അദൃശ്യമായ നിലയിൽ) വരുത്തിവെക്കുന്നത്‌ അല്ലാഹുവാണെന്നത്‌ ഈമാനിന്റെ ആറു കാര്യങ്ങളിൽ ഒന്നാണ്‌. ആ വിശ്വാസം കണ്ണേറും പിരാക്കും യാഥാർഥ്യമാണെന്ന്‌ വിശ്വസിക്കുന്നതിന്‌ എതിരാണ്‌.

അല്ലാഹു ഈ ലോകത്തുള്ള കാര്യങ്ങൾ നിയന്ത്രിക്കുന്നതും നടപ്പിൽ വരുത്തുന്നതും രണ്ടു വിധത്തിലാണ്‌.

ഒന്ന്‌ : മനുഷ്യരടക്കമുള്ള സൃഷ്‌ടികൾ മുഖേന. ഉദാഹണത്തിന്‌ ഒരാളുടെ കയ്യാൽ മറ്റൊരാൾ വധിക്കപ്പെടുന്നു. അതുപോലെ ഒരാളുടെ കയ്യാൽ മറ്റൊരാൾ അപകടത്തിൽ നിന്നും രക്ഷപ്പെടുന്നു. ഇവ രണ്ടും സംഭവിക്കുന്നത്‌ ദൃശ്യമായ നിലയിലും കാര്യകാരണ ബന്ധങ്ങൾക്ക്‌ അധീനവുമായിട്ടാണ്‌.

രണ്ട്‌ : അല്ലാഹു നേരിട്ട്‌ നടപ്പിൽ വരുത്തുന്ന കാര്യങ്ങൾ. മഴ പെയ്യാൻ സാധ്യതയില്ലാത്ത സന്ദർഭങ്ങളിൽ മഴ നൽകി അനുഗ്രഹിക്കുന്നതും നാം വിചാരിക്കാത്ത വിധം മഴ വർഷിച്ച്‌ നാശം സംഭവിക്കുന്നതും സർവ സാധാരണമാണ്‌. ഒന്നാമത്‌ പറഞ്ഞ മനുഷ്യർ മുഖേന അല്ലാഹു നടപ്പിൽ വരുത്തുന്ന കാര്യങ്ങൾ ദൃശ്യവും കാര്യകാരണ ബന്ധങ്ങൾക്കധീനവുമാണെങ്കിൽ അല്ലാഹു നേർക്കുനേരെ നടപ്പിൽ വരുത്തുന്ന കാര്യങ്ങൾ അദൃശ്യമായ നിലയിലും കാര്യകാരണ ബന്ധങ്ങൾക്കധീതവുമായിട്ടാണ്‌.

അല്ലാഹു പറയുന്നു : "(നബിയേ), താങ്കൾക്ക്‌ അല്ലാഹു വല്ല ദോഷവും വരുത്തിവെക്കുന്ന പക്ഷം അത്‌ നീക്കംചെയ്യാൻ അനവല്ലാതെ മറ്റാരുമില്ല. നിനക്ക്‌ അവൻ വല്ല ഗുണവും വരുത്തുന്ന പക്ഷം അവൻ എല്ലാ കാര്യത്തിലും കഴിവു ള്ളവനാകുന്നു.'' (അന്‍ആം17). "നിനക്ക്‌ അല്ലാഹു വല്ല ദോഷവും വരുത്തിവെക്കുന്ന പക്ഷം അത്‌ നീക്കംചെയ്യാൻ അവനൊഴികെ ഒരാളുമില്ല. അവൻ നിനക്ക്‌ വല്ല ഗുണവും ഉദ്ദേശിക്കുന്ന പക്ഷം അവന്റെ അനുഗ്രഹം തട്ടിമാറ്റാൻ ഒരാൾക്കും സാധ്യമല്ല.'' (യൂനുസ്‌ 107).  "എനിക്ക്‌ വല്ല ഉപദ്രവവും വരുത്താൻ അല്ലാഹു ഉദ്ദേശിക്കുന്നപക്ഷം അവർക്ക്‌ (അല്ലാഹു അല്ലാത്തവർക്ക്‌) അവന്റെ ഉപദ്രവം നീക്കം ചെയ്യാൻ സാധിക്കുമോ? അല്ലെങ്കിൽ അവൻ എനിക്ക്‌ വല്ല അനുഗ്രഹവും ചെയ്യുവാനുദ്ദേശിച്ചാൽ അവർക്ക്‌ അവന്റെ അനുഗ്രഹം പിടിച്ചുവെക്കാൻ കഴിയുമോ? പറയുക: എനിക്ക്‌ അല്ലാഹു മതി. അവന്റെ മേലാകുന്നു ഭരമേൽപിക്കുന്നവർ ഭരമേൽപിക്കുന്നത്‌.''(സുമര്‍ 38).

നബി(സ) പറഞ്ഞതായി ഇബ്‌നുഅബ്ബാസ്‌(റ) പ്രസ്‌താവിക്കുന്നു: "നീ വല്ലതും ചോദിക്കുന്ന പക്ഷം അല്ലാഹുവോട്‌ ചോദിക്കുക. സഹായം തേടുന്ന പക്ഷം അല്ലാഹുവോട്‌ സഹായം തേടുക. നീ ഒരു കാര്യം മനസ്സിലാക്കണം. നിനക്ക്‌ ഏതെങ്കിലും നിലയിൽ ഒരു ഉപകാരം ചെയ്യണം എന്ന്‌ ലോകത്തുള്ള മുഴുവൻ സമൂഹവും ഉദ്ദേശിച്ചാൽപോലും അല്ലാഹു രേഖപ്പെടുത്തിയതല്ലാതെ നിനക്ക്‌ ഒരു ഉപകാരവും ചെയ്യാൻ ആർക്കും സാധ്യമാകുന്നതല്ല. മുഴുവൻ ജനങ്ങളും നിന്നെ ദ്രോഹിക്കാൻ  വേണ്ടി ഒരുമിച്ചുകൂടിയാലും ശരി അല്ലാഹു രേഖപ്പെടുത്തിയതല്ലാതെ യാതൊരുവിധ ദ്രോഹവും വരുത്താനും ആർക്കും സാധ്യമല്ല'' (തിര്‍മിദി).

ഇമാം ഇബ്‌നു കസീർ (റ) രേഖപ്പെടുത്തുന്നു: ``തീർച്ചയായും നന്മയും തിന്മയും ഉപകാരവും ഉപദ്രവവും മടങ്ങുന്നത്‌ (സംഭവിക്കുന്നത്‌) അല്ലാഹുവിങ്കലേക്കാണ്‌. അതൊക്കെ വരുത്തിവെക്കുന്നത്‌ അവൻ മാത്രമാണ്‌. അവനതിൽ യാതൊരു പങ്കുകാരനുമില്ല.'' (2:434)

കണ്ണേറും നാക്കേറും ഫലിക്കും എന്ന അന്ധവിശ്വാസത്തെ പിഴുതെറിയുന്നതാണ്‌ നമസ്‌കാരശേഷമുള്ള പ്രാർഥന : "അല്ലാഹുവേ, നീ നൽകിയതിനെ തടുത്തു നിർത്തുന്നതോ, നീ തടഞ്ഞതിനെ നൽകുന്നതോ ആയിട്ടുള്ള യാതൊരു ശക്തിയുമില്ല. മഹത്വമുള്ളവന്റെ മഹത്വം നിന്റെയടുക്കൽ പ്രയോജനം ചെയ്യുന്നതല്ല'' (ബുഖാരി മുസ്‌ലിം). അല്ലാഹു ഒരാൾക്ക്‌ അനുഗ്രഹം നല്‌കാൻ ഉദ്ദേശിച്ചാലോ ഒരനുഗ്രഹം തടയാൻ ഉദ്ദേശിച്ചാലോ നൽകിയത്‌ തടയാനോ അവൻ തടഞ്ഞുവെച്ചത്‌ നൽകാനോ ഒരു കണ്ണിനും നാക്കിനും സാധ്യമല്ലെന്ന്‌ മേൽ വചനങ്ങൾ സംശയത്തിനിടവരുത്താത്ത വിധം വ്യക്തമാക്കുന്നു.

 കണ്ണേറും പിരാക്കും ഒന്നുതന്നെയാണ്‌. ഒന്ന്‌ കണ്ണുകൊണ്ടും മറ്റൊന്ന്‌ നാക്കുകൊണ്ടും എന്ന വ്യത്യാസം മാത്രം. രണ്ടിന്റെയും ഫലം ഒന്നുതന്നെ. കാര്യകാരണ ബന്ധത്തിന്നതീതമായും അഭൗതിക നിലയിലും കണ്ണിനും നാക്കിനും നാശമുണ്ടാക്കാൻ കഴിവുണ്ടെന്ന്‌ വിശ്വസിക്കപ്പെടുന്നു. ഇത്‌ മുഅ്‌ജിസത്തിനും കറാമത്തിനും അർഹരായ അമ്പിയാ ഔലിയാക്കൾക്കാണെങ്കിൽ സമ്മതിക്കാം. കാരണം അവരുടെ കണ്ണിനും നാക്കിനും അല്ലാഹു ചിലപ്പോൾ അമാനുഷികമായ കഴിവുകൾ നൽകിയേക്കാം. ഇവിടെ ചാത്തനായാലും കമ്മദായാലും വർഗീസായാലും കണ്ണേറും പിരാക്കും തട്ടും എന്നാണ്‌ വിശ്വസിക്കപ്പെടുന്നത്‌. ഖൈറും ശർറും (അദൃശ്യമായ നിലയിൽ) വരുത്തിവെക്കുന്നത്‌ അല്ലാഹുവാണെന്ന വിശ്വാസത്തിന് എതിരാണിത്‌. ഈ വിഷയത്തിലുള്ള ഹദീസുകൾ നോക്കാം :

1. ജിബ്‌രീൽ (അ) നബി(സ)യോട്‌ പറയുകയുണ്ടായി: "താങ്കളെ ദ്രോഹിക്കുന്ന എല്ലാ വസ്‌തുക്കളിൽ നിന്നും എല്ലാ മനുഷ്യരുടെയും തിന്മയിൽ നിന്നും അല്ലെങ്കിൽ അസൂയ നിറഞ്ഞ കണ്ണിൽ നിന്നും (രക്ഷക്കുവേണ്ടി) താങ്കളിൽ അല്ലാഹുവിന്റെ നാമത്തിൽ ഞാൻ മന്ത്രപ്രാർഥന നടത്തുന്നു.'' (മുസ്‌ലിം 7:424) 

2. അബൂഹുറൈറ (റ) പ്രസ്‌താവിച്ചു : "കണ്ണേൽക്കുക എന്നത്‌ സത്യമാണ്‌. ശൈത്വാൻ അതിനെ ഹാജറാക്കുന്നു. മനുഷ്യന്റെ അസൂസയും സത്യമാണ്‌.'' (അഹ്‌മദ്‌, ഫത്‌ഹുല്‍ബാരി 13:107)

 ഈ രണ്ട്‌ ഹദീസുകളിലും പ്രതിപാദിച്ച ഒരു കാര്യമാണ്‌ അസൂയ. ആദ്യത്തെ ഹദീസിൽ അസൂയ നിറഞ്ഞ കണ്ണിൽ നിന്നും രക്ഷതേടുന്നു. രണ്ടാമത്തെ ഹദീസിൽ അസൂയയുള്ള മനുഷ്യനിൽ നിന്നും രക്ഷ തേടേണ്ടതുണ്ട്‌ എന്ന സൂചനയുണ്ട്‌. അപ്പോൾ ഇവിടെ കണ്ണേറ്‌ എന്ന്‌ പരിഭാഷപ്പെടുത്തി വരുന്നത്‌ `അസൂയ വെച്ചുകൊണ്ടുള്ള നോട്ട'ത്തിനാണ്‌. അല്ലാതെ കേവലം കണ്ണും നാക്കും ഉപയോഗിച്ച്‌ മറ്റൊരാളെ `എറിയു'ന്നതിനല്ല. അത്‌ മനുഷ്യബുദ്ധിക്ക്‌ ഗ്രഹിക്കാനും സാധ്യമല്ല. കണ്ണേറുകൊണ്ട്‌ ഉദ്ദേശിക്കപ്പെടുന്നത്‌ അസൂയയാണ്‌. ഒരു വ്യക്തിക്ക്‌ അല്ലാഹു നൽകിയ അനുഗ്രഹത്തിലുള്ള അസന്തുഷ്‌ടി. ആ അസന്തുഷ്‌ടി നോട്ടത്തിലൂടെ അവൻ പ്രകടിപ്പിക്കുന്നു എന്നു മാത്രം. കണ്ണേറ്‌ എന്നത്‌ ഒരു ഭാഷാപ്രയോഗം മാത്രമാണ്‌. 'കണ്ണുകടി' എന്ന പ്രയോഗം പോലെ. കണ്ണിന്‌ ചൊറിച്ചിലോ കടച്ചിലോ ഉണ്ടാകുന്നതിനല്ല അത്‌ പ്രയോഗിച്ചുവരുന്നത്‌. മറിച്ച്‌ അസൂയക്കാണ്‌. കണ്ണേറുകൊണ്ട്‌ ലക്ഷ്യമാക്കുന്നതും അസൂയയാണ്‌.

ഇബ്‌നുഹജർ (റ) പറയുന്നു: "അവന്റെ നോട്ടത്തിന്റെ ലക്ഷ്യം അസൂയയും അല്ലാഹു നൽകിയ അനുഗ്രഹം ഇല്ലായ്‌മ ചെയ്യുക എന്നതു മാത്രമാണ്‌." (ഫത്‌ഹുല്‍ബാരി 13:116). ഇത്തരം അസൂയാലുക്കളുടെ ശർറ്‌ നീങ്ങിക്കിട്ടാനാണ്‌ പ്രാർഥനാ മന്ത്രം നടത്താൻ കൽപിക്കപ്പെട്ടത്‌. അതിൽ നിന്നും മറ്റും മോചനം ലഭിക്കാനാണ്‌ സൂറത്തുൽ ഫലഖും സൂറത്തുന്നാസും അവതരിപ്പിക്കപ്പെട്ടത്‌. സൂറതുൽ ഫലഖിലെ അവസാനവചനം ഇപ്രകാരമാണ്‌: "അസൂയാലു അസൂയപ്പെടുമ്പോൾ അതിന്റെ തിന്മയിൽ നിന്നും (നിന്നോട്‌ ഞാൻ കാവലിനെ തേടുന്നു)'' (ഫലഖ്‌ 5). അസൂയാലു തന്റെ ശർറ്‌ ഒരു നോട്ടം കൊണ്ട്‌ അവസാനിപ്പിക്കുന്നതല്ല. ഭാവിയിലും താൻ ആരോടാണോ അസൂയ കാണിക്കുന്നത്‌ അവനെ തകർക്കാൻ ശ്രമം നടത്തും. ചിലപ്പോൾ അദ്ദേഹത്തിനെതിരിൽ ആളുകളെ സംഘടിപ്പിക്കും. മറ്റു ചിലപ്പോൾ അധികാരം ഉപയോഗിച്ചുപോലും തന്റെ പ്രതിയോഗിയെ തകർക്കാൻ ശ്രമം നടത്തും. അതുകൊണ്ടാണ്‌ അത്തരം നോട്ടങ്ങൾക്കെതിരിൽ അല്ലാഹുവോട്‌ കാവലിനെ തേടാൻ നബി (സ) കൽപിച്ചത്‌.

By പി കെ മൊയ്‌തീൻ സുല്ലമി @ ശബാബ് 

കൃഷി ഒരു പുണ്യകർമ്മം

കൃഷിയെ ഒരു പുണ്യകർമമായും നിരന്തരം പ്രതിഫലം ലഭിച്ചുകൊണ്ടിരിക്കുന്ന ഒരു സദ്‌കർമമായും ഇസ്‌ലാം കാണുന്നു. സാക്ഷാൽ കൃഷിയും പരലോകത്തേക്കുള്ള കൃഷിയിൽ ഒന്നാണെന്ന തിരിച്ചറിവ്‌ ഇസ്‌ലാം വിശ്വാസികൾക്ക്‌ നൽകുന്നുണ്ട്‌. "ഒരാൾ ഒരു ചെടി നട്ടുവളർത്തി. അതിലുണ്ടായ കായ്‌കനികൾ മൃഗങ്ങളോ പക്ഷികളോ തിന്നാൽപോലും അത്‌ നട്ടുവളർത്തിയവന്‌ പ്രതിഫലം കിട്ടിക്കൊണ്ടേയിരിക്കും'' എന്ന നബിവചനം കൃഷിയുടെ ആത്മീയഭാവം വ്യക്തമാക്കുന്നു. "ഒരു വൃക്ഷത്തൈ നടാൻ പോവുമ്പോഴാണ്‌ പ്രപഞ്ചത്തിന്റെ അന്ത്യം സംഭവിക്കുന്നതെങ്കിൽപോലും, തൈ നട്ടിരിക്കണ"മെന്ന പ്രവാചകന്റെ ആഹ്വാനം എത്ര ശ്രദ്ധേയമാണ്‌! ഭൂമിയിലെ ഭക്ഷ്യലഭ്യത നിലനിർത്താനും ഭൂമിയെ ഹരിതാഭമാക്കാനും ഓരോരുത്തരും കടപ്പെട്ടവരാണെന്ന്‌ ഈ വചനങ്ങൾ സൂചിപ്പിക്കുന്നു. മുഴുവൻ ജീവജാലങ്ങൾക്കും ആവശ്യമായ ഭക്ഷ്യവിഭവങ്ങൾ ഉൽപാദിപ്പിക്കാനുള്ള ശേഷി അല്ലാഹു ഭൂമിക്ക്‌ നൽകിയിട്ടുണ്ട്‌. എല്ലാവർക്കും അന്നം നൽകുക എന്നത്‌ അല്ലാഹു ഏറ്റെടുത്ത ബാധ്യതയുമാണ്‌. അല്ലാഹു പറയുന്നു: "ഭൂമിയിൽ  യാതൊരു ജീവിയും അതിന്റെ ഉപജീവനം അല്ലാഹു ബാധ്യത ഏറ്റതായിട്ടല്ലാതെയില്ല; അവയുടെ താമസസ്ഥലവും സൂക്ഷിപ്പുസ്ഥലവും അവൻ അറിയുന്നു. എല്ലാം സ്‌പഷ്‌ടമായ ഒരു രേഖയിലുണ്ട്‌.'' [അദ്ധ്യായം 11 ഹൂദ്‌ 6]

എന്നാൽ അലസനായി ഒരിടത്തിരുന്നാൽ അന്നം അവനെ തേടിവരികയില്ല. തന്റെ കഴിവും ആരോഗ്യവും ഉപയോഗിച്ച്‌ ഭൂമിയിൽ അവൻ അധ്വാനിക്കണം. നിലമുഴുത്‌ വിത്തിറക്കുക, വെള്ളവും വളവും നൽകി സംരക്ഷിക്കുക തുടങ്ങി പ്രാഥമികമായ എല്ലാ പ്രവൃത്തികളും മനുഷ്യൻ ആസൂത്രിതമായും ശാസ്‌ത്രീയമായും നിർവഹിക്കണം. തന്റെ നിയന്ത്രണത്തിൽപ്പെടാത്ത കാര്യങ്ങളിൽ അല്ലാഹുവിൽ ഭരമേൽപ്പിക്കുകയും ശരിയായ ഫലപ്രാപ്‌തിക്ക്‌ വേണ്ടി പ്രാർഥിച്ച്‌ കൊണ്ടിരിക്കുകയും വേണ്ടതുണ്ട്‌. മനുഷ്യൻ മണ്ണിൽ പണിയെടുക്കുക മാത്രമാണ്‌ ചെയ്യുന്നത്‌. കൃഷിക്കാവശ്യമായ വെള്ളം അല്ലാഹുവാണ്‌ ഇറക്കിത്തരുന്നത്‌. വിത്തുകൾ മുളപ്പിക്കുന്നതും ഭൂമി പിളർത്തി അവയെ പുറത്ത്‌ കൊണ്ടുവരുന്നതും അവൻ (അല്ലാഹു) തന്നെ. അവയെ വളർത്തി പൂവും കായും നല്‌കി പൂർണതയിലെത്തിക്കുന്നതിലും മനുഷ്യന്‌ കാര്യമായ പങ്കില്ല. അവയുടെ നാശത്തെ തടഞ്ഞുനിർത്താനും ഒരു പരിധി വരെ മാത്രമേ മനുഷ്യനാവൂ. ഇതെല്ലാം ഉൾക്കൊണ്ടായിരിക്കണം ഒരു കർഷകൻ  പ്രവർത്തിക്കേണ്ടത്‌ എന്ന്‌ ഖുർആൻ ഉണർത്തുന്നു.

"ധാന്യങ്ങളും വിത്തുകളും പിളർത്തി മുള പുറത്തുകൊണ്ടുവരുന്നവനാകുന്നു അല്ലാഹു. നിർജീവമായതിൽ നിന്ന്‌ ജീവനുള്ളതിനെയും ജീവനുള്ളതിൽ നിന്ന്‌ നിർജീവമായതിനെയും അവൻ പുറത്തുകൊണ്ടുവരുന്നു''. [അദ്ധ്യായം 6 അൻആം 95]

 "നിങ്ങൾക്കു വേണ്ടി ഭൂമിയെ മെത്തയും ആകാശത്തെ മേൽപുരയുമാക്കിത്തന്ന, ആകാശത്ത്‌ നിന്നു വെള്ളമിറക്കി, അത്‌ മുഖേന നിങ്ങൾക്ക്‌ ഭക്ഷിക്കാനുള്ള കായ്‌കനികൾ ഉൽപാദിപ്പിച്ച്‌ തരികയും ചെയ്‌ത നാഥനെ (നിങ്ങൾ ആരാധിക്കുക). ഇതെല്ലാം അറിഞ്ഞുകൊണ്ട്‌ നിങ്ങൾ അല്ലാഹുവിന്‌ സമന്മാരെ ഉണ്ടാക്കരുത്‌." [അദ്ധ്യായം 2 ബഖറ 22]

 "നിങ്ങൾ കൃഷി ചെയ്യുന്നതിനെപറ്റി നിങ്ങൾ ചിന്തിച്ചു നോക്കിയിട്ടുണ്ടോ? നിങ്ങളാണോ അത് മുളപ്പിച്ചു വളർത്തുന്നത്‌? അതല്ല നാമാണോ അത് മുളപ്പിച്ച് വളർത്തുന്നവൻ? നാം ഉദ്ദേശിച്ചിരുന്നെങ്കിൽ അത് (വിള) നാം തുരുമ്പാക്കിത്തീർക്കുമായിരുന്നു. അപ്പോൾ നിങ്ങൾ അതിശയപ്പെട്ടു പറഞ്ഞുകൊണ്ടേയിരിക്കുമായിരുന്നു; 'തീർച്ചയായും ഞങ്ങൾ കടബാധിതർ തന്നെയാകുന്നു. അല്ല, ഞങ്ങൾ (ഉപജീവന മാർഗം) തടയപ്പെട്ടവരാകുന്നു' എന്ന്‌." [അദ്ധ്യായം 56 വാഖിഅ 63 - 67]

 By അബ്ദു സലഫി @ ശബാബ് 

താടിയുടെ മഹത്വം

ഒരു വ്യക്തിയെ സ്വർഗാവകാശിയാക്കുന്നത്‌ അവന്റെ ബാഹ്യമായ ജാടകളല്ല. മറിച്ച്‌ സത്യവിശ്വാസവും കര്‍മങ്ങളും മനശ്ശുദ്ധിയുമാണ്‌. നബി(സ) അക്കാര്യം നമ്മെ ബോധ്യപ്പെടുത്തുന്നു: "അല്ലാഹു നോക്കുന്നത്‌ നിങ്ങളുടെ രൂപത്തിലേക്കോ ശരീരത്തിലേക്കോ അല്ല. മറിച്ച്‌ നിങ്ങളുടെ മനസ്സുകളിലേക്കും കർമങ്ങളിലേക്കുമാണ്‌." (മുസ്‌ലിം). നമ്മുടെ കർമങ്ങൾ അല്ലാഹു സ്വീകരിക്കണമെങ്കിൽ മനസ്സുകൾ ശുദ്ധമായിരിക്കണം. നാം അനുഷ്‌ഠിക്കുന്ന കർമങ്ങൾ ഇഖ്‌ലാസോടെയാവണം. അസൂയ, കിബ്‌റ്‌, പക, പോര്‌ എന്നിവയിൽനിന്നെല്ലാം മനസ്സ്‌ മുക്തമായിരിക്കണം. അക്കാര്യം അല്ലാഹു ഉണർത്തുന്നുണ്ട്‌: "തീർച്ചയായും (മനസ്സ്‌) പരിശുദ്ധമാക്കിയവൻ വിജയം കൈവരിച്ചു. അതിനെ ദുഷിപ്പിച്ചവൻ പരാജയപ്പെടുകയും ചെയ്‌തു." (അശ്ശംസ്‌ 9,10). മൂസാനബി(അ) അല്ലാഹുവോട്‌ പ്രാർഥിച്ചത്‌ ഹൃദയ വിശാലതക്കു വേണ്ടിയായിരുന്നു: "നാഥാ, എന്റെ ഹൃദയത്തിന്‌ വിശാലത നൽകേണമേ?" (ത്വാഹാ 25). നബി(സ)ക്ക്‌ അല്ലാഹു നല്‌കിയ പ്രധാനപ്പെട്ട ഒരനുഗ്രഹം അതായിരുന്നു. "നിനക്ക്‌ നിന്റെ മനസ്സ്‌ നാം വിശാലമാക്കിത്തന്നില്ലയോ?" (ശര്‍ഹ്‌ 1).

ഒരാളെ സ്വർഗാവകാശിയാക്കുന്നത്‌ അയാളുടെ ത്യാഗമാണ്‌. സത്യവിശ്വാസവും സൽകർമങ്ങളും മനശ്ശുദ്ധിയും നിലനിർത്തിപ്പോരുന്ന ഒരു വ്യക്തിക്ക്‌ നിരവധി ത്യാഗങ്ങൾ സഹിക്കേണ്ടിവരും. ഇഷ്‌ടപ്പെട്ട പലതും ത്യജിക്കേണ്ടി വരും. മറ്റുള്ളവർ ത്യജിക്കുന്ന പലതും സ്വീകരിക്കേണ്ടിവരും. എന്നാൽ താടിയുടെ പിന്നിൽ യാതൊരു ത്യാഗവുമില്ല. അതു സ്വയം വളരുന്ന അവസ്ഥയിലാണ്‌. നബി(സ)യുടെ കല്‌പനയും പ്രോത്സാഹനവും ആ വിഷയത്തിൽ വന്നതിനാൽ താടിവെച്ചവന്‌ അല്ലാഹുവിന്റെ പ്രതിഫലം ലഭിക്കുന്നതാണ്‌. താടി വളർത്താൻ കൽപിച്ച ഹദീസും മുടിക്ക്‌ ചായം കൊടുക്കാൻ കൽപിച്ച ഹദീസും ഒരേ പദവിയിലുള്ളതും രണ്ടും സ്വഹാബികളോടായി നബി(സ) പറഞ്ഞതും ഇമാം ബുഖാരി റിപ്പോർട്ടു ചെയ്‌തിട്ടുള്ളതാണ്‌. ഇബ്‌നുഉമർ (റ) നബി(സ) പറഞ്ഞതായി പ്രസ്‌താവിച്ചു: ``നിങ്ങൾ ബഹുദൈവ വിശ്വാസികൾക്ക്‌ വിരുദ്ധരാവുക. താടി സമ്പൂർണമാക്കുക.'' (ബുഖാരി). നബി(സ) പറഞ്ഞതായി അബൂഹുറയ്‌റ(റ) പ്രസ്‌താവിച്ചു: ``നിശ്ചയമായും യഹൂദികളും നസ്വാറാക്കളും മുടിക്ക്‌ ചായം കൊടുക്കാറില്ല. നിങ്ങൾ (ചായംകൊടുത്ത്‌) അവർക്കെതിരാകണം'' (ബുഖാരി). ഈ രണ്ടു ഹദീസുകളും ഒരേ നിലയിലുള്ളതാണ്‌. ഒന്നാമത്തെ ഹദീസില്‍ മുശ്‌രിക്കുകൾക്ക്‌ വിരുദ്ധമായി താടി വളർത്താനും രണ്ടാമത്തെ ഹദീസില്‍ യഹൂദീ-നസ്വാറാക്കൾക്കു വിരുദ്ധരായി മുടിക്ക്‌ ചായംകൊടുക്കാനും കൽപിക്കുന്നു.

രണ്ടു കൽപനകളും നിർബന്ധമായ കൽപനകളല്ലെന്ന്‌ രണ്ടാമത്തെ ഹദീസിന്റെ വ്യാഖ്യാനം പരിശോധിക്കുമ്പോൾ മനസ്സിലാക്കാൻ കഴിയും. ഇബ്‌നുഹജർ (റ) രേഖപ്പെടുത്തുന്നു: ``അലി(റ) ഉബയ്യുബ്‌നു കഅ്‌ബ്‌(റ), സലമതുബ്‌നുല്‍ അക്‌വഅ്‌(റ), അനസ്‌(റ) എന്നിവരും ഒരു സംഘം സ്വഹാബികളും മുടിക്ക്‌ ചായംപൂശുക എന്നത്‌ ഒഴിവാക്കിയിരുന്നു'' (ഫത്‌ഹുല്‍ബാരി 13:359). യഹൂദീ നസ്വാറാക്കാള്‍ക്കു വിരുദ്ധമായി നിങ്ങൾ മുടിക്ക്‌ ചായം കൊടുക്കണം എന്ന ബുഖാരിയുടെ ഹദീസ്‌ നിർബന്ധ കൽപനയല്ലെന്ന്‌ ഇതിൽനിന്ന്‌ മനസ്സിലാക്കാം. മറിച്ച്‌ മുസ്‌ലിംകളെ തിരിച്ചറിയാനുള്ള ഒരു പ്രോത്സഹനം എന്ന നിലയിൽ പറഞ്ഞതാണ്‌. നിർബന്ധമായിരുന്നെങ്കിൽ മേൽപറഞ്ഞ സ്വഹാബിമാർ ചായം കൊടുക്കൽ ഒഴിവാക്കുമായിരുന്നില്ല. അതേ വിധി തന്നെയാണ്‌ ബുഖാരിയുടെ മുശ്‌രിക്കുകൾക്ക്‌ വിരുദ്ധമായി നിങ്ങൾ താടി സമ്പൂർണമാക്കണം എന്നുപറഞ്ഞ ഹദീസിനുമുള്ളത്‌. താടി വടിച്ചുകളയൽ ഹറമാണെങ്കിൽ മുടിക്ക്‌ ചായം കൊടുക്കാതിരിക്കലും ഹറാമാകണം. കാരണം നബി(സ)യുടെ കൽപന മുടിക്ക്‌ ചായം കൊടുക്കാനാണ്‌. മേൽ ഹദീസിനെ വിശദീകരിച്ചുകൊണ്ട്‌ ഇബ്‌നുഹജര്‍(റ) രേഖപ്പെടുത്തുന്നു: ``ഇയാദ്വ്‌ (റ) പ്രസ്‌താവിച്ചു: താടി വടിച്ചുകളയലും ഇല്ലായ്‌മ ചെയ്യലും കറാഹത്താണ്‌ (ഉത്തമമല്ലാത്തത്‌)'' (ഫത്‌ഹുല്‍ബാരി 13:351). ശാഫിഇ മദ്‌ഹബിൽ കറാഹത്തിന്‌ ഉത്തമമല്ല എന്നർഥമാണ്‌. അഥവാ സുന്നത്തിനെതിരാണ്‌ എന്നു മാത്രം. അപ്പോൾ താടി വടിച്ചുകളയൽ ഹറാമല്ല എന്നാണ്‌ ഇബ്‌നുഹജർ (റ) ഉദ്ധരിക്കുന്നത്‌.

 ഹറാമിന്റെയും ഹലാലിന്റെയും വിഷയത്തിൽ ഒരിക്കലും പണ്ഡിതാഭിപ്രായം സ്വീകരിക്കാൻ ഖുർആനും സുന്നത്തും അനുവദിക്കുന്നില്ല. കാരണം ഹലാലും ഹാറാമും വേർതിരിക്കപ്പെട്ടിട്ടുള്ള ഗ്രന്ഥം വിശുദ്ധഖുർആനും നബിചര്യയുമാണ്‌. അല്ലാഹു പറയുന്നു: ``തീർച്ചയായും നിങ്ങളുടെ മേൽനിഷിദ്ധമാക്കിയതെല്ലാം നിങ്ങൾക്ക്‌ വിശദീകരിച്ചുതന്നിട്ടുണ്ട്‌'' (അൻആം 119). നബി(സ) പറയുന്നു: ``അനുവദനീയം എന്നത്‌ അല്ലാഹു അവന്റെ ഗ്രന്ഥത്തിൽ അനുവദിച്ചിട്ടുള്ളവയാണ്‌. നിഷിദ്ധം എന്നത്‌ അല്ലാഹു അവന്റെ ഗ്രന്ഥത്തിൽ നിഷിദ്ധമാക്കിയിട്ടുള്ളവയാണ്‌. ഹലാലോ ഹറാമോ എന്ന വിഷയത്തിൽ അവൻ നിശ്ശബ്‌ദത പാലിച്ച കാര്യങ്ങൾ നിങ്ങൾക്കവൻ വിട്ടുവീഴ്‌ച ചെയ്‌തുതന്നിരിക്കുന്നു.'' (തിർമിദി, ഇബ്‌നുമാജ, ഹാകിം) അല്ലാഹു ഒരു കാര്യം ഹലാലാക്കുകയോ ഹറാമാക്കുകയോ ചെയ്‌താൽ അത്‌ വിശുദ്ധ ഖുർആനിലുണ്ടാകും എന്നാണ്‌ അല്ലാഹുവും റസൂലും പഠിപ്പിക്കുന്നത്‌. താടിയെ സംബന്ധിച്ച്‌ വിശുദ്ധ ഖുർആനിൽ വന്ന പരാമർശം മൂസാനബി(അ) ഹാറൂന്‍ നബി(അ)യുടെ താടിയും തലയും പിടിച്ചുവലിച്ച സംഭവം മാത്രമാണ്‌ (സൂറതുത്ത്വാഹ). അല്ലാതെ താടി നിർബന്ധമാണെന്നോ അതെടുത്തു കളയൽ നിഷിദ്ധമാണെന്നോ ഖുര്‍ആനിൽ ഒരിടത്തുമില്ല. തെളിവില്ലാതെ ഹറാമും ഹലാലുമാക്കുന്നതിനെ അല്ലാഹു ശക്തിയുക്തം എതിർക്കുകയും ചെയ്യുന്നു. അല്ലാഹു പറയുന്നു: ``നിങ്ങളുടെ നാവുകൾ വിശേഷിപ്പിക്കുന്നതിന്റെ അടിസ്ഥാനത്തിൽ ഇത്‌ ഹലാലാണ്‌, ഇത്‌ ഹറാമാണ്‌ എന്നിങ്ങനെ നിങ്ങൾ നുണ പറയരുത്‌. നിങ്ങൾ അല്ലാഹുവിന്റെ പേരിൽ നുണ കെട്ടിച്ചമക്കാൻ വേണ്ടിയത്രെ ഇത്‌. തീർച്ചയായും അല്ലാഹുവിന്റെ പേരിൽ നുണകെട്ടിച്ചമയ്‌ക്കുന്നവർ വിജയിക്കുകയില്ല.'' (നഹ്‌ല്‍ 116)

താടി വളർത്തൽ നിർബന്ധമാണെന്നും അത്‌ വടിച്ചുകളയൽ നിഷിദ്ധമാണെന്നുമുള്ള വാദം മുസ്‌ലിംകളിൽ ബഹുഭൂരിപക്ഷവും അംഗീകരിക്കാത്തത്‌ അതിന്‌ വ്യക്തമായ രേഖയില്ലാത്തതുകൊണ്ടാണ്‌. താടി വളർത്തൽ പ്രബലമായ സുന്നത്തോ സാധാരണ സുന്നത്തോ ആയിട്ടുള്ള നിലയിലാണ്‌ മുസ്‌ലിംകൾ പരിഗണിച്ചുവരുന്നത്‌. ഹറാമാണെങ്കിൽ താടിയില്ലാത്തവന്റെ നമസ്‌കാരം പോലും അല്ലാഹു സ്വീകരിക്കുന്നതല്ല. കാരണം ലഹരി ഉപയോഗിച്ചും സ്വർണചെയിൻ അണിഞ്ഞും നമസ്‌കരിക്കുന്ന പുരുഷന്റെ നമസ്‌കാരം അല്ലാഹു സ്വീകരിക്കുകയില്ലല്ലോ. താടി നിർണായകമാക്കി തീവ്രത പുലർത്തലും താടിയിൽ ഒന്നുമില്ല എന്നു പറഞ്ഞു നിസ്സാരപ്പെടുത്തലും ദീനിന്‌ ഗുണകരമല്ല. നബി(സ)യുടെ എല്ലാ കല്‌പനകളും നിർബന്ധമോ, വിരുദ്ധം പ്രവർത്തിക്കൽ ഹറാമോ അല്ല.

 By പി കെ മൊയ്‌തീൻ സുല്ലമി

ബിദ്‌അത്ത്‌ - ഉത്‌ഭവവും വ്യാപനവും

 ശൈഖുൽ  ഇസ്‌ലാം ഇബ്‌നുതൈമിയ്യ പറയുന്നു: "വിജ്ഞാനങ്ങളും ഇബാദത്തുകളുമായി ബന്ധപ്പെട്ട അധിക ബിദ്‌അത്തുകളും ഖുലഫാഉര്റാശിദുകളുടെ അവസാനകാലത്താണ്‌ സമുദായത്തിൽ പ്രത്യക്ഷപ്പെട്ടത്‌. അതിനെപ്പറ്റി റസൂൽ  (സ) നേരത്തെ പ്രവചിച്ചിട്ടുണ്ട്‌: "എനിക്കു ശേഷം ജീവിക്കുന്നവര്‍ക്ക്‌ ധാരാളം അഭിപ്രായ വ്യത്യാസം കാണാം. അപ്പോള്‍ നിങ്ങള്‍ എന്റെയും ഖുലഫാഉര്‍റാശിദിന്റെയും സുന്നത്ത്‌ സ്വീകരിക്കുക.'' 

ആദ്യമായി പ്രത്യക്ഷപ്പെട്ട ബിദ്‌അത്ത്‌ ഖദ്‌രിയ്യ, മുര്‍ജിഅ, ശീഅ, ഖവാരിജ്‌ എന്നീ വിഭാഗങ്ങളുടെ ബിദ്‌അത്താണ്‌. ഈ ബിദ്‌അത്തുകള്‍ രണ്ടാം നൂറ്റാണ്ടിലാണ്‌ രംഗത്തുവന്നത്‌, സ്വഹാബിമാര്‍ ജീവിച്ചിരിക്കുമ്പോള്‍. അവര്‍ അതിനെ എതിര്‍ക്കുകയും ചെയ്‌തു. പിന്നെയാണ്‌ മുഅ്‌തസിലുകളുടെ ബിദ്‌അത്ത്‌ പ്രത്യക്ഷപ്പെട്ടത്‌. മുസ്‌ലിംകള്‍ക്കിടയില്‍ ധാരാളം കുഴപ്പങ്ങള്‍ ഉണ്ടായി. അഭിപ്രായവ്യത്യാസങ്ങളും ബിദ്‌അത്തുകളും തന്നിഷ്‌ടങ്ങളോടുള്ള താല്‌പര്യങ്ങളും ഉടലെടുത്തു. സ്വൂഫിസവും ഖബ്‌റുകള്‍ കെട്ടിപൊക്കലും വിശിഷ്‌ട നൂറ്റാണ്ടുകള്‍ക്കു ശേഷം നിലവില്‍വന്നു.

പല മുസ്‌ലിംനാടുകളിലും ബിദ്‌അത്ത്‌ ഉണ്ടായിട്ടുണ്ട്‌. ശൈഖുൽ  ഇസ്‌ലാം ഇബ്‌നുതൈമിയ്യ പറയുന്നു: "നബി(സ)യുടെ സ്വഹാബിമാര്‍ താമസിച്ചിരുന്നതും ഇല്‍മും ഈമാനും പുറത്തേക്ക്‌ പ്രവഹിച്ചിരുന്നതുമായ പട്ടണങ്ങള്‍ അഞ്ചെണ്ണമായിരുന്നു. മക്ക, മദീന, ബസ്വറ, കൂഫ, ശാം. അവയില്‍ നിന്നാണ്‌ ഖുര്‍ആനും ഹദീസും ഫിഖ്‌ഹും ഇബാദത്തും അവയോടനുബന്ധിച്ച ഇസ്‌ലാമിന്റെ കാര്യങ്ങളും പുറത്തുവന്നത്‌. മദീന ഒഴികെയുള്ള ഈ പട്ടണങ്ങളില്‍ നിന്നാണ്‌ മൗലിക ബിദ്‌അത്തുകള്‍ പ്രവഹിച്ചത്‌. കൂഫയിലാണ്‌ ശീഅയും മുര്‍ജിഅയും ഉടലെടുത്ത്‌ മറ്റു നാടുകളില്‍ പ്രചരിച്ചത്‌. ഖദരിയ്യയും മുഅ്‌തസിലയും ദുഷിച്ച ആചാരസമ്പ്രദായങ്ങളും ബസ്വറയില്‍ മുളച്ച്‌ മറ്റു നാടുകളിലേക്ക്‌ പ്രചരിച്ചവയാണ്‌. ഖദരിയ്യയുടെ കേന്ദ്രം ശാം ആണ്‌. ഏറ്റവും ദുഷിച്ച ബിദ്‌അത്തായ ജഹ്‌മിയ്യ ഖുറാസാനിലാണ്‌ ജന്മമെടുത്തത്‌. ഉസ്‌മാന്‍(റ) വധിക്കപ്പെട്ടപ്പോള്‍ ഹറൂറിയ്യ ബിദ്‌അത്ത്‌ പ്രത്യക്ഷപ്പെട്ടു. എന്നാല്‍ മദീന ഇതില്‍ നിന്നെല്ലാം സുരക്ഷിതമായിരുന്നു- ബിദ്‌അത്ത്‌ ഉള്ളില്‍ ഒളിച്ചുവെക്കുന്ന ചിലര്‍ അവിടെ ഉണ്ടായിരുന്നുവെങ്കിലും. അതായത്‌ അവിടെ ഖദ്‌രിയ്യ വിഭാഗക്കാരായ ചിലര്‍ ഉണ്ടായിരുന്നുവെങ്കിലും അവരെ തലപൊക്കാന്‍ അനുവദിച്ചിരുന്നില്ല. എന്നാല്‍ കൂഫയിലെയും ബസ്വറയിലെയും ശാമിലെയും സ്ഥിതി അതായിരുന്നില്ല. "ദജ്ജാല്‍ മദീനയില്‍ പ്രവേശിക്കുകയില്ല" എന്ന്‌ നബി(സ) വ്യക്തമായി പറഞ്ഞിട്ടുണ്ട്‌. നാലാം നൂറ്റാണ്ടുകാരനായ മാലികിന്റെ അനുയായികളുടെ കാലം വരെയും അവിടെ ഇല്‍മും ഈമാനും രംഗത്തുണ്ടായിരുന്നു.

അല്ലാഹുവിന്റെ കിതാബും റസൂലിന്റെ സുന്നത്തും മുറുകെ പിടിക്കുകയാണ്‌ ബിദ്‌അത്തിലും പിഴവിലും അകപ്പെടുന്നതില്‍ നിന്ന്‌ രക്ഷപ്പെടാനുള്ള മാര്‍ഗം. അല്ലാഹു പറയുന്നു: "ഇതത്രെ എന്റെ നേരായ പാത. നിങ്ങള്‍ അത്‌ പിന്തുടരുക. മറ്റു മാര്‍ഗങ്ങള്‍ പിമ്പറ്റരുത്‌. അവയൊക്കെ അവന്റെ (അല്ലാഹുവിന്റെ) മാര്‍ഗത്തില്‍ നിന്ന്‌ നിങ്ങളെ ചിതറിച്ചുകളയും" [അദ്ധ്യായം 6 അൻആം 153]. നബി(സ) അത്‌ ഇങ്ങനെ വ്യക്തമാക്കി:- "ഇബ്‌നു മസ്‌ഊദ്‌(റ) പറയുന്നു: നബി ഞങ്ങള്‍ക്ക്‌ ഒരു വര വരച്ചുതന്നു. തുടര്‍ന്നു പറഞ്ഞു: "ഇതാണ്‌ അല്ലാഹുവിന്റെ മാര്‍ഗം." പിന്നെ അതിന്റെ ഇടത്തും വലത്തും കുറെ വരകള്‍ വരച്ചു. എന്നിട്ടു പറഞ്ഞു: "ഇവയെല്ലാം വ്യത്യസ്‌ത വഴികളാണ്‌. ഓരോ വഴിയിലും അതിലേക്ക്‌ ക്ഷണിക്കുന്ന ഓരോ പിശാച്‌ ഉണ്ട്‌." തുടര്‍ന്ന്‌ അദ്ദേഹം മുകളില്‍ കൊടുത്ത ഖുര്‍ആന്‍ വാക്യമോതി." അപ്പോള്‍ കിതാബില്‍ നിന്നും സുന്നത്തില്‍ നിന്നും ആരെങ്കിലും മുഖം തിരിച്ചാല്‍ പിഴപ്പിക്കുന്ന വഴികളും പുത്തന്‍ ബിദ്‌അത്തുകളും അവനോട്‌ പിടിവലി നടത്തും.

താഴെ പറയുന്ന കാര്യങ്ങളാലാണ്‌ ബിദ്‌അത്തുകള്‍ ജന്മമെടുക്കുക:-

 1. മതനിയമങ്ങളെപ്പറ്റിയുള്ള അജ്ഞത 

 കാലം മുന്നോട്ടുപോവുകയും റസൂലിന്റെ കാലടിപ്പാടുകളില്‍ നിന്ന്‌ ജനങ്ങള്‍ അകലുകയും ചെയ്‌ത ക്രമത്തില്‍ വിജ്ഞാനം കുറയുകയും അജ്ഞത വ്യാപിക്കുകയും ചെയ്‌തു. റസൂല്‍(സ) ഇത്‌ വ്യക്തമാക്കിക്കൊണ്ട്‌ ഇപ്രകാരം പറഞ്ഞു: "എനിക്കു ശേഷം നിങ്ങളിലാരെങ്കിലും ജീവിച്ചിരിക്കുകയാണെങ്കില്‍ ധാരാളം അഭിപ്രായവ്യത്യാസം അവന്‍ കാണും.'' റസൂല്‍ ഇപ്രകാരവും പറഞ്ഞു: "അല്ലാഹു ഇല്‍മിനെ പിടിച്ചുകൊണ്ടുപോവുക ജനങ്ങളില്‍ നിന്ന്‌ അതിനെ തട്ടിയെടുത്തല്ല. മറിച്ച്‌ പണ്ഡിതന്മാരെ പിടിച്ചുകൊണ്ടുപോവുക മുഖേനയാണ്‌. അങ്ങനെ അവന്‍ ഒരു പണ്ഡിതനെയും ബാക്കിവെക്കാതിരിക്കുമ്പോള്‍ ജനങ്ങള്‍ അജ്ഞരായ ആളുകളെ നേതാക്കളാക്കും. അവരോട്‌ ആളുകള്‍ ചോദിക്കും. അവര്‍ വിവരമില്ലാതെ ഫത്‌വാ നല്‌കും. അങ്ങനെ അവർ  പിഴക്കുകയും മറ്റുള്ളവരെ പിഴപ്പിക്കുകയും ചെയ്യും. അപ്പോൾ  ഇല്‍മും ഉലമാക്കളും ഇല്ലാതാകുമ്പോൾ  ബിദ്‌അത്തുകള്‍ക്ക്‌ രംഗത്തുവരാനും അതിന്റെ ആളുകള്‍ക്ക്‌ പ്രവര്‍ത്തിക്കാനും സൗകര്യമാകും.'' 

 2. തന്നിഷ്‌ടം പിമ്പറ്റുക 

 കിതാബില്‍ നിന്നും സുന്നത്തില്‍ നിന്നും മുഖം തിരിക്കുന്നവന്‍ പിന്നെ അവന്റെ തന്നിഷ്‌ടത്തെയാണ്‌ പിമ്പറ്റുക. അല്ലാഹു പറയുന്നു: ``എന്നാല്‍ തന്റെ ദൈവത്തെ തന്റെ തന്നിഷ്‌ടമാക്കിയവനെ നീ കണ്ടുവോ? അറിഞ്ഞുകൊണ്ട്‌ തന്നെ അല്ലാഹു അവനെ പിഴവിലാക്കുകയും അവന്റെ കാതിനും ഹൃദയത്തിനും മുദ്രവെക്കുകയും അവന്റെ കണ്ണിന്മേല്‍ ഒരു മൂടി ഇടുകയും ചെയ്‌തിരിക്കുന്നു. അല്ലാഹുവിന്‌ പുറമെ ആരാണ്‌ അവനെ നേര്‍വഴിയിലാക്കാനുള്ളത്‌?'' (വി.ഖു 45:23). ബിദ്‌അത്തുകള്‍ തന്നിഷ്‌ടത്തിന്റെ സൃഷ്‌ടിയാണ്‌.

 3. ചില അഭിപ്രായങ്ങളോടും ആളുകളോടുമുള്ള പക്ഷപാതിത്വം 

 ഇത്‌ തെളിവുകള്‍ പരിശോധിച്ചു സത്യം കണ്ടെത്തുന്നതിന്‌ തടസ്സം സൃഷ്‌ടിക്കുന്നു. അല്ലാഹു പറയുന്നു: "നിങ്ങള്‍ അല്ലാഹു അവതരിപ്പിച്ചതിനെ പിമ്പറ്റുക എന്ന്‌ അവരോട്‌ പറയപ്പെട്ടാല്‍ അവര്‍ പറയും: 'എന്നാല്‍ ഞങ്ങള്‍ ഞങ്ങളുടെ പൂര്‍വികരെ എന്തൊന്നിലാണോ കണ്ടിട്ടുള്ളതെങ്കില്‍ അതിനെയാണ്‌ പിമ്പറ്റുക'.'' (വി.ഖു 2:170). ചില മദ്‌ഹബുകളും സ്വൂഫിസവും പിമ്പറ്റുന്നവരും ഖബ്‌ര്‍ ആരാധകരുമായ പക്ഷപാത ചിന്താഗതിക്കാരുടെ നിലപാട്‌ ഇതാണ്‌. സുന്നത്ത്‌ പിമ്പറ്റേണമെന്നും ഇതിനു വിരുദ്ധമായി ഇവര്‍ സ്വീകരിച്ചുവരുന്ന കാര്യങ്ങള്‍ ഉപേക്ഷിക്കണമെന്നും ഇവരോട്‌ പറഞ്ഞാല്‍ മദ്‌ഹബിന്റെയും മശാഇഖിന്റെയും പൂര്‍വികരുടെയും പേര്‌ പറഞ്ഞ്‌ വാദിക്കുകയാണ്‌ അവര്‍ ചെയ്യുക.

 4. അവിശ്വാസികളെ അനുകരിക്കൽ 

 ഇതാണ്‌ മനുഷ്യരെ ബിദ്‌അത്തുകളില്‍ വീഴ്‌ത്തുന്ന ഏറ്റവും ചീത്തയായ കാര്യം. ഇതിനുദാഹരണം അബൂവാഖിദില്ലൈസി റിപ്പോര്‍ട്ടു ചെയ്യുന്ന ഒരു ഹദീസില്‍ വിവരിച്ച സംഭവം. അദ്ദേഹം പറയുന്നു: ഞങ്ങള്‍ റസൂലിന്റെ(സ) കൂടെ ഹുനൈനിലേക്ക്‌ പുറപ്പെട്ടു. ഞങ്ങള്‍ അടുത്തകാലം വരെയും കുഫ്‌റിലായിരുന്നു. മുശ്‌രിക്കുകള്‍ക്ക്‌ ഒരു നബ്‌ഖ്‌ മരമുണ്ട്‌. അവര്‍ അതിനടുത്ത്‌ ഭജനമിരിക്കുകയും അവരുടെ ആയുധങ്ങള്‍ അതില്‍ കെട്ടിത്തൂക്കുകയും ചെയ്‌തു. 'ദാത്തുഅന്‍വാത്ത്‌' എന്നാണ്‌ ഈ മരത്തെ വിളിക്കുക. അങ്ങനെ ഒരു നബ്‌ഖ്‌ മരത്തിനരികിലൂടെ നടന്നുപോകുമ്പോള്‍ ഞങ്ങള്‍ പറഞ്ഞു: 'അവര്‍ക്ക്‌ ദാത്തുഅന്‍വാത്ത്‌ ഉള്ളതുപോലെ ഞങ്ങള്‍ക്കും ഒരു ദാത്തുഅന്‍വാത്ത്‌ ഏര്‍പ്പെടുത്തണം തിരുമേനീ'. അപ്പോള്‍ റസൂല്‍(സ) പറഞ്ഞു: "ഇത്‌ പൂര്‍വികരുടെ സമ്പ്രദായമാണ്‌. എന്റെ ജീവന്‍ ആരുടെ കൈയിലാണോ അവന്‍ തന്നെ സത്യം, നിങ്ങള്‍ ബനൂഇസ്‌റാഈല്‍ മൂസായോട്‌ പറഞ്ഞതുപോലെ പറയുകയാണ്‌: 'അവര്‍ക്ക്‌ ദൈവങ്ങള്‍ ഉള്ളതുപോലെ ഞങ്ങള്‍ക്കും ഒരു ദൈവത്തെ വെച്ചുതരൂ!' അദ്ദേഹം പറഞ്ഞു: 'നിങ്ങള്‍ വിവരമില്ലാത്ത ജനതയാണ്‌. നിങ്ങളുടെ മുമ്പുള്ളവരുടെ നടപടിക്രമങ്ങള്‍ നിങ്ങള്‍ പിമ്പറ്റുകതന്നെ ചെയ്യും'. (തിര്‍മിദി).

 കാഫിറുകളെ അനുകരിച്ചതുകൊണ്ടാണ്‌ ബനൂഇസ്‌റാഈലും നബിയുടെ അനുയായികളില്‍ ചിലരും അവരുടെ നബിയോട്‌ ഈ ചീത്ത ആവശ്യം- അല്ലാഹുവിനെ കൂടാതെ അവര്‍ക്ക്‌ ആരാധിക്കാനും ബര്‍കത്ത്‌ തേടാനും ഇലാഹുകളെ വെച്ചുതരിക- ഉന്നയിച്ചത്‌. ഇത്‌ തന്നെയാണ്‌ ഇന്നും സംഭവിച്ചുകൊണ്ടിരിക്കുന്നത്‌. മുസ്‌ലിംകളില്‍ അധികപേരും ശിര്‍ക്കും ബിദ്‌അത്തും പ്രവര്‍ത്തിക്കുന്നതില്‍ കാഫിറുകളെ അനുകരിക്കുകയാണ്‌. ജന്മദിനാഘോഷം, ചില പ്രത്യേക കര്‍മങ്ങള്‍ക്ക്‌ ദിവസങ്ങളും ആഴ്‌ചകളും നിശ്ചയിക്കുക, മതചടങ്ങുകളും അനുസ്‌മരണങ്ങളും ആഘോഷിക്കുക, പ്രതിമകളും സ്‌മാരകങ്ങളും സ്ഥാപിക്കുക, ചരമദിനങ്ങള്‍ ആഘോഷിക്കുക, മൃതദേഹങ്ങളുമായി ബന്ധപ്പെട്ട ബിദ്‌അത്തുകള്‍, ഖബ്‌റുകള്‍ക്കു മുകളിലെ കെട്ടിടനിര്‍മാണം തുടങ്ങിയവയെല്ലാം ഇതില്‍ പെട്ടതാണ്‌.

 By ശൈഖ്‌ സ്വാലിഹ്‌ ഫൗസാൻ 

ഖുര്‍ആനിന്റെ വിശേഷണങ്ങള്‍

വിശുദ്ധ ഖുര്‍ആനിന്‌ ഇരുപതിലധികം വിശേഷണങ്ങള്‍ അല്ലാഹു ഖുര്‍ആനില്‍ പരിചയപ്പെടുത്തിയിട്ടുണ്ട്‌. അന്തിമ വേദഗ്രന്ഥത്തെപ്പറ്റി വ്യാപകമായി ഉപയോഗിക്കപ്പെടുന്ന പദം ഖുര്‍ആന്‍ എന്നാണ്‌. വായന, വായിക്കപ്പെടുന്നത്‌, വായിക്കപ്പെടേണ്ടത്‌ എന്നെല്ലാമാണ്‌ ഇതിന്നര്‍ഥം. മുസ്‌ലിംകള്‍ സാധാരണ ഉപയോഗിക്കുന്ന `മുസ്‌ഹഫ്‌' എന്ന പദം `ഖുര്‍ആന്‍ ഉള്‍ക്കൊള്ളുന്ന ഗ്രന്ഥം' എന്ന അര്‍ഥത്തിലാണ്‌ ഉപയോഗിക്കുന്നത്‌. രണ്ടു ചട്ടക്കുള്ളില്‍ സൂക്ഷിക്കപ്പെട്ട പുസ്‌തകം അഥവാ വിജ്ഞാനം എന്ന അര്‍ഥമാണ്‌ മുസ്‌ഹഫിനുള്ളത്‌. `ഖുര്‍ആന്‍' ദൈവികവചനങ്ങളും `മുസ്‌ഹഫ്‌' ഖുര്‍ആന്‍ അക്ഷരങ്ങളില്‍ വായിക്കാവുന്ന വിധം സൂക്ഷിച്ചുവെക്കാന്‍ വേണ്ടി മനുഷ്യരുണ്ടാക്കിയ ഒരു ഭൗതിക ക്രമീകരണവുമാണ്‌. അതിനാല്‍ മുസ്‌ഹഫ്‌ എന്നത്‌ ഖുര്‍ആനിന്റെ വിശേഷണമോ അതിന്റെ പര്യായപദമോ അല്ല, ഖുര്‍ആനിന്‌ ഖുര്‍ആനില്‍ തന്നെ സൂചിക്കപ്പെട്ട ചില സുപ്രധാന വിശേഷണങ്ങളാണ്‌ ചുവടെ:

 കിതാബുന്‍ മുബീന്‍ (സുവ്യക്ത ഗ്രന്ഥം) 

 "അലിഫ്‌ ലാം റാ... സുവ്യക്തമായ വേദഗ്രന്ഥത്തിലെ വചനങ്ങളാകുന്നു അവ. നിങ്ങള്‍ ഗ്രഹിക്കുന്നതിനു വേണ്ടി അത്‌ അറബിഭാഷയില്‍ വായിക്കപ്പെടുന്ന ഒരു ഗ്രന്ഥമായി നാം അവതരിപ്പിച്ചിരിക്കുന്നു.'' (യൂസുഫ്‌ 1,2)

ബലാഗുന്‍ (വ്യക്തമായ ഉദ്‌ബോധനം) 

"ഇത്‌ മനുഷ്യര്‍ക്കുവേണ്ടിയുള്ള വ്യക്തമായ ഒരു ഉദ്‌ബോധനമാകുന്നു. ഇത്‌ മുഖേന അവര്‍ക്ക്‌ മുന്നറിയിപ്പ്‌ നല്‌കപ്പെടേണ്ടതിനും അവന്‍ ഒരാരാധ്യന്‍ മാത്രമാണെന്ന്‌ അവര്‍ മനസ്സിലാക്കുന്നതിനും ബുദ്ധിമാന്മാര്‍ ആലോചിച്ചു മനസ്സിലാക്കുന്നതിനും വേണ്ടിയുള്ള ഉത്‌ബോധനം.'' (ഇബ്‌റാഹീം 52) 

മുഹൈമിന്‍ (കാത്തുരക്ഷിക്കുന്നത്‌) 

"(നബിയേ) താങ്കള്‍ക്കിതാ സത്യപ്രകാരം വേദഗ്രന്ഥം അവതരിപ്പിച്ചുതന്നിരിക്കുന്നു. അതിന്റെ മുമ്പിലുള്ള വേദഗ്രന്ഥങ്ങളെ ശരിവെക്കുന്നതും അവയെ കാത്തുരക്ഷിക്കുന്നതുമത്രെ അത്‌. അതിനാല്‍ നീ അവര്‍ക്കിടയില്‍ നാം അവതരിപ്പിച്ചതനുസരിച്ച്‌ വിധി കല്‌പിക്കുക. നിനക്ക്‌ വന്നുകിട്ടിയ സത്യത്തെ വിട്ട്‌ നീ അവരുടെ തന്നിഷ്‌ടങ്ങളെ പിന്‍പറ്റിപ്പോകരുത്‌.'' (മാഇദ 48)

അഹ്‌സനുല്‍ ഹദീസ്‌ (ഉത്തമമായ വര്‍ത്തമാനം) 

"അല്ലാഹുവാണ്‌ ഏറ്റവും ഉത്തമമായ വര്‍ത്തമാനം അവതരിപ്പിക്കുന്നത്‌. അഥവാ വചനങ്ങള്‍ക്ക്‌ പരസ്‌പരം സാമ്യമുള്ളതും ആവര്‍ത്തിക്കപ്പെടുന്ന വചനങ്ങളുള്ളതുമായ ഒരു ഗ്രന്ഥം. തങ്ങളുടെ രക്ഷിതാവിനെ ഭയപ്പെടുന്നവരുടെ ചര്‍മങ്ങള്‍ അതു നിമിത്തം രോമാഞ്ചമണിയുന്നു. പിന്നീട്‌ അവരുടെ ചര്‍മങ്ങളും ഹൃദയങ്ങളും അല്ലാഹുവെ അനുസ്‌മരിക്കുന്നതിനായി വിനീതമാവുകയും ചെയ്യുന്നു. അതത്രെ അല്ലാഹുവിന്റെ മാര്‍ഗദര്‍ശനം. അതുമുഖേന താന്‍ ഉദ്ദേശിക്കുന്നവരെ അവന്‍ നേര്‍വഴിയിലാക്കുന്നു.'' (സുമര്‍ 23)

മൗഇദ്വത്തുന്‍ (സദുപദേശം)

"മനുഷ്യരേ, നിങ്ങളുടെ രക്ഷിതാവില്‍ നിന്നുള്ള സദുപദേശവും മനസ്സുകളിലുള്ള രോഗത്തിന്‌ ശമനവും നിങ്ങള്‍ക്ക്‌ വന്നു കിട്ടിയിരിക്കുന്നു. സത്യവിശ്വാസികള്‍ക്ക്‌ മാര്‍ഗദര്‍ശനവും കാരുണ്യവുമാണത്‌.'' (യൂനുസ്‌ 57)

ശിഫാഉന്‍ (ശമനം)

"സത്യവിശ്വാസികള്‍ക്ക്‌ ശമനവും കാരുണ്യവുമായിട്ടുള്ളത്‌ ഖുര്‍ആനിലൂടെ നാം അവതരിപ്പിച്ചുകൊണ്ടിരിക്കുന്നു. അക്രമികള്‍ക്ക്‌ അത്‌ നഷ്‌ടമല്ലാതെ മറ്റൊന്നും വര്‍ധിപ്പിക്കുന്നില്ല.'' (ഇസ്‌റാഅ്‌ 82)

ഹുദന്‍ (സന്മാര്‍ഗം) 

"ജനങ്ങള്‍ക്ക്‌ സന്മാര്‍ഗമായിക്കൊണ്ടും നേര്‍വഴി കാട്ടുന്നതും സത്യവും അസത്യവും വേര്‍തിരിച്ചു കാണിക്കുന്നതുമായ സുവ്യക്ത തെളിവുകളുമായി വിശുദ്ധ ഖുര്‍ആന്‍ അവതരിപ്പിക്കപ്പെട്ട മാസമാകുന്നു റമദാന്‍'' (അല്‍ബഖറ:185). ഇതിനു പുറമെ ഖുര്‍ആന്‍ സൂക്ഷ്‌മത പാലിക്കുന്നവര്‍ക്ക്‌ സന്മാര്‍ഗമാണെന്ന്‌ 2:2ലും സത്യവിശ്വാസികള്‍ക്ക്‌ സന്മാര്‍ഗമാണെന്ന്‌ 10:57 ലും സദ്‌വൃത്തര്‍ക്ക്‌ സന്മാര്‍ഗമാണെന്ന്‌ 31:3ലും അല്ലാഹു വിശേഷിപ്പിച്ചിട്ടുണ്ട്‌. "നിങ്ങള്‍ക്കിതാ നിങ്ങളുടെ രക്ഷിതാവില്‍ നിന്നുള്ള വ്യക്തമായ പ്രമാണവും മാര്‍ഗദര്‍ശനവും കാരുണ്യവും വന്നുകിട്ടിയിരിക്കുന്നു. എന്നിട്ടും അല്ലാഹുവിന്റെ തെളിവുകളെ നിഷേധിച്ചു തള്ളുകയും അവയില്‍ നിന്ന്‌ തിരിഞ്ഞുകളയുകയും ചെയ്‌തവനേക്കാള്‍ കടുത്ത അതിക്രമി ആരുണ്ട്‌?'' (അന്‍ആം 157)

 ബുര്‍ഹാന്‍ (ന്യായപ്രമാണം) 

"മനുഷ്യരേ, നിങ്ങള്‍ക്കിതാ നിങ്ങളുടെ രക്ഷിതാവിങ്കല്‍ നിന്നുള്ള ന്യായപ്രമാണം വന്നുകിട്ടിയിരിക്കുന്നു. വ്യക്തമായ ഒരു പ്രകാശം നാമിതാ നിങ്ങള്‍ക്ക്‌ ഇറക്കിത്തന്നിരിക്കുന്നു.'' (നിസാഅ്‌ 174). `ന്യായപ്രമാണം' എന്ന്‌ ഇവിടെയും വ്യക്തമായ പ്രമാണം (ബയ്യിനത്തുന്‍) എന്ന്‌ 7:157 ലും അല്ലാഹു ഖുര്‍ആനിനെ വിശേഷിപ്പിച്ചിട്ടുണ്ട്‌.

റൂഹുന്‍ (ചൈതന്യവത്തായ സന്ദേശം) 

"അപ്രകാരം നാം നിനക്ക്‌ നമ്മുടെ കല്‌പനയാല്‍ ഒരു ചൈതന്യവത്തായ സന്ദേശം ബോധനംചെയ്‌തിരിക്കുന്നു. വേദഗ്രന്ഥമോ സത്യവിശ്വാസമോ എന്തെന്ന്‌ നിനക്കറിയുമായിരുന്നില്ല. പക്ഷെ, അതിനെ നാം ഒരു പ്രകാശമാക്കിയിരിക്കുന്നു. അതുമുഖേന നമ്മുടെ ദാസന്മാരില്‍ നിന്ന്‌ നാം ഉദ്ദേശിക്കുന്നവര്‍ക്ക്‌ നാം വഴികാണിക്കുന്നു. തീര്‍ച്ചയായും നീ നേരായ പാതയിലേക്കാകുന്നു മാര്‍ഗദര്‍ശനം നല്‌കുന്നത്‌.'' (ശൂറാ 52)

തന്‍സീലുന്‍ (അവതരിപ്പിക്കപ്പെട്ടത്‌) 

"തീര്‍ച്ചയായും ഇത്‌ (ഖുര്‍ആന്‍) ലോകരക്ഷിതാവിനാല്‍ അവതരിപ്പിക്കപ്പെട്ടത്‌ തന്നെയാകുന്നു. വിശ്വസ്‌താത്മാവ്‌ (ജിബ്‌രീല്‍) നിന്റെ ഹൃദയത്തില്‍ അതും കൊണ്ടവതരിച്ചിരിക്കുന്നു. നീ താക്കീതു നല്‌കുന്നവരുടെ കൂട്ടത്തിലായിരിക്കാന്‍ വേണ്ടിയത്രെ അത്‌. സ്‌പഷ്‌ടമായ അറബിഭാഷയിലാണ്‌ അത്‌ അവതരിപ്പിച്ചത്‌.'' (ശുഅറാ 192-195)

അലിയ്യുന്‍ ഹകീം (വിജ്ഞാനസമ്പന്നവും ഉന്നതവുമായത്‌ ) 

"തീര്‍ച്ചയായും ഇത്‌ (ഖുര്‍ആന്‍) മൂലഗ്രന്ഥത്തില്‍ നമ്മുടെ അടുക്കല്‍ (സൂക്ഷിക്കപ്പെട്ടതത്രെ). അത്‌ ഉന്നതവും വിജ്ഞാനസമ്പന്നവും തന്നെയാണ്‌.'' (സുഖ്‌റുഫ്‌ 4)

ഹിക്‌മത്തുന്‍ ബാലിഗത്തുന്‍ (പരിപൂര്‍ണമായ വിജ്ഞാനം) 

"നിഷേധത്തില്‍ നിന്ന്‌ ഒഴിഞ്ഞുനില്‌ക്കാന്‍ പര്യാപ്‌തമായ കാര്യങ്ങളടങ്ങിയ ചില വൃത്താന്തങ്ങള്‍ തീര്‍ച്ചയായും അവര്‍ക്ക്‌ വന്നുകിട്ടിയിട്ടുണ്ട്‌. അതെ, പരിപൂര്‍ണമായ വിജ്ഞാനം. എന്നിട്ടും താക്കീതുകള്‍ പര്യാപ്‌തമാകുന്നില്ല.'' (ഖമര്‍ 45)

ലാറയ്‌ബഫീഹി (സംശയരഹിതമായത്‌) 

"അലിഫ്‌, ലാം, മീം. ഇതാകുന്നു ഗ്രന്ഥം. അതില്‍ സംശയമേയില്ല. സൂക്ഷ്‌മത പാലിക്കുന്നവര്‍ക്ക്‌ മാര്‍ഗദര്‍ശകമത്രെ അത്‌.'' (അല്‍ബഖറ 1,2). ഖുര്‍ആന്‍ ദൈവികഗ്രന്ഥമാണെന്ന കാര്യത്തില്‍ സംശയമില്ല. ഖുര്‍ആനു തുല്യം ഖുര്‍ആന്‍ മാത്രം എന്ന കാര്യത്തിലും സംശയമില്ല. ഖുര്‍ആന്‍ പോലൊന്ന്‌ കൊണ്ടുവരാനോ നിര്‍മിച്ചുണ്ടാക്കാനോ ലോകാവസാനം വരെ ലോകത്താര്‍ക്കും സാധ്യമല്ല എന്ന കാര്യത്തിലും സംശയമില്ല. ഖുര്‍ആനില്‍ പറഞ്ഞിട്ടുള്ള കാര്യങ്ങളെല്ലാം മനുഷ്യരെ സംബന്ധിച്ചും മനുഷ്യരുള്‍ക്കൊള്ളുന്ന പ്രപഞ്ചത്തെക്കുറിച്ചും സത്യമാണെന്ന കാര്യത്തിലും സംശയമില്ല. ഖുര്‍ആനിന്റെ മാര്‍ഗദര്‍ശനം സ്വീകരിച്ചുകൊണ്ട്‌ ഒരാള്‍ ജീവിച്ചാല്‍ അയാള്‍ വിജയിക്കും എന്ന കാര്യത്തില്‍ സംശയമില്ല. ഈ ദിവ്യഗ്രന്ഥം ലോകാവസാനം വരെ നിലനില്‍ക്കുമെന്ന കാര്യത്തിലും വായിക്കപ്പെട്ടുകൊണ്ടേയിരിക്കുമെന്ന കാര്യത്തിലും സംശയമില്ല. ഇങ്ങനെ ഒട്ടനവധി അര്‍ഥതലങ്ങള്‍ ഉള്‍ക്കൊള്ളുന്നതാണ്‌ `സംശയരഹിതമായ ഗ്രന്ഥം' എന്ന വിശേഷണം.

ഇനിയുമുണ്ട്‌ ഖുര്‍ആനിന്‌ വിശേഷണങ്ങള്‍ ധാരാളം. പരസ്‌പരം സാദൃശ്യമുള്ള വചനങ്ങള്‍ ഉള്‍ക്കൊള്ളുന്നത്‌ എന്ന അര്‍ഥത്തിലുള്ള മുതശാബിഹ്‌ എന്നും (39:23) ആവര്‍ത്തിച്ചുവരുന്ന വചനങ്ങള്‍ എന്ന അര്‍ഥത്തിലുള്ള മസാനിയ എന്നും (39:23) ഖുര്‍ആനില്‍ പരാമര്‍ശം കാണാം.പ്രതാപമുള്ള ഖുര്‍ആന്‍ അഥവാ ഖുര്‍ആനുന്‍ മജീദ്‌ (ബുറൂജ്‌ 21), ആദരണീയമായ ഖുര്‍ആന്‍ അഥവാ അല്‍ഖുര്‍ആനുല്‍ കരീം (വാഖിഅ 77), യുക്തിഭദ്രമയ ഖുര്‍ആന്‍ അഥവാ അല്‍ഖുര്‍ആനുല്‍ ഹകീം (യാസീന്‍ 2), അറബിഭാഷയിലുള്ള ഖുര്‍ആന്‍ അഥവാ ഖുര്‍ആനന്‍ അറബിയ്യല്‍ (യൂസുഫ്‌ 2) എന്നിങ്ങനെ ഖുര്‍ആനിനെ വിശേഷിപ്പിച്ച പ്രയോഗങ്ങളും ഖുര്‍ആനില്‍ കാണാം.

By ശംസുദ്ദീൻ പാലക്കോട് @ ശബാബ് വാരിക 

Popular ISLAHI Topics

ISLAHI visitors